Alkitab Mobile SABDA
[VER] : [GULLAH]     [PL]  [PB] 
 <<  1 Timotius 6 >> 

1All Christian slabe mus look pon dey massa dem as people wa dey oughta spec een ebry way. All slabe mus do dis, so dat nobody ain gwine taak bad ginst God, needa taak bad bout dem Christian ting we da laan um.

2Dem slabe wa hab massa wa bleebe pon Christ mus dohn tink dat cause dey all broda een Christ, dey ain gwine gim spec. Steada dat, dem slabe mus wok eben mo betta fa dey massa, cause de wok dey da do gwine hep dey massa wa bleebe pon Christ an wa God lob.

Dem Ting wa True an Dem Ting wa Ain True

Ya mus laan people dem ting yah an courage um fa do um.

3De one wa da laan people diffunt ting an wa ain gree wid de true wod dem wa we Lawd Jedus Christ tell we an wa we da laan people, da tell um how dey oughta waak wid God,

4dat one dey too proud fa true, an e ain ondastan nottin. E jes like fa aagy an fight bout wod. An dat bad, cause dat da mek people jealous ob one noda. E mek um aagy an taak bad bout one noda, an tink dat oda people wahn fa do um bad.

5An e mek people aagy all de time cause dey ain tink right an dey ain laan wa true bout Christ no mo. Dey tink dat dey oughta waak God way jes fa git plenty ting. Ya mus dohn hab nottin fa do wid um.

6Now den, we git good ting fa true wen we da waak God way an we da sattify wid wa we got.

7We ain bring nottin eenta dis wol an we ain able fa cyaa nottin out wen we go outta dis wol.

8So den, ef we got food fa nyam an cloes fa weah, we oughta be sattify.

9Bot people wa wahn fa git plenty ting, dey fall eenta temptation an dey git ketch een a trap. De foolish ting wa dey wahn, wa ain no good fa people, dat da ruin dey life an dey stroy fa true.

10Cause de lob ob money da mek a poson do all kind ob ebil ting. Some people, cause dey wahn money real bad, done stop trus een God, an dey haat done broke cause ob de heapa saara dat dey got.

Dem Ting wa Paul Chaage Timothy fa Do

11Bot ya, a man wa da gii ya life fa do wa God wahn, ya mus dohn hab nottin fa do wid dem ting yah. Try haad fa waak scraight, fa do wa God wahn, fa trus God, an fa lob people. An try haad fa beah op onda all ting an fa treat people kindly.

12Try haad as ya kin fa do ya bes as ya fight de good fight ob fait. An tek hole ob de life wa neba end. Cause God done call ya ta dat life, wen ya taak plain bout ya fait een Christ out een de open, fo plenty people.

13A chaage ya fo God, wa gii all ting life, an fo Christ Jedus, wa ain been scaid fa taak plain bout de trute wen e been fo Pontius Pilate.

14Ya mus keep de chaage, an mus dohn git mix op wid no sin, so dat nobody ain gwine fault ya, fom now til wen we Lawd Jedus Christ come back.

15God gwine mek um appeah wen de right time come. De God we da praise, e de onliest Rula oba all. E de King oba all king, de Lawd oba all lawd.

16God de onliest one wa ain able fa neba dead. E da lib een de light dat nobody kin git close ta. Ain no poson neba shim yet, an ain no poson able fa shim. Leh we gim hona. Leh um hab powa fa rule faeba. Amen.

17As fa dem people wa rich an got heapa ting een dis wol, ya mus chaage um. Tell um say, dey mus dohn be proud, needa trus een dat heapa fine ting dat dey got. Cause ain nobody kin know fa sho how long e gwine hab um. Steada dat, dey mus trus een God. E de one wa da gii we all ting an mo den nuff fa mek we haat glad.

18Chaage um fa do good. Dey mus be rich een de heapa good wok dat dey da do all de time. Dey mus hab free han, da wahn fa gii people ting, an da share wa dey got.

19Ef dey do dat, dey gwine sto op tredja fa deysef dat gwine mek um ready fa de time dat gwine come. Den dey gwine be able fa tek hole ob dat life wa de real life fa sho.

20Do ya Timothy, keep safe wa God trus ya fa tek cyah ob. Dohn hab nottin fa do wid dat kind ob taak wa ain got nottin fa do wid God. Ton way fom dem teachin wa ain gree wid God, wa some people call “knowledge,” bot dat ain so.

21Cause some people beena say dey got dat “knowledge” an cause ob dat, dey done lost de way ob fait. God blessin pon ya.



 <<  1 Timotius 6 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel