Alkitab Mobile SABDA
[VER] : [BERIK]     [PL]  [PB] 
 <<  Kisah Para Rasul 2 >> 

1Nunu Pentakosta jame aa galap falaram, angtane seyafter Yesus aa jei ne tebanaram jena daamfennaiserem jeber ga aa ge betwebili jenabe.

2Tisana niniber ga aane sarbili winsiwer aa je iretyaram, bwona uskambar ga nane gwebat. Ane bwona jeiserem jena seyafter gemerserem jep ga aane kabwatenanna, ane angtane Yesus aa jei ne tebanaram jenap nwini seyafter gemerserem jei ga aane sarbili.

3Jewer ga maflama tokwa galserem ga aane damtabili aa ge bwere-bwerebuwena angtane daamfen-daamfennem jem sagabe.

4Mafnana Uwa Sanbagirmana angtane seyafter jeiserem ga tebabili, jepga jei ga aa ge towaiwebili ula nafis-nafsiserem jem jam ge nasbawefe. Jei ga aas ne nasbabili ula Mafnana Uwa Sanbagirmana aa jes golminirim jam nasewefe.

5Jes galapserem angtane Yahudimana jei ga unggwanfersus kota Yerusalem je aa jei ge nwinbenerem, jei negeri nafis-nafsiserem ga jewer ge forobuwetya ogiri seyafter gemerserem. Jei Uwa Sanbagiri jei ne tebana, ane nunu jeber-jeber jei sembayang aane gwebabuwena.

6Tisana jeiserem jame aa galap ne sarbilirim, angtane unggwanfersus jep ga aa ge betwebili. Jei seyafter jam ge bitbitwebili, aam temawer angtane Yesus aa jei ne tebanaram jei jelem olem aa jewer ge nasbawenaram.

7Jei uskambar jam ge bitbitwebili, ane jepga aa ge gubili, "Angtane aa jei ge nasbawenaram ula unggwanfer aaiserem jeme, jei ona daamfenna jewer ge jalbili, ona Galileya!

8Nei ula nemnaiserem daamfen-daamfennem ga fomfom nesa sarbabisini?

9Nei angtane ona Partya, Medya, Elam mese; nafsi ona Mesopotamya, Yudeya, ane Kapadokyaminiwer afwer nejewera jalwena. Ane afwer ga aawer ge jalbili propinsi Pontus ane Asya,

10Frigya, ane Pamfilya, negeri Mesir ane ona Libya, kota Kirene aa jem gwetmanfer nulnaram. Angtane afweraiserem nemniwer jei ga kota Romawer ge jalbuwena,

11jeiba angtane Yahudimana ane angtane anggwabura nafsiserem jei mese agama Yahudi aa jei ne taabilirim. Angtane afweraiserem jei naantei Kretamana, ane afwer negeri Arabwer ga aa ge jalbili. Nei safe ona nafis-nafsiserem nejewera forowetya, nei neya sarbabili nem olem ge nasbawena. Jei ga aas ne nasbili seyafter waakensususerem Uwa Sanbagiri aa jes eyebaabilirim jem temawer!"

12Angtane jeiserem seyafter ge bitbitwebili, jena ga aane taanaaminenne, "Aaiserem je fomfoma?"

13Jengga angtane nafsi afwer jei jam ne bweraltababili, enggam ne balbabili, "Angtane jeiserem jei jam ge mabukswebili."

14Petrus ga irwena sebelas Rasulu afwer seyafter gemerserem jebaner, ane Petrus ol dagame enggam ga nasowena angtane unggwanfer jem tarnabe, "Aamei angtane Yahudimana ai gemerserem, ane angtane seyafter ijeya nwinirim kota Yerusalem je, ai taterisi aaiserem ibe isa ajam nasipmif. Aamei taterisi aaiserem ga waakenfer isa sarbisini.

15Aamei enggam ima gunu, angtane aaiserem jei jam ge mabukswebili, jengga fas, namwer aas jepserem jem sembilan gwinibener.

16Jengga aafe aa je etamwenaram ga enggam, Uwa Sanbagiri Nabi Yoel mes bal, ane Nabi Yoel jei nep ga nes jei golmil:

17Uwa Sanbagiri enggamam gul, 'Nunu umwef jepserem, Ai Mafnana Amnaiserem As golmisi angtane seyafter gemerserem jebe, jega girtowai tane ane yafontowai tane imnaiserem jei taterisi Amna As ga sene nasibenense, ane angtane tansi ane anggwabak jei eserem sene damtabisi, taterisi Ai Ajes balbaipminirim jebe.

18Ane angtane awelna Amnip aa jei ne gwebilirim, wi mese anggwa, Mafnana Amnaiserem As golmisi nunu jeiserem jeme, ane jei taterisi Amnaiserem ga sene nasbisi.

19Ane Ai As eyebisi angtane gwanan jam ne domolyanaiserem winis sagabe ane ona gwonabe, angtane sene gerebaabisi aawis, ane tokwa, ane nunggwan murmur.

20Gwere gwinf se etamwesa, ane mwara se berberswesa, aawisi gamserem ga gas etamwesa, seyafter jeiserem sege etamwebisi, nalefe nunu unggwandusa Tuhanmana jam folbayan, nunu Jei jem foryalaiserem.

21Jes jepserem angtane afa Tuhan aa jei ne gwarenbanaram jam batobaabifi, Tuhan Jei angtane jeiserem se waakentababisini.'

22Am afelen mesna angtane Israelmana, taterisi aaiserem ga waakenfer isa sarbisini ai jam as nasbilirim: Yesus angtane tamna Nasaretmanaiserem, aamei imsama towaswena Jem temawer enggame, Uwa Sanbagiri Jei Yesusf awelna mesam gulbana Jei ibe is jes eyeipmiliserem, Jei ibe is mesam eyeipmini aamei ijama domolyanaiserem im nenennabe, bwembwemayo ane nafis-nafsi, seyafter jeiserem jeme aamei inera towaswena.

23Angtane Yesus ip is mes ne gaarmini, ane Uwa Sanbagiri mes towaswena aamei kapka ijesa eyeibeleiserem Jebe. Ane Jei ga gunu, 'Sya, aamei sa eyebi angtane kakala nafsiserem jebar.' Aamei Yesus ga ima munbono, ti salibip ima daktanswena.

24Jengga Uwa Sanbagiri Jei mes irtestena angtane jam tereserem jemniwer. Yesus bitisiwer mes aftannu, aam temawer baabeta fas Yesus jei tebasili bitisibe.

25Raja Daud enggam mesam nasowel Yesusem temawer: 'Ai Tuhan jeber-jeber ai gerebawena, Jei am taasfolawer gam fina, ai as jam gerebaasnenefe, jega angtane kapkaiserem jei fas ai as jam ne erelteyen.

26Jei ai as jewer gerebaasnenewenaram, ini amna saaser-saaserfer ga as jem temawer folbana, ane ai taterisi waakenater ai nasbabuwena. Ai safe jam as tere, ini amna ase unggwan-girem folbana Uwa Sanbagirem temawer.

27Aamei ai jafner as Ijam gerebayan ona angtane jam tereserem jebe, ane Aamei, Angtane Imna Igam nesiktene, Ijam tatwaltaasiyen Jem futunu jam butswefe.

28Aamei nele waakenaiserem Ap Asi mesam towastabana enggalfe Ai waakenfer aa jep gwelaiserem. Aamei Ase jewer egantaasinirim Ilem tarnabe, ane ini Amna ga ase jem temawer saaser-saaserswebana.'

29Am afelen mesna, ai isa jamer bilipmini, aamei gam ima towaswena enggame Raja Daud asal-asalgir nemna. Jei mes ter, ane tonmwa bitisip ga aane gaataantel, ane tonmwa bitisi jeiserem gemer fala nemnibe nunu namwer aaiserem aafer fala.

30Jengga Daud jei gwanan gemer aa galap gwelam, jeiba nabisam, ane jei mesam towaswebil Uwa Sanbagiri aa jes bilibelem jebe. Uwa Sanbagiri ga aas bilibel, 'Bunar-bunarsus Ai tane asal-asala imnaiserem as gaartena Rajafe, aamei gamserem.'

31Jei tousa Uwa Sanbagiri aa jes eyebiliserem. Raja Daud mes gul Mesias, Angtane Uwa Sanbagiri Jei bunarsus aa Jes balam Jam baftanafe, Jei se irwena angtane jam tereserem jemniwer. Raja Daud enggam gul: 'Uwa Sanbagiri Jei Raja jeiserem jafner Jam gerebayan ona angtane jam tereserem jebe, Jemna tifni jam butsweyan.'

32Yesus aaiserem Uwa Sanbagiri ba Jesam irtestena terewer, ane ai seyafter bunarsusfer amsa damtana.

33Uwa Sanbagiri Yesus aa galap gaartenaram Jem taasfolawer taman waaken-giribe, Uwa Sanbagiri Jei Mafnana Uwa Sanbagirmana ga Jes gulbana gwanan aa jes bilibenerem. Gam jega seyafter aamei ijesa domolaram, ane ijesa sarbilirim aafe, jeiserem mes ge etamwebili aam temawer Yesus Mafnana Uwa Sanbagirmana ap mes golmini.

34Raja Daud jentowai jam tauyan taman waaken-giribe, jengga jei ga enggam gul: 'Tuhan Uwa Sanbagiri enggam bal Tuhan amnaiserem: se nwinte Am taasfolawer,

35jamer ginanggwana Imnaiserem Ai jei As gwebabili ga sege nwinbetena Im tof gwonabe.'

36Jega jem temawer angtane Israelmana seyafter gemerserem, aamei ga jam isa towaswena bunarsusfer enggame, Yesus ijesa daktanswenantam ti salibibe, Yesus jeiserem Uwa Sanbagiri ba Jesam destabana Tuhanf, ane Mesiasf gwefe."

37Jame aa galap ne sarbilirim taterisi jeiserem, ini jemna ga aa ge jenbamini. Jepga Petrus ane Rasul-rasul afweraiserem jei mese, jei ga aane tenebaabili, "Am afelen mesna, ai ga bas asa eyebili?"

38Petrus ga balbabili, "Aamei etam-etama kapkaiserem jewer jam isa irfwena, ane aamei daamfen-daamfennem ga jam isa baptiswena bosna Yesus Kristusmanaiserem jeme, jega etam-etama imna is gase wirtabaipmini, ane waakenaiserem ga isa taabili Uwa Sanbagirminiwer. Waakena jeiserem ga aas, Mafnana Uwa Sanbagirmana.

39Uwa Sanbagiri ibe aa jes bilipminirim, jeiserem Jeiba ibam bilipmini jega enggalf aamei ane tantantane imnaiserem, ane angtane seyafter tamna bijauwap aa jei ge nwinbenennerem jes mese, angtane Tuhan Uwa Sanbagiri nemnaiserem Jei aa jes jenbebilirim, jei seyafter gemerserem Jemnip ga sege jalbili."

40Petrus bastowaifer jam nasoweyan, jengga jei unggwanfersus nasowena, ititmer enggam ga balbabili, "Tifni seyafter gemerserem sa kitulbo Uwa Sanbagirfe, jega Uwa Sanbagiri Jei kapka ip jam eyeipmiyen, angtane kapkaiserem jep aa jes kitulminirim."

41Angtane unggwanfersus taterisi Petrus aa jes nasbilirim, angtane taterisi jeiserem aa jei ne taabilirim jei ga aane baptistababili, ane nunu jeiserem jeme gamjon aane eterbilirim angtane unggwanfer ga enggammer 3.000.

42Nunu jeber-jeber angtane jeiserem jei Rasulu jeiserem, angtane Yesus aa jes baftabilirim, jes ne sarbabisiwena, ane ini jemna saaser-saasera seyafter ga aa ge betwebili. Ane angtane seyafter ga aane dwena, ane jei seyafter sembayanga gane gwebana.

43Angtane Yesus aa jes baftabilirim jei anesus aa jes ne eyebilirim, angtane gwanan jam domolyan, jei bwembwem mese gane eyebaabili jamere angtane seyafter aa ge erebili.

44Ane angtane seyafter Yesus aa jei ne tebanaram, jei daamfennaber ga naawena, ane galgala seyafter jemnaiserem jei seyafter ga aane bunulu jam erbife.

45Ane jei galgala jemna ga aane jualtababili, ane doini ga aane syentabaabili angtane seyafter gemerserem jebar, jei jena aa jes ne balbabilirim.

46Jei nunu jeber-jeber bunar-bunarsusfer ga aa ge betwebuwena Jena Uwa Sanbagirmanaiserem jebe. Ane angtane seyafter gemerserem jei jelem jenaber gam dwena ini saaser-saasermer, ane ini waakensusu.

47Ane jei Uwa Sanbagiri jeber-jeber ga aane pujitawena, ane angtane nafsi ini jemna jei aa ge saaser-saasersweipmini jebar seyafter jam gwefe. Ane nunu jeber-jeber Uwa Sanbagiri Jei angtane gamjon ga kitulmuwena jebe, angtane Uwa Sanbagiri jes waakentababiliserem.



 <<  Kisah Para Rasul 2 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel