Alkitab Mobile SABDA
[VER] : [BERIK]     [PL]  [PB] 
 <<  1 Korintus 15 >> 

1Am afelen mesna, ai enggam ai gunu, aamei Taterisi Waakena Kristusem temawer, ai gwanan fwater isa ajes nasipminintim ibe, aamei Taterisi Waakena jeiserem gamjon ga jam isa sarbistaabona. Aamei Taterisi Waakena jeiserem imsa taabili, ane Taterisi Waakena jeiserem jem temawer aamei Kristus ga ima tebana kanaufer.

2Afa aamei Taterisi Waakena jeiserem Kristusem temawer, ai isa ajes nasipminintim ibe, afa aamei taterisi jeiserem jeber-jeber jam isa tebabuwenaram kanaufer, gam jega Uwa Sanbagiri Jei aamei ga is waakentababisini. Jengga afa aamei jam isa tikwenaram Taterisi Waakena jeiserem jam taabiliwer, Uwa Sanbagiri Jei aamei is Jam waakentababisiyen, aam temawer afa aamei jam isa tikwenaram jam tebalawer, gam jega igi jemna ga enggam, aamei bunarsusfer gwanan Kristus ijama tebayan.

3Taterisi igsususerem ap aa jes gulbanantam, aime Taterisi Waakena jeiserem aime ga isa ames nasipminint ibe. Taterisi igsususerem ga aas: Kristus Jei nem temaweram tere enggalfe, Uwa Sanbagiri Jei etam-etama kapka nemna nes gam wirtabaipmif. Gwanan-gwanansus Kristus nalef Jam teryen, taterisi jeiserem tere Kristusmanaiserem jem temawer mesam tulisul Taterisi Uwa Sanbagirmanaiserem jebe.

4Ane Kristus Jei mes ne tirnnunt tonmwa bitisibe, jengga nunu nawer-ningnabaraiserem Jei gamjon ga irtestenant terewer. Jeiserem jes mese fwater mesam tulisul Taterisi Uwa Sanbagirmanaiserem jebe.

5Ane ai taterisi aaiserem jes mese isa ames nasipminint enggame: Kristus Jama irtestenantam terewer, Jei Jena Petrusminip ga aa ge sana, ane gamjon ga Jei Jena ga aa ge sana dua belas rasul afwenefener jemnibe.

6Jepga Jei gamjon ga Jena ga aa ge sana angtane 500 unggwanfer jemniwer Jei aa jei ne tikwebaatinennerem jei aa jep ge betwebilirim daamfennaber. Angtane afwer angtane 500 jeiserem jemniwer, jei mes ge terbili, jengga unggwanfersus jei gemer naawena.

7Jepga Kristus gamjon ga Yakobusminip jon Jena ga aa ge sana, ane rasulu seyafter gemerserem jemnip mese.

8Ane umwef ga Jena amnip ge sana. Aiba tantouya galserem jei aa jei gam surnurum nunu jem suruluserem jei gemerje jam folbayan, aam temawer ai rasulfe agalap etamwenantam, jes galapserem rasul-rasulu afweraiserem jei mes naawenant rasulfe.

9Rasulu Tuhanmanaiserem seyafter gemerserem jemniwer, bastowaisusu ga ai. Ai aner gunu angtane jei ai as jam ne balyan rasuleme, aam temawer ai Kristus nalef ajam tebayan, ai jemat-jemata Uwa Sanbagirmanaiserem uskamer ai tamtamtababilint.

10Jengga Uwa Sanbagiri Jei ams nesiktene, ane Jei waakena Jelemanaiserem as mes gulbana abe. Ane jega jem temawer aiba rasulsam. Uwa Sanbagiri Jei waakena Jemnaiserem as Jam gulbayan jam elsife. Fas. Jengga Jei waakena jeiserem abe as jewer gulbanaram, jemna igi ga enggam, ai awelna baabetfersus ai gwebili rasulu seyafter afweraiserem jemniwer. Ai awelna jeiserem ai baabeta alemanaiserem jeme ajam gwebiyen. Jengga ai awelna seyafter ai ajes gwebilirim, ai jeiserem ga aam temawer ai gwebili, Uwa Sanbagiri Jei waakena ap as jewer gulbanaram abe.

11Ane Taterisi Waakena aamei gwanan ijesa sarbilintim, Taterisi Waakena jeiserem ai angtanef ai nasipminenne, ane Rasulu nafsiserem jeime Taterisi jeiserem jeter ne nasbinenne. Taterisi Waakena daamfenna jeiserem ai ga seyafter ajetera nasbinenne, ane aamei Taterisi Waakena jeiserem ga imsa taabili.

12Ai ajesa nasbinennerem, jeiserem ai ga enggam aya nasbinenne, Kristus Jeiba mesam irtestena terewer. Jega jem temawer, aamei ijeya gunurum enggame, "Angtane fas jam irtebaabisteyan terewer.", jes gamserem aamei game syefer ima gunu.

13Afa angtane jam tereserem jei gamjon fas jam irtebaabisteyan terewer, afa jes gamserem bunare, gam jega Kristus mese Jei Jam irtesteyan terewer.

14Ane afa enggam, Kristus Jei Jam irtesteyanaye terewer, afa ga gam jes gamserem, gam jega ai taterisi ajesa nasbinenewenaram igi jemna fas. Ane afa ga gam, gam jega aamei taterisi jeiserem ijewera taabilirim, igi jemna fas.

15Ane gamjon aaiserem jes mese, afa Kristus Jei Jam irtesteyanaye terewer, gam jega jeiserem se gwerewa enggame ai rasulu seyafter gemerserem, ai angtane afaf-afafa, aam temawer ai angtane jam agalaba towas-towastababinennerem Uwa Sanbagirem temawer, ai ga enggam aya nasipminenne Uwa Sanbagiri Jei Kristus mesam irtestena terewer. Afa aamei igama gunurum enggame, angtane jam tereserem jei gamjon fas jam irtebaabisteyan terewer, afa jes gamserem bunare, gam jega Uwa Sanbagiri Jeime fas Kristus Jam irtesteyan terewer.

16Bunarsusfer ga enggam, afa angtane jam tereserem jam irtebaabisteyanaye terewer, gam jega Kristus mese Jei fas Jam irtesteyan terewer.

17Ane afa Kristus Jam irtesteyanaye terewer, gam jega aamei taterisi afaf-afafa aaiserem imsa taabili, ane etam-etama kapka ijesa eyebilirim fas is Jam wirtabaipmiyen.

18Afa Kristus Jam irtesteyanaye terewer, gam jega angtane Kristus aa jei ne tebanaram aa jei ge terbuwenaram, jei jam waakentababisiyen.

19Nei Kristus nejeya tebanaram, ini nemna unggwan-girfer ga nes enggalf sege folbamini, nei Kristusfar negama gwef taman waaken-giribe, jeke ogiri aaiserem jepfener. Jengga afa angtane jam tereserem jei fas jam irtebaabisteyanaye, gam jega nei taterisi afafaiserem nei nemsa taabili, ane angtane jei enggam sege gubili nem temawer, "Nesik, gwela jemna Kristus aa jewer ne tikwebaatinirim, gwela jemna jeiserem jam se elmisini."

20Jengga gamyan! Taterisi bunarsusfer aaiserem ga enggam, Kristus Jei mesam irtestena terewer. Ane jem temawer nei ga nesa towaswena enggame, angtane seyafter Kristus aa jei ne tebanaram jeime ga sene irtebaabisi terewer.

21Angtane seyafter gemerserem ga jam ge terbuwena, angtane daamfennaiserem jei aa jes eyebilim jem temawer. Jes gemerserem aaiserem jegme gemer, angtane gase irtebaabisi terewer, Angtane nafsiserem Jei aa jes eyebilirim jem temawer.

22Angtane seyafter gemerserem jeiba asal-asala Adammanam, ane aam temawer Adam jei aa jewer terem, angtane seyafter gemerserem ga jem temawer ge terbuwena. Jes gemerserem aaiserem jegme gemer, angtane seyafter Kristus aa jei ne tebanaram jei se irtebaabisi terewer, aam temawer Kristus mesam irtestena terewer.

23Angtane seyafter gase irtebaabisi terewer, nunu jes jepserem Uwa Sanbagiri Jam aa jep gunurum. Angtane nabal-nabalsusu ga Kristus se irwena terewer. Ane jep jon ga Kristus Jam aa jep forsanyaram, angtane Kristusmanaiserem jei gase irtebaabisi terewer.

24Jeiserem umwef ga jes. Kristus Jei Sanbakfe gase nwinsi jamer Jei ginanggwana Jemna seyafter gemerserem baabeta jemna gase taayipmisi, angtane sanbakf aa jei ge nwinbenerem, ane bwat kapka baabetabara aa jei ge nwinbenerem jes mese. Kristus Jei Sanbaksusfe Jei se nwinsi, jamere Uwa Sanbagiri ginanggwana seyafter gemerserem se gwebabisi Kristusem gwonap ga sege nwinbese. Ginanggwana umwef Kristus jes borolaiserem, ginanggwana jeiserem ga aas, tere angtanemanaiserem. Jep jon ga Kristus Jei baabeta Jelemanaiserem gase gulbasa Uwa Sanbagirfe, Uwa Jemna, baabeta Jei aa jes domolaram Sanbakf gwefe.

25(15:24)

26(15:24)

27Taterisi Uwa Sanbagirmanaiserem jep ga enggam baatultel: "Uwa Sanbagiri Jei apgal jigala seyaftersus gwebabili Jem gwonap naawefe." Bunarsusfer nei nemsama towaswena enggame, katana aaiserem "apgal jigala seyaftersus" jem temawer, Uwa Sanbagiri Jei Jena jep Jam batawiyen enggalfe Kristusem gwonap gwefe, aam temawer Uwa Sanbagiri Jei apgal jigala seyafter gemerserem ga Kristuse gwebabili Jem gwonap naawefe.

28Nunu umwef jes jepserem, apgal jigala seyafter gemerserem mesam ge etamwebili Kristusem gwonap naawefe, jep jon ga Kristus Jei Jen jon Jena gase gwebasa enggalfe, Jei Uwa Sanbagirem gwonap gam gwefe. Kristus Jei Jena Jener se gwebana Uwa Sanbagirem gwonap gwefe, jega enggalf Uwa Sanbagiri Jei gam se gwena seyafter gemerserem jem Sanbakfe.

29Angtane afwer imniwer aaiserem jei enggam ge gubili, "Angtane jam tereserem jei gamjon jam irtebaabisteyan terewer." Jengga aamei isa towaswena enggame, angtane taterisi jeiserem aa jei gane nasbinennerem, jei ga syefer gane nasbinenne, aaiserem ga jem temawer: Angtane afweraiserem jei enggam gane eyebili, angtane jam baptisteyamer aa jei gam tererem, angtane gemer gwelaiserem ga jem fwayenf gane baptistene bosna jemnaiserem jeme enggalfe, angtane jeiserem aa jei gam tererem jei gam gane bala mes ne baptistene. Afa angtane jam tereserem jei gamjon fas jam irtebaabisteyan terewer, afa jes gamserem bunare, gam jega jeje bafa angtane jes gemerserem ga aane eyebili?

30Am temawer mese ai rasulfe ajeya gwenaram afa angtane jam tereserem jei gamjon fas jam irtebaabisteyan terewer, afa jes gamserem bunare, gam jega ai awelna aaiserem aya jam gwebiyen, awelna tamtamtala uskambarsus ajem temawera domolwenaram.

31Am afelen mesna, bunarsusfer amsam towaswena nunu jeber-jeber angtane jei tamtamtala ap ga as gane gulbana enggalfe, jei ai as jam ne munbofe. Uwa Sanbagiri tousa ini amna ase saaser-saasersusfer folbana, aam temawer aamei Kristus Yesus Tuhan nemnaiserem imsama tebana, ane gwela imna waakenfer ga is jem temawer ge folbamini. Ane jes gemerserem Uwa Sanbagiri Jeime gemer towaswena enggame, tamtamtala ai jeber-jeber ajes domolwenaram, jeiserem bunarsusfer ba unggwandwasusum.

32Ai tamtamtala aafe uskambarsus ames domola kota Efesus je, aam temawer ginanggwana amnaiserem ga enggala twena unggwan-giri kakalsusu galserem ai as jei dwortafe. Ai kabwaktala ai ajes domolwenaram, afa ai seyafter jeiserem gwela ogiri aaiserem jem temawenefener agam domolaram, gam jega seyafter jeiserem igi ga fas, jam sege elbesini. Afa angtane jam tereserem fas jam irtebaabisteyanaye terewer, afa ga gam, gam jega taterisi angtane aa jes ne bilwenaram ga jes nesa onsobili. Taterisi jeiserem ga aas: "Au, nei ganma twen, fo mese ganma telbili masara gemerserem, ane ini nemna ga nese saaser-saaserfer sege folbamini, aam temawer nei ne gwirmera tereber, gamjon nejama gweyan." Jengga nei taterisi jeiserem nejama tikwebitiyen, aam temawer angtane ba se irtebaabistesa terewer.

33Angtane safnant aamei is jam ne afaftababiyen! Taterisi aaiserem angtane aa jes ne bilwenaram jeba bunaram: "Afa angtane waakenfer aa jei gam naawenaram, jei seyafter jeber-jeber jam gam naawenaram angtane gwela kabwakfer aa jei gam falminirim jebar, gam jega angtane gwela waakenfer aa jei gam naawenaram, gwela jemna ga jei gam kabwakulmini."

34Aamei ga jam isa tikwena taterisi syefer ilem inip jes igama damtabilirim, ane aamei ini waakenaiserem ga is jener sege folbamini! Ane aamei etam-etama safnant gamjon ijama eyebiyen! Aamei bunarsusfer ga jam isa seferswena, aam temawer angtane im nenennabe afwer jeiserem jei Uwa Sanbagiri jam ne damdamtaasiyen.

35Angtane afweraiserem afa engbar ke gam tenna enggame, "Angtane futunu jeje gamjon fomfom gam irtestena terewer? Angtane jam aa jep gam irtestenaram terewer, tifini seyafter ibirmi jemna gamjon fonggals gam domola?"

36Angtane jes gamserem gam aa jei gam tennaram, angtane jeiserem jei teisyensusu! Twam tanna jam tonolaiserem jem temawer gase sarbistaabon. Ga enggam, aamei twam tanna jam jep igama tonolaram onabe, twam tanna jeiserem nalefe jam kokosyan, twam tanna jeiserem gwanan nabala ga tarnaiserem jei gangge subamitye, ane tifini ga gangge butswebili.

37Aamei ijesa tonolaram onabe, jeiserem ga tanna tefner ima tonola, afa gandum tan, afa twam tanna nafsiserem jem tanna. Aamei twam tanna jem kokosaiserem unggwan-gwansus jam telaiserem, jeiserem ijama tonolyan.

38Uwa Sanbagiri Jei twam tanna aa jei gangge kokosbilirim numu Jeneram golmini. Jei twam tanna aa jei gangge kokosbilirim jemna numu daamfen-daamfennemer ga nafis-nafismer gam golmini, Jei Jener aa gemer gam gunurum.

39Matauwa ninibere seyafter gemerserem numu jemna daamfenyan, jengga nafis-nafismer. Angtane nini numu jemna daamfenna. Ane matauwa twen mese fenes, nini jemna numu nafis-nafsi, nini angtanemanaiserem jemniwer. Ane jumana nini nensa matauminiwer, ane angtaneminiwer. Ane jigal nin mese jemna numu nensa matau nini afweraiserem jemniwer.

40Uwa Sanbagiri Jei apgal jigala unggwanfersus aa jes eyebaabilim, winsi yo ogiri aaiserem jebe, apgal jigala seyafter jeiserem jam domolabe ba waakensusum. Jengga apgal jigala winsip aaiserem jam domolabe, ane apgal jigala ogiri aaiserem jam domolabe, numu jemna daamfenyan, jam domolabe jeba nenes-nensam.

41Gwer naf, ane mwar naf, ane nafa torbwanmana, nafa seyafter jeiserem ba waakensusum. Jengga gwer nafa jei nenesmer mwar nafminiwer. Ane torbwanmana jegme nafa nenesmer gwer nafa yo mwar nafa jemniwer. Ane torbwana daamfennaiserem nafa jemna nenesmer torbwana afweraiserem jemniwer.

42Jes gemerserem angtane futunu gamjon jam irtestelaiserem terewer jem temawer jegme gemer. Angtane futunu aa jebar gane gaataantenaram bitisibe, tifni jeiserem jei nenesmer tifni terewer aa jebar gam irtestenaram jemniwer. Tifni angtane futunu gam butswena. Jengga tifni terewer aa jebar gam irtestenaram, tifni jeiserem fas jam teryen, ane jam butsweyan.

43Angtane futunu aa jebar gane gaataantenaram bitisibe, tifini seyafter futunu jeiserem kapka, ane baabeta jemna fas. Jengga tifni terewer aa jebar gam irtestenaram, tifni jeiserem waakensusu ane baabetsusubara.

44Angtane futunu aa jebar gane gaataantenaram bitisibe, tifni jeiserem ogirmana. Jengga tifni angtane Kristen terewer aa jebar gam irtestenaram, tifni jeiserem taman waaken-girmanam, tifni Mafnana Uwa Sanbagirmanaiserem aa jes gam gulbanaram. Nei tifni enggalf ma damtabili ogiribe nejebara gwef. Jes gamserem gam ba bunaram, ane aaiserem jegme bunar, nei jam nes jep irtebaabistesaram terewer, nei tifni nafsiserem ga jes nesa damtabisi enggalfe taman waaken-giribe nei jebara gwef.

45Taterisi Uwa Sanbagirmana jep ga enggam baatultel: "Anggwana nabal-nabalsusu Uwa Sanbagiri aa jes eyebalam bosna ga Adam, Uwa Sanbagiri Jei mafnana tifni Adammanaiserem jep gulbal enggalfe, Adam jei angtanefe gam etamwef." Jengga Kristusem aa jes ne jenbenerem "Adam umwef aaiserem", Jeiba Mafnansam, Mafnana gwela jamer abak-abaksus aa Jei golminirim.

46Gwela nemnaiserem taman waaken-giribe jamer abak-abaksus, abakfer gwela jeiserem nabal-nabalsusu nejama domolyan taman waaken-giribe. Jengga ga enggam nei gwanan nabala ogirip negama gwena. Ane gwela umwef aaiserem ga taman waaken-girmana.

47Adam nabal-nabalsusu aa jes eyebalam, Adam jeiserem onnawer eyebal. Jengga Kristus aa jes ne jenbenerem "Adam naurabarfe", Jei taman waaken-giriwer jela.

48Angtane seyafter gemerserem jeiba asal-asala Adammana, ane tifni angtanemana ga enggala tifni Adammana galserem, ominiwer eyebaabili. Jengga angtane Kristusmanaiserem tifni jemna enggam sege etamwebamisi, tifni Kristusmana galserem, tifni jeiserem ga taman waaken-girmana.

49Tifni nemna ogiri aaiserem jebe jem gwefe, tifni jeiserem ga enggala tifni Adam nabal-nabalsusu aa jes eyebalam onnawer jes galserem. Jes gemerserem aaiserem jegme gemer, tifni galap nejesa damtabiliserem, tifni jeiserem ga enggala tifni Kristusmana gemerserem, tifni jeiserem ga taman waaken-girmana.

50Am afelen mesna, taterisi jeiserem ai ajes nasipminirim, igi jemna ga aas: Tifni nemna, ninibereiserem ane aawisibereiserem, tifni nemna jeiserem nei Uwa Sanbagirfar fas jem nejama gweyan, nunu Uwa Sanbagiri Jei aa jep gwesaram nem Sanbakfe anggwabura nei seyafter gemerserem. Tifni nemna jam tereserem ane ga gam butswena, nei tifni jeiserem jeme abak-abaksusfer nejama gweyan.

51Taterisi Uwa Sanbagiri aa jes mwangbisilim Jam eyebife, taterisi jeiserem Jei angtanefe Jam towasulmiyen jamer abaka, taterisi jeiserem ga waakenfer isa sarbisini. Taterisi jeiserem ga aas: Nei seyafter nejama teryen, jengga nei seyafter tifni ibirmiserem nes Jese golmisi.

52Trompeta umwef jam aa jep forolsaram, nei aafer-aafer jes jeberserem, nwena jam kamalsola gamserem, nei tifni ibirmi ga nesa damtabisi. Trompet tisna jeiserem jam aa jep ne sarbisirim, angtane jam tereserem jei se irtebistesa terewer, ane tifni ibirmiserem jebar gase naawena jamere abak-abaksus. Ane jes jepserem nei gemer nejeya gwenaram, nei tifni ibirmiserem ga nesa damtabisi.

53Nei ogirip nejeba gwenaram, nei tifni enggalf neya damtabili ogiri aaiserem jebar jep gam gwef. Tifni nemna jeiserem sege terbili. Jengga nei tifni ibirmiserem ga galap nesa damtabisi, tifni enggalfe taman waaken-girip jebar jep gam gwef. Tifni nemna jeiserem fas jam ge terbiyen, jengga tifni jeiserem nei abaksusfer ga jebaner nesa gwena.

54Nei tifni ogirmanaiserem nejesa damtabilirim, tifni jam tereserem, nei tifni jam teryeneiserem taman waaken-girmanaiserem, tifni jeiserem jam nejeba damtabisirim, jes jepserem Taterisi Uwa Sanbagirmanaiserem jep aa jes tulisulum gase etamwesa. Taterisi jeiserem ga enggam: "Angtane jei gamjon jam ge terbiyen, aam temawer Uwa Sanbagiri Jei tere angtanemana mes borolmini."

55Nei gamjon fas tere nejama erebiyen, aam temawer angtane gamjon fas jam ge terbiyen! Nei gamjon fas angtane jam tereserem nejama syebabuweyan, aam temawer angtane ba jamer se naawena jamer abak-abaksus!

56Angtane jei tere jam ne erbili, aam temawer jei mes ge towaswebili enggame, angtane jam aa jep gam tererem, jei gam tamtamtana etam-etama jelemanaiserem jem temawer. Jei mes ge towaswebili enggame, jeiba angtane etam-etamabaram, aam temawer jei masef ge unggwasbili Hukumu Uwa Sanbagirmana jam tikwebitife.

57Jengga au, nei Uwa Sanbagiri ganma pujite enggame nejewera gunurum, "Ase samfer golmini"! Yesus Kristus Tuhan nemna aa jes eyebilirim jeme, Uwa Sanbagiri Jei mes eyebili jega nei gamjon nejama ereyen jam terfe.

58Ga jem temawer, am afelen mesna ai unggwanfersus isa ajes nesiktababilirim, aamei kanaufer isa fina. Ane aamei Tuhan jamer isa tebana, aamei ijama aftannuyon. Aamei awelna Tuhan ibe aa jes golminirim, aamei awelna jeiserem jeber-jeber isa gweyibuwena, aam temawer aamei imsama towaswena enggame, awelna ijesa gwebilirim baabeta Tuhanmanaiserem jem gwonabe, awelna jeiserem jam ge elbesiyen.



 <<  1 Korintus 15 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran