Alkitab Mobile SABDA
[VER] : [GULLAH]     [PL]  [PB] 
 <<  Lukas 16 >> 

De Ceitful Wokman wa Hab Good Sense fa Plan

1Jedus tell e ciple dem say, “One time a rich man hab one wokman een chaage ob e propaty. Dat rich man yeh say dat de wokman ain been scraight, dat e beena shrow way e bossman propaty.

2De rich man call de wokman an aks um say, ‘Wa dis A yeh bout ya? Gii me de book weh ya da write all dat ya done tek een an all wa ya done spen. Cause ya ain gwine hab chaage oba me propaty no mo.’

3De wokman een chaage say ta esef, ‘Wa A gwine do now? Me bossman ain gwine leh me wok fa um no mo. A ain scrong nuff fa dig ditch, an A too shame fa beg.

4Now den, A know wa A gwine do so dat people gwine eenbite me ta dey house atta A done loss me job.’

5So de wokman sen an call fa all de people wa owe e bossman, fus one an den de oda. Wen dey come, e aks de fus one say, ‘Hommuch ya owe me bossman?’

6E ansa say, ‘A hundud barrel ob olib oll.’ De one een chaage tell um say, ‘Yah ya bill. Seddown quick an change de one hundud wa done been write down dey ta fifty.’

7Den de wokman een chaage aks noda one say, ‘Hommuch ya owe me bossman?’ Dat one ansa, ‘A owe um one tousan bushel ob wheat.’ De one een chaage tell um say, ‘Yah ya bill. Change de one tousan wa write down dey ta eight hundud.’

8“Now den, de bossman say de ceitful wokman een chaage hab good sense fa plan fohan, fa figga how fa git de people fa eenbite um ta dey house later on. Fa true, de people wa tink all de time bout ting een dis wol, how fa mek good, dey da tink good how fa deal wid people like deysef. Dey tink bout dat mo betta den de people wa da waak een God light.”

9Jedus tell e ciple dem say, “A da tell oona, oona oughta spen money an ting een dis wol fa mek fren fa oonasef. Den wen de money an ting done gone, God gwine welcome oona eenta oona ebalastin home een heaben.

10De poson dat oona kin trus fa tek chaage oba leetle bit an do good, dat de poson oona kin trus fa tek chaage an do good oba big ting. An de poson dat ain scraight consaanin leetle ting ain gwine do right consaanin big ting.

11So den, ef poson ain able fa trus oona wid money an ting een dis wol, ain nobody gwine trus oona wid ting dat walyable fa true, ainty?

12Ef dey ain able fa trus oona wid oda poson propaty, ain nobody gwine gii oona propaty fa oona own, ain dat so?

13“One wokman ain able fa saab two massa. Ef e be so, e gwine hate one an lob de oda one. E gwine be true ta one an hole de oda one cheap. Ya ain able fa saab God an be a slabe ta money at de same time.”

Jedus Teach Bout Oda Ting

14Wen de Pharisee dem yeh wa Jedus say, dey suck dey teet an shrow wod at um. Cause dey da lob money a whole heap.

15Bot Jedus tell um say, “Oona mek people tink dat oona ain da do bad. Bot God know wa dey een oona haat. Dem ting wa people say walyable fa true, dey ain wot nottin een God eye.

16“De law wa God gii Moses an de prophet, dem wod hab great tority til John wa Bactize come long. Fom dat time, dey da preach de Good Nyews bout how God da come fa rule. An all de people da do dey bes fa hab God fa rule oba um.

17Bot e mo easy fa mek heaben an de whole wol disappeah den fa mek one leetle paat ob God Law loss wa e mean.

18“A man wa worce e wife an gone marry noda ooman da lib een sin. Same fashion, a man wa gone marry ooman wa done been worce da lib een sin.”

Lazarus an de Rich Man

19“One time a rich man beena dress fa beat de ban. An e hab feas an joy esef tommuch ebry day.

20An one po man name Lazarus lib dey too. E beena kiba wid soo. E ain able eben fa waak roun. An ebry day, dey come bring Lazarus, leddown ta dat rich man door.

21Lazarus beena wahn fa nyam de scrap ob food wa lef oba, wa fall fom de table wen de rich man beena nyam. On top ob dat, eben dem dog beena come long dey an lick dat po man soo.

22“Den dat po man pass oba. God angel cyaa um fa seddown longside de ole people leada, Abraham, een heaben. De rich man pass oba too. An e git bury.

23E gone ta hell, an e beena suffa tommuch oba dey. E raise e eye an see Abraham way off. An Lazarus been longside um.

24So de rich man hail Abraham say, ‘Fada Abraham! Hab mussy pon me! Sen Lazarus fa me. Mek e pit e leetle finga een wata an come yah fa tetch me tongue an cool um off. Cause A da suffa tommuch eenside dis yah fire!’

25“Bot Abraham tell um say, ‘Me son, memba wen ya beena lib oba dey een de wol, ya done joy yasef. Ya done git ya paat. Ya git all ya good ting fo ya pass oba. Same time Lazarus done git all de bad ting. Bot now e da joy esef yah an ya da suffa.

26Fodamo, a deep deep ditch done been pit tween we an oona. Cause ob dat, dem wa wahn fa cross oba fom yah ta oona side ain able fa go. An dem ta oona side ain able fa cross ta yah weh we at.’

27“De rich man say, ‘Well den, Fada Abraham, A beg ya, sen Lazarus ta me fada house.

28A hab me fibe broda oba dey. Leh Lazarus go fa waan um. Leh Lazarus tell um say dat dey mus dohn lib de way A done lib een de wol. Den wen dey pass oba, dey ain haffa come yah ta dis place weh A da suffa tommuch.’

29“Bot Abraham tell um say, ‘Ya broda hab de Book wa Moses an de prophet dem write. Dem wod dey fa waan um. Leh um yeh an pay mind.’

30“De rich man ansa say, ‘No, dat ain nuff, Fada Abraham. Me broda dem ain gwine listen ta wa Moses an de prophet dem done say een dem Book. Bot ef somebody wa done dead go fa waan um, dey gwine change dey sinful way an do wa God wahn um fa do.’

31“Bot Abraham tell um say, ‘Ef ya broda ain listen ta wa Moses an de prophet done say een dem Book, dey ain eben gwine pay mind ta somebody wa done dead, wa gone back een de wol fa waan um. Dey ain gwine change dey way.’”



 <<  Lukas 16 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran