Alkitab Mobile SABDA
[VER] : [GULLAH]     [PL]  [PB] 
 <<  1 Timotius 4 >> 

Dem wa Laan People Ting wa Ain True

1God Sperit taak plain say, dat jurin dem las day, some people gwine stop fa bleebe dem true teachin bout Christ wa we bleebe. Dey gwine do wa de sperit dem wa da ceebe people tell um fa do, an dey gwine folla de teachin dat de demon dem laan um.

2People, dem hypicrit wa da lie, dey laan people dem teachin yah. E jes like dey done bun dey haat een fire an dat mek um so dat dey ain got no conscience no mo.

3Dem people yah da tell people say e ain right fa marry an e ain right fa nyam some kind ob food. Bot God mek dem food yah fa nyam. An dem people wa bleebe pon Christ an know wa fa true, dey kin nyam dem food atta dey pray an tell God tankya.

4Cause ebryting good dat God mek, an dey ain nottin tall dat people oughta say ain good fa nyam. Dey oughta nyam all kind ob food ef dey tell God tankya fa um.

5Cause God, by e wod an de pray wa people da pray ta um, da pit e blessin pon dat food.

How We Oughta Do Christ Jedus Wok

6Ef ya laan we bredren fa do dem ting yah wa A tell ya, ya gwine do Christ Jedus wok good. An ya gwine grow scronga an scronga een Christ by dem true ting wa we bleebe an dem true teachin yah wa A laan ya, wa good fa sho, an wa ya da folla.

7Ya mus dohn hab nottin fa do wid dem story wa go ginst de true teachin bout God an ain wot nottin tall. Train yasef fa lib mo an mo fa God.

8Cause ef somebody train e body, dat hep um some. Bot ef e train esef fa lib mo an mo fa God, dat good mo den all, een ebry way. Cause dat gwine hep um now een dis life an een de life fa come too.

9Dem wod wa A say, dey wa ebrybody oughta bleebe fa true. Ain nobody oughta doubt um none tall.

10An dat mek we wok mo scronga, an we keep on da try haad. Cause we trus fa true een God, wa da lib faeba, de Sabior ob all people, an specially dem wa bleebe.

11Ya mus laan people dem ting yah an chaage um fa do um.

12Mus dohn leh people hole ya cheap cause ya nyoung. Steada dat, ya mus show dem wa bleebe pon Christ, de way dey oughta do, by how ya da taak, how ya da do, how ya lob people, how ya trus fa true een Christ, an de pure way ya da waak scraight een ebryting.

13Til A git dey, ya mus mek sho fa read God Book ta de people, an fa splain um ta um an laan um wa God say.

14Ya mus dohn stop do dem speritual ting wa ya know how fa do, wa God been mek ya able fa do een e wok, wen de prophet dem done taak, da say wa God tell um bout ya an de choch elda dem pit dey han pon ya head an pray fa ya.

15Ya mus keep on da do dem ting yah all de time. Pit all ya haat pon um, so dat ebrybody gwine see dat ya da do um mo an mo betta.

16Ya mus pay mind ta how ya lib an wa ya da laan de people. Mus dohn stop fa do dem ting yah. Cause ef ya keep on da do um, ya gwine sabe dem wa da listen ta ya an yasef, too.



 <<  1 Timotius 4 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel