Alkitab Mobile SABDA
[VER] : [BERIK]     [PL]  [PB] 
 <<  Yakobus 1 >> 

1Ga ip, aamei safna Uwa Sanbagirmana anggwabura Yahudimanaiserem, ogirip igemera nwinbenennerem. Surta aaiserem amniwer, Yakobus. Aiba angtane awelna Uwa Sanbagirmana ane Tuhan Yesus Kristusmana aje eyeipminirim. Ai aamei isa enggam ai balbabili, waakenfer sa gwe!

2Am afelen mesna, afa aamei unggwasbala jam isa damtabilirim gala-gala, ini imna ga ise saaser-saasermer sege folbamini,

3aam temawer aamei enggam imsa towaswena, aamei unggwasbala jam ijeba domolaram, ane jes jepserem aamei Yesus ga gemer isa tebana, igi jemna ga enggam aamei kanaufer isa fina unggwasbala nafsiserem gamjon ijeba domolaram.

4Aamei ga kanaufera isa fina unggwasbala jam ijeba domolaram. Jewer ga aamei gamjon ginggitfer ga isa tebafa, jega aamei waakenfer gam isa gwena. Ane gwela imnaiserem jebe, ini imna waakena seyafter ga is sege folbamini.

5Afa angtane imniwer tousaiserem jam domolyanaye, jei sembayanga Uwa Sanbagirf enggam gam gwebabana, "O Uwa Sanbagiri tousaiserem ap se gulba.", ane Uwa Sanbagiri Jei angtane jeiserem tousaiserem jep ga gam gulbana. Jei gam gulbana, aam temawer Uwa Sanbagiri Jei angtanefe uskambar kitulmuwena. Angtane safe bastantowaifer gane bala, jengga Jei unggwanfersus gam golmini, ane Jei enggam jam ge gubiyen, "Aamei Ai gamjon As ijama balyan."

6Angtane Uwa Sanbagirminiwer apgal jigala jam gam bilibenerem, jei jelem inibe isar-isarmere jam bilyen, jengga inibersus enggammer gam gunu Uwa Sanbagiri jeiserem se eyebili. Angtane isar-isarabara aa jei gam gwenaram, jei ga enggala ti alna tiniwer antiyele jam irfifwela galserem, bwona enggam gam fonolswena enggam gam fonoltetya.

7Angtane jes galserem, jemna ini daamfennaber jam folbayan, jei namwer enggam gam eyebili, ane galap jei nafismer gam eyebili. Jei enggammersus jam guyon, "Ai waakena Uwa Sanbagirminiwer as domola."

8(1:7)

9Angtane Kristen galgalyenaiserem, ini jemna ga saaser-saaserfer gam folbana afa Uwa Sanbagiri galgala jep jam gam gulbanaram.

10Ane angtane Kristen galgalabaraiserem, ini jemna ga saaser-saasermer gam folbana afa Uwa Sanbagiri galgala jemniwer jam gam tamserenbaibenerem. Ini jemna ga saaser-saasermer gam folbana, aam temawer angtane galgalabaraiserem ga enggala kakatar ese gamserem, ese jeiserem gam ferwesini abakefyan, gamjon gam werenswena, ane ga gam jentya onnap. Jes gemerserem angtane galgalabara ga gemer gam tere.

11Gwere jam gam tawetyaram nafa jemna unggwanfer ane sarsara, jepga kakatar ese jeiserem ga gam sasanswena, ese jeiserem gam gam jentya, nei numu waakena jemnaiserem gamjon nejama domolyan. Jes gemerserem angtane galgalabaraiserem jeime gemer, jei awelna jemna jam aa jep gam eyebilirim, jeime gam jena.

12Afa angtane kanaufer jam gam finaram jei unggwasbala waakenaiserem jam aa jep gam domolaram, ini jemna waakenfer gam folbana. Angtane kanaufer aa jei gam finaram unggwasbala jam domola jepserem, ini jemna waakenfer gam folbana, aam temawer jei fwaina waakena gam domola. Fwaina waakena jeiserem ga aas: waakenfer gwelaiserem jamer abak-abaksus Uwa Sanbagiri aa jes bilipminirim angtanef jam golmife, angtane Uwa Sanbagiri aa jei ne nesiktenerem.

13Afa angtane unggwasbala kapkaiserem jam gam domolaram, angtane jeiserem jei enggammersus jam guyon, "Unggwasbala kapkaiserem Uwa Sanbagirminiwer jela." Uwa Sanbagiri Jei unggwasbala kapkaiserem fasfasus jam domolyan, ane Jei unggwasbala kapkaiserem Jam golmiyen angtanefe.

14Jengga angtane ini unggwan-giri enggam aa jemanem gam folbanaram galgala unggwanfer jam damtabif, ini jes galserem angtane ga jei gam dektene etam-etama jam eyebife.

15Gam jega angtane nabala enggam gam gunu jelem inibe, "Ai etam-etama kapka ajam eyebif." ane jei etam-etama jeiserem ga gam eyebili. Ane jei jeber-jeber kapkaiserem ga gam eyebuwena jamere jei gam tere, taman tokwagirip ga gam sofwa.

16Am afelen mesna ai isa ajes nesiktababilirim, aayai aamei in ina ijama afaf-afafsoyan! Kapkaiserem afa jam jelyan Uwa Sanbagirminiwer.

17Seyafter waakenaiserem ane bunarsusferaiserem, Uwa Sanbagirminiweram jela, Uwa Sanbagiri nafa seyafter aa jei eyebilim winsibe. Ane Uwa Sanbagiri Jei nafis-nafismer Jam eyebaabiyen. Jei aa jes eyebuwenaram, Jei ga jetefner eyebili. Jei ti uwuwu gamserem gamyan. Gwere jam gam anggasetyaram tibol mwongfar timana uwuwu bwalefer gam falbili, ane gwere bolap jam gam fityaram timana uwuwu gam toforswebili. Jengga Uwa Sanbagiri Jei Jam irfifweyan, Jei gamfener.

18Gwanan galapserem Uwa Sanbagiri enggam ga gul, "Ai angtane aaiserem Ajam eyebaabif Alefe." Ane taterisi Jelemana bunarsusfer aaiserem nei ga nes jem eyebaabili Jelem angtanefe. Nei Yesus nabala neya tebana waakenfer, ane angtane unggwanfer nafsiserem jei jon Yesus sene tebafa galabe.

19Am afelen mesna isa ajes nesiktababilirim, aaiserem ga waakenfer isa sarbisini. Aamei tatarmer igama sarbili, jengga samem-samem igama nasbili, ane samem-samem igama kakalswena.

20Uwa Sanbagiri Jei nei nes enggam balbabili, "Ini imna ga jam isa wirtabaabili." Jengga afa nei jeber-jeber nesa kakalsowenaram, ini nemna nejama wirtabaipmiyen.

21Jega jem temawer kabwakfer gwela ga jam isa tobolsiwi. Ini imna jam onabertalaiserem jesa tebabi, ane Taterisi Waakenaiserem jem ga isa sarbisini, taterisi Uwa Sanbagiri ijes golminirim ilem inibe. Taterisi jeiserem baabetabara aamei is je waakentabasife.

22Taterisi jafner ijama sarbisiyen, aam temawer afa aamei jafner jam igma sarbisini, gam jega aamei in inater igma afaf-afafsona. Taterisi Uwa Sanbagirmana aa jes bilirim, ga jam isa eyebili.

23Angtane taterisi Uwa Sanbagirmana jafner aa jei gam sarbisinirim jengga jam eyebiyen, angtane jeiserem ga enggala angtane mirmase jelemana serminip jam damtala gamserem.

24Jei jena jam gam gerebanaram serminibe, ane ga gam sofwa, ane jes jeberserem jei numu jelemana gam dirinswebili fomfom folbana.

25Taterisi Waakena waakensusu, ane baabetsusu angtane jam geserstefe gwiniwer. Angtane Taterisi Waakena jeiserem aa jei gam terelbilirim jamere waakenfer gam taabili, jei jafner jam sarbisiyen ane jam dirinswebiyen, jengga jei jam gam eyebili Taterisi Waakena jeiserem aa jes gam bilirim, Uwa Sanbagiri Jei waakena Jelemanaiserem angtane jes galserem ga jep gam gulbana, ane jei waakenfer gam gwena.

26Afa angtane aa jei gam gunurum enggame, "Ai Uwa Sanbagiriserem aJes onsobana.", jengga afa jei maflama jelemana waakenfer jam gerebaasneneyeneye, jei jenjen ga jam gam afaftana, ane jei bunarsus Uwa Sanbagiri jam onsobayan.

27Angtane ga fwersa Uwa Sanbagiri aa jes balaram waakeneme? Angtane waakenaiserem ga enggala: angtane gwesef tane ane saamirawi aa jei gam gerebaabisnenne waakenfer, afa jei kabwaktala jam gane domolaram. Ane jei jen jena waakenfer gam gerebaasnenne, jega kapka ogirmanaiserem jam dekteyen etam-etamap jam janfe.



 <<  Yakobus 1 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran