People Mek de Christian Dem Suffa Mo an Mo
1Bout dat time yah, King Herod staat fa mek some ob de bleeba dem wa blongst ta de choch suffa real bad.
2E hab sodja dem tek a sode an kill James, John broda.
3An wen de king see dat de Jew people heppy cause e done kill James, e sen sodja dem fa grab hole ta Peter, too. (Dis happen jurin de Jew holiday dey call de Feas ob Unleaven Bread, wen dey nyam bread dat ain hab no yeast.)
4Atta dey grab hole ta Peter, de king hab um pit um een de jailhouse. An e chaage sixteen sodja fa gyaad um. Dey been fo group ob sodja wid fo sodja een ebry group. Herod plan fa jedge Peter een front ob all de people wen de Jew Passoba holiday been oba.
5So Peter been dey een de jailhouse, bot de choch people beena pray pray ta God fa um.
De Lawd Angel Set Peter Free fom de Jailhouse
6De night fo Herod plan fa jedge Peter, Peter beena sleep een middle ob two sodja. Dey done tie um wid two chain, an oda sodja dem beena stan op by de jailhouse gyate, da gyaad de place.
7All ob a sudden, de Lawd angel da stan dey eenside de jailhouse an a bright light shine een de cell. De angel tetch Peter shoulda an wake um op. E tell um say, “Quick, git op!” Same time, dem chain pon Peter han fall off.
8Den de angel tell um say, “Git dress. Pit on ya belt an tie ya sandal pon ya foot.” Peter done wa de angel tell um fa do. An de angel say, “Pit on ya coat an come folla me.”
9Peter folla de angel outta de jailhouse. Bot e ain know dat de angel been do dat fa real, cause e beena tink dat e da see a bision.
10Peter an de angel pass de fus an secon gyaad dem. Dey reach de iron gyate dat open de way eenta de city. Dat gyate open esef fa um, an Peter an de angel pass shru. Dey waak down one screet, an all ob a sudden de angel lef Peter.
11Den Peter know e ain beena see a bision an e outta de jailhouse fa true. E say, “Now A know dis done happen fa true! De Lawd sen e angel fa come sabe me fom Herod han an fom all de bad ting de Jew people plan fa do ta me.”
12Wen Peter ondastan dat e outta de jailhouse fa true, e gone ta Mary house. Dis Mary yah de modda ob John Mark. Heapa people been geda togeda een de house dey, da pray.
13Peter knock on de outside door, an a ooman name Rhoda wa beena wok dey, come fa open de door.
14Wen e yeh Peter boice, e so heppy, e ron back fa tell de odares. Bot e ain open de door fa Peter. E gone an Peter dey da stan op at de door.
15De people tell Rhoda say, “Ya crazy!” Bot e keep on da tell um dat e fa real. So dey say, “Dat mus be Peter angel dey.”
16Bot Peter steady knock. Wen dey open de door an see Peter, dey been stonish down.
17E mek sign wid e han fa mek um stop fa taak. E tell um how de Lawd done tek um outta de jailhouse. Den e tell um say, “Tell James an de oda bredren wa happen.” Den Peter gone ta noda place.
18Wen day clean, de gyaad dem been all stir op. Dey aks one noda say, “Wa happen ta Peter?”
19Herod chaage um fa go look fa Peter, bot dey ain find um noweh. So Herod quizzit dem gyaad, an den e gii orda fa oda sodja dem fa kill um. Atta dat, Herod lef Judea an gone down fa stay een Caesarea.
King Herod Pass Oba
20Now den, Herod been bery bex wid de people een Tyre an Sidon. So some ob dem people da geda togeda fa go taak wid um. Fus dey mek peace wid Blastus, de man dat look atta all de ting een King Herod bighouse. Den dey gone ta Herod an aks um fa mek peace, cause dey food da come fom de country weh Herod da rule.
21Herod pick one day special fa shim. E dress op wid de rich cloes dat king weah, an e gone an seddown pon de chair weh e always sit fa rule. Den e taak ta de people geda dey ya.
22De people ansa an shout say, “E ain taak like a man. E da taak like a god!”
23Jes den, de Lawd angel come mek Herod sick, cause e leh de people praise um an e ain gii God de praise. So worm nyam op e body an e done dead.
24Bot de wod ob God beena grow mo an mo, an mo an mo people bleebe pon Jedus.
25Barnabas an Saul done de wok dey dat God gim fa do. Den dey gone back fom Jerusalem ta Antioch, an dey tek John Mark wid um.
<< Kisah Para Rasul 12 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel