Dem Las Day
1Now den, ondastan dat jurin dem las day, dey gwine be heapa trouble.
2Cause dey gwine be people wa lob jes deysef, an dey gwine hab de big eye, da wahn ebryting. Dey gwine brag on deysef an pit deysef op, da tink dey betta den oda people. Dey gwine sult people, an ain gwine pay no mind ta wa dey modda, needa dey fada tell um fa do. Dey ain gwine tell nobody tankya fa nottin, an dey ain gwine hab no spec fa God.
3Dey ain gwine cyah none tall bout oda people an ain gwine hab mussy pon nobody. Dey gwine tell lie bout one noda an hole one noda cheap. An dey ain gwine be able fa trol deysef. Dey gwine go wile ef people git een dey way, an dey gwine hate ebryting dat good.
4Dey ain gwine be people dat oda people kin trus. Dey gwine do ting dout study pon wa gwine happen cause ob wa dey done. Dey gwine be biggity, an lob dey own pledja. An dey ain gwine lob God none tall.
5Dey mek like dey da folla God bot dey ain gree fa leh God hab no powa oba dey life. Ya mus dohn mix wid dem people yah.
6Cause some dem sneak roun an mek dey way eenta people house an go ton ooman dem haat, ooman wa ain know wa dey oughta bleebe. Dem ooman da burden down wid dey plenty sin an dey da do all kind ob ebil ting wa dey haat gim fa do.
7Dem ooman yah always ready fa jes keep on da laan, bot dey ain neba able fa know wa ting true.
8Jes like Jannes an Jambres been ginst Moses, same way so, dem people yah, dey ginst de trute. Dey people wa ain da tink right cause dey mind ebil. An God done ton um way cause dey ain bleebe right.
9Bot dey ain gwine go faa, cause ebrybody gwine shim fa fool, jes like happen ta Jannes an Jambres.
De Las Ting Dem wa Paul Chaage Timothy fa Do
10Bot ya been pay mind ta dem ting wa A laan ya. Ya see how A da do, an ya know wa A wahn fa do een life. Ya know how A trus een Christ, an how A da beah op onda suffrin. Ya know how A lob people an stan op scrong ginst trouble.
11Ya know how people fight me an de suffrin A da suffa. Ya know wa happen ta me een Antioch an Iconium an Lystra, de bad bad ting dat people done ta me, wa A done beah op onda. Stillyet de Lawd bring me out ob all dem ting.
12Fa true, people gwine fight ginst all dem wa one wid Christ Jedus, wa wahn fa lib dey life like God wahn um fa lib um. People gwine mek um suffa.
13Same time, wickity people an dem wa da lie, da mek people tink dey good, dey gwine git wos, mo an mo. Dey gwine ceebe plenty people an people gwine ceebe dem too.
14Bot ya mus keep on bleebe de true ting dem dat ya done laan an dat ya bleebe fa sho. Ya know dem wa beena laan ya.
15An ya mus memba how fom wen ya been small, ya beena know dem ting wa done been write down een God Book. Dey able fa mek ya know fa true so dat ya trus een Christ Jedus fa be sabe.
16God cause people fa write down all dat dey done write down een God Book. An all dem ting dey een e Book, dey good fa mek we laan wa true, an fa mek we know dem ting dat we da do wa ain right. Dey good fa mek we wa ain da do right, ton an staat fa do wa right, an fa tell we how fa lib de way God wahn we fa lib.
17All dem ting dey een God Book good fa all dat, so dat de one wa gii e fa do wa God wahn kin git all de laanin fom God dat e oughta git an e kin be all dat e oughta be, so dat e gwine be ready fa do ebry good wok jes like e oughta do um.
<< 2 Timotius 3 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel