Jedus Laan People Bout Worce
1Jedus lef dey an gone ta Judea lan. Den e cross oba de Jerden Riba. Plenty plenty people geda roun um gin dey. An e laan um bout God, same like how e done beena do.
2Some Pharisee dem come quizzit Um. Dey da try fa ketch um taak ginst God Law dat Moses done write. Dey aks Jedus say, “Coddin ta we Jew Law, e right fa man fa worce e wife, fa leabe um an no hab um fa be e wife no mo?”
3Jedus aks um say, “Wa de Law wa Moses gii oona chaage oona fa do?”
4De Pharisee dem ansa Jedus say, “Moses done say man kin write paper fa gii ta e wife, show dat ooman ain gwine be e wife no mo. Den de man kin sen um way.”
5Jedus tell um say, “Moses write dat law fa oona cause oona haat haad. Oona ain wahn fa do wa God say.
6Bot fom wen e fus mek de wol, ‘God mek two kind ob people, man an ooman,’ like dey write een God Book.
7Cause ob dat, man leabe e modda an e fada an e go lib wid e wife.
8An dem two like one poson. So den, dey ain two people no mo. Dem two be like one poson.
9Wen God done jine de man an de ooman togeda like one poson, people mus dohn neba tek dem paat fom one noda.”
10Now wen Jedus an e ciple dem gone back eenta de house, e ciple dem aks um bout wa e done say bout worce.
11E ansa um say, “Ef any man worce e wife an den e go marry oda ooman, dat man sin gainst e fus wife, cause e sleep wid oda ooman.
12Same way so, ef a ooman worce e husban, an den e go marry oda man, dat ooman done sin gainst e fus husban, cause e da sleep wid oda man.”
Jedus Bless De Chullun
13Some people come bring chullun ta Jedus fa hab um pit e han pon dey head fa bless um. Bot e ciple dem buke de people, tell um dey ain oughta bodda Jedus so.
14Wen Jedus see wa e ciple dem da do, e bery bex. E tell e ciple dem say, “Oona mus leh de chullun come ta me. Mus dohn stop um, cause people like dem chullun yah gwine be wid God wen e da rule oba all.
15A da tell oona de trute, anybody wa ain wahn fa hab God rule oba um same like dem chullun, dat poson dey ain gwine be wid God wen e da rule.”
16Den Jedus pick op de chullun one by one, an e pit e han pon dey head an aks God fa bless um.
De Rich Man
17As Jedus da gwine way, one man ron meet um an kneel down fo um. E tell Jedus say, “Teacha, ya wa be good, tell me wa A haffa do fa git life wa neba end?”
18Jedus ansa um say, “Hoccome ya say A be good? Ain nobody good fa true, cepin jes God.
19Ya know dem law wa God done chaage we fa do, dem wa Moses done write. Dey say, ‘Ya mus dohn kill. Marry man mus dohn leabe e wife an sleep wid oda ooman, an marry ooman mus dohn leabe e husban, go sleep wid oda man. Mus dohn tief. Mus dohn lie bout wa oda people done. Mus dohn cheat. Mus spec ya fada an ya modda.’”
20De man ansa say, “Teacha, A beena do coddin ta all dem law yah eba since A beena chile.”
21Jedus look pon de man an e like um. An e tell um say, “Jes one ting lef wa ya ain done yet. Mus go sell all wa ya done git an gii de money ta de people wa ain git nottin. Ef ya do dat, ya gwine be rich fa true een heaben. An atta ya done gii way ya money, ya mus come be me ciple dem.”
22Wen de man yeh wa Jedus say, e look real sad. E too saary, cause e been bery rich. E done lef Jedus an gone way.
23Jedus look roun pon e ciple dem, tell um say, “E sho nuff haad fa rich people fa come ta God an be wid um wen e da rule!”
24De ciple dem stonish wen Jedus say dat. Bot Jedus tell um gin say, “Me chullun, e sho nuff haad fa rich people fa come ta God an be wid um wen e da rule.
25E haad fa mek de camel pass eenside a needle eye, bot e mo haad den dat fa a rich poson fa come ta God an be wid um wen e da rule.”
26Den de ciple dem been eben mo stonish. Dey aks one noda say, “Ef dat so e stan, ain nobody gwine be sabe, ainty?”
27Jedus look pon um an say, “God able fa do wa people ain able fa do. God able fa do all ting.”
28Peter tell Jedus say, “Look yah, we done lef ebryting an come waak longside ya!”
29Jedus ansa say, “A da tell oona fa true. Anybody wa done lef e house o broda o sista o modda o fada o chullun o propity fa sake a me an de Good Nyews, God gwine gim mo.
30God gwine gim hundud time mo den wa e done lef. E gim house, broda, sista, modda, chullun an propity. God gwine gim now wiles e da lib yah een dis wol. An people gwine mek e suffa bad yah, bot God gwine gim life wa neba end, een de wol wa gwine come.
31Plenty people wa big leada now gwine be back ob oda people wen God da rule all. An plenty people wa back ob odo people now gwine go fus an be big leada den.”
De Shree Time Jedus Say E Gwine Dead
32Wen dey beena trabel long de road ta Jerusalem, Jedus da waak een front ob e ciple dem. Dey beena wonda tommuch. An de people wa beena come long wid um beena scaid. Jedus call e ciple ta one side an tell um gin bout wa some people gwine do ta um.
33E say, “Oona listen ta me. We da gwine ta Jerusalem, weh some people gwine grab hole ta de Man wa Come fom God. Dey gwine han um oba, gim ta de Jew priest leada dem an de Jew Law teacha dem. Den dey gwine han um oba ta people wa ain Jew fa mek um kill um.
34Dem people gwine hole um cheap. Dey gwine spit pon um, whip um an kill um. Bot atta shree day, e gwine come out fom mongst de dead people an lib gin.”
Wa We Mus Do Fa Be Big Leada Wen Jedus Rule
35James an John, wa beena Zebedee chullun, come ta Jedus say, “Teacha, we wahn ya fa do sompin dat we gwine aks ya fa.”
36Jedus aks um say, “Wa dat oona wahn me fa do fa oona?”
37Dey ansa um say, “Wen ya rule all de wol, leh we rule wid ya, da seddown close ta ya, one a we pon ya right han side an de oda one pon ya lef han side.”
38Jedus say, “Oona ain ondastan wa oona da aks me fa do. Oona gwine be able fa suffa wid me, fa drink fom de cup wa A gwine drink fom? Oona gwine be able fa dead wid me, fa be bactize like A gwine be bactize?”
39Dey ansa say, “We gwine be able fa do um.” Jedus tell um say, “Fa true, oona gwine drink fom dat cup wa A gwine drink fom, an oona gwine be bactize same like how A gwine be bactize.
40Bot A ain hab de tority fa leh oona seddown pon me right han side an pon me lef han side, wen A gwine rule. God done keep dem place fa de people wa e done pick fa seddown dey.”
41Wen de oda ten ciple yeh bout dat, dey bery bex at James an John cause ob wa dey done aks Jedus fa do fa um.
42Jedus call um all togeda an tell um say, “Oona know bout de leada dem wa spose fa rule oba de people dey een de wol. Dem leada hab powa oba de people an da tell dem wa fa do.
43Bot e ain dat way fa oona. Ef any ob oona wahn fa be oona big leada, e mus be oona saabant.
44Ef any ob oona wahn fa be oona leada, dat poson mus wok fa oona like e oona saabant.
45Cause eben de Man wa Come fom God ain come fa mek people be e saabant. E come fa be de people saabant, an fa gii e life fa pay de price ob sin steada dem, fa sabe a whole heapa people.”
Jedus Mek Bline Eye Bartimaeus See
46Jedus an e ciple come ta Jericho. Wen dey da leabe dey long wid a whole bunch ob oda people, one bline eye man name Bartimaeus beena seddown close by de road, da beg. E been Timaeus chile
47Wen Bartimaeus yeh say dat Jedus wa come fom Nazareth da pass by dey, e staat fa holla say, “Jedus, son ob David, hab mussy pon me!”
48Plenty ob de people buke Bartimaeus, tell um mus dohn crack e teet. Bot e da holla mo loud say, “Son ob David, hab mussy pon me!”
49Jedus stop, tell de people say, “Call um fa come yah.” So de people call ta Bartimaeus de bline eye man, say, “Study yasef! Git op! Jedus da say come yah.”
50Bartimaeus shrow e coat off wa e beena weah. E hop op an gone ta Jedus.
51Jedus aks um say, “Wa dat ya wahn me fa do fa ya?” De bline eye man say, “Teacha, A wahn ya fa mek me eye well so dat A kin see.”
52Jedus say, “Ya kin go pon ya way now. Cause ya da bleebe, ya eye done git well.” Nex ting e know, Bartimaeus able fa see. An e waak wid Jedus down de road.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel