Alkitab Mobile SABDA
[VER] : [BERIK]     [PL]  [PB] 
 <<  Yohanes 7 >> 

1Jes jepserem taban, Yesus jepga aa wofena ona Galileyaminibe. Jei bai ona Yudeyaminiwer Jam gwife, aam temawer angtane sanbaka Yahudimanaiserem jei nels ne terelbene enggalfe Yesus jewer gam ne munbof.

2Jes galapserem Nunu Masara Jatouya jem ne Eyebaabiliserem ga mes gwetmanswena.

3Jepga Yesus Jelem oson mesna jep ga aane bala, "Ona aaiserem jas mirsotefal, ane ona Yudeyaminiwer ga Is sofwa, jega angtane Aamei Is jei ne tikwebaatinennerem awelna Imna jebe Is ga sene domolbana.

4Afa Aamei enggam Is gunurum, 'Ai angtane unggwanfer As gane damdamtaasife.', gam jega Aamei awelna basyamer Ijam gwebiyen. Aamei aafe bwembwema unggwanfer Imes eyebaabili. Bwembwema jes galserem gamjon jas eyebaabi, jega angtane ogirip seyafter gemerserem Aamei Is ga sene damdamtaasini."

5Jei gam aa jewer ge gubilirim, aam temawer Yesus Jelem oson mesna jeime Yesus jam ne tebayan.

6Jepga Yesus Jei ga aa balbabili, "Nunu Amna kota Yerusalemwer sofwefe gemerje fas fala. Jengga aamei saf isa sofwa nunu namwer aaiserem afa galap-galap.

7Angtane Amanyanaiserem ogiribe jei aamei is jam ne uskamswebabiyen, jengga jei Am sene uskamswebana. Jei Am sene uskamswebana aam temawer Ai enggam Ai balbabili, 'Aamei kapkaiserem ijesa eyebaabili.'

8Aamei sa sofwe masara jeiserem jebe! Ai gemerje jewer Ajam sofweyan, aam temawer nunu Amna gemerje jebe fas fala."

9Yesus ga Jelem oson mesna ga gam balbabili, ane Jei ona Galileyaminip nwini.

10Yesusem oson mesna jam aa ge sofobilirim kotana Yerusalemwer masara jeiserem jes onsobife, Yesus mese Jeime jewer ga sofwa. Jei Jam ge sofwebiyen angtane uskambar jebar. Jei ga basyamer sofwa, angtane nafsi jam ne damtayan.

11Angtane sanbaka anggwabura Yahudimana jei ga Yesus ga aane terelbene masara jeiserem jebe. Jei ga aa ge tenaabili, "Angtane jeiserem jeje fwera?"

12Jepga angtane unggwanfersus jen jena uskambar ga aane nastumunonno Yesusem temawer. Afwer jei enggam ge gubili, "Yesus Jei Angtane waaken." Afwer jei enggam ge gubili, "Wowo, Jei angtanes afaf-afaftababuwena."

13Angtane Yesusem temawer jena jamfener ga aane nastumunonno, aam temawer jei angtane sanbaka anggwabura Yahudimana ga jes ne erebaabili.

14Masara jeiserem ga nenennap, Yesus ga Uwa Sanbagirem Jenap ga aa kautena, jepga angtane aa towaitababili jam towas-towastababife.

15Angtane sanbak anggwabura Yahudimana jei ga jam ge bitbitwebili, ane jei ga aa ge tenaabili, "Jeje fomfoma Angtane aaiserem Jei seyafter tousa, Jei safe sekolanabe Jei Jam kaweyan?"

16Yesus ga aa tamawola, "Taterisi Ai Ajes towas-towasulminirim jeke Amanfenna. Fas, je Uwamana Ai As Jei baftannuntum.

17Afa angtane taterisi Uwa Sanbagirmana waakenfer aa jei saribenerem, jei enggam ga sege towaswebili taterisi jeiserem je ke Uwa Sanbagirmana afa Amanfenna.

18Angtane taterisi jener aa jei gam nasbilirim enggam gam gunu, 'Angtane nafsi as gane pujitef.' Jengga angtane afa jei angtane nafsi aa jei gam towastababilirim enggam gam balbabili, 'Uwa Sanbagiri sa pujite Ai As Jei baftannuntum!', angtane jeiserem jei bunarsusfer gam nasowena. Taterisi afaf-afafa jemniwer fas.

19Nabi Musa jei Hukumu Uwa Sanbagirmana ibe is mes golmil. Jengga aamei Hukumu jeiserem waakenfer ijama sarbiyen. Jeje bafa aamei As ijama munbofe?"

20Jepga angtane anesus jeiserem jei ga aa ge tamawolbili, "Bwata kapka jei Ims eyebana ga Is kabwaktana, ane jega jem temawer Aam ga gam ga Im gunu. Angtane fas Ims munbofe."

21Yesus ga aa tamawola, "Ai bwembwema ga Ai eyebilint nunu Sabateme, ane aamei seyafter ga ima bitbitwena.

22Jeje bafa aamei ga ima bitbitwena? Aamei tane girtowai imna nunu Sabateme ima sunattababuwena, aam temawer Nabi Musa jei enggam gul, tane girtowai ga jam isa sunattababili. (Jengga sunat osiri jeiserem, Nabi Musa jam towaiwulyon, jengga asal-asala nemnaiserem ga jei ne towaiwul.)

23Aamei tane girtowai ga im sunattana nunu Sabateme, jega aamei hukumu Nabi Musa aa jes tulisulum ijama ayebiyen. Afa jeiserem je bunare, gam jega angtane waakentala jemba bunaram. Jeje bafa aamei ga As ima nasbana aam temawer Ai angtane tifni seyafter gemerserem As waakentana nunu Sabateme?

24Aamei angtane nwemfener damtalaiserem tatarfer ijama balyan, 'Jei kapka gam eyebili.' Jengga bunarsusfer jamer igama damtana inibe."

25Jepga angtane kota Yerusalemmana afweraiserem ga aa ge tenaabili, "Angtane ke aas aa jes ne terelbenerem jam ne munbofe?

26Gasa damta! Jei jame teisyenfer nasowena angtane uskambar jem nwenabe, ane angtane jei taterisi afa jam ne tamawolbiyen. Angtane sanbakaiserem jei ke mes ge towaswebili enggame, Angtane aaiserem bunarsusfer Jeiba Mesiasam, Angtane Uwa Sanbagiri bunarsusfer aa Jes balam Jam baftanaf enggalfe angtane gam waakentababisif?

27Nei nemsama towaswena Angtane aaiserem Jei aa jewer jelaram. Jengga Mesias jeiserem Jei jam se fortyaram, angtane afa jam towasweyan Jei fwer jela."

28Jepga Yesus aa gemer towas-towastababilirim Uwa Sanbagirem Jenabe, Jei ititmer ga aa gutena, "Aamke tousa Ai nansa, ane Ai ga Afwer jela? Ai Alem baabeteme Ajam foroyan. Ai As Jei baftannu, Jeiba bunaram. Aamei Jei ijama damdamtaasiyen,

29jengga Ai Jei Ames damdamtaasini, aam temawer Aiba AJemniweram jelant, ane Jei ga Ai As Jei baftannunt."

30Jes galapserem Yesus ga safe jam ne temilf, jengga angtane afa Jei jam ne temilyan, aam temawer nunu Jemna jepserem gemerje fas fala Jei jem terfe.

31Jepga angtane uskambar jep gemerserem, jei ga Yesus jep ga waakenfer ga aane tebana, ane ga aa ge gubili, "Ga fomfoma, afa Mesias jeiserem Jei jase fortyaram, Jei ke bwembwema anesus gase gwebuwena Angtane aaiserem Jemniwer?"

32Angtane safna Farisimana ga aa ge sarbili angtane uskambar jep aaiserem jei jena aane nastumunurum Yesusem temawer. Jei game aa jewer ge sarbilirim, angtane imam-imam sanbakaiserem ane angtane safna Farisimana jei ga angtane Jena Uwa Sanbagirmana aa jei ne geraibesnenewenaram, jei ga aane balbabili jam gwife, Yesus jewer gam ne temilfe.

33Yesus ga angtane uskambar jeiserem ga aa balbabili, "Ai ibar aafe abakferyan. Ane gamjon ga As warauwa As Jei baftannuntum Jemnibe.

34Aamei ga As isa terelbene, jengga As ijama damtayan. Aamei ijama foroyan tampata Ai Ajep nwinirim jebe."

35Jepga angtane sanbak anggwabura Yahudimana jena ga aane tenaaminenne, "Angtane aaiserem Jei fwer se gwina, jega nei ga nejama damtayan? Fomfoma, Jei kota-kotana Yunanimanaiserem jebe ke jep se gwina angtane Yahudimana aa jei ge nwinbenerem, ane anggwabura Yunanimana jep aaiserem ga Jei se towas-towastababili?

36Igi jemna fomfoma, Jei game aa jewer gunurum enggame, 'Aamei ga As isa terelbene, jengga As ijama damtayan. Aamei ijama foroyan tampata Ai Ajep nwinirim jebe.'?"

37Masara jeiserem jemna nunu umwef ga, nunu igsususerem, Yesus ga Jena Uwa Sanbagirmana ga jep fiton, ane ititmer ga aa gutena, "Angtane fo botona aa jei gam folbanaram, jei ga Amnip se fortya, ane fona jewer gam telbife.

38Taterisi Uwa Sanbagirmanaiserem jep ga mes ne tulisul enggame, 'Angtane Ai As jei gam tebanaram, jem inip ga fona abakfer gwelaiserem ga jese forominenne.'"

39Yesus ga Mafnana Uwa Sanbagirmanaiserem Jei ga Jem temawer nasowena. Angtane Yesus aa jei ne tebanaram, jei ga Mafnana jeiserem ga jei sene domola. Jes galapserem Uwa Sanbagiri Jei Mafnana Jelemanaiserem Jei nalef jam golmiyen, aam temawer Yesus Jei gemerje Jam teryen, ane Jei gemerje taman waaken-girip Jam taweyan.

40Angtane uskambar ga Yesus ne sarbasini Jei aa gam nasowenaram, ane angtane afweraiserem enggam ga aa ge gubili, "Angtane aaiserem Jei bunarsusfer Nabisam."

41Angtane afweraiserem ga enggam ge gubili, "Angtane aaiserem Jeiba Mesiasam, Angtane Uwa Sanbagiri bunarsusfer aa Jes balam Jam baftanaf enggalfe angtane gam waakentababisif." Jengga afwer ga enggam ge gubili, "Mesias Jei Jam jelyan ona Galileyaminiwer.

42Taterisi Uwa Sanbagirmanaiserem jep ga enggam baatultel, Mesias Jei ga asal-asala Raja Daudmana. Jei ga tamna Betlehemminiwer se jela, tamna Daud aa jep nwinim."

43Ane jepga angtane uskambar jei Yesusem temawer ga aa ge doksobana.

44Angtane afwer jei enggam ge gubili jei Yesus jam ne temilf, jengga angtane afa Jei jam temilyan.

45Angtane Jena Uwa Sanbagirmana aa jei ne geraibesnenewenaram, jei gamjon ga aa ge waraubitne angtane imam-imam sanbakaiserem ane angtane safna Farisimana mese jemnibe. Imam-imam ane angtane safna Farisimana jei ga aane tenebaabili, "Jeje bafa aamei Yesus aafe ijama aftayalyan?"

46Angtane Jena Uwa Sanbagirmana aa jei ne geraibesnenewenaram jei ga aa ge tamawolbili, "Angtane afa fas game waakenfer jam nasoweyan Jei gamserem."

47Angtane safna Farisimana jei kakalmer ga aane tenebaabili, "Jei ke aamei mese ke is mes afaftababili?

48Fomfoma, angtane sanbaka anggwabura Yahudimana afa angtane safna Farisimana mese, jei ke Yesus ke mes ne tebana? Fas!

49Jengga angtane uskambar aaiserem jei Hukumu Nabi Musa aa jes tulistababilim jei jam ne towaswebiyen. Ane Uwa Sanbagiri Jei angtane uskambar aaiserem se tamtamtababili."

50Nikodemus ga jep fina. Jei mese jeime angtane safna Farisimana. Jei gwanan Yesusminip aa jei fortyantam. Jei ga aa balbabili,

51"Hukumu Nabi Musa aa jes tulistababilim jep ga enggam, nei angtane jeiserem gwanan jam negma sarbana, ane kapka jei aa jes gam eyebilirim jeiserem gwanan ga jam negma towasweibene. Jeiserem taban, nei ga angtane jeiserem jem temawer ga negma bala, 'Jei angtane kapka.'"

52Jepga jei Nikodemus ga aane tamawolbana, "Aamei mese ke angtane ona Galileyamana? Taterisi Uwa Sanbagirmana waakenfer se gerabiste! Aamei jep ga is domoltena, angtane nabi afa Galileyaminiwer jei jam jelyan."

53(Jep ga taban, angtane seyafter ga aa ge sofobuwena jelem jenabe.



 <<  Yohanes 7 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran