Alkitab Mobile SABDA
[VER] : [DAIRI]     [PL]  [PB] 
 <<  Markus 5 >> 

1Enggo kessa i, soh mo Jesus dekket simengèkutkensa mi suberrang Tao Galilea, i nagerri Gerasa.

2Sampur kessa Jesus ibagasen perrau idi nai, idapetken sada daholi siroh i liang kuburen nai mo Jesus.

3Ikuasai tendi sètan ngo kalak èn janah bekkasna pè i perkuburen ngo. Oda ndorok terrèketen ia, barang dekket rantè pè oda tellap nèngè.

4Enggo nggati tanganna dekket nèhèna ilanggu, tapi dak irettes ngo langguna idi janah bessi bèangenna pè ipenggelken ngo. Gegohna menempurung, gabè isè poda ndorok mencèkèpisa.

5Mahar dekket berngin pè dak kadap ngo ia i pekuburen dekket mi delleng, ninganna mendengkuk-ndengkuk janah ipempaluken ngo batu mi dagingna.

6Tikan itatap ia roh Jesus, mènter merdigal mo ia mendapetken Jesus janah mersujud i hadeppenNa.

7Nggang mo sorana menurakken, "Jesus, Anak Dèbata sintèmbul i! Kadè naing bakinenmu taba aku? Kuèlèk-èlèk kono merkitè Dèbata asa ulang susahi aku!"

8(Idokken pè bagidi kumarna idokken Jesus tabasa, "Tendi sètan,laus kono bana nai!")

9Ikuso Jesus mo ia, "Isè ngo gerarmu?" Ialoi mo, "Gerarku Lègiun, ai mbuè kalohon ngo kami!"

10Iendik-endik mo Jesus asa ulang isuruh sètan-sètan idi karuar i nagerri idi nai.

11Njolmit isidi nai, mbuè ngo babi dak menggigi i tebbing uruk nisidi.

12Ipidoken sètan i mo taba Jesus asa ipaduè kalak idi mbengket mi bagasen babi idi.

13Nai ipaduè Jesus mo. Jadi karuar mo tendi sètan-sètan idi bai jelma idi nai janah ibengketti mo karina babi idi. Gabè karinana babi silungguken idi mermangkaten i tebing i nai mi tao, nai merlennengen mo. Karinana babi idi lot ngo dua ribu.

14Bulanting mo permakan babi idi laus, ipembagahken mo simasa idi mi kuta dekket sosor-sosor. Merrohen mo kalak lako menengen simasa idi.

15Idahi kalak i mo Jesus, iidah kalak i mo nisellapen sètan idi kin kundul i sidi. Enggo mo merroles ia janah enggo terrus ukurna. Gabè mbiar mo kalak idi karinana.

16Isukutken simengidah idi mo simasa bai jelma i ndai dekket mi babi-babi idi.

17Kumarnaken idi, gabè ièlèk-èlèk mo Jesus asa itadingken nagerri idi.

18Tikan naing mbangkit mi perrau idi Jesus, nai roh mo sisellapen sètan idi kin mengidoken tabasa, asa ipaduè ia mengèkutken Jesus.

19Tapi oda ipaduè Jesus, balikna nola ngo idokken Jesus tabaSa, "Mulak mo kono mendahi kaka-anggimu. Bagahken mo taba kalak idi terrèngèt karinana sienggo nibaing Tuhan i bamu dekket kiniselloh nibaingna i taba kono!"

20Nai laus mo ia, ibagahken mo mi Sisipuluh Kuta nibaingken Jesus i tabasa. Lengang mo kalak karina simendengkohsa.

21Balik mo Jesus mi suberrang tao, mbuè ngo kalak roh mengerengemmi Jesus i biding tao idi.

22Roh mo sada kalak mergerar si Jairus. Ia ngo pengulu ibages perguruun ni kuta idi. Iidah kessa Jesus, sujud mo ia mi hadepenNa.

23Ipidoken mo taba Jesus, "Alè Guru, mpiah kalohon ngo sakit berrungku. Tolong mo roh Kono mengampèken tanganmu bana asa malum janah nggelluh ia!"

24Nai laus mo Jesus rebbakken si Jairus. Mbuè kalohon ngo mengèkutkenSa, gabè isessak jelma i ngo Ia kacimbang lambung.

25Lot ma mo isidi sada kalak daberru, enggo sanga sipuluh dua tahun lalap bubus.

26Enggo mbuè penambari mendaunisa janah enggo lahlah kèpèng ikerriken lako pertambarna. Tapi ulang lebbè malum iakap, makin mparahna nola ngo.

27Enggo nung idengkoh terrèngèt Jesus. Asa i tengah-tengah jelma nterrem idi, isessak ia mo lako menjolmiti Jesus i podi nai.

28Ai dok atèna, "Asal mo ndorok giam kujamah olesNa, pasti njuah kuakap!"

29Ijamah mo jubah Jesus, mènter kom mo iakap sibubus i. Pengakapna oda lot nèngè ipas dagingna penakit idi.

30Gejapkenna i, iakapken Jesus mo lot karuar gegoh i diriNa nai. Itulihken mo mi jelma nterrem idi, ikusoken mo, "Isè menjamah olesKu?"

31Nina sisiin idi mo, "Iidah Guru i sendiri ngo bagèen jelma èn menessak Guru i, keppè ikusoken Guru idi barang isè menjamah jubah Guru i?"

32Tapi dak irior Jesus ngo merkuliling lako menulus kalak sienggo menjamahSa idi.

33Ibettoh daberru idi ngo, kadè sienggo masa bana. Mbiar janah menggirgir mo ia roh mersembah mi hadeppen Jesus, janah ipertuhu mo karinana.

34Nai idokken Jesus mo taba daberru i, "Kepercayaenmi ngo pejuahken kono alè nangè! Laus mo kono merdamè-damè. Enggo njuah kono!"

35Tikan mengerana dèng Jesus, enggo roh pasulaken i bages si Jairus nai. "Enggo matè berrumu i," nina taba si Jairus, "Kadè pella lejaan nèngè Guru idi?"

36Oda pella ipikirken sinidokken pasulaken idi idokken Jesus mo taba si Jairus, "Ulang kono roga, percaya mo kono!"

37Nai terrus mo merdalan Jesus, tapi oda ipaduè barang isè pè mengèkutkenSa laènken si Petrus dekket si Jakobus bak si Johanes dengan sibeltek si Jakobus.

38Nai soh mo kalak i mi bages si Jairus pengulu bages perguruun idi: Iidah Jesus mo isidi bagi mèngèrna janah idengkoh mo sora tangis milangi pelluiken ukur.

39Nai mbengket mo Jesus, nina mo taba kalak idi, "Kasa mèngèr kènè janah tangis? Ai oda ngo matè anak idi pellin meddem ngo!"

40Itertabai kalak idi mo Jesus. Kernana i idokken Jesus mo kalak i mi ruar. Iarahken mo partua anak i duana dekket sisinNa idi masuk mi bilik anak idi.

41Icèkèp Jesus mo tangan anak idi, idokken mo tabasa ibas kata Heber, "Talita kum," lapatenna, "Alè tatat, Aku mendokken bamu: kèkè mo ko!"

42Mènter kèkè mo sitatat idi janah merdalan-dalan. Umurna enggo sipuluh dua tahun. Kagum ngo karinana simengidah simasa idi.

43Tapi ipernoi Jesus ngo kalak idi, asa ulang ibagah-bagahken bai barang isè pè. Nai idokken mo asa iberrè mangan si tatat idi.



 <<  Markus 5 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel