Alkitab Mobile SABDA
[VER] : [GULLAH]     [PL]  [PB] 
 <<  Galatia 4 >> 

1Wa A mean fa say, wen a poson da stillyet a leetle chile, e ain gwine git de propaty dat e fada promise um. Wen e a chile, dey gwine treat um like a saabant, eben dough e got all dat propaty.

2Wiles e still a chile, dey people wa tek cyah ob um. Dey gwine show um wa fa do an be sponsible fa um bout de propaty dat gwine come ta um. Dey gwine do dat til e fada say dat de time done come fa leh e chile do um.

3Same way, we, too, beena slabe ta de sperit dem wa da rule oba de wol, wen we been like leetle chullun, fo we ondastan real good de trute bout God.

4Bot wen de right time come, God sen e Son eenta de wol. E hab a modda jes like all people hab, an e do wa de Jew Law say.

5E come fa sabe de people wa dey onda de Jew Law, so dat we all could come fa be God own chullun.

6An cause oona come fa be God chullun, God sen de Sperit ob e Son eenta we haat. An dat de Sperit dat call out ta God say, “Fada, me Fada!”

7So den, oona ain no slabe no mo. Ebry one ob oona, ya God chile, an cause ya God chile, e gwine gii ya all dat e got fa gii ta e chullun.

Paul Consaan Bout de People een Galatia

8Oona ain know God fo, so oona been slabe ta dem ting dey call “god” wa ain no god tall.

9Bot now dat oona come fa know God--o A oughta say, now dat God know oona--hoccome oona da ton back fa be slabe gin ta dem sperit wa da rule oba de wol. Dey ain got no scrent an dey ain wot. Fa sho, oona ain wahn fa be dey slabe all oba gin, ainty?

10Oona got special day an mont an season an yeah wa oona da celebrate cause oona tink dat gwine mek God sattify wid oona.

11Fa true, A consaan bout oona. Could be dat all wa A done fa hep oona been fa nottin.

12Me Christian bredren, A da beg oona, do ya please, be like me. Cause A come fa be like oona. Oona ain done me no bad ting.

13Oona know hoccome A fus tell oona de Good Nyews bout Jedus Christ. Cause A been sick, A git de chance fa preach ta oona.

14Wen A been real sick, dat mek ting haad fa oona fa true. Stillyet, oona ain neba hole me cheap. Oona ain say A ain wot. Steada dat, oona treat me real good an tek me een jes like oona would tek een one ob God angel. Oona tek me een, jes like oona would tek een Christ Jedus.

15Oona been real heppy! Wa happen ta change all dat? Fa true, A know dat oona been ready fa gii me ebryting oona got, eben ef A woulda aks oona fa tek out oona own eyeball an gim ta me.

16Now cause A da tell oona de trute, oona tink dat A done come fa be oona enemy?

17Dem oda people da try real haad fa hab oona go dey way, bot dey ain op ta no good fa oona. Dey wahn fa mek oona stop greein wid me so dat oona kin try mo haada fa folla dey way.

18E a fine ting fa try real haad ef oona wahn fa do good. An oona oughta do like dat all de time, eben wen A ain dey wid oona.

19Me deah chullun! Now noda time, A da feel pain fa oona sake. An dis pain dat A feel, e jes like de pain dat a ooman feel wen e chile wahn fa bon. A gwine feel dis pain yah til oona come fa lib like people wa hab Christ een um fa true.

20Wid all me haat A wahn fa be wid oona now, so dat A could stop da taak scrong wod ta oona. A so consaan bout oona, A ain know wa fa do.

De Two Cobnant: Hagar an Sarah

21Leh A aks oona, oona wa wahn fa hab de Jew Law rule oba oona, oona ain ondastan fa true wa de Jew Law say, ainty?

22Dey write een de Law say dat Abraham git two son. One ooman wa been de slabe ob e wife, e bon one ob Abraham son. An e wife, wa been a free ooman, bon de oda one.

23De ooman dat ain been free, been wid chile an bon Abraham son jes like ooman always bon chullun. Bot de son dat Abraham wife, de free ooman, bon, e bon um cause God done beena promise Abraham dat chile dey.

24Now den, wa happen wid Abraham two son mean two diffunt ting. De two ooman, dey like two diffunt greement dat dey call cobnant. One ob de cobnant come fom Mount Sinai. De ooman wa ain free, name Hagar, stan fa dat cobnant, an Hagar chullun ain been free wen dey bon.

25Wen we taak bout Hagar, we da taak bout Mount Sinai een Arabia. An wen we taak bout Hagar, we kin taak too bout how Jerusalem da taday. Jes like Hagar ain free an e hab jes chullun dat ain free, same way Jerusalem ain free, an all de people ob dat city ain free needa.

26Bot de Jerusalem wa dey een heaben, e free, an dat Jerusalem dey, e like we modda.

27Cause dey write een God Book say, “Ya ooman wa ain able fa hab no chullun, ya oughta be heppy! Ya wa ain neba feel de pain fa bon chullun, ya oughta shout loud cause ya glad! Cause de ooman dat e man done lef, e gwine hab mo chullun den de ooman wa dey wid e man.”

28So den, me Christian bredren, oona God chullun, cause dat de way God promise e gwine happen. Same way, Abraham git e son, Isaac, cause God promise dat.

29Een dat time dey, Abraham son wa Hagar bon like ooman always bon chullun, e mek de son dat been bon cause ob wa God Sperit promise Abraham, suffa. An de same ting happen now.

30Bot wa dat dey write een God Book? Dey write dey say, “Mus mek de ooman dat ain free, go way, an e son mus go too. Cause de son ob de ooman wa ain free ain neba gwine hab no paat ob de fada propaty. De son ob de wife wa free, dat de son wa gwine git de propaty.”

31So den, me Christian bredren, we ain chullun ob de ooman wa ain free. We chullun ob de wife, wa free.



 <<  Galatia 4 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran