We Mus Please We Christian Bredren
1We wa stan scrong een God way oughta beah op wid dem wa ain scrong yet een de way. We mus dohn do jes wa we wahn fa wesef.
2Ebry one ob we mus please we Christian bredren, da do wa good fa dem fa hep um stan mo scronga een de way.
3Eben Christ ain been do all wa e do jes fa please esef. Dey write een God Book say, “People been sult ya, bot wa dey say da sult me too.”
4Ebryting wa been write down een God Book way back dey, dat been write down fa laan we, so dat we kin look fowaad ta wa gwine come. Cause God Book da courage we an gii we hope.
5An A pray dat God wa da courage people an mek um able fa beah wa come, mek oona able fa gree togeda an lib peaceable cause oona waak togeda een de way ob Christ Jedus.
6So dat oona all togeda wid one haat gwine praise God, de Fada ob we Lawd Jedus Christ.
De Good Nyews de Same fa de People wa Ain Jew
7So oona mus gii haaty welcome ta one noda an cept um een ya haat, jes like Christ welcome an cept oona, so dat people gwine praise God.
8Cause A da tell oona say, Christ come fa saab de Jew people, fa sho dat God da do wa e say e gwine do. Fa true, e gwine do wa e promise we ole people leada dem, Abraham, Isaac an Jacob.
9An Christ come, too, fa mek de people wa ain Jew praise God cause e hab mussy pon um. Like dey write een God Book weh dey taak ta God say, “So den, A gwine praise ya mongst all de nation dem. A gwine sing praise ta ya name.”
10An dey write gin een God Book say, “Oona wa ain Jew, oona oughta praise God long wid de Jew dem, de people wa God done pick!”
11An dey write gin say, “Oona all wa ain Jew, oona oughta praise de Lawd. Leh all people praise um!”
12An Isaiah, too, say, “One poson fom Jesse fambly line gwine come. God gwine mek um rule oba all de nation dem, an dey gwine pit dey hope een um.”
13A pray dat God wa da mek we hab hope, mek oona full op wid all joy an peace as oona da trus een um, so dat de powa ob de Holy Sperit gwine mek oona look fowaad mo an mo ta wa God gwine do.
Paul Wok fa Christ Mongst de People wa Ain Jew
14Me Christian bredren, A feel sho bout oona, dat oona good people. Oona know all wa oona need fa know, an oona able fa laan one noda.
15Stillyet, een dis letta A ain hide nottin. A memba oona gin bout some ob de ting dem wa A beena tell oona bout. A ain hide nottin, cause God gii me dis special wok fa do.
16E sen me fa wok fa Jedus Christ mongst de people wa ain Jew. E mek me fa wok like a priest fa tell dem people de Good Nyews wa God gii we, so dat dem wa ain Jew kin bleebe pon Christ an stan like a offrin wa please God. De Holy Sperit mek dey haat clean an mek um God own people.
17So cause A one wid Jedus Christ, A kin be proud ob me wok fa God.
18A ain gwine taak bout nottin bot wa Christ mek me able fa say an do, fa bring dem people wa ain Jew fa saab God.
19E God Sperit wa gii me de powa fa do de miracle an sign dem wa A done. So, wiles A da trabel fom Jerusalem all de way roun ta de province ob Illyricum, A done beena tell people de Good Nyews bout Christ.
20A jes wahn fa tell de Good Nyews weh de people ain neba yeh bout Christ yet. Dat way, A ain gwine do wa noda poson done been staat fa do, like a man wa build a house pon a foundation wa noda man done pit down.
21Steada dat, e stan like dey write een God Book weh dey say, “De people dem wa nobody ain neba tell bout Christ, dey gwine see. An dem wa ain neba yeh bout um yet, dey gwine ondastan.”
Paul Plan fa Come ta Rome
22Cause ob dis wok, plenty time wen A beena wahn fa come fa see oona, A ain been able fa come.
23Bot now dat dey ain no mo place yah weh dey ain yeh bout Christ, an cause A beena wahn fa a long time fa come see oona,
24A plan fa come ta oona. A look fowaad fa see oona wen A pass by dey pon me way ta Spain. An A like fa hab oona hep me go dey, atta A da wisit dey wid oona fa a leetle wile.
25Bot now, A da gwine ta Jerusalem fa hep God people dey.
26Cause de choch memba dem een Macedonia an Achaia beena wahn fa gii some money ta God people een Jerusalem wa ain got nottin.
27Dem memba mek op dey mind fa do dat. An fa true, dey oughta hep dem wa ain got nottin dey een Jerusalem. Cause de people wa ain Jew beena git dey paat een God blessin fom de Christian Jew dem wa beena tell um de Good Nyews. So den, de Christian dem wa ain Jew oughta hep de Christian Jew dem an bless um wid money an oda ting dey need fa lib.
28Wen A done dat wok een Jerusalem, wen A done gim all de money wa de people een Macedonia an Achaia done geda fa um, den A gwine lef dey an come see oona as A pass by pon me way ta Spain.
29A know dat wen A come ta oona, A gwine come full op wid blessin wa Christ gii me fa oona.
30Me Christian bredren, cause ob we fait een we Lawd Jedus Christ an de lob wa God Sperit pit een we haat, A da beg ya fa jine wid me fa pray ta God fa me wid all ya haat.
31Pray dat de people een Judea wa ain bleebe pon Jedus ain gwine do me no haam, an dat God people een Jerusalem gwine be heppy fa wa A gwine do fa um.
32Pray fa dem ting, so dat ef God wahn um fa be, A gwine come ta oona wid joy een me haat, an A gwine spen some time dey wid oona, as we courage one noda togeda.
33A pray dat God, wa da gii we peace, be wid all ob oona! Amen.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel