Alkitab Mobile SABDA
[VER] : [BAUZI]     [PL]  [PB] 
 <<  Markus 14 >> 

1Labi neo usi behàsdi Yahudi dam bada nibe im tai ahobada zi labe Im Adam Datahida Alat Oddaha Vabat Labohotehe Bake Vi Ozome Roti Fikidehe Vabna Àme Iziam di ee gagom Paskah laham di fuseo meedàmu damat Ala bake lomna ve vua vahudam toheda zi laba vuusu im vameame faheme modiam dam lamti dat ahamda Musat toedume fi hasi esuhu Im Feàna zi lam ozobohudi fa dam bake vahokedam guru zi lamti vazisi im aa odoada. “Uho ozom, iho akatihasu modi zila audume Yesus si otela?

2Lahana ibi iho dam vahi na àme iziam di nim imo nasi Yesus a simule. Aba tu vuzehehe dam duada kota Yerusalem niba esdamda ehete. Iho di nibe Aba simeam làhà dam dae gai fai ziddume iba beomo. Gi ba digat meit sise,” lahame aa ab odoadaham.

3Amu Yesus num debu Betania laba le dat amu sokba faidi vàhàdem bohu vuusdamda modi fa neàdeheda ee gagom Simon labe am num laba le aidam di labe nam meida vàmtea iba ab leham. Labi Yesus ame num laba vahi na àdam di labe ame nam labe aho narwastu omnao aaboda labe modehe minyak abo doi duana vahana ahana neàna amu ke fauhana ee gagom pualam meit modeme botolilehena laba fedehena aho vou le ame botoli omtobe feolehe bak labe aguti Yesusam ohu laba ab nom veàtoham. “Yesus abo feàte,” lahame ame bak laba vi ozome ab modeham.

4Labi dam ame bak laba esdamda totbaho labe ame bak lam aahemu faki dam ihimo ab ot gagoidamam. “Oo, akati modi doi feàna vaha minyak lam gi vàhàdedàla?

5Gi fa meia ot loiame doi feàna abo dat vàmtea na meedume tahun vàmtea foli gohali vam doiti ulohona fa vame ame doi lam dam na vab dam laba fa lodam vaba modela?” lahame ame nam laba faki im ab vahokedamam.

6Lahana Yesusat fa dam laba ab gagoham. “Gi labihasule. Um ana modi nam niba faki im vahokedàla? Um ozom vaba? Aho Eba vou baedalo gi im neà bak modehe bak.

7Um dam na vab dam gi labaha bohu tau esdam labe vi taui vi tauidam labe esdam bohu meedam bak. Lahana Em etei nim ba uba tau azim bohu meedam vab Dàt modem bak.

8Nam nibe aba aho ozome modelo modem bak ahamo ab modeham bak. Eho ozoha, Em ba elom di koei noimna noime afoezobe ke bumata vou oli esum bakti uloho bak laba ozome Em so niba na lam ahit nasi fet veosi ahumdi esulo modem bake ahole modehe bak.

9Aho neàna modehe bakta imbote. Lahana Eho etei uba neo gagolo modem im imboda nidi nim laha nasi aima. Eho meedaha Im Neàna lam meit bak iudu iuba le vameadào? Bak iudu iuba le vameadào? Labihadam di ame nam nibe aba aho etei Eba lab modehe im lam damat laha aime ozobohudi fa ame im lamti vou vameatedam bak. Ba setem vaba gi labaha bohu vou ai ledam bak,” lahame fet ab vameadaham.

10Ame di labe Yesus Aba vi tau meedam dam dua belas labe dat meida Yudas Iskariot labe aho damat Ala bake lomna ve vua vahudam toheda zi laba vuusu im vameame faheme modiam dam laba aho Yesus vou fohome ame dam laba ub lom bake aa ab le odoadaham.

11Labihàmu ame dam labe Yudasat etei li gagoho im lam aiha uledi, “Iho doi oba lo tame,” lahame fet gagu ab esuham. Làhàmu Yudas aho ahit neà dateli le, “Yesus adi diat vou fohome dam bake ub loela?” lahame gi vou faoda.

12Labihadam di labe vou faodameilahit Yahudi Dam Vahi Ame Roti Fikidehe Vabna Àme Iziam di ab vou fuham. Vou fuhemu digat ahamteda labe abo damat ame Paskah vi ozome àlo modem domba otem digat fuhemu Yesus Aba vi tau meedam dam labe Aba li ab gagoham. “Boehàda oa, im Paskah fuhemu iho vahi na àm bake iho ake le na modeme vaheme ahumdi esuela?”

13Làhàmu Yesusat am dam behàsu laba fa ab vi gagoham. “Uho kota Yerusalem laba lefusi duzu aameam dat vao noai vou lemda omti ot gausiamda labe lam bak laba uho am ohuse vi duzu vulale.

14Uho laba vi duzu vulame aameam num da labe aho olemda laba um laba vi olele. Labi vi oli num deda laba nehi gagole. ‘Im gurut oba neha, “Aho amu oba Paskah fum diat Am damti vahi na àdam bak gagu esuhu bak akete?” lahaho.’

15Uho labi gagomeam làhà dat num deda labe um vou le ame num zuhuba baa duana lam gi vabieme neàdi esdamna le aam bak. Uho gi ame tom fi hababu laba ibi iho ame bak vi ozome vahi àmna lam laba modeme vahedale,” lahame ab gagu oluham.

16Làhàmu Aba vi tau meedam dam behàsu labe kota Yerusalem laba le aaha Yesusat lab gagoho bak lam abo imbona le aa. Làhàmu ame Paskah vi ozome àdamna lam modeme vahedume ahumdi neàdi esu fa Yesus bake ab laham.

17Labi fa le disi aibulehemu Yesus Aba vi tau meedam dam dua belas lamti vahi ame num laba le na ab faasi àdamam.

18Faasi na àdam di labe Yesusat ab gagoham. “Um nasi iademe aima. Um etei niba na vahi àdam dam nim meida vàmtea labe Em vou fohome meia ub lomda niba ehete.”

19Lahame labi gagoha Aba vi tau meedam dam nibe im ahu faidi Yesus bake neha, “Ai oa, Oho ozom, eho modem im Oho gagohe?” lahame meit Yesus bake vi gagu ai. Meit neo vi gagu ai. Lahada.

20Lahahat Yesusat fa gago, “Ne, um ame dam dua belas nibe meida vàmtea gi Eba neab tau na vaksa fi lihibabu niba roti zoho ekeme ab àdamam bak.

21Lahana gi labihasule. Em Abo Asum Ahoba Iubet Bak Niba Li Dateleheda nim Eho ba modem im meit Alat Vameadaha Im Toedahana laba im meida nehasu toehe bak. ‘Elo tame,’ lahame fet toeme vàmadi esuhu labe ame bak ab imbodelo modemam bak. Aiee! Lahana ame da Em vou foholo modemda nim am oiat am faaha bak feidam vabate. Ame da nim Alat ba gi fai bak bohu tadelo modemda am bak,” lahame ab gagoham.

22Labi lab vazisi na àdam di labe Yesusat neo roti ve Am Ai Ala bake, “Neàte,” lahame tom gagu neàdi ame rotibu lam agube faheme Am dam bake ab lodaham. Lodam labe nehame vameada. “Roti nim Em so am tame. Uho roti nim ve àm di Eba vi ozome àdale.”

23Labi roti lam àdume neàdi Yesusat neo anggur oo vaksa mokzoho fedehena ve Am Ai Ala bake, “Neàte,” lahame tom gagu neàdi dat meidate lu vuusu vameada. “Uho ame anggur oo vaksa nim um ahebu uddam labe ototo vaidale,” lahame gagu neàdi dam ahebu ab otot udidamam.

24Labihadam di labe Yesusat neo vi vameada. “Iho etei uddam anggur oo vaksa nim nehi vi ozomna vaksa am tame. Amu Alat dam amudate gagu gohalemna lam fa vei seti etei nim Em vasea veàtolo modemna nim fa dam bakdate gohalemna Alat ab modi gàhàdeham bak. Dam bakda dua totbaho labe ibi iho faina meedam bak lam Alat ozahigeàmu im beodaha vaba fa vei neàdedume iba modi Am damaedume Aho iba vuusdam bak vi ozome veàtolo modem vasea am bak.

25Lahana im imboda nidi nim iademe aime tu vi ozodale. Iho etei vahi uddam anggur oo vaksa nim Em etei nib udehe tade tame. Lahana ba diamut Em Ai Alat Eba modi Boehàdateboli dam bake abobo vuusu im vahokedam di labe ba udem bakti gagom kaio.”

26Lahame labi vameadume neàdi vou ladeedaha bak vàmadi ame num labe futoi kota Yerusalem vou esmozi Zaitun Dee Dozeadaha Bak Buzoho laba laitelo ab ladamam.

27Labi ladam di labe Yesusat Aba vi tau meedam dam laba ab gagoham. “Etei aibu nim damat Em simeam làhà Eho geàdam bak lam uho aahemu um ahu gelevai ubu uho amu Eba lab vi tau meedam bak lam fa seti Em vou esmozi ili tame. Meit Alat Vameadaha Im Toedahana laba im meida nehi toehe labe Eho uba labi gagoho bak. Alat amu neha: ‘Ame da domba fi ho vou aasdamda lam Eho dam bake modi damat ote tame. Labi am domba gi fi goaitoi sete tame.’ Lahame labihasu toehe bak ehemu Eho uba labi gagoho bak.

28Lahana Em eloho bak labet Alat modi fa ahedi usai nasi Galilea bak laba le uho ba vulem bake gut vou faoda tame.”

29Lahame labi gagoha Petrusat fa ab vi gagoham. “Vabà! Dat Boehàda oa, dam totbaho nibe im ahu gelevai ibi iho Oba tu vuzehi meedam bak lam fa seti Om vou esmozi ili tame. Lahana em vàmtea nim ba Om vou esmozi itam bak em ba vi ozom vabak.”

30Lahahat Yesusat fa gago, “Lo, oho lab gagoho bak ame. Lahana im imboda nidi nim nasi aima. Om ba labiham vabak. Om etei ba diham ozoh aibubet meit oba neha, ‘Om Eba vi tau meedamda am tame,’ lahame aame labi gagom di om fa vei iedi tem veibam bak làtelademeam kuk aaum bak ab behàsdemam bak,” lahame ab fet gagu esuham.

31Lahahat Petrusat fa neo vi gago, “Dat Boehàda oa, Omti emti damat amediat otemta neàte. Em ba àvodem vabak. Lahamnàme em ahe lahasuhu di nim em ba meia neha, ‘Em Om bieho,’ lahame vageme Om mom vabak.” Lahame labi gagoha Yesus bake vi tau meedam dam totbaho labe ame im lam aihemu gi Petrusat lab gagoho bak lamti ulohona Yesus bake neo ab vi gagodaham.

32Labi Yesus Aho neo Aba vi tau meedam dam lam vame bak ee gagom Getsemani laba ab vou laham. Laba lafusi gago, “Uho niba nusualadume faode. Em iumà iuba le Em Ai Ala bake tom gagodalo mozo.”

33Lahame labi gagu neàdi Aho Petrusti Yakobusti Yohanesti labihasu dam làtela lamota, “Aba tau lele,” lahame gagu dam totbaho laba vou esmozi ab laham. Labi laba le lafusi modeha Yesusat Am ahu faidi feà bak fusi admahi ab meedamam.

34Làhàmu Aho Am dam làtela niba ab gagoham. “Em ahu faidi feà bak fuho. Em gi ab elom ahulaleham tame. Um niba faode. Em ehemo iumà iuba le tom gagodalo mozo. Labi um niba esdam di a imule. Gi vou faovoi aasdale.”

35Lahame labi gagu neàdi Ahamo iumà iuba le ogomasu bake biti Am Ai Ala bake ab tom gagodamam. “Ai Em Ai oa, na im ahebu Ohomo modem neà bak tadeho. Labihàmu Em geàdalo modem bak nim Oho fa faatoi vei setem neào?” lahame gagu ozoha vabamu fa neo gago, “Vabo. Ebe Eho ozom bak fa feidate. Gi Obo Oho ozoho baket modem neàte,” lahame ab tom gagoham.

36(14:35)

37Lahame labi tom gagu neàdi usai fa Aba vi tau meedam dam làtela laba fa le aaha dam gi beilame idaomna le aa. Le aame Petrus bake ukeme ab gagoham. “Simon, Em kehàm vabna gi jam vàmtea folehena um akati vou faovoi aasdam vaba idaoe?

38Iblisit uba li, ‘Um faina modem bak modeo,’ laham bak uba li um ahu modi ozolo modem di um ahu a bedemule. Gi mahate it vou faovoi Ala bake tom gagodale. Neham bak. Im ahu it ozomta gi neà bak modelo àhàki vi ozodam bak. Lahana im ahu nibet ihimo fatahivai bedem meo bak.”

39Lahame labi im vahokeme neàdi Yesusat Am dam làtela lam fa neo vou esmozi iumà iuba le Am Ai Ala bake Aba Aho amu tom gagoho baket neo tom gagu ab behàsdeham.

40Labi tom gagu neàdi usai fa Aba vi tau meedam dam làtela laba fa neo le aaha dam gi neo izeo àhàki feà bak fusi lavoidume fa idaomna le aa. Làhàmu le ukeme keesi modeha dam làtela labe ladi fa im vi gagom vabi gi daleàde.

41Làhàmu ame dam lam fa neo vou esmozi iumà iuba le Am Ai Ala bake Aba Aho amu tom gagoho baket neo tom gagu ab làteladeham. Labi tom gagodume neàdi usai fa Aba vi tau meedam dam làtela laba fa neo le aaha dam gi beilame idaomna le aa. Làhàmu ukeme ab gagoham. “Ne, um akati bedali idaom lahasuhela? Neàde! Nasi keesi usnadale. Asum Ahoba Iubet Bak Niba Li Dateleheda nim vou fohome dam faina meedam dam laba ub lomda iba ab fuseo vabaleham bak.

42Nasi usnadume ladase. Em vou fohome meia ub lolo modemda etei iubet ab ledamam bak.”

43Lahame Yesus gi etei vameadam lahasuhu di labe Aba vi tau meedam dam dua belas meida Yudas lam ab lefuham. Ahamo lem kai. Dam ae tot mo tot mo lahamna vuusualaha dam zi lamti labi eobu vuusualaha dam zi lamti labihasu aba tau mitaedume ab lefusi dozeadaham. Ame dam lam gi Yahudi damat ibi iho tu vuzehi meedam im vuusdam tohe dam zi labe amu vameame ahumdi oudaha labe ame dam zi lam ab le omsuham.

44Yudas amu aho gi iumà ium ledam labe ame dam zi laba nehame fet gagu esu, “Uho aameam im Yahudi damat meia tàm di oode totti totti tomoamdem bak lam eho ame Da laba modehe bak uho aameam làhà ame Da am tame. Uho nasi ame Da lam si vuusu uho vuusualahana lamti vuusualame vausu mei ousum bak iuba vou lale,” lahame amu fet gagu ahumdi esu.

45Labihàmu etei li dozeaha di labe Yudasat gi taho Yesus bake ub fetu duzu ab gagoham. “Ai Guru,” lahame gagu Am oode totti totti ab tomoamdeham.

46Labi modeha Yudas bake tau lehe dam zi labe ame bak lam aahemu vi feddume Yesus ab siham.

47Labi modeha Aba vi tau meedamda meida labe am ae goha dusuhuna vuu vihitoi Damat Ala Bake Lomna Ve Vua Vahudam Tohe Dam Zi Labe Bisi Boehàdatebo labe am na meedamda lam beoha biou gi dogoi baata fatoi bake ab biteham.

48Labi modeha Yesusat fa neo dam duada labe Aba silo lehe dam zi laba im ab vi vahokedamam. “Um Em otelo vabeddamna akati Eho amu Fihasi Ala Bake Vou Baedam Num Vàmteabu labe am ad oli aam bak tomba laba Eho Alam im vahokeme leidamehamdehena abo umti vahi meedamna akati ame di labe Em taho si otem vaba mode? Uho ozomta vedi Em dat aa li ausume mei beome im nazoh gelevai esmozi laiam dàt mode tiba uho etei aeti eobuti ab vou lehame? Lahana uho etei nib meedalo meedam im nim ahebu gi ahole meedalo modem bak. Nehaha bak. Dam ahamda Alat vameadaha im aime fa dam bake ahate vameaidaha dam zi labe iho amu Alat Vameadaha Im Toedahana laba fet toeme esuhu im lam imbodelo modem labe uho vabili etei ab meedamam bak.”

49(14:48)

50Lahame labi vameadume neàdi modeha Aba vi tau meedam dam lam ahebu iedi Am vou esmozi fi goaitoi ab ilime seteham.

51Labi laha ame di lam dat bas meida labe gi sue baana gimsudamna Yesus bake tau vulada. Vuladameam damat aba neo siha gi sue laba vi sihi labe aho fi tuha ame sue lam fodzi ab so bozbuli itaham.

52(14:51)

53Labi Yesus sihi dam labe Am vou duzu vou ladume Damat Ala Bake Lomna Ve Vua Vahudam Tohe Dam Zi Labe Bisi Boehàdatebo labe am num feàda laba ab vou laham. Ame di labe ame Yahudi damat ibi iho tu vuzehi meedam im vuusdam tohe dam zi labe iho Yesus bake uloome aim bake ozome ame num bumat laba laha tau leida.

54Ame di labe Petrusat gi vaitesu ba aa vi duzu vulada. Labi ame num feàda labe am ad oli aam bak tomba laba vi fusi ame meo dam labe num feàda laba vou aasdam dam lamti gi aa valiheme laba vi tau nusu vuaga fi dda.

55Ame di labe damat Ala bake lomna ve vua vahudam toheda zi laba vuusu im vameame faheme modiam dam abo Yahudit Ibi Iho Modem Im Gagu Vàmadi Esum Dam Debu labe im dam zi lam vahe vahedume Kayafasam num laba bakamta vahi vou faoda. Damat neha, “Yesus git modeho,” lahame gagu Yesus bake giomim vàlum damat li im gagom bake aihizobe Roma eeda laba ub lu, “Yesus fà beome elose,” laham bak gagolo àhàki vou faoda. Lahana ba ame im aim kai.

56Di lam dam giida labe giomim vàlum dam duata duat. Lahana meit vàluhu bak lamti meit vàluhu bak lamti ba vàmadem vab labe gi ot odosia.

57Gi labihasu meedameilahit dam totbaho labe lehe labe ame dam eeda labe iho avaesdam laba li duzu ab gagoham. “Iho aiha ame Da nibe nehi gagoha. ‘Ame Fihasi Ala Bake Vou Baedam Num Vàmteabu nim damat anekehàt mohona nim Aho beodume fa faamome seti usi behàsdi Aho fa dam bakda labe im anekehàt moho vab num lam Aho mo tame,’ lahame gagoho bak lam iho aiho.” Lahame labihasu giomim vàluhunàme etei lab vàlu gagoho bak lamti meit neo vi vàlu gagoidaha bak lamti ba uloho vab im vàlu vameada.

58(14:57)

59(14:57)

60Gi labihadume modeha ame Tohe Dam Zi Labe Bisi Boehàdatebo labe ahu gukeme usai tomba duzu Yesus bake netàdi vi ailo ab gagoham. “Om dam nibe etei Oba vàlu vameadam im nim Om taho veibame fa gagom vaba?”

61Lahame gagoha Yesus ba dae buhu vaba gi daleàdi vou faoda. Làhàmu ame Tohe Dam Zi Labe Bisi Boehàdatebot aho fa neo vi ailo gago, “Om, ‘Alat Gagu Fihasi Vimteme Oluhu Dat Boehàda abo ibi iho bisi tom vou baedam Ala labe Am Adàt am bak,’ laham bak lam imbodemeam làhà taho gagu vàmadi esule.”

62Lahame labi gagoha Yesusat fa ab vi gagoham. “Lo, Alat Gagu Fihasi Vimteme Oluhu Dat Boehàda lam Em ame Da am bak. Ba diamut Em Abo Asum Ahoba Iubet Bak Niba Li Dateleheda nim uho Eba aam di Em gi feà Dateli Ala Bisi Feàda labe Am ahi totbaho laba tau nusu na ahebu vuusdam bak lamti Em asum ahoba iube fa uloti bak niba lem bak lamti labihasu uho ba aa tame.”

63Lahame labi gagohemu ame boehàdatebo labe aho aime faki am sue ahoba dusuhuda lam gi ahamo naedat auet it vome geleme ab faheham. Faki dam eeda totbaho niba ab gagoham. “Um aim vaba? Da nim gi Ala bake feàtàhà bak. Aho vedi, ‘Amti Alati ulohote,’ lahame gagoho bak lam ihimo ab vi aiham taia? Ba akati meit neo li vàlu gagom im lam iho aie? Dat naeda labe Ahamo ab it gagu vàmadeham bak. Uho ozom, Da nim akatihà?” Lahame labi gagoha ame dam eeda totbaho labe vazisi fa ab gagoham. “Lo, ibi iho fi hasi baleàhà bak lam Da nibe vazidazehemu gi gagu otem neàdehe bak,” lahame ab gagu vàmadeham.

64(14:63)

65Lahame labi gagu neàdi dam eeda zi totbaho nibe Yesusam dauha laba keha beàda. Labi neo sue baa visoi Yesusat iba aam bak labna zohàme Am fakode laba baguamdi meit am aumbut Aba vi fu tozome gago. “Hohoa. ‘Om Alat vameadaha im aime fa dam bake ahate vameaidahada am tame,’ lahamda Oho ozom, Oba amat beo. Taho iba fa gagoma,” lahame meit vi fu tozome gago. Meit fu vi tozome gago. Lahada. Gi labihadume neàdi fa neo dam Yesus si vou goomda zi laba ub lu ame dam labe fa ve vou lalo modem di labe neo ab foadamam.

66Ame di labe Petrusat gi ame num labe am ad oli aam bak tomba laba nusda. Nusdume modeha ame boehàda labe am na modem nam meida vàmtea labe Petrus bake labohotesome aaha Petrusat vuaga fi ddam bak aahemu Petrus bake aasu ozodume ab gagoham. “Om Yesus Nazaretda laba vi tau meedam dam meida om am taia?”

67(14:66)

68Lahame labi gagoha Petrusat tem veibadam labe ab gagoham. “Vabo. Em ame da lam em bieho. Oho etei lab gagoho im lam em ozom vabili mozo,” lahame gagu neàdi ame num feàda labe am ad oli aam bak tomba labe am doo futom obe laba ab le duzuham. [Laba le duzuha kuk ab aauham.]

69Lahame vou faodameilahit ame nam labe neo Petrusat doo futom obe laba doudam bak aahemu dam totbaho aba netàda laba fi desi ab gagoham. “Em ozobohu bak. Ame da nim gi damat etei sihida laba vi tau meedamda meida am bak.”

70Lahahat Petrusat neo tem ab veibadamam. “Em ame da meida modem kaio,” lahame labi tem veibadaha bak ab behàsdeham. Labi neo vou faodameilahit neo dam laba dozeadaha dam labe ab aame gagoham. “Mm, abo imbote. Om abo damat etei sihida laba vi tau meedamda meida am bak. Iho gi oho im gagom bak vi aim di om gi Galilea damat im gagom bakti uloho bak.”

71Lahame dam labe neo ahate gagoha Petrusat, “Damat fà aise,” lahame fa neo ohu vame ab tem veibadamam. “Uho etei gagohoda lam em bieho. Eho giomim gagomeam làhà Alat fà eba beose.”

72Lahame gi etei tem veibaha bak làteladeha kuk neo vi aaume ab behàsdeham. Labi kuk aauha Petrusat Yesusat aba amu nehame fet gagoho bak lam ab vi ozobohudeham. “Om etei ba diham ozoh aibubet meit oba neha, ‘Om Eba vi tau meedamda am tame,’ lahame aame labi gagom di om fa vei iedi tem veibam bak làtelademeam kuk aaum bak ab behàsdemam bak,” lahaha bak lam fa ab vi ozobohudeham. Làhàmu am ahu faidi nom bohusu bisteat meb dae ab faaham.



 <<  Markus 14 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel