1Yesus aa galap iretyaram otum bolawer, angtane anesus jei Yesus ga aane onsobana.
2Angtane tifin bwernabaraiserem jei Yesusminip ga jela, ane somwan dumem ga nwintena jei Yesus ga sembatana. Ane angtane jeiserem Yesus ga bala, "Uwa, afa jam Is gunurum, Aamei baabetabara ams Is waakentana."
3Jewer ga Yesus tafna ga tetena, ane ga tosobaantena angtane tifin bwernabara jeiserem jem sagabe. Ane Yesus ga bala, "Sya, se waakenswe!" Jes jeberserem tifin bwerna jemna ga waakenswena.
4Jepga Yesus Jei enggam ga gunu, "Aamei ijam nasbineneyen taterisi aaiserem angtane nafis-nafsiserem jemnibe! Jengga jase sofwe imamminip, jeiba angtane taterisi angtanemana Uwa Sanbagirfe aa jei gwirinfelwenaram. Jei aamei is damtanaram enggame aamei imsam waakenswena. Jepga is eyebili Nabi Musa fwater aa gemer nasbilim: enggame se gulba Uwa Sanbagirfe apgal jigala jeiserem Nabi Musa aa jes bilim. Jepga angtane ga sege towaswebili enggame, aamei bunar-bunarsusfer imsam waakenswena."
5Yesus aa galap kautenaram kota Kapernaum je, angtane sanbaka 100 ginanggwamana jei Yesusminip ga jela. Jeiba angtane Romamana, jei angtane Yahudimanyan.
6Jei Yesus ga bala, "Uwa, ams batoba! Tane taini amna jei jenap tatna, jei jam irweyan. Jei bwerna uskambarsus folbana, jemna tifni sigin-ginsusu."
7Yesus ga bala, "Ai im jenap As gwina, Ai tane taini imnaiserem ga As waakentana."
8Angtane sanbaka 100 ginanggwamana jeiserem ga tamawolbana, "Wowo Uwa, Aamei sanbagiri, ai angtane Yahudimanyan ai bastantouya, jega jem temawer Aamei jena amnaiserem jep Ijam foroyan. Baabeta Imna unggwandwasusu, ane ai tousa afa Aamei jafner Is gunurum enggame, 'Se waakenswe!', tane taini amna jeiserem gase waakenswena.
9Ga enggam, ai am sanbakaiserem ai ga ajem gwonap gwena, ane ginanggwana afweraiserem jei am gwonap naawena. Ai ginanggwana afa enggam jam agam balaram, 'Se sofwe!', ane jei ga gam sofna. Ai angtane nafsi enggam jam agam balaram, 'Jas jal!', ane jei gam jela. Ane ai tane taini alemana enggam as balaram, 'Se eyebi!', ane jei ga gam eyebili. Aamei jeime galater, seyafter gemerserem Aamei gemer Igam gunurum, ga gemer gam etamwena."
10Yesus Jei jame aa galap sarbilirim taterisi jeiserem, Jei ga bitbitwena. Yesus jepga balbabili angtane Jei aa jei ne onsobanaram, "Ai bunarsusfer ims towas-towastababili, angtane negeri Israelmana seyafter gemerserem jemniwer, Ai angtane afa gemerje ini jemna tabalaiserem afa Ajam damtamiyen angtane aas galserem, jei Ai As ginggitfer tebana.
11Ai ims towas-towastababili, angtane Yahudimanyanaiserem jei unggwanfersus galap sege forobitye bijauwer, ona gwer tauyalawer jamer gwer irenalawer mese. Jei Abraham, Isak ane Yakub jebaner jepga seyafter gase dwena nunu Uwa Sanbagiri Jei aa jem se nwinirim anggwabura seyafter gemerserem jem Sanbakfe.
12Uwa Sanbagiri Jei taman waaken-girs menetaamisini angtane Yahudimanfe. Safe gam, malaikata Uwa Sanbagirmanaiserem jei sene taptababisiwili taman gwin-gwinsusube. Tamna jeiserem jebe, angtane jep ga sege syebinense, ga sene enolsa siginsusu, ane ini jemna uskambar ga sege jenbamisi."
13Jewer ga Yesus angtane sanbaka 100 ginanggwamana jeiserem ga bala, "Se sofwe jenap! Aamei ijes taabilirim, jeiserem se etamwena." Jes jeberserem tane taini jemna ga waakenswena.
14Yesus aa galap fortyaram Petrusem jenabe, Jei Petrusem munau tane ga domola, jei jelem nutarap tana, tifin sarsar bwerai falbili.
15Yesus tafnawer ga taabitena, jepga tifin sarsara jeiserem ga barwebili. Wini jeiserem ga irwa, ane tumilgala ga gulbana Yesusfe.
16Ona aa galap towaiwenaram jam gigitswefe, angtane bwata kapkaiserem aa jei ge kayipminirim ga aane aftabifelwetya Yesusminibe. Yesus Jei bwat kapka olemfener ga balbabili jam ge tobitinyefe, ane angtane bwernabara seyafter gemerserem ga waakentababili.
17Yesus Jei angtane jeiserem aa galap waakentababilirim, jes jepserem taterisi Nabi Yesaya aa jes nasbilim ga tabanwena: "Jei bwerna nemna seyafter gemerserem ga wirtabaabisini."
18Yesus Jei angtane uskambar aa galap damtabilirim Jem gwetmanabe, Jei ga balbabili angtane Jei aa jei ne tikwebaatinennerem, "Au, nei ganma sofwe fobogana jimwer!"
19Jewer ga guru daamfenna Hukumu Nabi Musa aa jes tulistababilim aa jei towas-towastababuwenaram ga fortya Jemnibe, ga bala, "Guru, ai Ims onsobaf Ijewer sofwaram."
20Yesus ga tamawolbana, "Serigala jei gwalna onnemana gemerserem, je o mwonabara, ane junu je golabara. Jengga Ai Tane Angtanemana, jena Amna fas, Amna taman nutara fas."
21Angtane nafsi Jei aa jei ne tikwebaatinennerem ga bala, "Uwa, ai gwanan ajam sofwa, uwa amna aa jep tererem ane as tirnnu, jepga ai Isas tikwebaatini."
22Jengga Yesus ga tamawolbana, "Namwer Ams tikwebaati! Angtane Ai baife As jei ne gwebanaram jam onsobafe, jei angtane futunuserem ga jei sene tatarbaabunnu."
23Jewer ga Yesus ga juwili atdusabe, ane angtane aa jei ne tikwebaatinennerem jei mese ga aa ge jubiwili.
24Aafer-aafer deye sanbagiri ga aane forobatya foboganabe, ane muru unggwanfer ga atap botabinsowetya. Jengga Yesus ga nustana.
25Jepga angtane aa jei ne tikwebaatinennerem ga aa ge taabuntini Yesusminibe, ane jei Yesus ga aane irtetena, ga aane bala, "Uwa, Aamei as tebabi seyafter! Nei nesa altil!"
26Yesus ga balbabili, "Aam je bafa erne game? Aamei Ai Ase bastantowaifer ima tebana." Jepga Jei ga irwena, jewer ga deye yo fobogana ga ofsobana, ane deye ga aane tikwebana, ane foboga jafner fala.
27Angtane jeiserem jei ga aa ge bitbitwebili, ane jei jena ga aane taanaaminenne enggame, "Angtane aaiserem bunarsusfer jei nansa? Deye yo muru taterisi ga Jemna gangge saribene!"
28Jewer aa galap fortyaram foboga jimwer, ona bosna Gadara, jewer ga angtane naura bwata kapkaiserem aa jei kamwinirim tonmwa bitisiwer ge jela Yesusminibe. Angtane naura jeiserem jei jam ge uskamswena. Angtane nafsiserem jei jam ge erebili, jewer jam ge wofobiyen.
29Angtane naura jeiserem jei ititmer ga aa ge gwarenwena, "Aamei Ibas eyebifi amnibe, Tane Uwa Sanbagirmana? Nunu Uwa Sanbagiri aa jep tamtamtababilirim jep gemerje fas fortya. Aam je bafa ga asIs tamtamsona namwer?"
30Jes jepserem jebe bijautouyan, twena anesus jei tumilgala ga jep ne terelbaabili jam tombaabife.
31Ane bwat kapkaiserem Yesus ititmer ga aane bala, "Afa Aamei as jam Is surbobilirim angtane nauna aaiserem jemniwer, gamjon ga as enggam Is balbabili, 'Sa kaute twena unggwanfer aaiserem jemnip!', ane aga asa kawetena twenminibe."
32Yesus ga balbabili, "Sa gwi!" Ane bwat kapka jeiserem ga aa ge tobitintye, ane twenminip ga aa ge kabwitena. Twena seyafter jeiserem ga aa ge nunggirbili, ane ga aa ge janbiton obititiriwer jamer foboganabo, jepga aa ge albitini.
33Jepga angtane twena aa jei ne gerebaabisnennerem, ga aa ge nunggirbili kotanap, ane taterisi seyafter jeiserem ga aane nasbinenne. Ane ga jes ne nasbili aa je etamwenaram angtane naura bwat kapka aa jei kamwinirim jem temawer.
34Angtane seyafter kotana jeiserem Yesusminip ga aa ge sofobili. Ane jei Yesus aa galap ne damtanaram, jes jepserem gane bala, ane gane balbalwena enggalfe Yesus ona jemnaiserem Jam mirtetefalf.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel