Alkitab Mobile SABDA
[VER] : [BERIK]     [PL]  [PB] 
 <<  Markus 10 >> 

1Yesus ane angtane Jei aa jei ne tikwebaatinennerem tampata jeiserem ga aane mirsotefala, gamjon ona Yudeyawer ga sofwa, fona Yordan jimwer. Jepga angtane unggwanfer gamjon ga aa ge betwebili Yesusem tarnabe. Ane Jei gwanan angtane jeber-jeber aa gemer towas-towastababuwenaram, gam ga towas-towastababili.

2Jepga angtane safna Farisimana ga aa ge forobitye. Jei Yesus jam ne unggwasbaf, jega jem temawer jei Yesus ga aane tenebana, "Fuma Nabi Musa aa gam tulisulum Hukumube? Anggwana wini baife aa jei gam gwebilirim ke samfer gangge syanwena, afa fas?"

3Yesus ga tamawolbaabili, "Musa jei is bagal tateris golmil ibe?"

4Jei ga aane tamawolbana, "Musa jei ai as enggam balbabil, 'Sya, jengga gwanan nabala surta ijem ge syanwelaiserem jes igam eyebili, jepga wini ga igam bili, sya se sofwe!'"

5Yesus ga balbabili, "Musa jei aamei is jewer balbabilim enggame 'Sya, samfer wifar jam syanwefe.' jeiserem ga aam temawer balbabil ini imna kekelna, aamei masef is jam ne towas-towastababife.

6Gwanan galapserem Uwa Sanbagiri seyafter gemerserem aa galap eyebaabilim, jes galapserem Jei angtane ga naura gam eyemil, anggwana yo wini.

7Jega jem temawer anggwana ga ene yo jeta ga gam mirsona, ane winabar daamfen jenaber ga gangge nwini.

8Ane jepga nawersamer daamfennaber gangge tawena. Gam jega naweryan, jengga daamfenna.

9Ga jem temawer Uwa Sanbagiri aa jes gam batsonaram daamfennaber gwefe, nei angtane nejama syansosiyen."

10Jenabe aa galap ge forobilirim, angtane Yesus aa jei ne tikwebaatinennerem Yesus ga aane tenebana taterisi jeiserem jem temawer.

11Yesus ga aa balbabili, "Afa anggwana wini baif aa jei gam gwebilirim, ane wini nafsi ga gam gula, anggwana jeiserem jei etam-etama maaryenf gwelaiserem jes gam eyebili wini gwanan gulaiserem jebe.

12Ane wini afa anggwana baif aa jei gam gwebanaram, ane anggwana nafsi ga gam gera, wini jeiserem jei etam-etama maaryenf gwelaiserem ga jes gam eyebili."

13Jepga angtane tane bastantouya ga aane aftabuwena Yesusminibe enggalfe, Yesus tafna jem dwak sagap gam bunulmunsowef, waakena Jelemanaiserem jep gam kitulmif. Jengga angtane Yesus aa jei ne tikwebaatinennerem, jei angtane tane aa jei ne aftabuwenaram Yesusminibe ga jes ne uftabili.

14Yesus Jei angtane aa jei ne tikwebaatinennerem jam aa galap damtabilirim enggame, jei angtane tane aa jei ne aftabiyelwenaram jes ne uftabili, Yesus ga nasbabili, ane ga balbabili, "Angtane jeiserem safnant ipsama uftabilirim. Jei samfer tantantane jei gane erbiyelwe Amnibe, aam temawer angtane enggalaiserem tanna aas galserem, jei samfer se naawena Uwa Sanbagirfar, ane Uwa Sanbagiri Jei ga jem Sanbakf se gwena.

15Sa sarbistaabon taterisi aaiserem! Tanna bastantana aas galserem jei Uwa Sanbagiriserem ga jei gane tebana, ane Uwa Sanbagiri Jei jem Sanbakf se gwena. Angtane baife aa jei gam gwenaram Uwa Sanbagiri Jei jem Sanbakf gwefe, angtane jeiserem jei jam etamweyan enggame Uwa Sanbagirem gwonap gwefe, nunu Uwa Sanbagiri Jei aa jem nwinirim anggwabura seyafter gemerserem jem Sanbakfe."

16Jepga Yesus tantantane jeiserem ga kituliwena, tafna dwak sagap ga tosobaipmunsowena, ane Uwa Sanbagiri ga bala, "Tane aaiserem jebe waakenaiserem jep Is kitulmini."

17Yesus ane angtane Jei aa jei ne tikwebaatinennerem jewer jam aa ge sofobilirim, angtane aasaje ga Yesusminip ga nunggirwena, somwan dumem ga nwintena Yesusem tarnabe. Jepga angtane jeiserem Yesus ga aa tenebana, "Guru, Aamei waakena. Ai ga basas eyebili enggalfe, ai waakenfer gwelaiserem jamer abak-abaksus agam domolfe?"

18Yesus ga angtane jeiserem ga aa tamawolbana, "Jeje bafa aamei Ai ga Asim bala enggame Ai waakena? Angtane waakena afa fas jam gweyan, jengga Uwa Sanbagiri Jenfentowai Jei waakena.

19Uwa Sanbagiri aa jes balbabilim, seyafter jeiserem aamei imes towaswebili enggame: Aamei angtane ipsam tat. Maaryen ipsam gwebit. Jigala angtanemana ipsam komkomulsit. Angtane nensa syefer ipsam balt. Angtane ipsam afaf-afaftat. Iye yo uwa imna, taterisi jemna ga jam igam tasyipmini."

20Angtane jeiserem Yesus ga aa bala, "Guru, taterisi seyafter jeiserem ai amsam tikwebitinint, ai bastowaisamer galapserem jamer namwer aas jepserem jep mese."

21Yesus angtane jeiserem ga gerebana, ane ga nesiktene jei, ane ga bala, "Taterisi umwefe ga daamfenna, aamei gemerje jeiserem ijam eyebiyen. Taterisi jeiserem ga aas: Se gwi, ane galgala imna seyafter ga is jualtababili, ane doini ga angtane galgalyenaiserem ga jep is kitulmini, ane aamei waakenfer gwelaiserem ga is domola jamer abak-abaksus. Afa jeiserem jam is eyebilirim jamer taban, aamei ga is jela Amnibe, ane Ai ga Asis tikwebaatini."

22Jengga angtane jeiserem taterisi Yesusmana jeiserem jam aa galap saribenerem, jei ga sofwa ane ini ga jenbana, aam temawer jei enggam gunu, "Apgal jigala aman ke bastantowaifer, apgal jigala amna unggwanfersusu."

23Jepga Yesus angtane Jei aa jei ne tikwebaatinennerem ga gerebaabisnenne, ane ga aa balbabili, "Angtane galgalabaraiserem jei ini galgalapfener gam folbana, ini jemna Uwa Sanbagirminip jam folbayan. Afa ini angtanemana jes gemerserem gemer gam folbanaram, afa jei fas jam irfweyanaye, gam jega Uwa Sanbagiri Jei jem Sanbakfe Jam gweyan."

24Angtane Jei aa jei ne tikwebaatinennerem jei taterisi jeiserem jam aa galap ne sarbilirim, jei ga aa ge bitbitwebili. Jengga Yesus gamjon ga balbabili, "Tantantane Amna, angtane afa fas tatarmer Uwa Sanbagirfer daamfennaber jam ge gwefe, jega Uwa Sanbagiri Jei jem Sanbakf ga gam gwena.

25Bunar-bunarsus, twena unggwan-giri jei jam kaweteyan burum mwonabe. Jes gamserem aaiserem jegme gemer, angtane afa ini jemna galgalapfener aa jemanem gam folbanaram, angtane jeiserem jei Uwa Sanbagirfer daamfennaber jam ge gweyan, ane Uwa Sanbagiri Jei jem Sanbakfe Jam nwinyen."

26Jes jepserem jei taterisi jeiserem jam aa galap ne sarbilirim, jei uskambar ga aa ge bitbitwebili, ane jei jen jena ga aa taanaaminenne, "Afa ga gam jes gamserem, gam jega nan se waakentaasini?"

27Yesus ga gerebaabili, ane ga balbabili, "Angtane jen jena jam waakentaasiyen, jengga Uwa Sanbagiriserem angtane ga Jei gam waakentaasini. Uwa Sanbagiri seyafter gemerserem gam eyebili."

28Jepga Petrus Yesus ga aa bala, "Galgala seyafter amsa mirtebitefala enggalfe, ai Aamei Is agma tikwebaatif!"

29Yesus ga balbabili, "Ai bunarsus ims towas-towastababili, angtane jena aa jei gam mirultefalaram, afa aya, afa oso, afa ene, afa jeta, afa tane jemna, afa makana jemna, afa jei jeiserem seyafter aa jei gam mirtebitefalaram enggalfe, taterisi Uwa Sanbagirmana gam nasibenenefe,

30angtane jeiserem jei namwer aas jepserem fwaina se taabili uskambarsus aa jes mirtebitefalaram jemniwer. Jei gamjon ja, ane aya mese oso, ene, tane, ane makan unggwanfersus se damtabili. Ane jei kabwaktala unggwanfer mese ga sene damtabili. Ane nunu galap aa jep forsanyaram, Uwa Sanbagiri Jei angtane jeiserem jebe waakenfer gwelaiserem se golmisi jamer abak-abaksus.

31Jengga angtane namwer nabal danalaiserem, angtane jeiserem afwenefener galap amnup sene bunulu. Ane angtane amunemanaiserem, afweraiserem galap ga jei sege danabifi."

32Yesus ane angtane Jei aa jei ne tikwebaatinennerem, jei aa galap ge sofobilirim nel tawela kota Yerusalem je jep aa galap ga wofobilirim, Yesus ga jei dannasnene. Ane angtane dua belas Jei aa jei ne tikwebaatinennerem ini jemna ga aa ge jenbamini, ane ini esesfer ga aa ge folbamini. Ane angtane nafsiserem amnuwer aa jei ne onsobaabilirim jei ga aa ge erebili. Yesus angtane dua belas Jei aa jei ne tikwebaatinennerem ga aftabifele nel eyebe. Ane Jei ga towaiwulu jam towastababife Jemnibe aa je etamwebalaiserem kota Yerusalem je.

33Yesus ga balbabili, "Gasa sarsi! Nei ga kota Yerusalemwera tauna. Ane jes jepserem Ai Tane Angtanemana, Ai ga Asene gera angtane imam-imam sanbakaiserem, ane guru-guru Hukumu Nabi Musamana aa jei ne towas-towastababuwenaram jemnibe. Ane jei ga ula jewer ga sene nasbili enggalfe Ai Ajam terfe. Ane Ai ga Asene gera angtane Yahudimanyanaiserem jemnibe.

34Ane jep ga jei Ai ga Asene bisobafa, ane makem ga Asene gwebafa. Ane jei Ai ga Asene safsaftana newa utuboroserem jeme, ane Ai Asene munbofo. Jengga nunu nawer-ningnabaraiserem Ai gamjon ga jem As irwefa terewer."

35Jepga Yakobus ane Yohanes, tane nauna Sebedeusmana, Yesus ga aa ge bala, "Guru, ai Is ajam ge bala, taterisi amna gwanan as jam Is taayipmini!"

36Jepga angtane nauna jeiserem Yesus ga aa tenaamini, "Aamei Amniwer Ase bas ge bilibene Ai ibe isa Ajes eyeipmife?"

37Jei ga aa ge bala, "Ai ke samfer Ibar nwinfe, afelna taasfolawer ane afelna ga gwejawer jame Ijep nwinirim Sanbakfe Raja gemerserem?"

38Yesus ga gitmini, "Aamei ijam ge towaswebiyen Ap Ase ijes ge bilibenerem. Aamke kapkaiserem ke samfer is ge gwirni, Ai gemerserem? Ane aamke samfer is ge tere, Ai gemerserem?"

39Jepga aa ge gunu, "Ai samfer." Jepga Yesus ga gitmini, "Jeiserem bunar, kapkaiserem is ge gwirfi Ai gemerserem, ane aamei is ge tere Ai gamserem.

40Jengga Am taasfola jei nwiniserem, ane Am gwejawer jei nwiniserem, angtane jeiserem Ai Ajam destabayan. Jeiserem gam ke baabeta Amna, jengga Uwa Sanbagirmana. Angtane jebe jei nwiniserem, Uwa Sanbagiri Jener se destabana."

41Angtane sepulu aa jei ne tikwebaatinennerem afwer jeiserem jei aa galap ne sarbilirim angtane naura jeiserem jei aa jes ge bilirim, jei Yakobuso Yohanes ga aane nasmini.

42Jega jem temawer Yesus seyafter ga dupdupbulu, ane seyafter ga balbabili, "Aamei tousa, angtane Yahudimanyana jei jam gane balaram sanbakf gwefe, jei uskamer gam eyeipmini angtane jelemanaiserem jebe. Jei angtane nafis gane baftana enggalfe, angtane nafsi gane damtana jemna baabeta unggwandusa.

43Jengga aamei gamyan. Aamei ga enggam isa gwena: Afa angtane imniwer aa jei gunurum sanbakef jam etamwefe, jei gwanan ga angtane nafsiserem jes gam batobaabili, awelna angtane nafsiserem jeman gam gweipmini.

44(10:43)

45Aas gemerserem, Ai Tane Angtanemana, Ai Ajam jelyan angtane nafsi Ai As jam ne batobafe, jengga Ai enggalf Ai fortya angtane nafsi Agam batobaabif, ane gwela Amnaiserem Agam golmif jamer Ai As tere, jega angtane unggwanfer gam aftabunnuf."

46Yesus ane angtane Jei aa jei ne tikwebaatinennerem jei kota Yeriko ga aa ge forobili. Jepga Yesus ane angtane Jei aa jei ne tikwebaatinennerem jam aa galap ge sofobilirim angtane unggwanfer aaiserem jebar, angtane aasaje ga nel eyep ga jep nwini. Jei nwe kofa, ane jei doif jeber-jeber aber-aberwowena. Jemna bosna ga Bartimeus, tane Timeusmana.

47Jei jam aa galap sararam enggame, Yesus Angtane tamna Nasaret jeiserem Jei Jam jela, jei ga towaiwulu enggam ga gwarna, "Yesus, Tane Raja Daudmana, ai ase nesikte!"

48Angtane afweraiserem jei ga jam ne uftana, ga aane bala "Jas tikwe!" Jengga jei gamjon ga gwarna uskambarsus, "Tane Raja Daudmana, as nesikte!"

49Jepga Yesus ga aa fyatena, ane angtane ga balbabili, "Imsa jenbe!" Jepga angtane nwe kofaiserem enggam ga aane bala, "Gase sar! Se irwe! Yesus Jei ims jenbene!"

50Jepga angtane nwe kofaiserem fene sagamanaiserem ga jasona, ane ga irwena, Yesusminip ga nunggirwena.

51Yesus ga angtane nwe kofa jeiserem ga tenebana, "Aamei ibas bili Ai ibe is Ajes eyeibefe?" Angtane nwe kofaiserem ga tamawolbana, "Guru, ai enggam ai gunu, ai waakenfer anggasif."

52Jepga Yesus ga angtane nwe kofaiserem ga bala, "Se sofwe! Nwena imna kofaiserem is mes ne waakennebal, aam temawer aamei Ai As imes tebana waakenfer." Yesus game balaram, ane jes jeberserem jei ga gaarasini, ane jei Yesus ga tikwebaatini nele jeiserem jebe.



 <<  Markus 10 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel