1Naobbini Arung Yosia sininna pamimpinna Yéhuda sibawa Yérusalém.
2Nainappa silaong mennang lao ri Bolana PUWANGNGE, riyaccowéri risining imangngé, sining nabié sibawa sininna ra’ya’é, muwi iya kasiyasié iyaré’ga iya sugié. Ri yolona iya maneng mennang, ri seddéna pilar iya ripallaingngé untu’ arungngé, tettonni arungngé nanabacai sibawa sadda battowa sininna lise’na kitta assijancing iya puraé naruntu ri Bolana PUWANGNGE. Nainappa mébbu arungngé assijancing sibawa PUWANGNGE untu’ mapato ri Aléna, enrengngé pajoppai sibawa sukku atinna nenniya sukku nyawana sininna parénta-Na sibawa hukkung-hukkun-Na. Majjanci towi arungngé untu’ pennoiwi sara’-sara’na assijancinna PUWANGNGE sibawa umma’-Na iya tarokié ri laleng kitta’éro. Sininna ra’ya’é turui majjanci untu’ mapato lao ri assijancingngéro.
3(23:2)
4Purairo napparéntanni arungngé lao ri Imang Lompo Hilkia, sining imang pabbantué sibawa sining pengawal iya jagaé ri sumpang Bolana PUWANGNGE, kuwammengngi napassui polé ri Bolaéro sininna pakkakkasa iya ripaké untu’ sompai Baal, Déwi Asyéra, sibawa sining wéttowingngé. Sininna barangngéro natununi Arung Yosia ri saliweng kota seddéna Lompo Kidron, nainappa awunna ritiwi ri Bétel.
5Napaléssoni sining imang iya puraé naakka arung-ngarung Yéhuda untu’ majjama ri onrong assompang déwataé ri kota-kota Yéhuda sibawa seddéna Yérusalém; makkuwatoro sining imang iya makkasuwiyangengngé akkarobangeng lao ri Baal, mata essoé, kétengngé, plani’é sibawa sining wéttowingngé.
6Napassuni dato-dato’na Déwi Asyéra polé ri Bolana PUWANGNGE, naritiwi ri saliweng kota ri Lompo Kidron. Kuwaniro ritunu iyaro dato-dato’é, nainappa ritettu osinna gangka manenné, na awunna riyassiyamporengngi ri yasé’na akkuburukeng samaé.
7Bili’-bili’é ri laleng Bolana PUWANGNGE iya napaké sining cakkuribang bola-bola déwataé untu’ pogau’i accakkuribangengngé selaku assompang lao ri déwataé, naancuru’i. (Ri bili’-bili’éro sining makkunraié tennungngi kaing untu’ napaké ri laleng assompangngé lao ri Déwi Asyéra.)
8Sininna imang iya monroé ri kota-kotana Yéhuda risuroni ri Yosia lao ri Yérusalém, nainappa kégi-kégi risininna wanuwa Yéhuda napanajisi’i mézba-mézba déwataé kégi iyaro imang-ngimangngé pura makkasuwiyangeng akkarobangeng. Iyaro imang-ngimangngé dé’ naripalalo pajoppai assompangngé ri Bolana PUWANGNGE. Iyakiya, weddingngi mennang nanré roti dé’é raginna iya ripassadiyaé untu’ sellao-sellaona mennang. Mézba-mézba iya ripallaingngéro untu’ assompang lao ri déwataé ri seddéna Gerbang Yosua, walikotana wanuwaéro, riruttunni. Iyaro gerbangngé engkai ri seddé abéyona Gerbang Utamaé ri laleng muttama’é ri kotaé.
9(23:8)
10Tofét, iyanaritu onrong assompang déwataé ri Lompo Hinom, ripanajisi’ni. Nanallalengiwi dé’na gagana tau iya weddingngé makkasuwiyangengngi ana’na selaku akkarobangeng ritunu untu’ Déwa Molokh.
11Sininna anyarang iya napallaingngé sining arung Yéhuda untu’ assompangngé lao ri mata essoé riyabbéyanni, sibawa karéta-karéta iya ripaké ri laleng assompangngéro ritununi. (Iyaro karéta-karétaé engkai ri seddéna Bolana PUWANGNGE — seddéna pintu gerbangngé — dé’ namabéla polé ri bili’-bili’ onrong naonroiyé Natan Mélékh, séddiwi pegawé tanré.)
12Mézba-mézba iya napatettongngé arung-ngarunna Yéhuda ri pabbingengngé ri yasé’na bili’-bili’na Arung Ahas, riyancuru’ni. Makkuwatoro mézba-mézba iya napatettongngé Arung Manasyé ri iya duwa seddéna Bolana PUWANGNGE, nacabbu’i Yosia, nainappa nabbéyang ri Lompo Kidron.
13Makkuwatoro mézba-mézbaé ri bagiyang alauna Yérusalém, seddé yattanna Bulu-bulu Majaé ripanajisi’ni. Iyaro mézba-mézbaé napatettongngi Arung Salomo untu’ sompai déwata-déwata iya mappakaciddi-ciddi’é — iyanaritu Asytorét déwinna bangsa Sidongngé, Kamos déwatana bangsa Moab-é, sibawa Milkom déwatana bangsa Amongngé.
14Tugu-tugu déwataé sibawa dato-dato’na Déwi Asyéra naruttunni, nainappa tana kégi ripatettong tugu-tugué sibawa dato-dato’éro, natébunni Yosia sibawa buku-buku tau.
15Nasolangi towi onrong assompangngé ri Bétel iya napatettongngé Arung Yérobéam ana’ Nébat — arung iya puraé nassabariwi namadosa tau Israélié. Nainappa nareppa Yosia mézbaé ri onrong assompangngéro, sibawa tunui silaong dato-dato’na Déwi Asyéra iya engkaé kuwaro.
16Nainappa giling Yosia, nanaitai siyagangngaré tampung ri tompo’na bulué. Nanasuroni tauwé tunui tampungngéro, sibawa passui buku-bukunna nanatunui ri mézba iya mattengngangngé ritunuro. Mappakkuwaniro carana panasiji’i iyaro mézbaé. Nakajajiyanna aga iya nabotoé riyolo nabinna PUWANGNGE wettunna Arung Yérobéam tettong ri seddéna mézbaéro riséuwaé ramé-ramé. Purairo naitani Arung Yosia séddi tampung laissi.
17Namakkutana, "Tampunna niga iyaé?" Nappébali sining tau Bétel-é, "Iyaro tampunna séddi nabinna PUWANGNGE iya puraé lao kuwaé polé ri Yéhuda, sibawa botoi gau’-gau’ iya silalonaé napogau’ Datu lao ri mézbaéwé."
18Napparénta arungngé, "Aja’ nariyagaga iyaro tampungngé. Leppessangngi buku-bukunna kuwaro, aja’ naripalétté!" Na buku-bukunna nabi polé ri Yéhudaro dé’ nariyagaga; makkuwatoro buku-bukunna nabi polé ri Samaria iya ritampungngé kuwaro.
19Ri tungke kota ri Israél, naruttungngi Arung Yosia sininna onrong assompang déwata iya napatettongngé arung-ngarung Israélié, sibawa iya puraé nassabariwi PUWANGNGE namacai. Aga pura napogau’ Arung Yosia ri Bétel, napogau’ towi iyaro lao ri mézba-mézbaé ri sininna Israélié.
20Sininna imang iya majjamaé ri onrong-ngonrong assompang déwataé naunoi ri yasé’na mézba-mézba kégi mennang majjama. Sibawa ri tungke mézbaéro natunui Yosia buku-bukunna tauwé. Purairo lisuni ri Yérusalém.
21Nainappa napparéntang Arung Yosia lao ri ra’ya’é untu’ ramé-raméiwi Paskaé pada-pada iya tarokié ri laleng kitta Assijancingngé Sibawa PUWANGNGE. Nanallalengiwi napakalebbii mennang PUWANGNGE, Allataalana.
22Mappammulai wettunna bangsa Israélié riparénta ri pabbarani-pabbaranié dé’pa naengka tau arung Israél iyaré’ga arung Yéhuda iya ramé-raméiyéngngi Paskaé pada-padaro.
23Banna ri taung maseppuloé aruwa apparéntanna Yosiaro nappai riramé-raméi Paskaéssi ri Yérusalém untu’ pakalebbii PUWANGNGE.
24Untu’ pogau’i hukkung-hukkung iya tarokié ri laleng kitta iya naruntu’é Imang Lompo Hilkia ri Bolana PUWANGNGE, sininna pangobbi waliyalaé sibawa pappalakiyaé ripaddésu’ni ri Arung Yosia polé ri Yérusalém sibawa polé ri sininna Yéhuda, nainappa nabbéyang sininna déwata ruma tanggaé, barahalaé sibawa barab-barang iya napaké untu’ assompang déwata-déwata.
25Dé’pa naengka arung pada-pada Arung Yosia iya mattumanié ri PUWANGNGE sibawa sukku atinna, sibawa mappaitangngi iyaro ri laleng atuwo-tuwonna sibawa pangkaukenna, situru sibawa sininna hukkung iya engkaé ri laleng Kitta’na Musa. Muwi labe’na Arung Yosia, dé’na gaga arung iya pada-padaé aléna.
26Iyakiya pangkaukenna Arung Manasyé pura paompoi cai-Na PUWANGNGE lao ri Yéhuda; na iyaro cai-Na dé’pa nasoro.
27Makkedai PUWANGNGE, "Aga iya puraé Upogau’ lao ri Israélié, Upogau’ towi matu lao ri Yéhuda. Upalii matu tau Yéhudaé polé ri wanuwa iya Uwéréngngéngngi mennang. Usampéyangngi matu Yérusalém, kota Upilé, makkuwatoro Bola-Kué, iya siturué adak-Ku mancajiwi matu onrong assompang lao ri Iyya."
28Matéi Arung Yosia ri laleng ammusurengngé ri Mégido wettunna lao musui Nékho, arung Maséré, iya mattengngangngé malluru sibawa pasukanna untu’ bantui arung Asyur ri wirinna Salo Efrat. Nalani sining pegawénna ujuna Arung Yosia nanatiwii lisu sibawa karéta ri Yérusalém. Kuwaniro rikuburu ri akkuburukeng arung-ngarungngé. Nainappa ra’ya’ Yéhuda piléi sibawa makkai Yoahas ana’ worowanéna mancaji arung sulléiwi. Curita laingngé passalenna Arung Yosia riyokii ri laleng kitta Sejarana Arung-ngarunna Yéhuda.
29(23:28)
30(23:28)
31Umuru’na Yoahas wettunna mancaji arunna Yéhuda 23 taung, namapparéntai ri Yérusalém tellumpuleng ittana. Indo’na riyasengngi Hamutal ana’ Yérémia polé ri kota Libna.
32Madosai Yoahas lao ri PUWANGNGE pada-pada toriyolona.
33Maccappa’i apparéntanna Yoahas wettunna Nékho arung Maséré tawangngi ri Ribla, ri daéra Hamat, sibawa passai Yéhuda makkamaja pakkasuwiyang lao ri aléna singngéga 3.400 kilo péra’ sibawa 34 kilo ulaweng.
34Nainappa Arung Nékho makkai ana’ worowanéna Yosia iya riyasengngé Elyakim mancaji arunna Yéhuda, sibawa sulléiwi asenna Elyakim mancaji Yoyakim. Yoahas natiwii ri Maséré nakkuwaniro maté.
35Untu’ mpajai pakkasuwiyang iya natuntu’é Nékho arung Maséré, léléi sima Arung Yoyakim polé ri ra’ya’é situru amampungenna mennang tungke-tungke.
36Umuru’na Yoyakim wettunna mancaji arunna Yéhuda 25 taung, namapparéntai ri Yérusalém 11 taung ittana. Indo’na riyasengngi Zébuda, ana’na Pédaya polé ri kota Ruma.
37Madosai Yoyakim lao ri PUWANGNGE pada-pada toriyolona.
<< 2 Raja-raja 23 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel