1Ane aamei, angtane doini uskambar jemanserem, aamei esorola amniwer aaiserem imsa sarbisi! Aamei uskambar jam isa syesyawena, aam temawer aamei kabwaksususerem galap isa domolsa, ane isa enolsa.
2Galgala imna uskambar jeiserem mes ge butswebili. Bingini fene imna mes ne tombaipmini.
3Emas ane perak imnaiserem mes ge sargwet-sargwetabarswebili. Ane nunu Uwa Sanbagiri Jei angtane seyafter aa jem tenebaabuwesaram umwefe, emasa yo peraka sargwet-sargweta jemnaiserem aamei ga is jei sene destabaabisi enggame, emas yo perak imna angtane nafsiserem jebe ijama kitulmiyen. Ane sargwet-sargweta jeiserem tifni imnaiserem ga is jem se taayipmisisi tokwana gamserem. Aamei galgala unggwanfer imsa orobaabili nunu umwef namwer aas jepserem.
4Aamei doini fas ijama kitulmiyen angtane awelna aa jei ne gwebilirim makana imnaiserem jebe. Namwer jei aa jes ge gwarenbuwenaram, aamei gwarna jemna jeiserem jasa saripmi! Angtane nananis aa jei ne tumtumulsiwenaram im makanabe, jei enggam ge gwarenbuwena, "Asa batobaabi!" Ane jei aa jes ge gwarenbuwenaram, Uwa Sanbagiri Jei mes sarbabili imwana Jelemanaiserem jeme, Jeiba Tuhan baabetabaraiserem.
5Aamei ogiri aaiserem jep imesa nwini ini saaser-saasermer, aam temawer aamei galgala anesus ima damtabuwenaram. Tifni imna is mes ge teleberswebamil, tabanap imsa fyal jam targabaabife.
6Angtane kapkaiserem jam ne eyebiyeneiserem, aamei angtane jeiserem jem temawer enggam igama gunu jei jamer sege terbili, ane aamei jei ga igama munbobili, ane jei aamei is jafner ne onsobaabili.
7Ga jem temawer am afelen mesna, abakfer igama fina, ane kanaufer igama fina jamere Tuhan se fortya. Sa damta angtane makana aa jei gam gwebanaram, angtane jeiserem fomfom gam fina jamere ona jeiserem nananisi jem igiserem gam gulbana waakena. Jei arous gam fibana twam tanna nalefe jam tonolyan, ane arouwa afelnaiserem gam fibana nalefe nananisi jam ge eseberswebife.
8Ane aamei mese, aamei abakfer igama fina, ane kanaufer igama fina, aam temawer nunu Tuhan jem foryalaiserem nunu jeiserem ga mes gwetmansweyal.
9Am afelen mesna, aamei taterisi syefer ijama nasbiyen angtane nafsiserem jem temawer, jega Uwa Sanbagiri aamei is Jam teneba-tenebabuweyan. Angtane jam Jei tenebaabuwelaiserem mes menetwesil jewer foryafe.
10Am afelen mesna, nabi-nabi fwater aa jei ge nasbawelam Tuhanem boseme, jes sa sarbabistaabon. Angtane nafsi safe kapkaiserem jes ne eyeipmuwel jebe, jei abakfer ge fibil, ane kanaufer ge fibil. Jei waakenfer naawel, ane nei samfer ga gemer nesa gwena jei gamserem.
11Angtane enggam ne balbabili, nabi-nabi jeiserem ini jemna waakenfer ge folbamini, aam temawer jei kanaufer ge fibil. Aamei imsama sar Nabi Ayubem temawer, jei kanaufer aa gam filam jei tamtamtala uskambar aa galap domolaram. Ane aamei imsa towaswena enggame, Tuhan Jei waakena jep mes gulbal nalefe jam teryen. Tuhan Jei angtane uskambar nesiktababili, ane ini Jemna waakena.
12Am afelen mesna, igsusu ga aas: Aamei ina ijama testenanayan taman waaken-girem boseme, safe ogirem bosem, afa apgal jigala nafsiserem jem bosem. Jafner igama biltena, "Sya." afa aamei enggam igma gunu bunar; ane "Fas." afa aamei enggam igma gunurum jeiserem bunaryan. Jes gemerserem aamei ga gemer isa eyebili, jega Uwa Sanbagiri Jei aamei is Jam tamtamtababiyen.
13Afa angtane im nenennabe kabwaktala aa jei gam domolaram, jei sembayang jam gam gwebana. Afa angtane ini saaser-saaserfer aa jeman gam folbanaram, jei simals gam twola, Uwa Sanbagiri ga gam pujitene.
14Afa angtane im nenennabe jei bwerna jam gam folbanaram, jei angtane sanbaka jemata aa jei ne taabilirim ga jes gam jenbebili. Angtane sanbak jeiserem jei sembayanga ga gane gwebabana, ane minyakem ga gane gwebana Tuhanem boseme.
15Angtane sanbak jeiserem jei sembayanga jam aa jep gane gwebanaram, afa jei bunar-bunarsusfer jam gane tebanaram, angtane bwernabara jeiserem jei ga gam waakenswena. Tuhan Jei angtane jeiserem ga gam waakentana, ane afa jei kapkaiserem jes gam eyebilirim, Tuhan Jei etam-etama kapka jemna jeiserem ga gam wirulbaasini.
16Jega jem temawer etam-etama kapka jes igma eyebaabilirim, seyafter ga jam igama nasbabili jam towaswebabife. Ane sembayang ga jam igama gwebabinenne. Aamei sembayanga angtane nafsiserem jem temawer igama gwebana, ane angtane nafsi jei sembayanga im temawer gane gwebana. Ga gemer isa eyebuwena, jega Uwa Sanbagiri aamei is ga gam waakentababili. Angtane aa jei gam eyebilirim Uwa Sanbagiri aa jes gam bilirim, sembayanga jemnaiserem baabeta uskambar.
17Nabi Eliya jeiba angtanesam nei galaterserem. Jei sembayanga ini jemna seyafter gemerserem jem gwebal enggame, "Arouwa jam nyenyan.", ane arouwa ga jam nyenyan jamere tahunu unggwanfer ga tiga setenga.
18Ane jei sembayanga gamjon aa gwebal, ane jes jemerserem arouwa ga ireyal winsiwer, ane nananis gamjon waakenfer ga aa ge tenbili.
19Am afelen mesna, afa angtane im nenennabe jei taterisi Uwa Sanbagirmana bunarsusfer aaiserem baif jam gam gwebilirim, ane angtane nafsiserem jei angtane jeiserem gamjon ga gam batobana jamere angtane jeiserem gamjon gam warauwa Uwa Sanbagirminibe,
20ayata aaiserem jesa sarbistaabon: Angtane aa jei gam gwebanaram angtane etam-etamabara gamjon gam waraunafe nele kapkaiserem jewer, angtane jeiserem jei angtane etam-etamabara jeiserem uwu jeman gam waakenulbaasini terewer, ane etam-etama unggwanfersusu aaiserem ga gam matabaibasini.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel