Alkitab Mobile SABDA
[VER] : [BERIK]     [PL]  [PB] 
 <<  Wahyu 1 >> 

1Bukunu aaiserem taterisi aaf aa je ge batobilirim, taterisi jeiserem ga Yesus Kristus aa jes gwerauwuluntum galap aa je ge etamwebiliserem jem temawer. Uwa Sanbagiri Yesus Kristus towastanant, jega Jei angtane awelna Uwa Sanbagirmana aa jei ne gweyibenerem Jei gam towastababif enggame, aa je ge etamwebiliserem abakefyan ga sege etamwebili. Ane jepga Kristus Jei malaikata ga baftanant Yohanesminibe enggalfe taterisi jeiserem gam bilibef jebe.

2Ane Yohanes seyafter aa jes domolantam ga nasipmini. Jei aa jes domolantam ga Uwa Sanbagirminiwer jela, ane taterisi bunarsusfer aaiserem Yesus Kristus aa jes bilibenerem.

3Angtane taterisi aaiserem aa jei ne gerabistenaram, jemna ini waakenfer sege folbamini. Ane angtane taterisi Uwa Sanbagirminiwer aaiserem aa jei ne sarbisinirim, ane taterisi aaiserem jebe aa jes gam tulistababilirim ga gane onsobili, ini jeman jegme waakenfer gangge folbamini. Ini jemna waakenfer ga aam temawer gangge folbamini abakefyan bukunu aaiserem seyafter aaf aa jes tulistababilirim ga sege etamwebili.

4Ga ip, tuju safna Yesus aa jei ne tebanaram propinsi Asya je. Amniwer, Yohanes. Ai sembayangs gwebana Uwa Sanbagiri, ane Mafnan Jemna, ane Yesus Kristus Jei waakena Jelemanaiserem ip is ga sege golmini, ane ini imna samfer is ga sege folbamini. Uwa Sanbagiri Jeiba namwermanaiserem, Jei gwananmanaiserem, ane gamjon se gwena abak-abaksus. Mafnana tuju Jelemanaiserem taman nwini sanbagiri Uwa Sanbagirmanaiserem ga jep ge nwinbene. Yesus Kristus Jei taterisi Uwa Sanbagirmana bunarsusfer ga jes towas-towasulmuwena. Jei ga nabal-nabalsusu ga Jei se irwena terewer, ane Jeiba Sanbagirsusum raja seyafter gemerserem ogirip aaiserem jep aa jei ge nwinbenerem. Yesus Jei nems nesiktababili, ane tere Jemnaiserem jeme Jei ga etam-etama kapka nemnaiserem ga nes jem wirtabaipmini.

5(1:4)

6Jei gamjon nei nes eyebaabili enggalfe nei safna Uwa Sanbagiri aa jei ne pujitawenaram, Uwa Jelemanaiserem, galfe negama gwef, ane enggalf Uwa Sanbagiri aa jes gam bilirim nei jeiserem negama eyebif. Au, nei Yesus ganma pujite jamer abak-abaksus. Nafa Jemna unggwanfer, ane baabeta Jemna unggwandwasusu! Amin, jes gamserem ga gamfener.

7Gasa damta, Jei Jam fortya winis sinsinibaner! Angtane seyafter gemerserem ga sene damtana, angtane Jei aa jei ne abeitabanaram tumbakeme jei mese. Anggwabura seyafter gemerserem ogiri aaiserem ga sege syebisi Jem temawer. Jeiserem se etamwesa! Amin.

8Tuhan Uwa Sanbagiri enggam gutena, "Ai jamer tap, Amnibe dwona afa jam falbiyen. Ai aare, ane Ai gwananmanaiserem, ane Ai jamer abak-abaksus. Amna baabeta unggwandwasusum."

9Aiba Yohanesam, im afelna, aiba Yesus amsam tebana. Neiba Jemnam, Jei angtane seyafter gemerserem jem Sanbakfam gwena. Jega jem temawer angtane nafsi jei kapkaiserem nep nes jam sene eyeipminirim, jengga nei jafner nesa fina. Yesus nems batobaabili jega nei kanaufer sa fina. Ai ames nasbuwena taterisi Uwa Sanbagirmanaiserem, ane ai angtane nafisfe ames towasulmini enggame Yesus Jeiba am Tuhansam, ane jega jem temawer angtane sanbagiri nafsiserem jei ams ne tergenbana aaf nwinf naantei Patmos je.

10Nunu Tuhanmana, Mafnana Uwa Sanbagirmana Jei ams tebana. Ane alem amnuwer ga ai sara Angtane ga nasowena uskambar, trompet ter manggen gamserem,

11ane Jei ga bala, "Aamei ijes domolaram, jeiserem ga jam is tulistabaipmini, ane bukunu jeiserem ga tuju safna Yesus aa jei ne tebanaram, ga jep is baafulmini kotana jeiserem ga enggammer: Efesus, Smirna, Pergamus, Tyatira, Sardis, Filadelfya, ane Laudikya."

12Ai alem duruwer ga ai irfwena, ai ajam damtaf Jei nansa abar aa Jei ge nasounaram. Jepga ai damtabili lampunu tuju emasabara titikip ge fibili.

13Lampunu jeiserem nenennabe, Angtane aasaje ga jep fina, angtane galserem. Jemna bajunu bwalna gam kamwini, jamer tufabo. Ane Jem danggonawer Jei ban emas gwelawili.

14Nabal safna Jemna ga sinsini enggala domba safna galserem, afa kapas sinsini galserem, ane nwena ga jam ne bwerebawena tokwana gamserem.

15Tufa Jemna ga enggam tembagana galserem, tokwanap jes gam giransiwilirim, ga sofem ga gane wirtana. Ane Jemna tisna ga enggam fosasana gas tenteyal.

16Tafna taasfolawer torbwana ga tuju ga gemer erbisini, ane aaremawer ga nombeya binbinsusu gam ergesosini jemna ula naura. Jemna mirmase ga enggam, gwer nafa gamserem, gwere bolap gamserem.

17Ai jeiserem jame ai agalap domolaram, ai ga ai jena Jem tarnabe, angtane tere gamserem. Jengga Jemna tafna taasfolawer ga aa tosontena am sagabe, ga aa gutena, "Ipsam ernerem! Aiba Nabal danalaiserem, ane Umwefaiserem.

18Aiba Jesam aa Jei gwenaram! Aiba Amsam ter, jengga se angga, Ai abak-abaksusfer Ai gemer Ai gwena. Baabeta uskambar ba Amnam terewer, ane Taman Tereserem.

19Aamei ijes domolaram, seyafter jeiserem jem temawer se tulistababi, ga enggam namwer aamei ijes domolaram, ane Ai galap ibe is Ajes destabaibeleiserem.

20Taterisi aa jes syawulsinirim torbwana tuju Am tafa taasfolawer ijes damtabilirim, ane lampunu tuju emasabara aa jei ge fibilirim titikabe ga enggammer: torbwana tuju jeiserem jei ga malaikata tuju safna Ai As jei ne tebanaram, ane lampunu tuju jeiserem jei safna tuju Ai As jei ne tebanaram."



 <<  Wahyu 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel