Jedus Lib Gin, Rise op fom Mongst de Dead People
1Wen de Jew Woshup Day done pass, Mary Magdalene an Mary wa been James modda, an Salome gone buy spice ointment wa hab fine smell fa go rub um pon Jedus body.
2Aaly een de maanin de fus day ob de week, jes atta day clean broad, dey gone ta de tomb.
3As dey da gwine, dey da aks one noda say, “Who dat gwine roll way de stone fa we, dat stone wa kiba de tomb doormout?”
4Bot wen dey look op at de tomb, dey see dat de big stone wa done beena kiba de doormout done been roll way. An dat beena big big stone.
5Wen de ooman dem gone eenside de tomb, dey see one nyoung man dress op een a long white robe. E beena seddown pon dey right han side. An dem ooman beena bery stonish.
6De nyoung man tell um say, “Oona mus dohn be stonish. A know dat oona da look fa Jedus fom Nazareth, wa done been nail pon de cross an dead. E ain yah. E done rise op fom mongst de dead people an e da lib gin! Look, dis yah de place weh dey done lay um down.
7Oona go tell Peter an e oda ciple dem say, ‘E da gwine fo oona ta Galilee. Oona gwine meet um dey, same like e done tell oona.’”
8De ooman dem beena all shake op an scaid. Dey come outta de tomb an ron way fom dey. Dey ain say nottin ta nobody cause dey been scaid down.
Jedus Come ta Mary Magdalene
9[Now den, aaly een de maanin pon de fus day ob de week, Jedus done rise op fom mongst de dead people, da lib gin. E come fus ta Mary Magdalene. Mary been de ooman wa been hab seben ebil sperit eenside um wa Jedus done dribe outta um.
10Atta Mary see Jedus, e gone ta dem people wa done beena waak long side Jedus. Dey still beena cry out an moan cause Jedus done dead. Mary tell um all wa done happen.
11Stillyet wen dey yeh dat Jedus da lib gin an dat Mary esef done shim, dey ain bleebe wa e say.]
Jedus Come ta Two Man
12[Noda time atta dat, two man wa done beena waak wid Jedus beena gwine ta one willage. Wiles dey da waak, Jedus come ta um. Jedus look diffunt ta dem den how Mary done shim.
13De two man gone back ta Jerusalem an tell de oda res wa done happen. Bot de oda dem ain bleebe dem man needa.]
Jedus Come ta de Leben Ciple
14[Atta dat, Jedus come ta de leben ciple wen dey beena nyam. E buke um cause dey ain beena bleebe dat e da lib an cause dey been too haad head fa bleebe dem people wa done been shim atta e done git op fom mongst de dead people an lib gin.
15Jedus tell um say, “Oona mus go all oba de wol an tell all de people de Good Nyews bout me.
16De poson wa bleebe de Good Nyews an git bactize, God gwine sabe dat poson. Bot de one wa ain bleebe de Good Nyews, God gwine condemn um.
17Dem people wa bleebe de Good Nyews, God gwine gim powa fa do dem miracle yah. Een me name dey gwine dribe ebil sperit outta people, dey gwine taak diffunt tongue.
18Ef dey pick op snake o ef dey drink poison esef, nottin ain gwine hut um. Dey gwine pit dey han pon sick people an pray fa dem fa be well, an dem people gwine be well.”]
Jedus Go ta Heaben
19[Wen de Lawd Jedus done taak ta e ciple dem, God tek Jedus op eenta heaben. Jedus gone seddown ta God right han fa rule wid um.
20De ciple dem gone all oba, da tell people de Good Nyews. An de Lawd Jedus beena hep um, gim powa fa do miracle so dat de people know dat wa dem ciple say be true fa sho.]
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel