1Ga ip, aamei angtane Uwa Sanbagirmana, kota Kolose je ijeya nwinirim. Aamei am afelen mesna, aamei seyafter Kristus Yesus waakenfer imsa tebana, ane imna gwela Jebar ga daamfennaber. Surta aaiserem ga amniwer, Paulus, kota Roma je. Timotius nem afelen mesna, jegme surta aaiserem ga ajebaner ge baafulu. Uwa Sanbagiri Jei ams destabana ai rasulf gwefe. Jei ams baftana enggalfe, ai Taterisi Waakena Kristus Yesusem temawer ai agam nasipminennef. Ai sembayanga as ge gwebabana Uwa Sanbagirfe, Jei waakena Jelemanaiserem ip is gase golmini, ane Jei ini imna is gase gwebaipmini waakenfer is ga sege folbamini.
2(1:1)
3Ai sembayanga im temawer agalaba gwebanaram, ai jeber-jeber Uwa Sanbagiri agma bala enggame, "Ase samfer golmini." Uwa Sanbagiri Jei Uwa Yesus Kristusmana, Tuhan nemna.
4Ai ajewera balaram enggame "Ase samfer golmini.", ga aam temawer ai amsama sarant enggame, aamei Yesus Kristus baabetfer ima tebana, ane aamei angtane Uwa Sanbagirmana nafsi seyafter gemerserem ima nesiktababili.
5Aamei nabala taterisi bunarsusfer aaiserem igalaba sarbilintim, Taterisi Waakena Yesusem temawer jeiserem, aamei jes galapserem taterisi Uwa Sanbagirfar gam gwefe ga imsa sarbili. Ane namwer aamei Yesus ima tebana, ane aamei angtane Uwa Sanbagirmana ga ima nesiktababili, aam temawer aamei ima fina enggalfe Uwa Sanbagirfar igama gwefe taman waaken-giribe.
6Taterisi Waakena jeiserem angtanef ga sene nasipmini, tampata unggwanfer ogiri aaiserem jebe, jes gemerserem Taterisi Waakena jeiserem is gemer nasipminintim ibe. Ane angtane unggwanfer gemerserem ga taterisi jeiserem ga jes ne taabili, ane jei gwela waakenaiserem ga jemfener naawena, aamei gemerserem aamei ima taabili ane ga ima gwena. Aamei Taterisi Waakena jam igalaba sarbilintim, ane aamei ga ima gunu enggame, "Ba bunaram Uwa Sanbagiri ba nemsam nesiktababili.", aamei ga ima taabili, ane aamei ga ima towaiwena waakenfer gwefe.
7Nem afelna Epafras nei nejesa nesiktenerem, jei awelna Kristusmana gam gweyibene, ai Timotiusfar gamserem. Jei Taterisi Waakena jeiserem is mes nasipminint ibe, ane jei jeber-jeber awelna Kristusmana waakenfer gweyibene enggalfe aamei is gam batobaabif.
8Epafras jei ai as enggam towastababili aamei angtane Uwa Sanbagirmana seyafter ima nesiktababili, baabeta Mafnana Uwa Sanbagirmanaiserem jeme. Seyafter jeiserem jem temawer, ai Uwa Sanbagiri agma bala, "Ase samfer golmini."
9Ai seyafter jeiserem ajesa sarbabilintim im temawer, jega jem temawer ai sembayanga jeber-jeber ga aya gwebana im temawer. Ai jam isa galaba sarbabilintim enggame aamei waakenfer ima gwena, ai ga aya towaiwenant sembayanga jam gwebafe im temawer, ane ai ajama tikweyan sembayanga Uwa Sanbagirfe jam gwebabalabe im temawer. Ai Uwa Sanbagiri agma balfe enggame Mafnana Jemna aamei is gam batobaabife, jega aamei tousaiserem gam isa domola. Ane aamei ga isa sarbili waakenfer enggame bunarsusfer ga fwersa ane afaf-afafaiserem jei ga fwersa. Ane aamei ga isa towaswebili seyafter Uwa Sanbagiri aa jes bilirim aamei ijesa eyebiliserem.
10Jepga aamei gam ga isa gwena, Tuhan aamei is gemer balbabilirim jam gwefe. Ane ini Jemna saaser-saaserfer gase folbana, aamei seyafter ijesa eyebilirim jem temawer. Aamei ga enggam aas gemerserem ga isa eyebaabili: Aamei waakenater isa eyebaabili gala-gala angtanefe. Namwer aas jepserem aamei Uwa Sanbagiri bastowaifer ima damdamtaasini, jengga afa aamei Uwa Sanbagiri Jei aa jes bilirim jeiserem jam isa onsobilirim, aamei Jei uskambar ga isa damdamtaasini.
11Baabeta Uwa Sanbagirmana unggwandwasusum, jega jem temawer ai sembayanga Jep asa gwebabana enggame Jei baabeta ip is gase golmini. Ane jem temawer ga tamtamtala jam ijeba domolaram, aamei kanaufer gam isa fina ini saaser-saasermer.
12Ane aamei Uwa Sanbagiri ga isa bala, "Ase samfer golmini.", aam temawer Uwa Sanbagiri Jei mes eyebili, jega aamei ane angtane nafsi Jei aa jei ne tebanaram, aamei seyafter jebaner gam isa domola Uwa Sanbagiri aa jes golminirim angtane Jelemanfe, ane aamei nafa Jemnaiserem jep ga isa gwena jamer abak-abaksus.
13Nei gwanan nalefe Yesus nejama tebayan, bawasa jei nem sanbakf nwinint, ane jes galapserem nei ga gwinip neya gwenant. Jengga Uwa Sanbagiri Jei nei nes mes waakentababisini, ane Jei nei nes mes erbifele Jelem Tanem gwetmanabe, Tanna Jam aa jes nesiktenerem, ane Tanna jeiserem Jei ga Jei se nwini nem Sanbakfe.
14Kristus aa jes eyebilintim jeme, Uwa Sanbagiri etam-etamawer nei ga nes jem aftabunnu, Jei etam-etama kapka nemna nes mes wirtabaipmisini.
15Angtane fas Uwa Sanbagiri jam ne damtayan, jengga Kristus Uwa Sanbagiri ga nes Jei gweretaamisini nebe, aam temawer Kristus Jeiba Uwa Sanbagiri galserem. Kristus Jeiba unggwan-girsusum, Jei Uwa Sanbagiri seyafter aa jes eyebaabilim jem sagabe Jei nwinf Sanbakfe.
16Uwa Sanbagiri seyafter ga Jei eyebaabil baabeta Kristusmanaiserem jeme, taman waaken-girip ane ogirip mese, apgal jigala jam sokotiliserem ane jam sokotiyeneiserem, malaikata baabetabara seyafter gemerserem-- malaikata sanbaka ane jem bastantouya jes mese. Uwa Sanbagiri seyafter ga eyebaabil baabeta Kristusmanaiserem jeme, ane seyafter aa jes eyebaabilim jeiserem ga enggalf Kristus Jelef.
17Gwanan nalefe apgal jigala seyafter gemerserem jam eyebaabiyen, nabal-nabalsusu ga Kristus se gwel. Kristus Jener eyebaabili baabeta Jemnaiserem jeme, jega gwer, muar, fi ane apgal jigala seyafter gemerserem jelem tarnabe ga sege falbili, jam ge irwalwebiyen.
18Angtane seyafter Kristus aa jei ne tebanaram, jeiba tifni daamfenna galserem, ane Kristus Jena ga tifni daamfenna jeiserem jem Duka. Jei Jebar daamfennaber se naawena, ane Jei gwela gase golmini jebe. Jeiba nabal-nabalsusu Jeyam irwenant terewer enggalfe, Jei seyafter gemerserem jem sagabe Sanbakfe gam nwinf.
19Gwela Uwa Sanbagirmana seyafter ga Kristusminip. Kristus Jeiba Uwa Sanbagiri galserem, Jei nenesyan. Uwa Sanbagiri Jener ba gamam gul.
20Uwa Sanbagiri ga enggam mwangbisil, Kristus ga ti salibip se terse, ane aawisi Jemna gase tenbentesa, ane etam-etama angtanemana jem gase wirtabaipmisi. Ane jega jem temawer seyafter taman waaken-girip aaiserem ane ogirip aaiserem ga sege waraubisi Uwa Sanbagirminibe, ane jei Jem gwonap gase naawena Jena ga Sanbakf se nwini. Kristus aa jewer terentem, jem temawer ga angtane ga samfer Uwa Sanbagirfar daamfennaber ga naawena.
21Aamei nalefe Kristus ijama tebayan, ini imna jes galapserem ga kapka, ane aamei kapkaiserem jetefener igama eyebili. Ane jem temawer aamei ina ga ima bijausona Uwa Sanbagirminiwer, ane aamei Jei baif ima gwebana, ginanggwana galserem.
22Jengga namwer Kristus Jei mes terent, jem temawer ga Uwa Sanbagiri Jei aamei ga is aftabifele Jelem gwetmanabe. Jei aamei is aftabifelserem Jem gwetmanabe enggalfe, aamei galabe jam isa fisaram Uwa Sanbagirem danggonabe, jes jepserem aamei kapkaiserem imnibe fas, jengga waakenmer isa gwena.
23Jengga aamei Taterisi Waakena Kristusem temawer ga jamer isa taabili ginggitmer. Aamei Kristus igalaba tebanantam, jes galapserem aamei ga ima towaiwenant Kristus ini saaser-saasermer ga ima fibana Jam waraunafe, ane enggalf Jei aamei is gam aftabifelf taman waaken-giribe Jebar seyafter gam gwef. Aamei Jei jeber-jeber jamer isa fibawena. Taterisi Waakena ba mesam ne nasipminenne angtanefe tampata unggwanfer aa gemer falaram ogiri aaiserem jebe. Ane Uwa Sanbagiri Jei awelna abe as mes gulbana, awelna jeiserem ga enggalf angtanefe Taterisi Waakena agam nasipminennef.
24Kristus Jei ai as enggam bala ai tamtamtala as domola enggalfe, ai angtane Kristusfar daamfennaber aa jei naawenaram, ai angtane ajes batobaabif. Tamtamtala Kristus aa gemer domolantam, ai jegme agemer domola. Ane namwer ini amna ase saaser-saaserfer folbana, aam temawer ai tamtamtala jeiserem im temawer domola.
25Uwa Sanbagiri Jei ams destabanant enggalfe ai angtane Jelemana agam batobaabif, ane enggalfe Jei aa jes mwangbisilim ai seyafter jeiserem aamei angtane Yahudimanyanaiserem ai isa agam nasipminennef ibe.
26Gwanan-gwanansus Uwa Sanbagiri Jener mwangbisil enggalfe Jener gam eyebif. Ane Jei Jener aa jes mwangbisilim jeiserem angtanefe Jam towasulmiyen jamer abaka. Jengga Uwa Sanbagiri aa jes mwangbisilim, jeiserem namwer Jener gwerauwulmif angtane Jelemanaiserem jebe, angtane tampata unggwanfer aa jei ge nwinbenerem jebe, angtane ula nafis-nafsi unggwanfer aa jei ne nasbabilirim. Seyafter Jei aa jes mwangbisilim jeiba bunarsusfer ba waakenam. Jeiserem Jei aa jes mwangbisilim ga aas: Afa Kristus Jei im inip Jam se nunitonom, aamei jeber-jeber nafa Jemnaiserem Jebar seyafter jep ga isa gwena.
27(1:26)
28Jewer ga ai angtane seyafter ga as ge towastababinenne Kristusem temawer. Ai unggwanfer as ge balbabinenne, angtane etam-etamawer ga jam sege tikwebili, ane ai bunarsusfer as ge towas-towastababili tousaiserem jeme. Ai gam ajewer ge eyebilirim, jega enggalf jei Kristusfar daamfennaber gam naawef, ane gwela jemnaiserem jem waakena tefner sene eyebili.
29Jeiserem jem temawer, ai awelna jeber-jeber uskambarsus ga ajem temawer gwebili, baabeta uskambar jeiserem jeme. Ai samfer jeiserem as eyebili, aam temawer Kristus Jei baabeta Jemnaiserem as mes gulbana abe, baabeta unggwandwasususerem.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel