De Debil Tempt Jedus
1Jedus come back fom de Jerden Riba, an e been full op wid de Holy Sperit. De Sperit lead um eenta de desat.
2Jedus been dey foty day. An all dat time de Debil beena try fa mek um do some ebil ting. Jedus ain nyam nottin jurin dat time. So atta dem foty day done pass, e been hongry down.
3De Debil tell um say, “Since ya God Son, mek dis rock yah ton ta bread.”
4Jedus ansa um, “Dey done write down een God Book say, ‘People ain able fa lib fa true lessin dey got mo den sompin fa nyam. Dey lib by ebry wod wa God gim.’”
5De debil tek Jedus op a high place an show um all de country een de wol at one time.
6E tell Jedus say, “A gwine gii ya powa fa rule oba all dem country yah an all de good ting dem dey, wa mek people too heppy. Cause all dem ting yah blongst ta me now. An A able fa gim ta anybody A wahn.
7A gwine gii ya all dem ting ef ya bow down an woshup me op.”
8Jedus ansa say, “Dey done write down een God Book, say, ‘Mus woshup de Lawd ya God an mus dohn saab nobody cep um.’”
9De debil tek Jedus ta Jerusalem an set um op on de mos high paat ob God house. E tell Jedus say, “Since ya God Son, shrow yasef down fom yah.
10Cause dey done write down een God Book, say, ‘God gwine gii orda ta e angel dem, tell um fa tek cyah ob ya so dat nottin ain gwine haam ya.’
11An e say too, ‘De angel dem gwine tote ya een dey han, so dat ya ain gwine hut eben ya foot on a rock.’”
12Jedus ansa um, “Dey done write down een God Book, say, ‘Mus dohn tempt de Lawd ya God fa jes do wa ya wahn.’”
13Wen de debil done try fa mek Jedus do ebil een all kind ob way an e ain able fa tempt um fa do um, e gone an lef Jedus fa leetle wile.
Jedus Staat E Wok een Galilee
14Jedus gone back ta Galilee full op wid God Sperit. E da lib een Jedus an gim powa. An de nyews consaanin Jedus git roun ebryweh een de whole arie.
15Jedus beena laan de people een all dey meetin house, an ebrybody praise um.
Jedus een Nazareth
16Jedus gone ta Nazareth, weh e lib fom de time e been a leetle chile til e git big. Wen de Jew Woshup Day come, e gone ta de meetin house like e always do. An e stan op fa read God Book ta de people.
17Dey gim de book wa Isaiah done write. Isaiah been a prophet wa taak fa God ta de ole people. So den, Jedus open de book ta da place weh Isaiah write, say,
18“De Sperit ob de Lawd pon me. E done pick me fa tell de good nyews ta de po people. E done sen me fa tell dem wa ain free, say, ‘Oona gwine be free.’ E sen me fa tell de bline people, say, ‘Oona gwine see gin.’ E sen me fa free dem wa da suffa.
19An e sen me fa tell de people say, ‘De time done come wen de Lawd gwine sabe e people.’”
20Den Jedus shet de book an gim ta de man wa tek cyah ob de book. An e seddown. Ebrybody een de meetin house fasten e eye on um.
21An Jedus tell um say, “Taday dis paat ob God Book done come true, same time oona done yeh um.”
22De people dem all taak good bout Jedus. Dey stonish cause e know how fa pit e wod jes so. An dey say, “Ain dis Joseph boy?”
23An Jedus tell um say, “Fa sho, oona gwine tell me dat ole wise wod, say, ‘Docta, mek yasef well!’ Oona gwine say, ‘All dem miracle wa we yeh say ya done een Capernaum, ya mus do de same ting yah weh ya raise op.’”
24An Jedus say, “A tell oona fa true, ain nobody wa tell God wod wa eba git hona weh e raise op.
25Fa true, de time wen Elijah been een Israel, e ain rain fa shree yeah an six mont. Dey been a dry drought, an de people been staabin een de whole country. An fa sho, plenty wida-ooman been dey een Israel.
26Stillyet, God ain sen Elijah ta none dem wida-ooman yah een Israel. Stead ob dat, e jes sen um ta one wida wa lib een Zarephath town een de arie dey call Sidon.
27An de time wen Elisha, de prophet, beena tell God wod een Israel, plenty people wid leposy been dey, bot Elisha ain mek none dem clean cep fa Naaman, wa come fom Syria.”
28Wen de people een de meetin house yeh dat, dey all been full op wid rage.
29Dey jomp op an shrow Jedus outta de town. Dey tek um ta de top ob de hill weh dey town been build. Dey cyaa um dey cause dey wahn fa shrow um oba de edge ob de hill.
30Bot Jedus waak shru de middle ob de people an gone on e way.
Jedus Mek Ebil Sperit Come Outta a Man
31Jedus gone down ta Capernaum, a town een Galilee. E beena laan de people dey ebry Jew Woshup Day.
32An dey been stonish wen dey yeh um, cause e laan um wid tority fa true.
33One ebil sperit been een a man dey een de Jew meetin house. An e holla loud say,
34“Leh we be! Jedus fom Nazareth, wa bidness ya got wid we? Ya come fa stroy we? A know who ya da. Ya blongst ta God fa true!”
35Jedus chaage dat ebil sperit say, “Dohn crack ya teet! Come out fom eenside dis man!” De ebil sperit shrow de man ta de groun fo all de people, an e lef um. An e ain done de man no haam.
36All de people been stonish, an dey tell one noda say, “Wa kind ob wod dis man nyuse? E da taak scrong, wid tority, an e gii orda ta de ebil sperit an dey come out!”
37An de nyews git roun all de town an settlement close by bout wa Jedus da do.
Jedus Heal Plenty People
38Jedus git op an lef de meetin house an gone ta Simon house. Simon wife modda been real sick wid a high feba. So dey aks Jedus fa hep de sick ooman.
39Jedus gone stan op close ta e bed, an e buke de feba. An de feba lef um. Same time de ooman git op an staat fa fix sompin fa dem fa nyam.
40Bout fus daak, all de people bring all kind ob sick people ta Jedus. E pit e two han on um, one by one, an all dem been heal.
41Fodamo, ebil sperit dem come outta a heapa people. Dem sperit holla say, “Ya God Son!” Jedus chaage um say, “Mus dohn open oona mout!” Cause de ebil sperit beena know Jedus de Messiah.
Jedus Preach de Good Nyews ta de People
42Wen day clean, Jedus lef de town an gone ta a place weh dey ain been no people. An de crowd saach fa um. Wen dey done find um, dey try fa keep um dey wid um.
43Bot Jedus tell um say, “A haffa go ta all de oda town too, fa tell de people de good nyews bout how God da rule, cause dat wa God sen me fa do.”
44An Jedus gone an preach de Good Nyews een de Jew meetin house dem een Judea.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel