De Faama an E Seed
1One oda time Jedus staat fa laan de people wa been wid um close by Lake Galilee. An a heapa people geda roun um til de crowd been too big. So e gone seddown eenside a boat, dey een de wata close ta de sho. An de crowd da stan pon de sho.
2Jedus da tell um paable fa laan um plenty ting. Wen e da laan um, e tell um say,
3“Listen! One faama gone ta e fiel fa plant seed.
4Wen e da scatta de seed dem, some faddown pon de pat an some bod come out, nyam op all dem seed.
5Some seed faddown pon groun weh dey been heapa stone an dey ain been much dort. Cause ob dat, de seed dem buss quick, cause de dort ain deep dey.
6Bot wen de sun git hot, de nyoung plant dem wida an dead, cause dem root ain been gone down deep een de groun.
7De faama scatta oda seed wa faddown mongst bramble bush. An de bramble bush grow an kiba op de good plant so dem ain able fa beah.
8Bot oda seed faddown pon good groun. De seed buss an grow fine an beah plenty. Some seed beah tirty, some sixty, an some a hundud.”
9Jedus say, “Listen me good fashion, oona wa hab yea fa yeh. Oona oughta yeh an study good pon wa A say.”
Wa Fa Jedus Tell Paable
10Wen de crowd done gone way, some ob de people wa been wid Jedus an de tweb ciple dem come aks um say wa dem paable mean.
11Jedus ansa dem say, “Fa oona, God gii oona de chance fa know bout how e gwine rule all people like king yah een dis wol. Bot de oda people wa ain wid we, dem wa ain wahn fa bleebe, ain ondastan bout um. A da laan dem wid jes paable.
12A da tell um so dat, ‘Dey gwine look an look bot dey ain able fa see. Dey gwine yeh an yeh bot dey ain able fa ondastan. Now ef dey beena ondastan, dey woulda ton ta God, dem life woulda change, an God woulda paadon um!’”
Jedus Splain de Paable Bout de Faama an E Seed
13Jedus tell de people wa come aks um say, “Ef oona ain ondastan dis paable, oona ain gwine ondastan dem oda paable wa A da laan oona, ainty?
14De faama da scatta God wod.
15Some time de seed da faddown een de haad pat. Dem seed same like de people wa yeh de wod, bot as dey yeh um so, Satan come snatch way de wod outta dey haad haat.
16Now de seed wa faddown pon groun weh dey been heapa stone, dem seed same like de people wa yeh de wod an same time bleebe um, an dey glad.
17Bot de wod ain gone down deep een dey haat, so dey ain keep um. Dey stan like plant wa ain hab root. Wen trouble meet um o people fight ginst um cause dey bleebe de wod, same time dey lef dey right way. Dey ain bleebe de wod.
18De seed wa faddown mongst bramble bush, dem same like de people wa yeh de wod.
19Bot dey study tommuch pon de ting een dis wol wa dey wahn fa do. Dey wahn fa git rich, so dey fool deysef bout dat. Dey wahn fa hab all kind ob ting. So cause all dem ting stay een dey haat, God wod ain git place fa spread dey, same like plant wa been kiba op an ain beah fruit. Dem people ain do wa God wahn um fa do.
20Bot de seed wa faddown pon good groun, dem same like de people wa yeh de wod. An dey bleebe um good. Dat wod stay een dem haat. Dem stan like plant wa beah plenty. Some beah tirty, some sixty an some a hundud.”
De Lamp Pon de Table
21Jedus tell um noda ting say, “Ef anybody git lamp an light um, e ain gwine kiba um op wid a bowl o pit um onda a bed, ainty? No, e gwine pit um pontop de table so people able fa see e light.
22Cause all ting wa people do now wa dey hide, dem ting haffa come out sometime. An sometime people haffa know de ting wa secret now. Wa anybody ain ondastan fohan, e gwine ondastan um atta a wiles.
23Listen ta me good fashion, oona wa hab yea fa yeh. Oona oughta yeh an study good pon wa A da say.”
24Jedus say, “Oona pay mind now ta wa oona yeh. De rule dem wa oona da tek fa jedge oda people, dem de same rule God gwine tek fa jedge oona. An God gwine jedge oona mo scronga den how oona da jedge oda people.
25Anybody wa hab sompin, God gwine gim mo, bot anybody wa ain hab nottin, de leetle bit wa e hab, God gwine tek um. O ef oona wahn fa ondastan wa A da say, den God gwine mek oona ondastan me eben mo. Bot ef oona ain wahn fa listen ta me good, den eben dat leetle bit wa oona done ondastan, God gwine tek um way, so oona gwine lose um all.
De Paable Bout Seed Wa da Grow
26Den Jedus laan um wid one paable bout how God rule people like a king. E say, “God rule stan jes like how seed da grow wen a man scatta um pon de groun fa plant um.
27An jurin de day an de night, wen de man wake an wen e da sleep, de seed dem da buss out an da grow. Bot de man esef ain know how dem da grow.
28Jes de groun esef da mek seed grow fa gii food. Wen seed da grow, de paat wa buss out fom de root fus, dat wa ya see fus. Den ya see de leetle sprout dem, an las ob all, ya see de food wa e beah.
29Den wen de plant done big an de food ready fa nyam, de man tek e hook knife fa cut um, cause de time done reach fa cut all wa e done plant.”
De Paable bout De Mostad Seed
30Jedus tell um noda paable say, “A gwine show oona mo now bout how God da rule people like king. A gwine laan oona one paable fa splain how God da rule.
31God rule stan like mostad seed, wa de leeleetle seed ob all de seed oona plant een de groun.
32Bot wen e grow, e kin grow big mo den all de oda gyaaden plant. An e git plenty big branch weh bod kin come build dey house pon um.”
33Jedus taak plenty ob dis kind a paable, wen e beena laan de people God wod. E tell um all dat dey been able fa laan.
34E taak jes paable ta de people. Bot wen e an e ciple dem done lef de people, den e splain ta e own ciple dem wa de paable dem mean.
Jedus Mek de Big Wind an de Swellin Wata Steady
35Dat same ebenin time dey wen de sun da lean fa down, Jedus tell e ciple dem say, “Leh we cross oba de wata ta de oda side ob de lake.”
36So dey lef de crowd. De ciple dem git een de boat wid Jedus an dey gone. An dey been mo boat dey too.
37Wen dey da gwine, a big wind steal op pon um. An de big swellin wata staat fa come eenta de boat til de boat well nigh full op wid wata.
38Jedus been een da back paat ob de boat. E beena sleep wid e head pon a pilla. De ciple dem wake um op an aks um say, “Teacha, ain ya mind we be dead?”
39Jedus stanop, taak scrong ta de big breeze say, “Hush, stop blow.” An e say ta de swellin wata, “Go down.” De big breeze done hush an stop fa blow, an de swellin wata gone down an be peaceable an steady.
40Den Jedus ton roun ta e ciple dem say, “Hoccome oona so scaid? Stillyet oona ain bleebe pon God, ainty?”
41Bot dey beena stonish til dey ain know wa fa tink. Dey aks one noda say, “Who dis yah man yah? E tell eben de breeze an de wata wa fa do, an dey do jes wa e tell um!”
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel