1Aamei tantantane, aamei iye uwa ilemana taterisi jemna ga jam igama saripmini, ane jeter ga igama eyebili iye yo uwa jei aa jes gangge bilirim. Tane Tuhan aa jei ne tikwebaatinennerem, jei ga jes gemerserem ga gemer se naawena,
2aam temawer Uwa Sanbagiri Hukumu Jemna aa galap kitulmilim, Jei enggam bil hukumu nawer-naurabara jeiserem jebe: "Aamei waakenfer isa nwini iye yo uwa jebar, ane bosna iye yo uwa jemna ga jam isa golmitena." Hukumu nawer-naurabara jeiserem, jeba hukumu nabal danalaiserem Uwa Sanbagiri enggam aa jes bilim, afa aamei hukumu jeiserem waakenfer jes isa sarbilirim, aamei waakenaiserem ga isa domola.
3Jei ga enggam gul, "Ga jes gemerserem ga gemer isa gwena, jega aamei waakenfer gam isa gwena, ane umuru imna is ga sege bwaleswebamini ogiri aaiserem jebe."
4Iye mese uwa, aamei tanna gam ijama gwebabiyen, jamer tanna jeiserem jemna ini gangge kabwakswebaipmini, jengga jebe waakenater igama eyeipmini. Tane ilemana waakenfer igama gerebaabisnenne. Ane jei kapkaiserem jam gam eyebilirim, ga jam igama uftana, ane ga jam igama towas-towastababili taterisi Tuhanmanaiserem waakenfer gwelaiserem jem temawer.
5Aamei angtane awelna nenesfe ijeya gwebilirim, aamei angtane sanbaka ilemana ga jamer igama sarbana, aamei Tuhan gemer igama sarbanaram. Sanbaka ilemanaiserem ga jem gwonap isa gwena, ane jei aa jes gam bilirim ga isa eyebili ini waakenmer.
6Akar-akarem awelna ijama gwebiyen enggalfe angtane sanbak ilemana is gam damtabife, jega jei enggam is gam balbabife aamei awelna waakenfer ima gwebili. Aameiba angtane Kristusmanam, jewer ga aamei awelna waakenfer isa gwebili enggalfe, Uwa Sanbagiri Jei aamei enggam is gam balbabife aamei awelna waakenafer ima gwebili.
7Angtane sanbaka ilemanaiserem awelna jemna ga ini waakenmer isa eyebili, awelna Kristusmana igemera gweyibenerem. Aamei ilem inibe ga enggam igama gunu, "Awelna aaiserem gam ke alem sanbakmanfenna, jengga awelna aaiserem je Kristusmanam."
8Sa sarbistaabon, Tuhan Jei fwaina waakena se golmini angtane awelna waakenfer aa jei ne gwebilirim jebe, angtane awelna nenesfe aa jei gam gwebilirim, ane angtane sanbaka mese jegme gemer.
9Jes gemerserem, aamei angtane sanbakfe ijeya gwenaram, ini imna ga ise waakenfer sege folbamini, angtane awelna imna aa jei ne gwebilirim jem temawer. Ol dagam ijama balbabiyen. Sa sarbistaabon, aamei ane angtane awelna imna aa jei ne gwebilirim, Sanbaka imna ba daamfennam taman waaken-giribe. Ane Jei angtane afa Jam artayan, Jemna fwaina jeiserem armanaber gam syenulu.
10Taterisi umwef jeiserem amniwer ga aas: Baabeta Tuhanmana Jeba unggwandwasusum, ane aamei Jebar daamfennaber. Jega jem temawer aamei baabetfer gam isa gwena, baabeta Jemnaiserem jeme.
11Anggwana ginaf aa gemer gam betwenaram, jigala aa gemer gane menetababisinirim jem erafe, sa taabi Uwa Sanbagiri seyafter is jes golminirim enggalfe kanaufer jem gam isa fina, bawasa ini imna is galap se dektebaipmini.
12Ai taterisi jeiserem agam bili, aam temawer ginanggwana nemnaiserem jei angtaneyan. Fas. Ginanggwana nemna jeiba bwat kapka baabetabara seyafter aa jei ge wofebilirim nem nenennabe, ane nei jebar negama eraf. Bwata kapka jeiserem, jei angtane gwin-gwinip aa jei naawenaram jem sagap gwena ogiri aaiserem jebe.
13Ga jem temawer, sa taabi Uwa Sanbagiri seyafter is jes golminirim enggalfe aamei bawasfar ijema erafe! Jepga jeber-jeber bawasa jei gam fortya enggalfe ini imna is gam dektebaipmif, aamei ga jebar baabetfer ga isa erna. Ane bawas safe ini is abakfer se dektebaipmini, aamei kanaufer gemer isa fina.
14Ga jem temawer aamei kanaufer isa fina! Anggwana ginaf betwela gamserem, jei gane menetababisini nonggolfini gane bunuwili tomonfe, ginna, ulum, fon jega tumilgala jep bokolntef, ane kambata gam kamwini, jega waakenfer gam erafe. Jes gemerserem aamei aaiserem ga gemer isa eyebili, jega aamei bawasfar waakenfer gam isa erna: Aamei jeber-jeber jam isa gwenaram taterisi bunarsusfer Uwa Sanbagirmanaiserem ga jetefener isa onsobili. Aamei jeber-jeber waakena tefner igama eyebili jeiserem jes gamserem Uwa Sanbagiri aa jes bilirim. Aamei jeber-jeber jam isa menetwesini enggalfe Taterisi Waakena gam nasbinennef. Taterisi jeiserem ga enggam: Kristus aa Jes eyebilirim jeme, angtane ga sege etamwebili Uwa Sanbagirfar daamfennaber jam gwefe.
15(6:14)
16Bawasa ini imna is galap dektebaipminirim, jes gemerserem bawasa ga kajugwana gemer gam afsunnurum im inibe. Anggwana ga jes gemerserem ga gemer gangge erabana, jei dumu jemna jam gam jejetana enggalfe ginna jem taarbaf, anggwana jes gemerserem aamei jegme gemer Kristus jeber-jeber uskambar isa tebana. Jepga bawas kajugwana jam gam afsunnurum, jam ne kaweyan im inibe.
17Ane jes gemerserem topi besini angtane duka jem gam motolsinirim jam eralabe, aamei jeber-jeber isa sarbistaabonwena Uwa Sanbagiri aamei is Jeye waakentababisinirim. Taterisi Uwa Sanbagirmana Mafnana Jemna ip aa jes golminirim, jeba nombeya imna galserem.
18Mafnana Uwa Sanbagirmana Jei aamei jeme is gemer batobaabilirim, aamei jeber-jeber sembayanga isa gwebabuwena enggalfe Uwa Sanbagiri gam pujitef, ane ga isa bilibene aamei ijesa bilirim Uwa Sanbagirminibe. Aamei ijama tikweyan sembayanga jam gwebafe. Ane sembayanga isa gwebabana Uwa Sanbagirfe angtane Kristen seyafter gemerserem jem temawer.
19Ane sembayanga jam isa gwebanaram am temawer mese, jega ai jam ajep nasipminirim angtanefe, Uwa Sanbagiri Jei taterisi Jemna ap as gase gulbana. Ane aamei sembayanga am temawer jam isa gwebabanaram, jega ai ajam ereyen Taterisi Waakena jam ajep nasbinennerem, taterisi angtane gwanan jam ne towaswebiyeneiserem.
20Yesus Kristus Jei ams baftana enggalfe Taterisi Waakena agam nasbinennef. Ane Taterisi jeiserem ai ajewer nasbinennerem, ai ga as jem temawer ne gaataantena bwiyibe. Yesus Jei awelna jeiserem ap gulbana enggalfe ai Taterisi Waakena jeiserem jem temawer agam nasbinennef. Ga jem temawer, aamei sembayanga as jam isa gwebabana, jega ai ajam ereyen Taterisi Waakena jam ajep nasbinennerem, ane jega ai baabetfer gam as nasbinenne.
21Ai enggam ai gunu aamei ijama towaswef am temawer aa je etamwenaram, ane ai ajes eyebilirim. Jega jem temawer ai Tikikus, nelem afelna nei nejesa nesiktenennerem, as baftana imnip gwife. Jei awelna Tuhanmana gam gwebili, ini waakenmer. Jei jam se forotnaram imnibe, ga is nasipmini ibe seyafter aa jei etamwenaram am temawer. Ane jei taterisi seyafter angtane aaf ajebara nwinirim, taterisi jemna jem temawer ga is nasbaipmini ibe. Ane jei ga ini imna is gase kanautabaipmini.
22(6:21)
23Ai sembayanga as gwebana Uwa Sanbagiri, Uwa nemna, ane Tuhan Yesus Kristus, Jei ini imna waakenfer is gas gwebaipmini. Ane Jei aamei is ga sege batobaabili, jega aamei ina gam isa nesiksonanna. Ane Jei baabeta ip ga is golmini, jega aamei Yesus jeber-jeber waakenfer gam isa tebana.
24Ai sembayang as gwebana Uwa Sanbagiri Jei waakena Jelemanaiserem ip is gase golmini aamei seyafter gemerserem Tuhan Yesus Kristus bunarsusfer iJeya nesiktenennerem.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel