1Iterusken si Paulus mo perdalanenna mi kuta Derbe kessa i mi Listra. Lot mo i sidi sada kalak simengèkutken Jesus mergerar si Timoteus. Berru Jahudi ngo inangna sienggo percaya taba Jesus; tapi ukum bapana kalak Junani ngo.
2I tengah-tengah si percaya i kuta Listra dekket Ikonium, termurmur ngo kiniselloh si Timoteus.
3Jadi ipergeddo si Paulus ngo asa dekket nemmu si Timoteus mahan denganna mi perdalanen. Saut mo dekket ia, tapi lebbè itakkil ngo ia kumarna kalak Jahudi silot i aur i, ai karina ngo memettoh kalak Junani bapana.
4I gennep kuta niagahen kalak idi i, ibagahken kalak i ngo keputusen runggu apostèl-apostèl dekket pengendeng-pengendeng si ni Jerusalem simahan ulanken janah jamotenken kalak idi.
5Jadi makin ntegguhna mo kepercayaen kuria i karina, janah dak mertambah-tambah ngo bilangenna gennep ari.
6Kumarna oda ipadiat Tendi Dèbata ijamitaken si Paulus dekket si Silas kata Dèbata i Asia, gabè iterusken kalak i mo pedalanenna mi Frigia dekket Galatia.
7Nai soh kessa mo kalak i mi perbalengen tanoh Misia, ioji kalak i mo merdalan mi suberri aur Bitinia tapi oda ipadiat Tendi Jesus kalak i.
8Nai gabè merdalan mo kalak i mengarbis aur Misia, jadi soh mo kalak i mi Troas.
9Bernginna idi i Troas idah si Paulus mo sada alaten. Ibas alaten idi idah mo sada kalak Makedonia dak mengendik-ngendiksa mendokken, "Suberrang mo kono mi Makedonia mengurupi kami."
10Idah si Paulus kessa mo alaten i, mèter itaki kami mo berkat mi Makedonia, ai dokatè nami, Dèbata ngo mendokken kami laus mi sidi lako magahken Sukuten Kelluahen i.
11Nai mèter merbungki mo kami i Troas nai memènter mi Samotrake janah sibarembenkenna mi Nèapolis.
12I sidi nai berkat mo kami mi Pilipi imo kuta simbelgahna i nagerri Makedonia, janah termasuk gemgemmen Rom ngo i. I sidi mo kami barang piga-piga ari.
13Tupung ari Sabat laus mo kami mi ruar kuta i, mi biding laè, lako mennulusi bekkas mersodip kalak Jahudi, ai dok atè nami tentu lot i sidi. Nai kundul-kundul mo kami ninganna mengeranai dekket daberru-daberru sienggo mertumpu i sidi.
14Lot mo i sidi sada kalak daberru mergerar sm Lidia. Sada kalak pertiga-tiga kaèn mbalo ngo ia i Tiatira, janah merkebiaren midah Dèbata. Jadi ibuka Tuhan i mo pennarihenna, gabè iradum-radumi mo jamita si Paulus i.
15Nai gabè iperridi mo si Lidia dekket karina kalak i si sada jabu, janah gabè iarahken mo kami mi bagesna, nina mo, "Mula tuhu ngo enggo percaya aku taba Jesus dokatè ndènè, kiserrang mo kènè lebbè mi bagesku." Pella dak ièlèk-èlèk kami.
16Tikan sikali tupung laus kami mi bekkas mersodip i, pesimbak mo kami dekket sada kalak daberru hamba janah nangguru pertendung ngo ia. Merkitè tendungna i, mbuè ngo laba dapet indukna.
17Dak ièkut-èkut ngo si Paulus bak kami ninganna mendilo-ndiloken, "Naposo Dèbata simeheji i ngo kalak èn, lako magahken dalan kelluahen ndènè!"
18Dak iempet daberru i ngo katana bagidi barang piga-piga ari. Tapi gabè ncego mo atè si Paulus, itulihken mo ia janah idokken, "Merkitè-kitè gerar Jesus Kristus, kudokken karuar kono i daberru idi nai!" Nai mèter karuar mo gejapkenna i silanna i bai daberru idi nai.
19Tapi idah induk somangna i kessa mo oda lot nèngè laba iakap bai daberru idi nai, itangkup kalak i mo si Paulus dekket si Silas, iruah kalak i mo mi kerungguun mi hadeppen penghukum.
20Iaduken mo si Paulus dekket si Silas taba pengerajai, nina mo, "Gontar ngo ibaing kalak Jahudi èn kutanta!
21Ipeddahken ngo siso ndorok ulanken janah ngganè ngo i banta kalak Rom. Oda ndorok terjalo kita barang pe menguei kecemmalen bagi."
22Nai gabè dekket ngo jelma nterrem mengalo taba si Paulus bak si Silas, iribaki penghukum i mo oles kalak i sidua, janah isuruh mo mengeligasi.
23Enggo kessa narih toko dekkahna iligasi, ipemasuk mo kalak i mi kurungen. Idokken ma mo taba perjaga kurungen i, asa tuhu-tuhu ijaga kalak i.
24Kumernaken perèntah idi, gabè ipemasuk nola mo kalak i mi kurungen perbagasen, janah ibèangken ngo nèhè kalak i.
25Mayak tengah mberngin mersodip mo si Paulus dekket si Silas janah merendè memoji-moji Dèbata ipedengkoh-dengkoh si ni kurungen i.
26Nai sintempu mo masa rènur mergegoh kalohoon sanga tumuyu-tuyu batu cendi kurungen i. Nai mèter mbuka mo gejapkenna idi pèntu kurungen i, janah ntalkas mo karina rantè bak bèangen ni sidi.
27Ndungo janah tersengget mo penjaga kurungen i. Idah kessa mo dalngah ngo keppè pèntu kurungen i, iberkat mo peddangna naing mendelles, ai idokdok enggo mperrus karina siterkurung ni sidi.
28Tapi ipegang si Paulus mo sorana mendiloken, nina mo, "Ulang idelles ko dirimu, ai isèn ngo kami karina!"
29Nai ipido mandur kurungen i mo togok, lojang mo ia mi bagasen, mèter isembah mo si Paulus dekket si Silas ninganna menggirgir.
30Iarahken mo kalak i mi ruar janah mengkuso mo ia taba kalak i, nina mo, "Kènè alè Tuan, bakunè ngo kubakin asa maluah aku?"
31Nai ialoi si Paulus bak si Silas mo, "Kepercayai mo Tuhan Jesus -- asa maluah kono dekket pengisi bagesmu!"
32Nai iajarken si Paulus bak si Silas mo kata Tuhan i bai mandur kurungen i, dekket taba karina jelma silot i bagesna.
33Nai mèter ialengi mandur kurungen i mo kalak i bernginna idi, ipebersih mo ugah pengeligasen i. Jadi mèter iperridi kalak i mo ia rebbak dekket karina pengisi bagesna.
34Nai iarahken mo si Paulus dekket si Silas mi bagesna janah ihantari mo pangaan taba kalak i sidua. Lolo kalohoon ngo atèna dekket karina pengisi bagesna kumarna enggo percaya ia taba Dèbata.
35Siceggen sibarembenkenna nola, ipasulak penghukum i mo upasna mi kurungen mendokken, taba mandur kurungen i asa ipaluah si Paulus dekket si Silas i.
36Ibagahken mandur kurungen i mo berita i taba si Paulus, nina mo, "Enggo iperèntahken penghukum maluah mo kènè. Nteng, karuar mo kènè, janah njuah-njuah mo!"
37Tapi idokken si Paulus mo taba upas i, "Kalak Rom ngo kami. Enggo iligasi kami i hadeppen sinterrem janah ikurung, oda lebbè iperèso. Keppè bagèndari idokken asa laus kami bagi sipsip? Oda uè kami! Dokken mo roh penghukum i lako paluahken kami."
38Nai ibagahken upas i mo kata i taba penghukum i. Enggo kessa ibettoh penghukum i, kalak Rom ngo keppè si Paulus dekket si Silas mbiar mo kalak i.
39Roh mo kalak i mengidoken asa ulang pella ilugun si Paulus bak si Silas pemmakinna i. Jadi iarahken mo kalak i mi ruar, janah ièlèk-èlèk mo kalak i sidua, asa itadingken kuta i.
40Itadingken si Paulus bak si Silas mo kurungen i, laus mo kalak i mendahi si Lidia. Perridah kessa mo kalak i dekket sipercaya i, mendokken kata apo-apo mo kalak i, nai berkat mo si Paulus dekket si Silas.
<< Kisah Para Rasul 16 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel