1Gubernur Festus propinsi jeiserem jebe aa galap fornaram, nunu nawer-ningna jewer ga kota Kaisareyawer ga sofwa, kota Yerusalemwer gwina.
2Jepga angtane imam-imam sanbakaiserem, ane angtane sanbaka Yahudimana jei Festusminip ga aa ge jalbili, ane kapkaiserem Paulusem temawer jep ga aane nasbaibene.
3Jei Festus uskambar ne bala, "Afa ini imna waakena abar, Paulus se jenbe gamjon gase jela Yerusalem je." Angtane jeiserem jei gam aa jewer ge gubilirim, jei aam temawer ge gubili jei ula enggam mes ne tagalbaasini, "Nei Paulus nelep nesa munbono."
4Festus angtane jeiserem ga tamawolbaabili, "Paulus jei bwiyip nwini kota Kaisareya je, ane an mesna nunu abakefyan ai gamjon ga as warauwa jewer.
5Ga enggam, angtane sanbak-sanbaka imnaiserem jei abar asa sofwa Kaisareyaminip, ane jei taterisi kapka Paulusem temawer jep ga sene nasbili, afa Paulus jei kapkaiserem bunar eyebiliye."
6Festus jei nunu delapan afa sepulu jei kota Yerusalem je jam nwinibe. Jepga jei gamjon ga warauwa kota Kaisareyaminibe. Ane jem gwirmer ga Festus jei mwonap nwini, mwona jeiserem ga angtane sanbagiriserem jep nwinf, ga angtane jep teneba-tenebawef enggalfe gam towaswef afa angtane waakena gam eyebili, afa fas. Jepga Festus angtane nafsi ga balbabili, "Paulus aaf sa aftayal."
7Paulus jebe jam aa galap fortyaram, angtane Yahudimana Yerusalemwer aa jei ge jalbilirim, jei Paulus ga aane goronwebana. Ane jei taterisi kabwaksususerem jepga aane nasbaibene Paulusem temawer, jengga angtane daamfenna afa fas bunarsusfer jei nasbife, aam temawer jei jener jam ne damtayan ane jam ne sarbayan Paulus kapkaiserem aa jes eyebilirim.
8Jes jepserem Paulus waakenfer ga enggam tamawolbili jelem temawer, "Ai Hukumu Nabi Musa aa jes tulistababilim baife ajam gwebiyen. Ai syefer ajam nasouyan Jena Uwa Sanbagirmanaiserem jem temawer, afa bosna Kaisar Romamana jem temawer. Seyafter fasfasus."
9Festus enggam ga gunu jelem inibe, "Ai baiyan angtane Yahudimana jei ai as enggam ne bala ai waakena." Jega jem temawer jei Paulus ga tenebana, "Paulus, aamke baiyan aamei jam gwife kota Yerusalemwer enggalfe, ai jewer is agam tenebanaf taterisi kapka aaiserem im temawer?"
10Jepga Paulus ga tamawola, "Ai aaf ai fina mwona Kaisar Romamana, mwona aaiserem angtane sanbaka angtane jep ne teneba-tenebabuwena, ane aamei ai as aafer se teneba. Uwa, aamei tousa enggame ai kapkaiserem afa ajam eyeipmiyen angtane Yahudimanfe.
11Wa, afa ai kapkaiserem jame agam eyebilintim, afa etam-etam kabwaksusu jes agam eyebilint, jega ai jem temawer gam as tere, sya ai samfer as tere. Jengga jemna kapkaiserem aa jes ne nasbabilirim am temawer, afa je bunaryan, angtane afa fas ai as jam ne geryan angtane Yahudiminibe. Ai enggam ai gunu, gwanan asa aftawe Kaisarminip."
12Angtane aa jei ne esoroltababuwenaram Festus jebar jam aa galap nasbawenaram jamer taban, Festus jei Paulus ga bala, "Samfer, aamei enggam im gunu, 'As aftawe Kaisarminip.' Sya, aamei gase gwi Kaisarminip."
13Jepga nunu abakefyan, Raja Agripa yo Bernike ga aa ge fortya kota Kaisareyaminibe enggalfe gam ge guf, "O Festus, samfer aamei aaf nwini."
14Jes jepserem nunu gamjon unggwanferyan, Festus ga taterisi Paulus aa jewer nwinirim bwiyibe, Raja Agripaf ga nasibene. Festus enggam ga bala, "Angtane aasaje bwiyip aaf nwini. Angtane jeiserem ga Gubernur Felikse mirtetefalant bwiyibe.
15Ai kota Yerusalem je agalap nwinintim, angtane imam-imam sanbakaiserem ane angtane sanbaka Yahudimana, jei ula kabwakfer aa jes ne nasbawenaram Paulusem temawer, ula jeiserem abe as mes ne bilibenent. Jei ams ne bala ai ula kapkaiserem Paulusem temawer ai borolbaf.
16Jengga ai enggam ga gununt, angtane Romamana jei enggam ne eyebuwena, angtane ane angtane ula kapkaiserem aa jei gane nasbilirim jem temawer, jei seyafter gangge dorwebili enggalfe gangge nasbawef mwona angtane jep teneba-tenebawelaiserem jebe, jega angtane aa jes gane tebanaram jei jener waakenfer gam nasbif jelem temawer. Angtane Romamana jei angtane jam ne geryan afa gwanan jei daamfennaber jam ne nasbiyeneye.
17Ane angtane Yahudimana ai jebara jelantam, ai abakef ajam fiyan. Jem gwirmer ga angtane sanbagiriserem ai jem mejanap ga ai nwinint, ane angtane ga ai balbabilint Paulus amnip jam ne aftayalfe.
18Angtane jam aa galap ge irwebilintim enggalfe ula kapkaiserem Paulusem temawer jei ne nasbife, ai alem inibe enggam ga ai gununt jei engbar ba kabwaksususerem ga jes sene nasbili, jengga fas.
19Jengga angtane Yahudimana jei Paulusfar ga aa ge doksobana enggalem temawer, Uwa Sanbagiri fomfom gane pujitene. Ane jegme taterisi aas ne nasbili Angtane bosna ga Yesus aa Jei terentem jem temawer, jengga Paulus jei unggwanfer balbabili Angtane jeiserem gamjon mes nwinsanswena.
20Jengga ai ula aaiserem Paulusem temawer ai teisyena, ai bunarsusfer as nane se nasibene? Jega jem temawer ai Paulus ga ai tenebanant, 'Aamei ifom gunu, ke samfer Yerusalemwer is sofwef, ane ula aaiserem ilem temawer waakenfer ga jewer is nasbitne?'
21Jepga Paulus ga gununt, 'Wowo, ai bwiyiber as nwini, jamer Kaisar jener aa jep gunurum enggame ula am temawer bar.'" Ane Festus Raja Agripa gamjon ga bala, "Ai enggam ai gunu, sya afa ga gam, Paulus jei samfer bwiyiber ge nwin, jamer ai dwona ajep domolaram Paulus ga as baftawili Kaisarminibe."
22Ane jepga Raja Agripa Festus ga aa bala, "Ai mese, aime taterisi Paulusmana aner ajam sarbaf." Festus ga Agripa gamjon ga aa tamawolbana, "Sya, aamei gwirmer is sarbafa!"
23Jem gwirmer ga Raja Agripa yo Bernike ane angtane sanbaka 1.000 ginanggwamana, ane angtane sanbaka jepmana seyafter ga aa ge forobitye Paulus gam sarbasif. Angtane seyafter jep gemerserem jei tousa angtane aaiserem jeiba sanbak-sanbakam. Jei seyafter ga aa ge betwebili, ane jena unggwandusa jep ga aa ge kabwitena. Jepga Festus ga balbabili Paulus mese jei ge kawetya.
24Jepga Festus ga aa gutena, "O Raja Agripa, ane aamei seyafter igemera betwenaram, angtane aaiserem gwanan imsa damta. Angtane Yahudimana seyafter gemerserem jei kapkaiserem jes ne nasbili angtane aaiserem jem temawer. Angtane Yahudimana Yerusalemwer aa jei ge jalbilintim, ane angtane aafmana aa jei ge nwinbenerem, jei seyafter ga enggam tetenbuwena, 'Angtane aaiserem ijam balyan jam gwefe!'
25Jengga angtane aaiserem kapka aa jes eyebilirim afa ajam domolbayan afa ajam saribeyen, jega samfer jei jem temawer gase tere. Ane angtane aaiserem jei jener mes gununt, 'Ula amnaiserem Kaisar jener se sarbisini.' Ane aiba mesam gunu, ai angtane aaiserem Kaisarminibe ajam baftawife.
26Paulusmana kapka aa jes eyebilirim afa ajam towasweibeyen, jega jem temawer ai teisyena surtabe ajes baatulbofe Paulusem temawer, surta ai Kaisarfe ajes gulbafe. Jega jem temawer ai ga ai balbabili Paulus jam ne aftayalf aaf angtane unggwanfer aaiserem jem tarnabe, nabal-nabalsusu ga aamei Raja Agripa. Nei Paulusfar jam nesa nasounaram jamer taban, ai ga as towaswena ai ajes tulisuluserem surtabe, surta ai ajes eyeibeleiserem Kaisarfe.
27Ai enggam ai gunu alem inibe, ai angtane ajam baftayan Kaisarminibe, afa ai gwanan kapka jemnaiserem ajam baatulboyonoye surtabe."
<< Kisah Para Rasul 25 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel