Alkitab Mobile SABDA
[VER] : [BERIK]     [PL]  [PB] 
 <<  Matius 25 >> 

1Yesus gamjon ga balbabili, "Jes jepserem, nunu Uwa Sanbagiri Jei aa jem gwenaram anggwabura seyafter gemerserem jem Sanbakfe, nunu jeiserem ga enggam se fala taterisi aaiserem gamserem: Tane yafma sepulu jei pelitana ga aane tebabili, ane ga aa ge sofobili enggalfe anggwana wini jam gulaiserem jebar jewer gam ge dorwebif.

2Tane yafma tafna gwiri jeiserem jei teisyena, ane tane yafma tafna gwiri afwer jei tousa.

3Tane yafma teisyenaiserem jei pelitana ga aane tebabili, jengga jei minyaka jam ne tebabiyen.

4Tane yafma tousaiserem jei minyaka botolabara afwer ga gemer ge falipmini, ane pelitana jemna ga gemer ge taayipmini.

5Anggwana wini jam gulaiserem jei abaka jam foroyan, jega jem temawer tane yafma jeiserem jei nunu ga aa ge folbamini, ane jei nunu ga aa ge tabana.

6Gwini nenennap angtane jeiserem ga jene ol dagame, 'Anggwana wini jam jei gulaiserem gas foryal! Au, nei jebar ganma dorwe!'

7Tane yafma jeiserem seyafter ga aa ge irwebili, ane pelitana eseserem ga aane tofortababisini enggalfe waakenfer gam ge ertebif.

8Tane yafma teisyenaiserem jei ga tane yafma tousaiserem ga aane balbabili, 'Minyaka imna bastowaifer ap abasa jesulmi; pelitana amna amkom ga ase ge kofweipmini.'

9Tane yafma tousaiserem jei ga aane tamawolbaabili, 'Wowo! Minyaka amna aaiserem unggwanferyan, jam waksofe. Jasa gwi tokonap, minyaka jep ga isa armantababitne ilefe!'

10Jepga tane yafma teisyenaiserem jei ga aa ge gubili minyakfe. Jei safe aa gemer ge gubilirim, anggwana wini jei gulaiserem jei ga aa fortya jebe. Tane yafma aa jei ge menetwebisinirim, jei masarap seyafter ga aa ge kabwitena anggwana wini jam jei gulaiserem jebaner. Ane mwona ga aane matasini.

11Tane yafma teisyenaiserem minyakfe aa jei ge sofobilirim jei jep ga ge forobitye masar tarnabe, ane ga aa ge jenbuwena, 'Uwa, uwa! Abe mwas tertemisiwiye!'

12Jengga anggwana wini jam jei gulaiserem, jei ga tamawolbaabili, 'Ai bunar-bunarsus ai aamei isa ajam damdamtababisiyen.'"

13Ane Yesus ga taterisi aaiserem umwef ga nasbili enggame, "Aamei ina ga waakenfer isa gaaramisnenne, aam temawer aamei teisyena nunu yo jema Ai gamjon Ajem foryalaiserem."

14Yesus gamjon ga balbabili, "Jes jepserem nunu Uwa Sanbagiri Jei aa jem nwinirim anggwabura seyafter gemerserem jem Sanbakfe, nunu jeiserem ga enggam se fala taterisi aaiserem gamserem: Angtane sanbak jei jam sofwef, ona nafsi ane bijuap. Jei angtane awelna jemnip aa jei ne gwebilirim ga jenbebili. Jei doini jemna ga kitulmini jebe enggalfe doini jeiserem gam unggwan-girtaasif.

15Jei doini ga kitulmini daamfen-daamfenneme, jener aa gemer towaswenaram jes gemerserem. Angtane daamfenfe jei doi emasa 5.000 ga gemer kitulbono, angtane afelna doi emasa 2.000 ga gemer kitulbono, ane angtane afelna jei doi emasa 1.000 ga gemer kitulbono. Jepga jei ga sofwa.

16Angtane doi emasa 5.000 aa jei tebabilirim, jei tatarfer ga sofwa, jei doini jemna gamjon ga unggwan-girswebana doi emasa 5.000 jeiserem.

17Angtane doi emasa 2.000 aa jei tebabilirim jeime gemer, jei doini jemna gamjon ga unggwan-girswebana doi emas 2.000 jeiserem.

18Jengga angtane doi emasa 1.000 aa jei tebabilirim, jei ga sofwa ane o mwona ga terbili, ane doini jelem sanbaka aa jes gerbanaram, doini jeiserem jepga sitasini.

19Nunu unggwanfer aa barwebanaram, angtane nawer-ningna jeiserem jem sanbaka gamjon ga warautna, ane doini jeiserem jem temawer enggam ga tenebaabili, 'Aamei doini jeiserem jeme ibasa eyebili?'

20Angtane doi emasa 5.000 aa jei tebabilirim jei ga jela, ane jei ga doi emasa 10.000 ga kitulbono. Jei enggam ga bala, 'Uwa, aamei doi emasa 5.000 gwanan as ijes kitulbonont abe. Ai doini jeiserem gamjon ames unggwan-girtaasinint doi emasa 5.000 jeiserem.'

21Jelem sanbak jemna ga bala, 'Samfersus, aamei angtane waakena, aamei awelna amna i waakenfer im gwebili! Aamei awelna bastantouya ai is ajes gulbanantam, aamei awelna jeiserem waakenfer im eyebili. Jega jem temawer ai awelna gamjon anesus ip isas gulbana. Au, se jal am masarap, ini imna abar ga is saaser-saaserfer se folbana!'

22Jepga angtane doi emasa 2.000 aa jei tebabilirim, jei mese ga jela. Jei jon ga gunu, 'Uwa, aamei ap gwanan doi emasa 2.000 as igam kitulbonont. Se damta! Ai gamjon ames unggwan-girtaasinint doi emasa 2.000 jeiserem.'

23Jelem sanbaka ga bala, 'Samfersus, aamei angtane waakena, aamei awelna imna waakenfer im gwebili! Aamei awelna bastantouya ai is ajes gulbanantam, aamei awelna jeiserem waakenfer im eyebili. Jega jem temawer ai awelna gamjon anesus ip isas gulbana. Au, se jal am masarap ini imna abar ga is saaser-saaserfer se folbana!'

24Jepga angtane doi emasa 1.000 aa jei tebabilirim umwefe jei jon ga jela. Jei ga gunu, 'Uwa, ai tousa aamei angtane ititmer igam balbabili. Aamei titanna nuna ijes fulurum, ti tanna jeiserem je aamei tonolyan. Ane aamei nananisi jep ijam fasawolnanayan, nananisi jeiserem ijes gulnannaram.

25Ai ga aamei isa jem temawer erebene. Ai sofna, doini imna ga o mwonap ai sitasini. Doini imna ga aare se damta! Ai doini imna gamjon isa ajam gerbana.'

26Jelem sanbaka ga bala, 'Aamei angtane kapka ane kwaalaamiti! Aamei ai as enggam im bala, ai titanna nuna ajam tonolyenaiserem, titanna jeiserem ajep fulnonno. Ane ai nananisi ajam fasawolyanaiserem, nananisi jeiserem ga ajes gulnanna.

27Afa ga gam aamei ai as igam balaye, jeje bafa aamei doini amna jeiserem ga ijam gaataanteyan banggabe enggalfe, nunu ai jema gam warautnaram ai doini jeiserem seyafter bunganabaner ga agam tebabili?'

28Angtane sanbaka jeiserem gamjon angtane nafsi ga balbabili, 'Doi emasa 1.000 jemniwer sa amsonba, ane doini jeiserem ga isa kitulbono angtane doi emasa 10.000 aa jei tebabilirim jebe.

29Angtane waakenfer aa jei gane eyebilirim jei aa jes gane damtababilirim jeme, Uwa Sanbagiri Jei gamjon ga gam kitulmini jega unggwanfersus ga gane damtabili. Angtane bastowaifer aa jei gane damtabilirim, afa jei kabwakfer gane gwebili jeiserem jeme, Uwa Sanbagiri Jei bastowaifer jeiserem jei aa jei ne domolaram ga gam amsonbana jemniwer.'

30Angtane sanbaka jemnaiserem jei angtane nafsi ga balbabili, 'Sya, angtane jeiserem awelna kabwakfer aa jei gwebilirim, sitawer sa firtaaniwi tamna gwin-gwinsusube. Tamna jeiserem jebe, angtane ga sege syebinense, ane ga sene enolsa siginsusu, ini jemna uskambar ga jam sege jenbamisi.'"

31Yesus gamjon ga balbabili, "Ai Tane Angtanemana, Ai gamjon As waraunsu, malaikata seyafter jeiserem jebaner, ane baabeta unggwandusa jeiserem jeme. Jes jepserem Ai ga As gwesa Sanbakfe, ane Ai ga As nwinsi kursini rajamanaiserem jem sagabe.

32Ai malaikata Amna As baftabisi angtane ogiri seyafter gemerserem ga sene dupdupbulsu Am danggonawer. Ai Aner ga As waksosisi angtane waakenfer eyebiliserem ane angtane kabwakfer eyebiliserem. Ai angtane enggam As waksosi, gembalna dombana yo kambingi aa gemer gam waksosinirim.

33Angtane ga dombana galserem, jei ga angtane aa jes gane eyebilirim Uwa Sanbagiri Jei aa jes gam bilirim. Ai angtane jeiserem ga As dupdupbulsisi Am taasfolawer. Angtane kambingi galserem, jei ga angtane jei jam ne eyebiyeneiserem Uwa Sanbagiri aa jes gam bilirim jam eyebife. Ai angtane jeiserem ga As dupdupbulsisi Am gwejawer.

34Jepga Ai jem Rajaf ga As gwesa, ane angtane Am taasfolawer aa jei ge nwinbenerem ga As balbabisi enggame, 'Uwa Sanbagiri Uwa Amna, Jemna waakenaiserem Jei is mes golmini ibe. Ai Ajam gwena im Sanbakfe. Au, aamei mawaf isa nwini Am tarnabe! Gwanan ogiri aa galap etamwelam, Uwa Sanbagiri Jei im temawer ga enggam gul, Ai im Sanbakf As nwini, aamei ga Am gwonap isa gwena.

35Ai wisi As galap folbanantam, aamei tumilgala Abe imsa gulbanant. Ai fobotona As galap folbanantam, aamei fona Abe imsa gulbanant. Aamei safe Ai As ijama towaswebayan, aamei Ai As imsa bala Ai im jenap kautefe.

36Ai fene fas, aamei fene As imsa terbenent. Ai bwernabara, aamei Ai imsa egantaasinint. Ai bwiyip Agalap nwinintim, aamei Amnip imsa jelant.'

37Jepga angtane aa jei ne eyebilirim Uwa Sanbagiri aa jes bilirim, jei ga Asene tenebasa, 'Tuhan, ai Aamei Isa fonggalabara damtanant wisi Is galap folbanantam, ane ai tumilgala ga Is aya gulbanant? Afa fobotona Is galap folbanantam, ai fona Ip ga Is aya gulbanant?

38Fonggalabara ai Aamei Isa ajama towaswebayan, ane ai ga Aamei ga Is aya balant Aamei am jenap kautefe? Afa Aamei fene fas, ai fen Ibe Is aya terbenent?

39Ai Aamei Isa fonggalabara damtanant Aamei bwerna Is galap folbanantam, ane ai ga Aamei Is aya egantaasinint? Afa Aamei bwiyip Is galap ne gaataantenantam, ane ai ga aya jelant Imnibe?'

40Jewer ga Ai, Aiba Rajasam, jepga Ai aamei ga isAs tamawolbaabisi, 'Ai bunarsus ims towas-towastababili, angtane sanbakyanaiserem aa jei ne eyebilirim Uwa Sanbagiri aa jes bilirim, jeiba aya oso Amna gamserem. Afa aamei angtane jeiserem jam isa batobaabilirim, gam jega aamei As imsa batobana.'

41Jepga Ai As balbabisi angtane Am gwejawer aa jei ge nwinbeserem, 'Aamei Uwa Sanbagirmana tamtamsususerem isa domola, jasa gwisi Amniwer! Aamei taman tokwagirip sa gwi, tokwana jei jam ne kofneuyanaiserem! Tamna jeiserem Uwa Sanbagiri bawasfe mes menetsobasini, ane bwata kapka bawasmanaiserem jes mese.

42Ai wisi As galap folbanantam, aamei tumilgala Ap As ijama gulbayan. Ai fobotona As galap folbanantam, aamei fona As ijama gulbayan.

43Aamei Ai As ijama towaswebayan, aamei Ai As ijama balyan jam kautefe im jenabe. Ai fene fas, jengga aamei fene As ijama terbeyen. Ai bwerna As galap folbanantam, ane bwiyip Asene gaataantenant, aamei Ai As ijama egantaasiyen?'

44Jepga angtane jam eyebiyeneiserem Uwa Sanbagiri aa jes bilirim jam eyebife, Ai angtane jeiserem jei Ai ga Asene tenebasa, 'Tuhan, ai Aamei Isa fonggalabara damtanant wisi Is galap folbanantam, afa foboto, afa Aamei Is ajama towaswebayan? Afa Aamei fene fas, afa Aamei bwernabara, afa Aamei bwiyip Igalap nwinintim, ai fas Is ajama egantaasiyen?'

45Jewer ga Ai Aiba Rajasam, jepga Ai aamei isAs tamawolbaabisi, 'Ai bunarsus ims towastababili, angtane sanbakyanaiserem aa jei ne eyebilirim Uwa Sanbagiri aa jes bilirim, jeiba aya oso Amna gamserem. Afa aamei angtane jeiserem ijama batobaabiyen, gam jega Ai mese As ijama batobayan.'"

46Yesus umwef ga gunu, "Angtane jeiserem jam eyebiyeneiserem Uwa Sanbagiri aa jes bilirim jam eyebife, jei sene tamtamtababisi jamer abak-abaksus. Jengga angtane jeiserem aa jei ne eyebilirim Uwa Sanbagiri aa jes bilirim, jei gwela waakena jamer abak-abaksus ga sene domolsa."



 <<  Matius 25 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel