Alkitab Mobile SABDA
[VER] : [BERIK]     [PL]  [PB] 
 <<  Kisah Para Rasul 12 >> 

1Jes galapserem Raja Herodes ga kapkaiserem jes eyeipmini angtane Kristenfe.

2Jei Yakobus, Yohanesem ayana jes bala jam munbofe, ga enggam balbabili, "Nombeyem isa tegila."

3Angtane Yahudimana jeiserem aa galap ne domolaram, ini jemna saaser-saaserfer ge folbamini angtane Kristen jam ne munbobife. Jega jem temawer Raja Herodes jei Petrus ga bala jam tebafe. Jeiserem ga enggalap etamwena masara Roti Tanyana jes Tombaabif afa masara Paskana aa galap falaram.

4Petrus jame aa galap ne tebanaram, bwiyip ga aane gaataantena. Herodes ga awelna golmini ginanggwana safna nawer-naura jebe, safna daamfenna jep ga ginanggwa nawer-naura, ane jei Petrus ga aane gerebaasnenne. Raja Herodes ga enggam mwangbisini, masar Paskana jam aa jep barwenaram, Raja Herodes ga Petrus gase aftawena angtane unggwanfer jepserem jem nwenabe, ane jep gam tenebawefe.

5Ga jem temawer Petrus ga bwiyip nuniton, jengga angtane safna Yesus aa jei ne tebanaram jei sembayanga jeber-jeber ne gwebabawena Uwa Sanbagirfe Petrusem temawer.

6Gwini daamfenna nalefe Raja Herodes jei Petrus jam aftaweyan angtane unggwanfer jem nwenabe jep gam tenebawefe, Petrus jei bwiyiber nwini. Tafna jemna rantena naura ga jem ne faarebana, ane ginanggwa naura jem terterewer ge tananna. Gamjon mwa kawetelabe, ginanggwa gamjon naura jep ge fina.

7Aafer-aafer malaikata Tuhanmanaiserem Petrusem tarnap ga fyatetya. Ane nafa malaikatmana mwonap ga kautena. Malaikata jeiserem Petrus ga gin-gintene jamer Petrus aa irwena, ane ga aa bala, "Tatar, se irwe!" Jes jepserem rantena jeiserem ga aane fernebaatini Petrusem tafnawer.

8Malaikata jeiserem ga bala, "Ban se ginggitulsi ane tofgola se kamwi!" Petrus jes gemerserem gemer ga aa gwena. Malaikata jeiserem gamjon ga aa bala, "Fene imna sagamanaiserem se kamwi, ane ai ga asis onsobana!"

9Petrus malaikata jeiserem ga onsobana bwiyiwer, jebaner ga aa ge totintye. Petrus jei teisyena jei ke bunar totini, afa jei esers tana.

10Jei ginanggwa naura gwanan jeiserem ga aa ge ayemintye, ane gamjon ginanggwa naura jeiserem jes ge ayemintye, jamer aa ge fortya mwa besi unggwandusa jem tarnabe kotanap jewer gwilaiserem. Mwona jeiserem jener ga gwawetini, jei jewer ge totinyefe. Jei ga aa ge totini jitefwer, nels tamer ga aa ge sofwa. Abakferyan malaikata jeiserem Petrus jep ga mirtetefala.

11Jes jepserem Petrus ga towaswena jeleminip aa je etamwebanaram jeba bunaram. Petrus ga gunu, "Ai ga as towaswel Tuhan ba malaikata Jelemana bunaram baftannu enggalfe ai as gam aamsinfe Herodesem tafnawer, ane seyafter kapka gemerserem angtane Yahudimana jei abe aa jes ne mwanggibaasinirim jewer."

12Petrus jame aa galap towaswebilirim jemnip aa je etamwenaram, jei ga aa sofwa Mariyam jenabe, Yohanesem eneserem. Yohanesmana bosna afwer ga Markus. Angtane unggwanfersus Mariyam jenap aa jei ge betwebilirim, jei sembayang ga aane gwebana.

13Petrus mwona aa galap entewilirim sitawer, tane yafma jena jeiserem awelna jep aa jei gwebuwenaram bosna Rode, jei ga jela enggalfe gam damtaf mwona nane enentene.

14Pintu tarnabe jei taterisi Petrusmana ga saribene, ini jemna saaser-saasersusfer ga falbili, jengga jei mwona jam tertesiwiyen. Jei gamjon tatar aa gwina angtane jep aa jei ge betwebilirim jam towastababife enggame, "Petrus aa fitna mwa totiyele tarnabe!"

15Angtane jep aa jei ge betwebilirim enggam ga aane bili, "Aamke dwak teten?" Jengga Rode jei gamjon uskambar ga gutena, "Bunar-bunarsus jeiba Petrusam!" Jepga jei ga aane tamawolbili, "Fas, jeiba malaikata jemnaiserem."

16Jei gemer ge nasbawena, Petrus jei mwona ga enentewili. Jepga jei mwona aa galap ne tertebaasiwilirim, jei ga aa ge bitbitwebili Petrus jam aane damtanaram.

17Petrus jei tafna kukmer ga gweipmini enggalfe, jei olgulyamer gam ge nwinbef. Jes jepserem jei ga aa nasipmini Tuhan aa gam geserstenaram bwiyiwer. Ane enggam ga balbabili, "Aaiserem ga jam isa towasulbono Yakobusfe, ane nem afelna afwer gemerserem jei mese jei jam isa towastababili." Jeiserem jame tabanulminirim jam nasipmilibe, Petrus jem ga aa mirtebitefala, tampata nafsiserem jewer ga sofwa.

18Jem gwirmer gwinibenersus, ginanggwana era ga aane dena, jei jena jam ne taanaaminenne enggame, "Petrus jei fwera?"

19Raja Herodes angtane ga balbabili Petrus jam ne terelbefe, jengga jei Petrus jam ne damtayan. Jepga Herodes ga gunu ginanggwana jam tenebaabife, ane taban angtane nensa ga balbabili ginanggwa jeiserem jam munbobife. Jeiserem taban Raja Herodes ona Yudeyawer ga ge sofobili, kota Kaisareyawer ge gubili, ane ga jep ge nwinbene.

20Raja Herodes jei angtane kota Tirus ane Sidon jes nasbabili. Jega jem temawer angtane Tiruso Sidonmana ga aa ge betwebili, ane jei safna daamfenna ga jes ne baftabili Raja Herodesminip ge sofobife. Nabal-nabalsusu jei angtane bosna Blastus jemnip ge sofobili. Blastus jei angtane sanbaka jena unggwandusa Herodesmanaiserem jebe. Gamjon jei Raja Herodesminibe ga aa ge gubili waakenfer jewer gwef jes ne bilibene, enggalem temawer tumilgala aa jes ne damtabuwenaram Raja Herodesem onnawer.

21Ane nunu daamfenna aa jes ne bilirim, Raja Herodes fene waakena ga kabwabili, taman nwini Rajamanaiserem jep ga nwintena, angtane unggwanfer taterisi jep ga nasipmini.

22Ane angtane unggwanfer jei aa jei ne sarbasinirim, jei ga aa ge gubitowena, "Taterisi aaiserem je angtanemanyan, jengga taterisi aaiserem je Uwa Sanbagirmana jes galserem."

23Ane jes jeberserem malaikata Tuhanmana jei Raja Herodes ga aa saftana, enggalem temawer jei bosna Uwa Sanbagirmana jam gulbateyan. Ane ufa Raja Herodes ga aane tumna jamere aa tere.

24Jepga taterisi Uwa Sanbagirmanaiserem ga bijauswebana jam ne nasibenenelebe, ane angtane unggwanfer Yesus ga aane tebana.

25Barnabaso Saulus jei awelna jemna jam aa galap ge tabanulurum angtane galgalyanaiserem doini jep jam ge kitulminenefe Yerusalem je, jei gamjon ga aa ge warauwa kota Antyokyawer. Ane jei ga Yohanes Markus gemer ge aftayala.



 <<  Kisah Para Rasul 12 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran