Alkitab Mobile SABDA
[VER] : [BERIK]     [PL]  [PB] 
 <<  Efesus 3 >> 

1Jega jem temawer, ai Paulus sembayanga Uwa Sanbagirfe as gwebabana im temawer. Ai Taterisi Waakena Kristus Yesusem temawer ai isai nasipminenne ibe angtane Yahudimanyanaiserem. Ane ai ga ase jem temawer ne gaataantena bwiyibe.

2Bunarsus aamei imsa sarbili, Uwa Sanbagiri Jei ams destabana enggalfe, ai isa gam nasipmif ibe Uwa Sanbagiri Jei ims nesiktababili.

3Uwa Sanbagiri ga enggam mwangbisil Jei Jam eyebif Jei aa jes bilirim Kristus galap jes eyebiliserem jeme. Uwa Sanbagiri aa jes mwangbisilim angtane jam ne towaswebiyen jamer abaka. Jengga Uwa Sanbagiri Jei ams towastana Jei aa jes mwangbisilim, ane ai waakenfer ames sarbili. Ai bastowaifer is amsam towastababili jem temawer surta aaiserem jebe. Aamei waakenfer igalaba sarbilirim ilem inibe ai ajes tulistaabilirim, ga isa towaswena ai isa ajes towas-towastabaipminirim Uwa Sanbagiri aa jes mwangbisilim jem temawer.

4(3:3)

5Fwater galapserem Uwa Sanbagiri aa jes mwangbisilim, Jei angtanefe Jam towasulmiyen. Jengga namwer aas jepserem Mafnana Uwa Sanbagirmana, Jei mes towastababili Uwa Sanbagiri aa jes mwangbisilim, rasulu ane nabi Jelemanaiserem aa jes destabaabilirim jebe.

6Uwa Sanbagiri aa jes mwangbisilim ga aas: Angtane Yahudimanyan Taterisi Waakena Kristus Yesusem temawer aa galap ne taayibenerem, jei ga aa ge etamwebili Kristusfar daamfennaber ge nwinbefe. Ane angtane Yahudimanyanaiserem jeiserem ga daamfennaber ge etamwebili, angtane Yahudimana Kristus aa jei ne tebanaram jebaner. Angtane Yahudimanyanaiserem ane angtane Yahudimana ga aa ge etamwebili safna daamfennaber. Jeiba seyafter Uwa Sanbagirem angtanesam. Ane jei seyafter ga sene domolsa gwela Uwa Sanbagiri aa jes bilim Jei gase golmisi angtane Jelemanaiserem jebe.

7Uwa Sanbagiri waakena ap as mes eyeibene, ane Jei ai ga as destabana enggalfe Taterisi Waakena gam nasbinennefe. Jei baabeta as mes gulbana, jega ai awelna jeiserem baabetmer gam as gwebili.

8Ai safe angtane bastouya angtane Uwa Sanbagirmana seyafter gemerserem jemniwer, Uwa Sanbagiri Jei awelna waakenaiserem ap gulbana enggalfe, ai angtane Yahudimanyanaiserem ai jei agam towas-towastababinenefe Kristusem temawer. Ane aga jei ga as towas-towastababili Kristus Jeiba waaken-waakensusum, ane Jei waakensususerem ga nese golmini nebe. Seyafter waakensusu jeiserem jam barweyan.

9Uwa Sanbagiri Jei seyafter eyebil, ane Jei aa jes mwangbisilim Jam eyebife Jei angtanefe Jam towasulmiyen jamer abaka. Ane Jei awelna waakenaiserem ap gulbana enggalfe, ai angtane seyafter gemerserem agam towas-towastababif jamer jei waakenfer sene sarbili Uwa Sanbagiri aa jes mwangbisilim.

10Uwa Sanbagiri seyafter aa jes mwangbisilim, Jei ga enggalf mwangbisil, namwer aas jepserem mafnana baabetabara seyafter gemerserem winsibe, jei ga sene damtabisi, ane ga sege towaswebisi enggame, safna Kristusmana ibirmi jeiserem jei Kristusfar daamfennaberam naawena. Ane mafnana jeiserem jei ga sege towaswebisi, Uwa Sanbagirmana tousaiserem jeba unggwandwasusum seyafter gemerserem jem temawer.

11Gwanan-gwanansus jes jepserem Uwa Sanbagiri ga mwangbisil Jei Jam eyebif abakfer aa jei falaiserem. Ane Kristus Yesus, Tuhan nemna, ga jes eyebilint.

12Nei Kristus nesa tebana, ane nei Jebar daamfennaber. Jega jem temawer nei nejama ereyen Uwa Sanbagiri jam gwetmantaasife, ane nei gasa towaswena Jei nei nese tebabili.

13Ga jem temawer ai isa enggam ai balbabili uskambarsus, ini imna is jam ge jenbamiyen aam temawer ai bwiyip ajewer nwinirim. Ai bwiyip nwini, ga aam temawer ai Taterisi Waakena isa ajewer nasipminennerem ibe. Tamtamtala amna seyafter gemerserem ga enggalf, aamei is jei batobaabif.

14Uwa Sanbagiri aa jes mwangbisilim, jeiserem jem temawer ai agemer sarbisnenne, ai ga somwan dumem ga ai nwini Uwa Sanbagirfe sembayanga ga ai gwebabana im temawer.

15Uwa Sanbagiri Jeiba Uwasam angtane Jelemana seyafter gemerserem, taman waaken-girip ane ogiri aaiserem jep mese.

16Uwa Sanbagirmana waakenaiserem ane Jemna baabeta jeba unggwandwasusum! Jega jem temawer ai sembayanga ai gwebana enggalfe, Mafnana Uwa Sanbagirmana Jei baabeta ip is gase golmini, jega ini imna kanaufer ga is sege folbamini.

17Ai sembayanga as gwebana, jega aamei Kristus ginggitfer gam isa tebana, ane jem temawer ga Jei jeber-jeber im inip gase nuniton. Ai Uwa Sanbagiri enggam ai bala aamei Kristus enggam isa nesiktene, Jei is gemer nesiktababilirim.

18Neiba nemsama towaswena nei nesiktele Kristusmanaiserem jem tofna nejama domolbayan. Safe gam, ai sembayanga as gwebana enggalfe Uwa Sanbagiri Jei aamei is gase batobaabili, angtane Uwa Sanbagirmana seyafter gemerserem jebaner, jega aamei nesiktele Kristusmana gam isa enola enggame Kristusmana nesiktele jeba unggwandwasusum. Ane jem temawer ga Uwa Sanbagiri Jei ilem tifinip gam se nwini, jamer aamei isa bugufswena waakena Jemnaiserem seyafter gemerserem jeme. Ai seyafter jeiserem ai sembayanga as gwebana im temawer.

19(3:18)

20Nei Uwa Sanbagiri ganma pujite! Jei baabeta mes domola enggalfe seyafter nejesa bilibenerem Jei gase eyebili. Bunar-bunarsus Uwa Sanbagiri Jei baabetabara enggalfe, gam eyebif uskambarsus nei jes negama bilirim nelem inibe jewer.

21Uwa Sanbagiri aa jes mwangbisilim nem temawer jeba unggwandwasusum! Neiba angtane Jelemanaiserem, ane neiba Kristusfar daamfennaberam. Jega jem temawer nei Uwa Sanbagiri ganma pujite, namwer aas jepserem, ane jamer abak-abaksus! Amin, jes gamserem ga gamfener.



 <<  Efesus 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel