1Malaikata jeiserem jei ga fona abe ga ase destaibene, ane fona jeiserem ga angtanef gam gulbana waakenfer gwelaiserem jamer abak-abaksus. Fona jeiserem ga tabalbalsusu kacana galserem, ane fona jeiserem taman nwini sanbagiriserem Uwa Sanbagirmana ane Domba Tanemanaiserem ga jewer sutya.
2Ane kotana jeiserem jebe, fona jeiserem ga jem nenennaber tityetya. Fona jeiserem jem binfip jimwer ane aamwer tini aasa jep fina, ane igi jemna jam gam tenaram tahunu daamfenna muara jeber-jeber, jamere unggwanfer ga dua belas. Angtane titantan aa jei gane tombaabilirim, jei abak-abaksus jam gwelabe. Tini jeiserem jem alnaiserem anggwabura ogirip jem gam waakentababif bwera-bwernawer.
3Kotana jeiserem jebe fasfasusu Uwa Sanbagiri enggam aa jes bilirim, je kapka. Taman nwini sanbagiriserem Uwa Sanbagirmana ane Domba Tanemana jeiserem kotana jeiserem ga jep nulna, ane safna Jemna ga sene pujitese.
4Ane jei mirmase Jemna ga sene damtaibese, ane bosna Jemna sene tulistababisi jelem miribe.
5Jebe gwini fas. Ane lampu naf ane gwer naf jei jam irfwebaabiyen, aam temawer angtane jei Tuhan nemna Uwa Sanbagiriserem Jem nafemfener sege nwinbese. Ane jei ga rajafe jei sege nwinbese jamer abak-abaksus.
6Jepga malaikata jeiserem ga ase bala, "Taterisi aaiserem ba bunaram, ane angtane waakenfer ga jeter sene taabili. Ane Tuhan Jeiba Uwa Sanbagirsam, ane Jei Mafnana Jelemana nabi-nabif golmini. Ane Jei malaikata Jemna mes baftannu enggalfe, angtane awelna Uwa Sanbagirmana aa jei ne gwebilirim jei jep gangge saamisif galap aa je ge etamwebiliserem."
7Jepga Yesus enggam ga gutena, "Aaiserem ga jam isa sarbisini! Ai abakferyan As fortya. Taterisi jam etamweyanaiserem bukunu aaiserem jep aa jes tulistaabilirim jebe, angtane taterisi jeiserem aa jei ne sarbilirim, ane jeter ga sene eyebili, angtane jeiserem ini jemna waakenfersus sege folbamini."
8Aiba Yohanesam. Ai ames sara ane ai ames damtana, seyafter Uwa Sanbagiri as mes ge sabasini. Jeiserem ai sarbisini ane ai gerabili taban, malaikata jeiserem jei seyafter abe as mes ge saayibesnenne, ai malaikata jeiserem jem tarnap ga ai nwintena somwan dumeme, ai safe jei ajam sembataf.
9Jengga jei ai ase enggam bala, "Safnant, aamei ai as ijam sembatayan, aam temawer ai, ane aamei, ane im afelen mesna jeiba nabisam, ane angtane seyafter taterisi aa jei ne sarbilirim bukunu aaiserem jebe, ane ga jeter sene eyebili, nei seyafter daamfenna. Nei seyafter awelna Uwa Sanbagirmanaiserem nejesa gwebili. Nei Uwa Sanbagiri tefner ganma sembata!"
10Ane jei gamjon ga as bala, "Taterisi Uwa Sanbagirmanaiserem gwanan jam etamweyanaiserem bukunu aaiserem jep aa jes tulistaabilirim jebe, ijam syawulsiyen, aam temawer jemna nunu jam gwetmanswena jeiserem seyafter jewer ge etamwebife.
11Nunu gamjon fas angtane kapka gwela jem waakenulsife. Angtane kakala aaiserem saf se gwena kakalmer, angtane etam-etamabara saf se gwena etam-etamabarfe. Ane angtane waakena aaiserem saf se gwena waakenmer, ane angtane aa jei gam eyebilirim Uwa Sanbagiri aa gam ga gunurum, jei saf se gwena jes gam eyebili Uwa Sanbagiri aa gemer gam gunurum."
12Yesus enggam ga gutena, "Aaiserem ga jam isa sarbili! Nunu abakefyan, Ai gamjon ga Ase fortya. Ai fwaina As gwirinmifeltye angtane waakenfer gwelaiserem jebe. Ane angtane seyafter awelna aa jei ne gwebilirim jem fwaina ga As syenulmini.
13Ai jamer tap, Amnibe dwona afa jam falbiyen. Aiba Nabal danalaiserem, ane Umwefaiserem. Ai gwananmana jamer tabanabo.
14Angtane fene aa jei ne wirtabaabilirim jamer sinsinsus, ini jemna waakenfer ge folbamini. Jei titantan tini jeiserem ga jei sene tombaabili, ane jei abak-abaksusfer ga jei se naawesa, ane kotana jeiserem jep ga jei sege kabwitena mwonawer.
15Jengga angtane kotana jeiserem jem eyewer aa jei ge nwinbenerem, angtane jeiserem ga enggala: angtane jener ne eyebiliserem Uwa Sanbagiri aa jes bilirim jam eyebiyenfe; angtane faatrews aa jei ne eyebiliserem; angtane maaryen aa jei ne gwebiliserem; angtane, angtane nafsi aa jei munbobuwenaram; angtane patunga aa jei ne sembatababuwenaram; ane angtane ol kabwak aa jei ne nasbiliserem ane kapkaiserem aa jei ne eyebilirim."
16Jepga Yesus ga ams bala, "Aiba Yesusam. Ai malaikata Amna is Amesam baftamitne ibe, jega taterisi aaiserem Uwa Sanbagirminiwer safna Ai As jei ne tebanaram seyafter is gam nasbaipmif. Aiba Daudtem asal-asalam. Aiba torbwana nafabaram aa jei jersyetyaram gwinibener."
17Mafnana Uwa Sanbagirmana, ane wi siwiri Domba Tane aa jes gularam, jei ga aa ge gutena, "Au!" Ane angtane seyafter gemerserem tateris aaiserem aa jei ne sarbilirim, jeme gemer sege gubitena, "Au!" Angtane fobotona aa jei gam folbanaram, jei ga saf se fortya. Ane angtane jelem inip aa jei gam gunurum, jei fona jeiserem jam telbife doiyamer, fona waakenfer jem gwelaiserem jamer abak-abaksus angtanef aa jei gam gulbanaram, angtane jes mese saf se fortya.
18Ai Yohanesam, ai isa ititmer balbabili, taterisi gwanan jam etamweyanaiserem bukunu aaiserem jep ai ajes tulistaabilirim jebe, aamei seyafter taterisi jeiserem is jei ne saripminirim: angtane afa jei taterisi gwanan jam etamweyanaiserem jener gam tulistaabili nafismer taterisi bukunu aaiserem jemniwer, ane afa jei enggam gam gunurum taterisi jes mese jeimba taterisi Uwa Sanbagirmana, gam jega Uwa Sanbagiri Jei angtane jeiserem jep gam daranulbaasini tamtamtala Jemnaiserem jeme.
19Afa angtane enggam gam gunurum, "Taterisi gwanan jam etamweyanaiserem bukunu aaiserem jep ai ajes tulistaabilirim jebe, taterisi jeiserem jeba bunaryan.", afa angtane game aa jei gam gunurum, gam jega Uwa Sanbagiri Jei titantan jemna gamjon se golsiwili. Tini tannabara jeiserem afa angtane aa jei ne tombaabilirim, jei abak-abaksusfer gase naawesa. Ane angtane jeiserem kota waakena ai ajes tulisonantam bukunu aaiserem jebe, jei jep jam kauteyan.
20Yesus aa gam gunurum taterisi ai ajes tulistaabilirim jeba bunaram, Jei enggam ga gunu, "Bunar, Ai abakferyan As warautna." Ane nei ga nesa gutena, "Ngga, jeiserem ba bunaram. Tuhan Yesus, se forya!"
21Ai Yohanes, ai sembayanga as gwebana enggame Tuhan Yesus Kristus Jei waakena Jelemanaiserem ip ise golmini angtane seyafter safna Uwa Sanbagirmana jebe. Amin.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel