1Labi Yesusat dam dua bak labe Aba valadam bak aahemu Aho bak buzoho laba laisi dam bake vahokedam bak ozome ab nusuham. Labi nusuha Aba Aho vahokedam im ozobohudelo vi tau meedam dam zi neo Aba lehemu Aho ame dam laba gagodume ab nusualadaham.
2Labi nusualadume neàdi ab faasi vahokedamam.
3“Uho neha, ‘Iho gi nehasu aidameam im ba Alam damalem vabiem bak. Alat fà iba vou aasu vabiedase,’ lahame uho Ala vàmtea lamota tu ahumdi vou faodam dam oa, Alat uba deeli vame Am damali Aho uba ab vuusu im vahokedamam bak. Labihadamdaleàmu um etei bisi deelehe bohu vuusdam dam um am bak.
4Labi um etei na im uba ahu faidemna modem di mebe izidam dam oa, Alat fa uba ba diamut vabededume um fa neàdeda tame. Labihadamdaleàmu um etei bisi deelehe bohu vuusdam dam um am bak.
5Labi um etei ahu ladehebeat esdam dam oa, bak nim Alat ba diamut modi fa gàhàdi Aba Aho amu di iube fet vameadume vàmadi esuhuna ahebu uba lu uho gi neà bak azi tame. Labihadamdaleàmu um etei bisi deelehe bohu vuusdam dam um am bak.
6Labi um etei na vabali idoali meedam bakti valo àhàkedam bakti ulohona uho neha, ‘Alat Aba Aho ozome esuhu bak lam im ahu vàmadi ame baket ulohodesu meedase,’ lahame uho modelo àhàki meedam dam oa, uho lab modelo àhàki meedam bak lam Alat fa uba ba diamut modi vizi imbodi um fa asimdi neàdeda tame. Labihadamdaleàmu um etei bisi deelehe bohu vuusdam dam um am bak.
7Labi um etei meia aame faobekesi im neà bak tau meedam dam oa, Alat ba diamut uba laha aame faobekesi im neà bak tau meeda tame. Labihadamdaleàmu um etei bisi deelehe bohu vuusdam dam um am bak.
8Labi um etei Alat vameadaha im aime ahu vàmadi meedam dam oa, um ba diamut Alati ot aaiame vahi azi tame. Labihadamdaleàmu um etei bisi deelehe bohu vuusdam dam um am bak.
9Labi um etei dam fi baeme neàdelo meedam dam oa, Alat ba diamut uba neha, ‘Um Em adam imboda am tame,’ lahame uba ba labi gagodam bak. Labihadamdaleàmu um etei bisi deelehe bohu vuusdam dam um am bak.
10Labi uho Alat Aba Aho ozome esuhu bak laba ozome im vamdesu meedàmu meit uba vabidume modi geàdam di um gi ozahigeàmu keàtet lahasu meedam dam oa, Alat uba deeli vame Am damali Aho uba ab vuusu im vahokedamam bak. Labihadamdaleàmu um etei bisi deelehe bohu vuusdam dam um am bak.
11Labi etei nim uho Eba tu vi tau meedàmu damat uba faki tozome feàtàdam bak modeo, uba neha, ‘Um gi faina meedam damat modem bak,’ lahame giomim uba vàlu meedam bak modeo, uba labihasu vabidamnàme um gi ozahigeàmu keàtet lahasu meedam dam oa, uho bak niba meedaha bake gohali lodamna Alat asum ahoba iuba esu ahumdehena abo feàte. Labihadamdaleàmu um etei bisi deelehe bohu vuusdam dam um am bak. Nehaha bak. Aham di iube Alat vameadaha im aime fa dam bake ahate vameaidaha dam lam laha dam Ala bake fakemoholehe damat fa iba vabidam meot. Labihàmu etei nim dam giida labe ba uba ame baket meedameam làhà um a àvodemule. Gi ozahigeàmu mahate deelehe bohu vuusu meedale,” lahame Yesusat ab vahokedaham.
12(5:11)
13Labi im lada lam vahokedume neàdi Yesusat im meida nehame neo vi vahokeda. “Uho Ebe Eho vahokedam im ozobohudelo meedam dam nibe uho bak niba esdam di uho lab neà bak meedam bak lam uho fa meia vizem labe um gi garam na voou àm neà bak lamti ulohona ozomom damat modem bak. Garam abo na àmna nu laba voou vizehe labe ame na nu lam àm di abo àm neàt. Labiha labe garam lam abo neàt. Um laha gi ame bak lamti ulohona meedale. Lahana ame garam labe ahamo na nua vizemna lam fa vei seti faidemeam làhà ame na fauha keobe lam ba akati modi garamli na nu laba vizemnalela? Labiham biem bak. Ame na lam faidehemu gi damat lailaiam tomba laba voom bak. Labihàmu uho meia modi vizem bak lam mahate bohulali meedale.
14Labi laha uho Ebe Eho vahokedam im ozobohudelo meedam dam nibe uho bak niba esdam di um gi vuagat fauhaedam bak lamti ulohona ozomom damat modem bak. Uho lab neàna meedam bak lam dam giida labe vi aame ozo, ‘Yesus bake tu vuzehem bak ame?’ làhàmu fa neo ame bak laba ab vi tau meedamam bak. Neham bak. Bak buzoho ahoba iuba num debu bak moadume dozeadameam làhà ba ame num debu bak ba vasti fi olem vabiem bak. Tom aam neà labe labiham bak.
15Labi laha meit vuagat usim di ba boloseh visoi ahoba nom suusum vabak. Gi damat oli aam neà laham bak ozome tom fi haba laba esu fauhaedam bak. Labiham labe damat ame numa oli aidam di gi fauha neàdi modesdamna damat aam bak.
16Labihàmu ubu uho Eba lab tu vuzehi neà bak bohu meedam bak lam a vastemule. Gi ahate meedale. Uho labihasu ahate meedam labe dam giida labe vi aame um Ai Ala asum ahoba iuba, ‘Am abo feàte,’ lahame labi tom vou baedam bak am tame,” lahame Yesusat ab vahokedaham.
17Labi im lada lam vahokedume neàdi Yesusat Aho neo ame dam zi laba neo vi vahokeda. “Uho ozom, Eho bak niba lehe bak nim gi dat ahamda Musat toedume fi hasi esuhu Im Feàna zi lam Eho fa faamome voedalo lehe? Laham vabameam dam ahamda Alat vameadaha im aime fa dam bake ahate vameaidaha dam labe ibi iho toedume esuhu im zi lam Eho fa faamome voedalo lehe? Vabà! Em ba labihalo lehe vabak. Eho gi ame im zi lam modi fa imbodelo lehe bak.
18Lo, lamota imbot. Lahana Eho etei uba neo gagolo modem im imboda nidi nim laha nasi aima. Asum ahoba iuba modealahana zi lamti bak niba modealahana zi nimti ehe lahasuhu di nim Alat Vameadaha Im Toedahana zi lam ba ame na toehena keobe beà vàmtea setem vabak. Abo ame im zi lam ahebu imbodi vou mode ledume ba novam digat fuhuzobe vaitom di am bak.
19Labihàmu uho meit neha, ‘Ame im nidi nim feà vab imot modem bak,’ lahame ame Alat fi hasi esuhu im meida buà modehe vaba zidazi meeda. Labi ame da labe laha vedi fa neo meia nehi vahokeda. ‘Alat fi hasi esuhu im lam feà vab imot modem bak. Um laha voom neàte,’ lahame meia labihasu vahokeda. Alam damaleheda labihasu meedamda labe am ee ba vousai ee feàda talum vabak. Lahana uho meit ame Alat fi hasi esuhu im meida buà vekehe vaba ahebu ulohodesu vouhodume meeda. Labi laha meia neha, ‘Ame im lam meida a voomule. Ahebu meedam tadele,’ lahame meia labihasu vahokeda. Alam damaleheda labihasu meedamda labe am ee ba vousai ee feàda talumda am bak.
20Neham bak. Ame Farisi dam lamti labi dat ahamda Musat toedume fi hasi esuhu Im Feàna zi ozobohudi fa dam bake vahokedam guru zi lamti labihasu ibi iho ame Fihasi Esuhu Im Feàna zi lam ulohodesu meedam di meedamta meeda. Lahana, ‘Damat iba fà aame deelese,’ lahame gi ahobat neàdi meeda. Ame dam labe ibi iho meedaha bak lam um a vi tau meedamule. Uho nehi ozohe? Uho ame dam zi labe ibi iho lab meedaha bak lam uho ulohodesu meedam bak labet modi Alat um vame Am damale? Vabà! Um git ozoho bak. Ba labiham vabak. Neham bak. Uho gi, ‘Alat fà iba deelese,’ lahame ahu adat iedi im Aba Aho ozohoda lam iademe vamdesu meedam bak labet modi Alat uba deeli vame Am damali vuusu im vahokedam bak am bak. Laham bak ozodale,” lahame Yesusat ab vahokedaham.
21Labi im lada lam vahokedume neàdi Yesusat neo ame dam zi laba nehame vi vahokeda. “Um amu Musat aho gagu fi hasi esuhu im nidi nim damat aham di iube faasi nehame vou vamea usehena uba vi fusi um aihina taia? ‘Mei a otemule. Uho labihameam meit um si vou le dat boehàda labet aba aho modem bak laba vou duzu ame da labe fa uba uloome vi aime neàdi gagu beom bak ehete.’ Lahame fi hasi esuhu im lam damat uba vou vamea usehe labe um aime ozobohudehena taia?
22Lahana Em etei im gàhàna nehasu uba fa vi vahokedalo modem bak. Uho meit dat meidate ahu adat fakemeam làhà Alat uba uloome aim bak ehete. Labi laha uho meit dat meidate gameam làhà ame da lam si Yahudit Ibi Iho Modem Im Gagu Vàmadi Esum Dam Debu labe avaesdam laba vou le duzu uloome vi gagu aime neàdi modem bak ehete. Labi laha uho meit dat meidate neha, ‘Ahusobut,’ lahame meia labi vàlu feàtàmeam làhà Alat ba diamut uba vi gagu aime modi vua eludamna sutem gikina bohu laba voou vi vataum bak ehete.
23Labihàmu uho meit neha, ‘Em na nim Ala bake lolo mozo,’ lahame Fihasi Ala Bake Vou Baedam Num Vàmteabu labe am ad oli aam bak tomba laba modesuhu vua vahudamnabu laba vou le it ozo, ‘Oo làhà! Eho meia faina modi ame da labe eba fakemda ehe?’ lahame it ozobohudemeam làhà ame na lam nasi Ala bake a lomule. Gi ame nabu modesdam obe laba vou esmozi nasi dat oba faki aidamda laba fa le im vameadume vei neàdi fa li ame na Ala bake lole.
24(5:23)
25Labi umti vahi esumda meida labe fa oba faki neha, ‘Om eba git modehemu om si meia uloome vi aime neàdi gagu modidam dat boehàda labe aho meia uloome vi aim num laba vou lalo modem bak,’ lahame uba vàlu gagomeam làhà uho gi ozahigeàmu etei vou ladam di labe gi zie doni laba taho fa nasi im ot vameaidume fa neàdele. Oho labiham vabameam oba faki vàlu gagomda labe om vou le dat boehàda laba ub lom bak. Labi ame boehàda labet fa neo am meo dam gagome om neo si mei si ousu teudi simtedem num abo sel laba voom bak.
26Lo, lamota imbot. Lahana Eho etei uba neo gagolo modem im imboda nidi nim laha nasi aima. Om sel laba voomeam làhà ba taho futom vabak. Abo ousdamehamdi boehàdat aba aho gagu esuhu doi oho gohali lodume uloholehezobe ba futom bak. Labiham bake gi zie doni laba nasi ot vameaidume neàdele. Lam bisi fa ot vahiam bak am bak,” lahame Yesusat ab vahokedaham.
27Labi im lada lam vahokedume neàdi Yesusat neo nehame vi vahokeda. “Um amu Musat aho gagu fi hasi esuhu im nidi nim damat aham di iube faasi nehame vou vamea usehena uba vou fusi um laha aihina taia? ‘Nam dat eheda modeo, dat nam eheda modeo, a modemule.’ Lahame amu mali fi hasi esuhu im lam damat uba vou vamea usehe labe um aime ozobohudehena taia?
28Lahana Em etei im gàhàna nehasu uba fa vi vahokedalo modem bak. Uho meit nam amomoi laba gi fakot aame ahulat vi ozo, ‘Nam lam eho vase,’ lahame gi ahulat vi ozome àhàkedameam làhà Alat ozomta uho gi ame nam lam ab ve faina modeham bak.
29Labihàmu om ahu labe oba modi om fako om vou fohome faina modi ubahi ubahidume Em mu voolo modemeam làhà om fako nasi valoi voole. Bak lam bisi neà bak am taia? Omti Alati vahi vou ali ahu vàmadi amedamalem bake etei bak niba godam di gi fako vàmtea vou godam bak lam bisi neà bak am taia? Ba akati modi fako ahimit faina meedam bohu vuusu vou mode ladume ba diamut om so ahebu vua elum sutem gikina bohu laba voela?
30Labi laha om ahu labe oba modi om anekehàt om vou fohome faina modi ubahi ubahidume Em mu voolo modemeam làhà om anekehà nasi vaitoi voole. Omti Alati vahi vou ali ahu vàmadi amedamalem bake etei bak niba godam di gi anekehà vàmtea vou godam bak lam bisi neà bak am taia? Ba akati modi anekehà ahimit faina meedam bohu vuusu vou mode ladume ba diamut om so ahebu vua elum sutem gikina bohu laba voela?” lahame Yesusat ab vahokedaham.
31Labi im lada lam vahokedume neàdi Yesusat neo nehame vi vahokeda. “Um amu Musat aho gagu fi hasi esuhu im nidi nim damat aham di iube nehame faasi vou vamea usehena uba vou fusi um laha aihina taia? ‘Uho meit am nam amu neàt vahana fa mu voolo modemeam làhà dat amu nasi, “Nam nim debu nehasu meedàmu eho mu vooho bak,” lahame sunit toeme ahate fi desi vameadume mu voomta neàte.’ Lahame fi hasi esuhu im lam damat uba vou vamea usehe labe um aime ozobohudehena taia?
32Lahana Em etei im gàhàna nehasu uba fa vi vahokedalo modem bak. Meit am nam dat amomoit bako bake aa vaha vab nam aho naedat vedi ostame mu voohemu ame nam labe ozoha vabamu fa dat amomoi vameam làhà faina ab modeham bak. Lahana ame lab faina modehe bak lam debu am dàt modehe bak. Labi aho lab mu vooho nam lam labe aho vaha dat lam laha gi faina modehe bak,” lahame ab vahokedaham.
33Labi im lada lam vahokedume neàdi Yesusat neo nehame vi vahokeda. “Um amu Musat aho gagu fi hasi esuhu im nidi nim damat aham di iube nehame faasi vou vamea usehena uba vou fusi um laha aihina taia? ‘Uho dat meidavat neha, “Ame bak lam eho mode tame,” lahame gagu vàmadi esumeam làhà a modehe vaba voomule. Abo uho Ala bake gagu vàmadi neha, “Ala amta nim. Ame bak lam eho mode tame,” lahame vi gagu esumeam làhà ame baket modem tadele.’ Lahame fi hasi esuhu im lam damat aham di iube faasi vou vamea usehe labe uba vou fusi um aime ozobohudehena taia?
34Lahana Em etei im gàhàna nehasu uba fa vi vahokedalo modem bak. Uho im gagu vàmadi esulo modem di mei ee feàda a vi gagu esumule. Abo uho Alam ee gagom mu fi hasi ahit, ‘Asum ahoba ium ame nim. Eho mode tame,’ laham bak lam a vi gagu esumule. Asum ahoba iuba Alat azi dam bakdate vuusdam bak am bak.
35Labi laha uho im gagu vàmadi esulo modem di Alam ee gagom mu fi hasi ahit, ‘Bak adba ame nim. Eho mode tame,’ laham bak lam a vi gagu esumule. Bak adba nim Alat laha naedateli vuusdam bak. Labi laha uho im gagu vàmadi esulo modem di kota Yerusalem laba a vi gagu esumule. Ame kota Yerusalem lam Alat bisi Boehàdateboleheda labe Aba Aho azi dam bake vuusu im vahokedam bak lam ehemu Aho neha, ‘Dam Aba, “Feàte,” lahame vou baedase,’ lahame gagu fi hasi esuhu num debu am bak. Laham bake na im gagu vàmadi esulo modem di na etei gagohoda lam a vi gagu vàmadi esumule.
36Labi oho laha im gagu vàmadi esulo modem di om so laba odosu, ‘Em ame nim,’ lahame a vi gagu vàmadi esumule. Om so lam Ala naeda am bak. Om so lam om naedatelem vab labe om ohuta lam, ‘Fauhalele. Gihobulele,’ lahame labi gagu ame baket meedam biem bak.
37Labihàmu fa gi nehale. Uho meit im gagu vàmadi esulo modem di, ‘Eho mode tame,’ lahame gi labihasu gagom neà. Laham vabameam, ‘Eho modem kaio,’ lahame gi labihasu gagom neà. Gi labihasu gagodale. Mei ee feàda a vi gagu esumule. Uho mei ee feàda vi gagu esumeam làhà um gi Iblis labe aba aho gagoho bak laba uho vi tau meedam bak am bak,” lahame Yesusat ab vahokedaham.
38Labi im lada lam vahokedume neàdi Yesusat neo nehame vi vahokeda. “Um amu Musat aho gagu fi hasi esuhu im nidi nim damat aham di iube nehame faasi vou vamea usehena uba vou fusi um laha aihina taia? ‘Uho dam bohudemeam meit mei fako belu fako meida aibulemeam làhà dat fako aibuleheda fa neo dat aheda labe am fako laha belu fa vatau aibulem neàte. Labi laha meit mei adoha belu mo goaitomeam làhà dat mo belu goaitohoda labe fa neo dat aheda labe am adoha laha belu fa vatau am mo fa goaitom neàte.’ Lahame fi hasi esuhu im lam damat aham di iube faasi vou vamea usehena uba vou fusi um aime ozobohudehena taia?
39Lahana Em etei im gàhàna nehasu uba fa vi vahokedalo modem bak. Oba fakemoholeheda labe oba fai bak modemeam làhà oho a modi fa vi vataumule. Meit oba faki eobu visoi om udehà ahi tot laba beomeam làhà oho gi teoli neo udehà soi totbaho ame da laba fi sule.
40Meit oba nehi ozome tem vàlu gagomeam, ‘Om eba git modehe bake gohali om sue sona ad laba dusuhuda eho fa vase,’ lahame ame im lam fa meia uloome vi aime neàdi gagu beodam busaoda boehàda laba fi desi gagolo modemeam làhà oho gi ozahit sue obo oho ahoba dusuhuda sona bohu lamti vihitoi vi tau lole.
41Labi laha Roma meo damat oba nehi gagomeam, ‘Em nazoh nim oho kilometer vàmtea lamota vou lale,’ lahame tet ooteme gagom di um gi ozahit kilometer behàsu lamota abo bak bohulana teo laha vou lale.
42Meit oba neha, ‘Na lam eba lom neào?’ lahame ailo vi gagomeam làhà ame na lam a malemule. Gi lodale. Labi laha meit oba nehameam, ‘Om na lam eho teohe vou lam neào?’ laham di modeo, meit oba nehameam, ‘Om na lam eho vase. Labi eho ba vamda lam fa oba baleà vouhose,’ laham di modeo, lahame labi gagomeam làhà ame na a malemule. Gi lu olum neàte,” lahame Yesusat ab vahokedaham.
43Labi im lada lam vahokedume neàdi Yesusat neo nehame vi vahokeda. “Um amu Musat aho gagu fi hasi esuhu im nidi nim damat aham di iube nehame faasi vou vamea usehena uba vou fusi um laha aihina taia? ‘Umti vahi ot vou aliam dam laba deelele. Lahana uba fakemoholehe dam laba uho fa faki ahu zoho beom neàte.’ Lahame fi hasi esuhu im lam damat aham di iube faasi vou vamea usehena uba vi fusi um aime ozobohudehena taia?
44Lahana Em etei im gàhàna nehasu uba fa vi vahokedalo modem bak. Dam uba fakemoholehe dam laba uho gi ozahigeàmu fa vei deelele. Labi laha dam uba vabidume fai bak meedam dam laba uho gi ozahigeàmu fa Ala bake neha, ‘Ai oa, Oho ame dam laba im neà bak modi esule,’ lahame tom gagodale.
45Uho labiham labe, ‘Um gi Alam damali abo um Aiat asum ahoba azimda labe Am itbaho fatoi meedam dam um am bak,’ laham bak uho vouhodam bak am bak. Eho gi neham bak ozome uba labi gagoho bak. Alat abo dam faasi gi dam totbaho lamota aame faobekesi vou aasdam vab Alat modem bak. Abo gi dam ahebu faobekesi vou aasdam Alat modem bak. Neham bak. Abo ala digadda fauhaedam di gi dam neà bak meedam dam lamota ozome fauhaedam vabak. Abo gi dam faina meedam dam lamti laha ozome fauhaedam bak. Labi abaedam di laha dam Alat Aba Aho gagoho im vuzehi vamdesu meedam dam lamota ozome abaedam vabak. Gi dam im vamdesu meedaha vab dam lamti laha ozome abaedam bak.
46Uho gi dam uba deelem dam lamota fa ot deeliameam làhà ba akati Alat ame bak laba gohali ame baleà vouhoe? Labiham vabiem bak. Um ozom vaba? Meia teo vi gagome vaiam doi abo pajak atem dam lam gi ame baket modem meot. Ame dam labe gi dam iba deelem dam lamota abo uho neha, ‘Debu faina meedam dam,’ lahame feàtàhà dam totbaho laba ot deeliame meedam meo damat modem bak. Dam lamti ulohona a meedamule.
47Labi laha uho meia ot tahiame im vameadam di uho, ‘Neàte. Alat oba neà bak modi esule,’ lahame gagom bak lam dam giidate gagodam vaba vedi gi um vou alem dam lamota gagomeam làhà uho ozom, Alat ba uba neha, ‘Um abo im neàna meedam damat modem bak,’ lahame uba deeli vou baedà? Vabà! Ba labiham vabak. Dam Ala bake tu vuzehi meedaha vab dam labihadam meot. Gi ibi iho vou alem dam lamota, ‘Neàte,’ lahame tahi gagodam damat modem bak.
48Im Ai asum ahoba iuba azim Ala lam abo fai bak vaba abo dam ahebu deeli gi im neà bakta bohu meedam Alat modem labe um laha gi ame baket meedale,” lahame Yesusat ab vahokedaham.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel