Alkitab Mobile SABDA
[VER] : [GULLAH]     [PL]  [PB] 
 <<  Kisah Para Rasul 11 >> 

Peter Tell de Jerusalem Choch bout Cornelius

1De postle dem an de bredren wa bleebe pon Jedus all oba Judea, dey yeh dat dem people dat ain Jew been bleebe God wod, too.

2So den Peter gone op ta Jerusalem, de Jew dem wa say we mus circumcise all wa bleebe, dey taak ginst Peter.

3Dey blame Peter say, “Ya gone eenta de house ob people dat ain circumcise an ya nyam wid um!”

4So den, Peter tell um all dat done happen fom fus ta las. E say,

5“A beena pray een Joppa city an God show me a bision. A see sompin dat look like a big bed sheet come down. E beena leddown fom heaben by e fo cona, til e git ta me.

6Wen A look good eenside dat ting like a sheet, A see all kind ob critta. A see wile beast, an reptile wa crawl pon de groun, an wile bod.

7A yeh a boice da tell me say, ‘Peter, git op. Kill some dem an nyam um!’

8Bot A ansa say, ‘No, Lawd, A mus dohn, fa true! A ain neba nyam nottin dat we Jew Law say ain fit fa nyam.’

9De boice ansa say, ‘Wasoneba God mek good fa nyam, ya mus dohn say e ain fit fa nyam.’

10Dat happen shree time. Den all ob um done been pull back op eenta heaben.

11Dat same time, shree man dat done been sen ta me fom Caesarea, come ta de house weh we beena stay.

12God Sperit tell me fa go wid um, an dat A mus dohn warry cause dey ain Jew people. Dem six bredren fom Joppa gone wid me, too, ta Caesarea an we all gone eenta Cornelius house.

13Cornelius tell we dat God sen a angel ta e house. De angel come an stan close ta Cornelius an tell um say, ‘Sen some man dem ta Joppa fa bring back one man dey name Simon, wa dey call Peter.

14E gwine come tell ya how ya an all de people een ya house gwine be sabe.’

15So den wen A staat fa ansa Cornelius, God mek e Holy Sperit come down pon Cornelius an dem een e house. De Holy Sperit come down pon um same like how e been come pon we at de fus.

16Dat mek me memba wa de Lawd done say, ‘John bactize oona wid wata bot God gwine bactize oona wid de Holy Sperit.’

17Fa true, God gii dem people dat ain Jew dat same Holy Sperit dat e gii we wen we bleebe pon de Lawd Jedus Christ. So den, who dat A da, fa tell God say A ain gwine do wa e tell me fa do?”

18Wen dey yeh wa Peter say, dey stop grumble ginst um. Dey staat fa praise God say, “So den, God gii eben de people dat ain Jew a chance fa ton fom dey sin an change dey way, so dat dey kin git life wa gwine last faeba.”

De Choch een Antioch

19Wen de Jew leada dem een Jerusalem done kill Stephen an mek de people dat bleebe pon Jedus Christ suffa, dem people beena scatta all oba. Some gone a long way til dey git ta Phoenicia, some gone ta Cyprus, an some git ta Antioch. Bot dey jes tell de Jew people de wod bout Jedus.

20Bot den some oda ob dem dat bleebe pon Jedus wa come fom Cyprus an Cyrene, dey gone ta Antioch an staat fa tell de Greek people too, de Good Nyews bout de Lawd Jedus.

21De han ob de Lawd, all ob e powa, been dey pon um. An plenty people bleebe pon Jedus an tek Jedus fa dey Lawd.

22Dey nyews bout wa beena happen een Antioch come ta de choch people een Jerusalem. So dey sen Barnabas ta Antioch.

23Wen Barnabas git ta Antioch an see how God da bless de people dey, e been heppy fa true. E courage um all fa keep on da bleebe pon de Lawd wid all dey haat an waak fa true wid um.

24Barnabas been a good man, full op wid de Holy Sperit. E bleebe God een ebryting. An plenty people bleebe pon de Lawd.

25Den Barnabas gone ta Tarsus fa look fa Saul.

26Wen e find um, e bring um ta Antioch. Barnabas an Saul stay ta Antioch fa a whole yeah. Dey da meet wid de choch people an laan a heap ob um dey. Antioch been de fus place weh de people staat fa call dem wa bleebe pon Jedus Christian.

27Same time, some prophet dem come down fom Jerusalem ta Antioch.

28One dem prophet yah name Agabus. E stan op an God Sperit gim powa fa tell bout de bad famine dat been bout fa come oba all de wol. (Dis bad famine done come een dat time wen Claudius beena rule een Rome.)

29So dem wa bleebe een Antioch gree fa hep dey Christian bredren wa hab need, dem wa lib een Judea. Dey gree dat ebry Christian een Antioch gwine gii wa e able fa gii.

30An dey done dat. Dey gii Barnabas an Saul de money fa cyaa um ta de choch leada, dem wa dey call elda, een Jerusalem.



 <<  Kisah Para Rasul 11 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran