1Jengga Yesus Jei Otumu Saitunwer ga sofwa.
2Nunu jeiserem jem gwirmer Yesus Jei gamjon ga aa warausa Jena Uwa Sanbagirmanaiserem jebe. Ane Jemnibe angtane ga anesus ga aa ge betwebili. Jepga Yesus ga nwintena, ane angtane jeiserem ga aa towas-towastababili.
3Guru-guru Hukumu Nabi Musa aa jes tulistababilim aa jei ne towas-towastababuwenaram, ane angtane safna Farisimana mese jei wini maaryena aa jei gwebilirim ga aane domola. Ane jepga aane taabili, ga aane afolfala Yesusminibe. Jei wini jeiserem ga aane tergenbili nenennap fyafe,
4ane jei Yesus ga aane bala, "Guru, wini aaiserem amsa domola, ane ga aya taabili jei maaryena jame aa galap gwebilirim.
5Hukumu Musamanaiserem nei nejesa gerabistowenaram jebe enggam baatultel wini maaryena aa jei gwebilirim, jei tonmer gane munbili jamer futu. Aamei Ifom gunu?"
6Jei game aa jewer ne tenebanaram, jei enggalf ne tenebana Yesus gane unggwasbaf, jega jei taterisi kapkaiserem Jem temawer ga sene nasbaibene. Jengga Yesus Jei jamfener aanwestena, ane tafame onnap ga aa tulistaabitena.
7Jei gamjon jame aa galap ne tenebawenaram, Yesus Jei ga duka gamjon ga aa gaartena, ane ga aa balbabili, "Afa angtane imniwer etam-etamyanaiserem, gwan ga wini aaiserem ga jese tabtabili toneme."
8Jes jepserem taban, Yesus Jei gamjon ga aa aanwestena, ane onnap gamjon ga aa tulistaabitena.
9Yesus game aa galap ne sarbanaram, Jei game aa galap gutenaram, jei ga jewer ga aa ge sofobili, daamfen-daamfenneme gwan ga sanbakawer jamer bar. Jepga Yesus ane wini jeiserem jep aa jei finaram ga jetefener ne mirsotefala.
10Jepga Yesus duka gamjon ga aa gaartena, ane wini jeiserem ga aa bili, "Iye, anggwana seyafter aaf jeiserem jei fwera? Jei aamei ke is jam ne bilyen jam tamtamulfe?"
11Wini jeiserem Yesus ga enggam tamawolbana, "Uwa, fas." Yesus ga enggam bili, "Samfer, Ai mese is Ajam bilyen jam tamtamulfe. Namwer gase sofwe, ane etam-etama kapka gamjon ijam eyebiyen.")
12Yesus Jei ga angtane uskambar jep aaiserem jemnip gamjon ga enggam gunu, "Aiba ogiri aaiserem jem nafsam. Angtane Ai As jei gam tikwebaatinennerem, jei gwinip jam wofeyan, jengga jei nafa gam domola, nafa waakenfer jem gwelaiserem aa jei gam destaibenerem."
13Angtane safna Farisimana jei Yesus ga aane bala, "Aamei namwer Iner nasowena Ilem temawer, ane Aamei Ilem temawer Ijes bilirim, je bunaryan. Jengga ai enggam aya gunu, angtane afa nafsi jewer agma sarbaf enggame, taterisi Imna jeba bunaram."
14Yesus ga tamawolbaabili, "Ai safe taterisi Alem temawer saf As nasbabili, taterisi Amna jeiserem je bunar, aam temawer Ai tousa Ai Afwer jela, ane Ai fwer As sofwa. Aamei seyafter teisyena Ai Afwer jela, ane Ai ga fwer As sofwa.
15Aamei angtane nafsim temawer enggam ima gunu, 'Jei kapka gam eyebili.' Jengga aamei nwemfener igama domola. Ai angtane nafsiserem jem temawer afa Ai Ajam balyan enggame, 'Jei kapka gam eyebili.'
16Jengga aaiserem ga Ai jafner gunu enggame, afa Ai enggam jam As gunurum angtane jei kapkaiserem ga jes ne eyebili, taterisi Amna jeiserem jei bunar, aam temawer Ai Anfentowaiyan. Uwa Ai As Jei baftannuntum, Jei mese aa gunu enggame taterisi Amna jeiserem je bunar.
17Taterisi Nabi Musa ip is jes golmilim jep ga enggam baatultel, taterisi angtane naura aa jes gangge nasbilirim, jeiserem jei bunar.
18Taterisi Alem temawer jesa gangge nasbilirim, taterisi jeiserem ga naura; afelna ga Ai nasbili, ane afelna ga Uwa nasbili Ai As Jeye baftannuntum."
19Jepga jei Yesus ga aane tenebana, "Uwa Imna Jei fwera?" Yesus ga aa tamawola, "Aamei As ijama damdamtaasiyen, ane Uwa Amnaiserem Jes mese ijama damdamtaasiyen. Afa aamei Ai As jam isa damdamtaasinirim, gam jega Uwa Amnaiserem Jes mese jegme isa damdamtaasini."
20Yesus Jei taterisi seyafter jeiserem ga enggalap nasbabili, Jei angtane aa galap towas-towastababilirim Jena Uwa Sanbagirmanaiserem jebe. Jei ga angtane jep towas-towastababili mwona doini aa jep ne bokolnsowenaram kotakabe. Jengga angtane Jei jam ne temilyan, aam temawer nunu Jemna jepserem gemerje fas fala.
21Yesus Jei ga gamjon ga aa balbabili, "Ai As sofwa. Aamei Ai ga As isa terelbene, jengga aamei ga isa tere ilem etam-etamabe. Tamna Ai Ajewer sofwaram, aamei jebe ijama foroyan."
22Ane jepga angtane sanbaka anggwabura Yahudimanaiserem jei ga aa ge gubili, "Jei enggam gunu, 'Tamna Ai Ajewer sofwaram, aamei jebe ijama foroyan.' Jei engbar ke enggam gunu Jelem inibe, Jei Jenjen se saftaniwili?"
23Jepga Yesus ga aa balbabili, "Aamei gwonawer ima fortya, jengga Ai winsiwer Ai iritya. Aamei angtane ogirmana, jengga Ai ogirmanyan.
24Jeiserem Ai aamei ga isa jem temawer balbabili, 'Aamei ga isa tere ilem etam-etamabe.' Ane aamei ga isa tere ilem etam-etamabe, afa aamei enggam ijama taabiyeneye, Aiba bunarsusfer Jesam Ai AJei nasounaram."
25Jepga jei ga Yesus gane tenebana, "Aamei bunarsusfer nansa?" Yesus ga aa tamawola, "Aiba Jesam gwanan fwater isa AJei balbabisintim.
26Taterisi jame anesus im temawer Ai safe Ajes nasbife, ane is Ajam tener-tenerbaabuwefe. Jengga Jei Ai As Jei baftannuntum, ga Jes isa tebana. Taterisi Jemniwer Ai Ajes saribenerem, Ai taterisi jeiserem ga As nasipminenne angtane ogiri aaiserem jep aa jei ge nwinbenerem."
27Jei jam ge towaswebiyen enggame Yesus ba taterisi Uwa Jelemanaiserem ga Jem temawer nasbili.
28Jepga Yesus ga aa balbabili, "Aamei Ai Tane Angtanemanaiserem ti salibip ijeba daktanswefaram, aamei jepga isa towaswena enggame Aiba Jesam Ai AJei gunurum. Ane aamei ga isa towaswena enggame Ai apgal jigala Aner afa Ajam eyebiyen. Jengga Ai jetefener Agam bilipmini, Uwa Amna Ap As jes gam bilibenerem.
29Jei Ai As Jei baftannuntum, Jei Abar seyafter. Jei Ai As Jam tatwaltaasiyen, aam temawer Ai jeber-jeber Agam eyebili enggalfe ini Jemna jem Agam saaser-saasertabana."
30Seyafter jeiserem Yesus jame aa nasbilirim, angtane uskambar Jei ga aane tebana.
31Yesus Jei ga aa balbabili angtane Yahudimana Jei aa jei ne tebanaram, "Afa aamei Ai isa gemer balbabilirim gemer isa gwenaram, gam jega aamei bunarsusfer As ijeya tikwebaatinennerem.
32Jepga aamei bunarsusfer isa towaswena enggame Ai bunarsusferam nasowena, ane jega jem temawer aamei ga isene aftabunnu etam-etama kapkaiserem jewer."
33Jei ga aa ge tamawolbili, "Ai seyafter aaiserem asal-asala Abrahammana. Ai gemerje angtane nafsiserem as jam ne armantababiyen. Aamei Ijes bilirim enggame, 'Aamei ga isene aftabunnu.', taterisi jeiserem jemna igi jei basa?"
34Yesus ga balbabili, "Ai isa bunarsusfer balbabili enggame, angtane etam-etama kapka aa jei gam gwebilirim, etam-etama jeiserem jei ga jem sanbakfe ga jei gam nwini.
35Angtane aa jes gam armantanaram, jei abakfer jam nwinyen angtane sanbaka jelemana aa jei gam armantanaram jebar. Jengga tane jelemansususerem jam armantayanaiserem jei ga jeber gam nwini jamer abak-abaksus.
36Jega jem temawer, afa Ai Tane Uwa Sanbagirmana Ai aamei is Ajes aftabunnurum, gam jega aamei bunarsusfer tifni seyafter ga isa ferwetini.
37Ai Amesam towaswena enggame aameiba asal-asala Abrahammanam. Ane aamei Ai safe As ijama munbof, aam temawer taterisi Amnaiserem jei fas ilem inibe.
38Ai Uwa Amnaiserem Jemniwer jes Agam domolbanaram, jeiserem ibe ga is Ajes nasipmini. Jengga ilem temawer, uwa ilemana is jes gane towas-towasulminirim, ga jes igama eyebili."
39Jei ga aa ge tamawolbili, "Uwa amnaiserem jei Abraham." Jepga Yesus ga tamawolbaabili, "Wowo, afa aamei bunarsusfer tantantane Abrahammanaye, gam jega awelna Abraham aa jes eyebilim awelna jeiserem aamei jon ga jam isa eyebili.
40Ai taterisi bunarsusfer Uwa Sanbagirminiwer jes Agam sarbilirim, ga isa jes Agam nasipmini ibe. Jengga aamei Ai As ijama munbof. Abraham jei game afa jam eyebiyen.
41Aamei ga awelna uwa ilemanaiserem awelna jemnaiserem ga ijesa eyeibene." Jei ga aa ge tamawolbili, "Ai gam ke maaryen tane? Uwa amnaiserem Jei daamfenna, Jei ga Uwa Sanbagiri Jenfentowai."
42Jepga Yesus Jei ga aa balbabili, "Wa, afa Uwa Sanbagiri Jei bunarsusfer im Uwaye, gam jega aamei Ai As jam isa nesiktene. Aamei As isa nesiktene, aam temawer Aiba Uwa Sanbagirminiweram jelant, ane namwer ga Ai aaf Ai nwini. Ai Aner Ajam guyon aaf foryafe, jengga As Jeye baftannunt.
43Jeje bafa aamei waakenfer ijama saryan Ai isa Ajes bilipminirim? Aamei waakenfer ijama saryan, aam temawer aamei taterisi Amnaiserem jei ibaifa gwebili ijama sarbife."
44Yesus gamjon ga balbabili enggame, "Uwa imnaiserem jei ga bawas, ane aamei igemera gwena uwa imna jei aa gemer gunurum. Gwanan-gwanansus galapserem bawasa jeiserem ga jei towaiwul angtane jam munbofe. Jemnibe taterisi bunarsusfer aaiserem je fas. Jei taterisi bunarsusfer aaiserem jam towaswebiyen. Afa jei angtanes gam afaf-afaftababilirim, jei ga bunar je awelna jemna ga gam. Jei afaf-afafsusu, ane afaf-afafa seyafter gemerserem bura ga jemnip tenbisini.
45Jengga Ai taterisi bunarsusfer aaiserem Ai ga isa Ajes bilipmini ibe, ane jega jem temawer aamei taterisi Amnaiserem ijama taabiyen, aam temawer taterisi Amna jeiserem is enggam gweretababili aamei etam-etamabara.
46Angtane afa nansa im nenennabe Am temawer aa jei gunurum enggame Ai etam-etama kapkaiserem ga Ajes eyebili? Afa Ai taterisi bunarsusfer aaiserem ibe is Ajes nasipmiliye, gam jega bafa aamei Ai As ijama tebayan?
47Angtane Uwa Sanbagirmanaiserem jei ga taterisi Uwa Sanbagirmanaiserem ga jei gane saribene. Jengga aamei angtane Uwa Sanbagirmanyan, ane jega jem temawer aamei baife ga ijewera gwena, Ai As ijama sarbasife."
48Angtane Yahudimanaiserem jei Yesus ga aane tamawolbana, "Ke bunar ai enggam aya gunu, 'Aamei angtane Samarya, ane Aamei bwata kapkaiserem ga Is jei kabwana?'"
49Jepga Yesus ga tamawolbaabili, "Ai bwata kapka As jam kabwayan. Ai Uwa Amnaiserem ga Ajes pujitene, jengga aamei ga As ijama imei-imeitana.
50Ai angtane nafsi Ajam balbabiyen enggalfe Ai As jam ne pujitef. Jengga Ai As Jei pujiteleiserem ga daamfenna, ane jeiserem Jeiba Uwa Sanbagiri. Jei waakenfer Jei se gunu Am temawer.
51Ai isa bunarsusfer balbabili enggame, angtane Ai Ajes bilirim jeiserem aa jei ne eyebilirim, jei jam ge terbiyen jamer abak-abaksus."
52Jepga angtane Yahudimana jeiserem jei Yesus ga aane bala, "Namwer ai amsama towaswena enggame Aamei bwat kapkaiserem Is jeyam kabwana! Abraham jena jei mes ter, ane nabi-nabi mese jeime mes ge terbil. Jengga Aamei enggam Im gunu, 'Angtane Ai Ajes bilirim jeiserem aa jei ne eyebilirim, jei jam ge terbiyen jamer abak-abaksus.'
53Abraham jena jei mes ter, ane nabi-nabi seyafter jeime mes ge terbil, ane Aamei aaiserem ga nansa? Jeje fomfoma enggame Aamei unggwan-girsusu uwa amna Abrahamminiwer?"
54Yesus ga aa tamawola, "Afa Ai An Ana jam Agam pujitenerem, pujiyana jeiserem je jemna igi fas. Jengga Ai As Jei pujitenerem, Jei ga Uwa Alemanaiserem. Aamei Jei igama jenbewenaram enggame, Uwa Sanbagiri ilemanaiserem.
55Ane aamei Jei waakenfer ijama damdamtaasiyen, jengga Ai Ames damdamtaasini. Afa Ai enggam jam As gunurum Ai Jei Ajam damdamtaasiyen, gam jega Ai angtane ol kabwak, aamei seyafter galserem. Jengga Ai Jei Ames damdamtaasini, ane Ai ga Ai eyebili Jei aa jes bilirim.
56Abrahamem temawer ga enggam, uwa imnaiserem Abraham, jei ini jemna saaser-saaserfer folbal, nunu Ai jem As fortyaram jei se domolsa. Jei nunu jeiserem mesam domol, ane ini jemna saaser-saaserfer folbal."
57Ane jepga angtane Yahudimanaiserem jei ga Yesus ga aane bala, "Imna umuru gemerje tahunu lima pulu. Aamke Abraham ke Imes damtana?"
58Yesus ga aa tamawola, "Ai isa bunarsusfer balbabili enggame, Abraham nalefe jam suruyon, Ai Ames gwena."
59Jepga angtane Yahudimana jeiserem jei tuna ga aane kitultena, jei safe Yesus jem ne munbofe. Jengga Yesus Jei Jena ga Jam syetasnenne, ane ga aa sofwa, Jena Uwa Sanbagirmanaiserem ga aa mirultefala.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel