Alkitab Mobile SABDA
[VER] : [BERIK]     [PL]  [PB] 
 <<  Efesus 5 >> 

1Aameiba tane Uwa Sanbagirmanam, Jei uskambar ims nesiktababili. Ga jem temawer, aamei ga waakena tefner isa eyebili, Jei gemerserem.

2Kristus is gemer nesiktababilirim, ane Jei gwela Jemnaiserem aa golmini etam-etama imnaiserem jem temawer, gwela imna ga ina jam isa nesiksonanna. Kristus gwela Jemna aa galap gularam nem temawer, Jei ga eyebili Uwa Sanbagiri aa jes bilirim, ane ini Uwa Sanbagirmana ga saaser-saaserfer folbana jem temawer.

3Aameiba Uwa Sanbagirem angtanesam. Jega jem temawer angtane im jemata aaiserem jei etam-etama seyafter maaryena galserem jam ne eyebiyen. Ane ini imna unggwan-giri enggalfyan, galgala unggwanfer gam damtabif. Aamei ga waakensusfer isa gwena ini tabalbalmer, jega enggalf angtane enggam jam ge gubiyen, aamei maaryens ima gwebili, ane galgala unggwanfer gam damtabif.

4Ula kapka ijama nasbabiyen maaryens gwebife. Olsin-olsini etam-etama maaryens eyebiliserem jem temawer ijama nasbiyen. Seyafter jeiserem jei kapka enggalfe aamei ijesa nasbife. Jengga aarema imnaiserem jem ga Uwa Sanbagiri tefner isa pujitene, ga isa bala "Ase samfer golmini."

5Bunarfersus aamei aaiserem imsa towaswebili: Angtane maaryena aa jei ne gwebuwenaram, ane angtane ini unggwan-giri aa jemanem ge folbaminirim enggalfe galgala unggwanfer gam damtabif, angtane seyafter jes galserem jei Kristus ane Uwa Sanbagiri Jebar jam naaweyan, nunu Kristus ane Uwa Sanbagiri Jei aa jep ge gwenaram anggwabura seyafter gemerserem jem Sanbakfe. Afa ini imna jeber-jeber unggwan-giri is jam sege folbaminirim enggalfe galgala unggwanfer gam damtabif, jeiserem ga aas gemerserem aamei ga nensar tefner igama damdamulsif. Afa ini imna jes gamserem is gam sege folbaminirim, gam jega ini imna unggwan-giryen enggalfe Uwa Sanbagiri gam damdamtaasife, ane aamei Uwa Sanbagiri ijama pujiteyen.

6Angtane Uwa Sanbagiri jam sarbayanaiserem, ane jei etam-etama jeiserem ga gane eyebili, Uwa Sanbagiri Jei angtane jeiserem ga jese nasbabili, ane Jei gase tamtamtababili. Jewer ga ina jam isa gaaramisnenne! Angtane afweraiserem enggam ge gubili, "Au, nei etam-etama ganma eyebi. Jei kabwakyan." Jengga taterisi jes galserem jei ol kabwak. Aayai, angtane jeiserem is jam ne afaf-afaftababili!

7Aamei angtane jeiserem jemniwer ina ga jam isa bijausona.

8Aamei nalef Kristus ijama tebayan, gwela imna ga gwini gamserem, kapkaiserem ga jetefener igama eyebili. Jengga namwer aas jepserem, aamei Kristusfar daamfennaber, ane aamei nafa imsa domola. Jewer aamei ga jeber-jeber nafaber ga isa gwena, ane waakena tefner ga isa eyebili.

9Angtane nafap aa jei naawenaram, gwela jemna ga enggam: Ini jemna nornorfer ge folbamini. Jei bunarsusfer angtane gane batobaabif, ane jei waakenater gane eyebili.

10Sa towaswebi, ga jetefener isa eyebili Tuhan aa jes bilirim ini Jemna gam saaser-saaserwebafe.

11Angtane gwela enggam aa jei ge folbaminirim gwini gamserem, aamei angtane jeiserem jemniwer ina jam isa bijausona. Ane aamei ijama eyebiyen kapkaiserem jei aa jes ne eyebilirim. Jengga kapkaiserem jei aa jes ne eyebilirim jeiserem gasa nafabarul, jega angtane ga sege towaswebili jei aa jes ne eyebilirim jeba kapkam.

12(Afa nei etam-etama angtane gwin-gwini jei basyamer aa jes ne eyebuwenaram, afa nei jam nesa nasbilirim jem temawer, nei ga janma sefersona.)

13Nafa aa galap ertenerem apgal jigal sagabe, jepga angtane ga sege anggabili apgal jigala jeiserem je basa. Ane jepga apgal jigala jeiserem ga nafabarsona. Jes gemerserem aaiserem jegme gemer, aamei kapkaiserem angtane aa jes ne eyebilirim jame ijeba nafabarulurum, angtane gwela kapka jem aa jei naawenaram, jei ga sege towaswebili jei aa jes ne eyebilirim jeba kapkam. Ane angtane afwenefener jei ga sege irfwebili, ane kapka ga sene tobolsiwili, ane jei waakenaiserem jetefner ga sene eyebili. Jega jem temawer, ga sene bala: "Aamei angtane ijei tanaram, jase irwe nunuwer, ane jase irwe terewer! Kristus nafa ip is gas gulbana."

14(5:13)

15Nafa Kristusmana imsa domola, jega jem temawer gwela imna ina waakenfer isa gaaramisnenne. Aamei gam ijama gweyan angtane teisyena jei gamserem, jengga enggam isa gwena angtane tousa jes gamserem.

16Nunu aas jepserem angtane uskambar jei etam-etama kapkaiserem jes ne eyebili. Ga jem temawer, aamei dwona jam igama domolaram, jes jepserem aamei jeber-jeber waakenater ga isa eyebili.

17Aamei angtane jafner wofoyafelaiserem aamei galyan. Jengga sa towaswebi Tuhan aa jes bilirim aamei ijesa eyebife.

18Fo angguru uskambar ipsama telbebilirim, jamer igama mwalswena. Afa aamei jeber-jeber gamfener isa gwenaram enggame, fo angguru igama telbebili ane igama mwalswena, gam jega, gwela imna ga isege wasfer-wasferswebamini. Jengga Mafnana Uwa Sanbagirmanaiserem im inip nuniton jamer dup.

19Aamei jam isa nasowenaram angtane nafsibar, ga aas isa balbabitowena, taterisi mazmurmana, ane simal rohani, ane taterisi simala Mafnana Uwa Sanbagirmana ip is jes kitulminirim. Tuhan sa pujite ilem inip, ane simala ga isa twola enggalfe Jei gam pujitef.

20Bosna Yesus Kristus Tuhan nemnaiserem jeme, ga isa bala Uwa Sanbagiri, Uwa nemnaiserem, "Ase samfer golmini seyafter aa jei etamwenaram jem temawer."

21Aamei seyafter Kristus ijeya tebanaram, ini imna is ferfermer sege folbamini enggalfe ina jam isa sarminenne, Kristus jem gam gaartefe.

22Aamei wini anggwanabaraiserem, aamei Tuhan igemera sarbanaram, ane ga ima eyebili Jei aa jes bilirim, jes gemerserem aamei anggwana ilemana ga jam igam sarbana.

23Ai jeiserem enggam ai bili, aam temawer anggwana ba sanbakfe jei gam gwena wiminibe, jes gemerserem Kristus Jeime nem Sanbaka, nei Jei nejeya tebanaram. Neiba angtane Kristusmanam, ane Jei nes gase waakentababisini.

24Jewer ga, jes gemerserem angtane Kristusmana ga sene sarbili Kristus aa jes bilirim, aamei wini anggwanabaraiserem, anggwana ilemana ga jamer igam sarbana.

25Aamei anggwana winibereiserem, wini ilemana ga jam igam nesikulu, Kristus gemerserem Jei nei nes gemer nesiktababilirim, ane Jei nem temawer ga tere enggalfe,

26nei gasa etamwena angtane Jelemanfe. Jei nems wirtabaabili taterisi Jemna jeme, ane fo mese.

27Jei enggalf terent nes gam aftabifelf Jeleminibe. Jes jepserem nei etam-etama gamjon nejama eyebiyen, kapkaiserem nemnibe fas, jengga neiba angtane Jelemanam, ini nemna nes tabalmer ge folbamini. Ane nei Jebar ga nesa nwinsi.

28Aamei anggwana winibereiserem, wini ilemana ga jam igam nesikulu, ane jamer igam gaarabisnenne, jes gemerserem aamei tifini seyafter ilemana gemer igam gerebaasnennerem. Anggwana wini aa galap nesikulurum, jei ga enggala jena aa gemer gam gerebaasnennerem, aam temawer jei winibar daamfennaber.

29(Aamei imsa towaswebili, angtane jei tifni jelemana jam kabwakulyon, jengga jena waakenfer gam gerebaasnenne, Kristus nes gemer gam gerebaabisnennerem ga gemer,

30aam temawer neiba angtane Jelemanam, neiba Jebar daamfennaberam.)

31Taterisi Uwa Sanbagirmana jep ga enggam baatultel: "Ga jem temawer anggwana ene yo jeta jam gam mirsonaram, ane wini ga gam gula, gam jega, jei winabar daamfennaber ga gangge nwini."

32Taterisi Uwa Sanbagirmana jeiserem ba bunaram, ane jemna igi ba unggwandwasusum. Ane ai amsam sara jeba Kristus ane angtane Jelemana jem temaweram.

33Taterisi bunarsusfer jeiserem ga wi anggwa mese jem temawer. Ai isa gamjon balbabili: Aamei anggwana winibereiserem, wini ilemana ga jam igam nesikulu, aamei in ina gemer igam nesiktenennerem. Ane aamei wini anggwanabaraiserem, aamei ga anggwana ilemanaiserem jem gwonap igam gwena, ane jep ga waakenater igam nasibene.



 <<  Efesus 5 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran