De Chullun ob God
1Look yah! We oughta study pon how bery much de Fada beena keep on blessin we wid e lob! E da lob we so much dat e call we e own chullun, an we e chullun fa true. People ob de wol ain beena know who God da, an cause ob dat, dey ain know we.
2Me deah fren, we God chullun now. We ain know yet wa we gwine be bye an bye. Bot we know dat wen Christ come back, we gwine be like um. Cause wen e come, we gwine see um jes like e da fa true.
3Ebrybody wa da set e haat like dis pon Christ, dat one gwine keep da lib clean, same like Christ lib a clean life.
4Ebrybody wa keep on da sin ain da do wa God Law say e mus do. Wen we sin, fa true we broke God Law.
5Oona know dat Christ come fa tek way sin, an Christ ain hab no sin een e life.
6De one wa da keep on da lib een Christ ain gwine keep on da sin. An de one wa still keep on da sin ain neba know Christ. E ain neba shim.
7Me deah chullun, mus dohn leh nobody git oona fa stop folla de true way. De one wa da lib da do de right ting, dat de one wa right een God eye, jes like Christ right.
8Ebrybody wa keep on da sin blongst ta de Debil. Cause de Debil beena sin fom de bery fus. Dat wa mek God Son come. E come fa stroy de wok den ob de Debil.
9De one wa God chile ain gwine jes keep on da sin, cause e hab God een e haat. An cause God e Fada, e ain able fa jes keep on da sin.
10God chullun an de Debil chullun, dey diffunt fom one noda. De one wa sin ain da do wa right, e ain God own chile. An e wa ain lob e broda ain God chile needa. Dat de way we know wish one God own chile an wish one blongst ta de Debil.
Mus Lob One Noda fa True
11Dis de message oona done beena yeh fom de fus: We mus lob one noda.
12We mus dohn be like Cain, wa done blongst ta dat Ebil One, de Debil. Cain done kill e own broda. Wa mek Cain kill e broda? Cause e beena do dem ting wa ebil, an e broda beena do dem ting wa right een God eye.
13So me bredren, mus dohn wonda ef de people ob de wol hate oona.
14We know dat we done cross oba fom det eenta life. We know dat, cause we lob de bredren. Ebrybody wa ain lob e broda, dat one da keep on stillyet een det.
15Ebrybody wa da hate e broda, dat one a murdara. An oona know dat dey ain no murdara wa got de ebalastin life.
16Now den, dis mek we ondastan wa lob mean: Christ done gii e life fa we sake. Same fashion, we too oughta gii we life fa sake ob we bredren.
17Bot wen somebody hab plenty ting bot e ain hab no pity pon e broda dat e see ain got wa e need, fa true, dat rich man ain got none ob God lob een e haat!
18Me chullun, we mus dohn show we lob jes by da taak bout um, by wa we say. We haffa do ting wa show dat we lob fa true.
We Kin Be Full op wid Courage Wen We Come Fo God
19So den, dis wa gwine mek we know dat we blongst ta de trute an we ain gwine warry een we haat wen we come fo God.
20Ef we haat condemn we, say we ain do right, we know dat God great mo den we haat an e know all ting.
21Me deah fren, ef we haat ain condemn we, we full op wid courage wen we come fo God.
22An God da gii we waeba we aks um fa, cause we keep on da do wa e chaage we fa do an de ting dem wa please um.
23Dis wa God chaage we fa do: We oughta bleebe pon de name ob e Son Jedus Christ. An we oughta lob one noda, same like Christ chaage we fa do.
24Ebrybody wa da keep on da do wa God chaage um fa do, dat one da keep on da lib een God an God da lib dey een e haat. We know dat e da keep on da lib een we haat cause ob de Holy Sperit dat e gii we.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel