1Nunu Minggu jem gwinibener, ona gwini ga gemer, Maria Magdalena jei Yesusem tonmwa bitis tarnap ga aa sofsa. Jei tuna unggwandusa pintuf aaiserem tonmwa bitisi aa jem ne motolsinirim enggam damtasa, mes ne irfitaanwili tonmwa bitisiwer.
2Ane jepga Maria ga aa nunggiri, Simon Petruso ane ai Yohanes gas terelmisi. Aiba angtane afwer Yesus aJei tikwebaatinirim Yesus aa jes nesiktaunaram. Ane jei ga as gitmisi, "Tuhan Jei tonmwa bitisiwer mes ne gaasaarstena, ane ai ajam towasweyan Jei ga fof ne gerna."
3Jepga Petrus ane ai, ai ga tonmwa bitis tarnap ga ai ge sofwa.
4Ai jamer ge nunggiri, jengga ai tatarmer ai nunggiri Petrusminiwer, ane nabala gwanan ai forna tonmwa bitis tarnabe.
5Ai tonmwa bitisip ga ai naarwetena, ane ai ga sufa sinsini tefner ai damtana, sufa jeiserem ga jenefener faliton, jengga ai ajam kauteyan.
6Ane Simon Petrus jei ga am amnup forna tonmwa bitisi jeiserem jebe, ane jei ga jamer kautena tonmwa bitisibe. Jei ga sufa sinsini tefner damtana, sufa jeiserem jep ga jenefener faliton.
7Jengga sufa Yesusmana duka aa jem ne fwirebanantam, sufa jeiserem egwaitaasili ga jenefener faliton, sufa nafsi jem tarnap afa fas jam falyan.
8Ai safe nabala ai forna tonmwa bitisi jeiserem jebe, jengga ai amnup ai kautena. Ai ga anggasnenne, jepga taabili enggame ba bunaram Yesus mes irwena terewer.
9(Jes galapserem, bunarsus ai gemerje ajam ge saryan Taterisi Uwa Sanbagirmana jebe aa jes tulisulurum enggame, Jei gamjon se irwa terewer.)
10Jepga ai Yesus aa jei ge tikwebaatinennerem, gamjon ga ai ge warauwa alem jenabe.
11Maria Magdalena jei tonmwa bitis tarnap fina, ane jei ga aa syena. Jame aa galap syenaram, jei tonmwa bitisip ga aa naarwetena enggalfe, mwona gam domolf.
12Jepga jei malaikata naura fen sinsinibere ga domsotena. Malaikata naura jeiserem jei Yesusem futunu aa jep ne gaarantenaram ga jep ge nuniton, afelna duka jewerserem ga jewer nwini, ane afelna tufa jewerserem ga jewer nwini.
13Malaikata jeiserem jei ga Maria ga aa ge taanaabili, "Iye, aamei ibaf syena?" Jepga Maria ga aa tamawolmini, "Tuhan amna mes ne gaasaarstena tonmwa bitisiwer, ane ai teisyena jei ga fof ne gerna."
14Maria jei game aa gutenaram, jei jelem duruwer ga aa irfwena, jepga Angtane aasaje ga damtana Jei jep fina. Angtane jeiserem Jei Yesus, jengga Maria jam towasweyan enggame Jeiba Yesusam.
15Yesus Maria ga aa taanaabili, "Iye, aamei ibas syebili? Ane aamei inans terelbene?" Maria jei enggam gunu jelem inibe angtane aaiserem jeiba tampata aaiserem aa jei gaarabisnennerem, ane Maria jei ga aa bala, "Uwa, wa afa aamei geserstelaye aawer, gwanan asim bil Jei ifof gerna, jega ai jep gam as gaarfeya."
16Jepga Yesus bosna jelemanaiserem jewer ga aa jenbili, "Maria." Maria jei Yesusminiwer ga aa irfwena, ane Ibrani olem ga aa gutena, "Rabuni!" (Nem olem je Guru.)
17Jepga Yesus Maria ga aa bili, "Aamei Ase ijam tebasneneyen, aam temawer Ai Uwaminibe gemerje Afas warauwa. Jengga aamei gase sofwe angtane Alemana Ai aa jei ne tikwebaatinennerem jemnip, ane jep ga is nasipmini enggame, namwer ga Ai Ajam warauwa Alem Uwaminip, ane Uwa imnaiserem Jemnip. Ai Ajam warauwa Alem Uwa Sanbagirminip, ane Uwa Sanbagiri imnaiserem Jemnip."
18Jepga Maria Magdalena ga aa sofwa, ane ai angtane Yesus Jei ajeya tikwebaatinennerem enggam ga as towastababili, jei Tuhan ga mes damtana. Ane taterisi Yesus aa jes nasbilirim enggalfe angtane Jei ajeya tikwebaatinennerem abe as gam nasipmif, seyafter jeiserem Maria ga as nasbaipmini abe.
19Nunu Minggunu jes jeterserem, ona jame aa galap gigitswenaram, ai angtane Yesus Jei ajeya tikwebaatinennerem ai jenap ga aya betwena, ane pintunu seyafter ga aane matabaabisnenne. Pintunu jeiserem ga aam temawer ne matabaabisnenne, ai angtane sanbaka anggwabura Yahudimanaiserem ga ajesa erebaabili. Yesus jepga aa fortya, ane am nenennabe ga aa fyatetya, ane ga as balbabili, "Waakensusu ise etamwemini ibe!"
20Yesus Jei game as balbabilirim, Jei tafna yo usuyu Jemna ga as ge saamini. Jes jepserem ai Tuhan jame agalaba damtanaram, ini amna ga ase saaser-saasersusfer ge folbamini.
21Ane jepga Yesus Jei gamjon ga as balbabili, "Waakensusu ise etamwemini ibe! Uwa Sanbagiri Ai As gemer baftatnantam, Aime aamei isa gemer As baftabili."
22Ane jepga Yesus mafnana Jelemana ga as forolmini abe, ane ga as balbabili, "Mafnana Uwa Sanbagirmanaiserem gasa taayibe.
23Afa aamei etam-etama kapka angtanemana jam igama borolminirim, Uwa Sanbagiri Jeime etam-etama kapka jemnaiserem ga gam wirtabaipmini. Afa aamei etam-etama angtanemana ijama borolmiyeneye, Uwa Sanbagiri etam-etama kapka jemnaiserem ga jam wirtabaipmiyen."
24Tomas aa jes ne jenbewenaram "Nawer Bateneme", jei angtane daamfenna ai angtane dua belas Yesus Jei ajeya tikwebaatinennerem, jei jep fas Yesus Jena aa galap ge sanaram amnibe.
25Jepga ai angtane Yesus Jei ajeya tikwebaatinennerem afweraiserem, ai Tomas ga aya bala, "Ai Tuhan amesa damtana!" Jengga Tomas jei ga enggam tamawolbaabili, "Afa ai paku bwenta Jem tafnap ajam domsobayanaye, afa tafabola amna jem paku bwentabe ajam ensobayan, afa ai tafna amna Jem tumbak bwenta usuyube ajam kasoniwiyeneye, ai taterisi imnaiserem nalefe ajam taabiyen."
26Minggunu gamjon jeiserem, ai angtane Yesus Jei ajeya tikwebaatinennerem ai jena gwanan jeiserem gamjon ga jeber aya betwena, ane Tomas mese. Pintunu seyafter ga jam matabaabisnenele, jengga Yesus Jei am nenennabe ga aa fyatetya, ane Jena ga aa ge sana amnibe, ane ga as balbabili, "Waakensusu ise etamwemini ibe!"
27Jepga Yesus Tomas ga aa bala, "Tafna Amna ga Asim domsoba. Ane tafabola imna aaf gase gaarante. Tafna imna se bisouye, ane Am usuyube ga is kasoniwitye. Aamei isar-isaryamer is gwena, jengga taterisi Am temawer aaiserem, taterisi jeiserem ga jamer is taabili."
28Jepga Tomas Yesus ga aa bala, "Aameiba am Tuhansam, ane Aameiba Uwa Sanbagiri amnam."
29Ane Yesus ga aa bala, "Aamei As imes damtana, jega jem temawer aamei Ai ga Asim tebana. Ini angtanemana waakenfer aa jemanem ge folbaminirim, jei Ai Ajei ne tebanaram, jei safe Ai As jam ne damtayan."
30Bwembwema afwer safe anesus Yesus aa jes eyebaabuwenaram ai angtane Jei ajeya tikwebaatinennerem am tarnabe, jengga bwembwema unggwanfer jeiserem bukunu aaiserem jebe ajam tulistaabiyen.
31Jengga aaiserem ai ames tulistaabili, jega aamei gam isa taabili enggame Yesus Jeiba Angtane Uwa Sanbagiri bunarsus aa Jes balam Jam baftanaf enggalfe angtane gam waakentababisif. Jeiba Tane Uwa Sanbagirmanam. Ane aamei Jei ijewera tebanaram, aamei waakenfer gwela ga jem temawer isa domola bosna Jemnaiserem jeme.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel