Alkitab Mobile SABDA
[VER] : [GULLAH]     [PL]  [PB] 
 <<  1 Petrus 3 >> 

De Way Husban an Wife Oughta Lib

1Same way so, oona marry ooman. Ebry one ob oona, pit yasef onda ya husban. Den ef some ob oona husban ain do wa God wod say, ya kin bring um fa bleebe pon Christ by wa ya da do, widout ya haffa say a wod bout Christ.

2Cause oona husban gwine see dat oona da gii hona ta um an oona da waak scraight een wa oona da do.

3Mus dohn dress op fa show off. Ain de ting dem wa people da see pon oona wa fa mek oona fine fa true, like de style ob oona hair o oona gole jewelry o de fine cloes wa oona da weah.

4Steada dat, oona oughta be fine fa true dey eenside oona haat. Oona oughta do ting peaceable an gentle an quiet. Dat de kind ob fine ting wa las fa true. Dat way mo walyable een God eye.

5Same way so, de ooman dem wa beena lib fa God an waak close ta um way back dey, wa beena trus God fa do all dat e promise fa do fa um. Dey pit deysef onda dey husban. An dey beena mek deysef fine fa true.

6Sarah been like dat. E beena do all wa Abraham tell um fa do, an wen e da taak ta Abraham, e call um e lord. An now oona jes like Sarah fa true, ef oona do wa right an ain leh nottin mek oona scaid.

7Same way so, oona marry man. Lib wid oona wife dem wid ondastandin an cyah fa um. Oona know dat oona wife ain got scrent like a man, so oona mus spec um. Cause God gii oona togeda wid dem e mussyful blessin ob life wa go on faeba. Do dis so dat nottin ain gwine git een de way ob de pray wa oona da pray.

Da Suffa Cause Oona da Do wa Right

8De las ting A got fa tell oona, oona mus all gree mongst oonasef, wid one haat togeda. Lob one noda like broda an sista. Be kind ta one noda. Mus dohn be proud.

9Ef somebody do oona bad, mus dohn do bad back ta um. An ef somebody sult oona, mus dohn sult um back gin. Steada dat, aks God fa bless um. Cause God call oona fa gii oona a blessin.

10Cause dey write een God Book say, “Ef oona wahn fa mek oona life sweet an lib a good life, mus dohn taak bad an mus dohn tell no lie.

11Mus dohn do no bad no mo. Mus do good. Mus try haad all de time fa lib peaceable wid people.

12Cause de Lawd God da keep watch oba dem wa da waak scraight. All de time e da yeh dey pray. Bot e da ton ginst dem people wa da do ebil.”

13Who gwine mek oona suffa ef oona all de time try fa do jes wa right?

14Bot eben ef oona git fa suffa cause oona da do wa right, oona git blessin! Mus dohn be scaid ob wa people da do, an mus dohn warry.

15Bot woshup Christ een oona haat as Lawd. Be ready all de time fa ansa de people dat aks oona hoccome oona got hope een oona haat. Bot wen oona ansa um, mus dohn try fa force um fa bleebe pon Christ, an show spec ta um.

16Do wa oona haat tell oona e right fa do. Den wen people wa da say oona ain waak right an taak bad bout de good wa oona da do wiles oona de waak wid Christ, dem people gwine be shame cause ob wa dey beena say.

17Cause e mo betta fa suffa cause oona da do wa right, ef dat wa God wahn, den fa suffa cause oona da do ting wa ain right.

18Cause Christ too done dead fa all we sin. E done dead jes one time no mo. E wa ain neba do nottin wa ain right, done dead fa all wa ain do right, so dat e kin bring we ta God. Dey done kill Christ wen e been a man, bot God Sperit mek Christ lib fa true.

19An een de Sperit, Christ gone an preach ta de sperit dem wa dey beena gyaad dey.

20Dem sperit yah been de people wa ain do wa God wahn um fa do een Noah time, wen God beena beah wid um wiles Noah beena build de ark. De people wa gone eenside de ark ain been many. Jes eight people gone een an been sabe shru wata.

21So den, dat wata ob de Flood stan fa bactism. Dat bactism ain fa wash off dort fom we body, bot dat de promise dat we mek ta God, say we gwine waak scraight wid um so dat we kin know dat we ain guilty een e eye. An now by oona bactism, God sabe oona, shru Jedus Christ da git op fom mongst de dead people an da lib gin.

22An Jedus Christ gone eenta heaben. E seddown dey pon God right han side. An e da rule oba angel dem an oba dem wa got tority an powa.



 <<  1 Petrus 3 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran