Mus Dohn Jedge Ya Christian Broda
1Oona mus gii a haaty welcome ta de one wa ain scrong een e fait yet. Mus dohn aagy wid um bout wa e tink right fa do.
2Some people bleebe dey kin nyam all kind ob food. Bot oda people wa ain scrong een dey fait yet, dey ain nyam no meat tall.
3Dem people wa tink e right fa nyam all kind ob food, dey mus dohn tink dey mo betta den de people wa ain tink e right fa nyam no meat. An dem people wa ain tink e right fa nyam all kind ob food, dey mus dohn jedge dem wa tink e right fa nyam all kinda ting, cause God done welcome um fa be e own.
4Ya mus dohn jedge de saabant ob somebody else, ainty? De one wa de saabant da wok fa, e de one fa tell um ef e da do good o ef e da do bad. De saabant gwine do wa e oughta do, cause de Lawd able fa mek um do wa e oughta do.
5Some people tink one day mo betta den noda day, an oda people tink dat dey ain no day mo betta den noda. Ebrybody mus mek op e mind fa esef wa right.
6De one wa tink one day mo betta den noda, e do dat fa gii hona ta de Lawd. An de one wa tink e right fa nyam all kind ob food, e da nyam um fa gii hona ta de Lawd, cause e da tell God tankya fa de food. Same way so, de one wa ain nyam some kind ob food, e da do dat fa gii hona ta de Lawd, an e tell God tankya.
7Ain none ob we lib jes fa do wa we wahn, an ain none ob we dead jes cause we wahn fa.
8Cause wiles we da lib, we oughta lib fa please de Lawd. An wen we dead, we dead fa de Lawd. So den, wiles we da lib an wen we dead, we blongst ta de Lawd.
9Cause dat wa mek Christ dead an git op fa lib gin, fa mek um Lawd ob all people, dem wa done dead an dem wa ain dead yet.
10So, ain none ob oona oughta jedge ya Christian broda, ainty? An ain none ob oona oughta tink e mo betta den noda Christian broda, ainty? Cause we all got fa stan op fo God wa gwine jedge we.
11Dey write een God Book say, “De Lawd say, ‘Sho as A da lib, A promise dat all people gwine kneel down fo me fa woshup me. An all people gwine tell een de open who A da.’”
12So den, ebry one ob we gwine haffa ansa on e own ta God fa wa e done een dis wol.
Mus Dohn Mek Ya Broda Sin
13So den, we mus dohn jedge one noda no mo. Steada dat ebrybody oughta mek op dey mind dat dey ain gwine do nottin wa gwine mek dey Christian broda stumble o fall eenta sin.
14A blongst ta de Lawd Jedus, an dat mek me know fa sho dat dey ain no food wa ain right fa nyam. Bot ef somebody bleebe e ain right fa nyam sompin, den e ain right fa dat poson fa nyam um.
15Ef ya Christian broda git opsot cause ob sompin ya nyam, ya ain da waak een de way ob lob. Ya mus dohn nyam jes anyting ya wahn, ef dat gwine stroy a poson wa Christ dead fa.
16Ya mus dohn do nottin ya bleebe fa be good, ef dat gwine mek ya Christian broda sin an den oda people taak bad, say ya do ebil.
17Cause God rule ain bout ting we oughta nyam o ting we oughta drink. God rule bout how fa lib scraight an peaceable wid people, an de joy wa de Holy Sperit da pit een we haat.
18De one wa da saab Christ een dis way, e da mek God heppy wid um, an people, too, gwine like wa e da do.
19So den, we mus try all de time fa do dem ting wa gwine bring peace an wa gwine hep we mek one noda mo an mo scronga een Christ.
20Fa sho, ya mus dohn stroy de wok ob God fa sake ob food. Ya kin nyam all kind ob food, bot ya mus dohn nyam nottin wa gwine mek noda poson sin.
21Ya mus dohn nyam meat, needa drink no wine, o do no oda ting wa gwine mek ya Christian broda sin.
22Waeba ya bleebe bout wa right fa nyam o fa drink, ya mus lef dat tween yasef an God. Wen somebody do ting wa e bleebe fa be right an e ain doubt needa say ta esef ‘A done wrong,’ dat one heppy fa true.
23Bot ef somebody doubt een e haat wen e da nyam some kind ob food, den e been condemn, cause e ain bleebe e da do right. Ef we do sompin wa we ain bleebe right, dat da sin.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel