Christ Done Broke Sin Powa
1So den, wa we gwine say? Fa true, we mus dohn keep on da sin so dat God gwine keep on da bless we mo an mo, ainty?
2Fa sho, we mus dohn go on een we sinful way no mo! Ta we wa trus een Christ Jedus, e jes like we ole life done dead. Sin ain got no mo powa fa rule oba we, so how we gwine keep on da sin?
3Oona know fa true dat wen dey bactize we, dat mek we one wid Christ Jedus, an we been dead like Jedus been dead.
4So den, wen dey bactize we, we been dead wid Christ Jedus. An dey bury we wid um, so dat jes like we Fada been nyuse e great powa fa mek Christ Jedus lib gin, same way so e nyuse e powa so dat we, too, kin lib a nyew way ob life.
5Cause jes like we come fa be one wid Christ Jedus wen we been dead like e been dead, same way so, fa sho, we gwine be one wid um wen God mek we git nyew life jes like e gii Christ nyew life wen e mek um git op fom mongst de dead people.
6We know fa true dat de life wa we beena lib fo dat, e done dead, de same time wen dey kill Christ pon de cross, so dat de powa ob sin wa beena rule we life kin be stroy. We ain haffa be no slabe ta sin no mo.
7Cause wen somebody done dead, sin ain got no powa oba um no mo.
8Ef we dead wid Christ, we bleebe dat we gwine lib wid um too.
9Cause we know dat God done mek Christ git op fom mongst de dead people an lib gin, so e ain neba gwine dead no mo. Det ain got no powa oba um no mo.
10Wen Christ dead, e broke de powa ob sin faeba. An now de life e da lib, e da lib fa please God.
11Same way so, ya mus look pon yasef jes like ya done dead, so dat sin ain got no powa fa rule obaya no mo. An ya mus lib now fa please God, cause ya one wid Christ Jedus.
12So den, ya mus dohn leh sin rule no mo oba ya body wa gwine dead, so dat ya ain gwine do no bad ting wa ya haat tell ya fa do.
13Ya mus dohn sin wid no paat ob ya body fa do wickity ting. Steada dat, ya mus gii God all paat ob ya life, like people oughta do wa done dead bot wa God done gii nyew life ta. Ya mus gii God all ya life so dat e gwine mek ya do wa right.
14Sin mus dohn rule oba ya life, cause ya ain lib onda de law no mo. Ya da lib onda God blessin.
Free fom Sin fa Saab God
15So den, wa we gwine do? Fa true, we mus dohn keep on da sin jes cause we da lib onda God blessin now an we ain lib onda de law no mo, ainty? Fa sho we mus dohn keep on da sin!
16Fa sho, oona know dat ef ya gii yasef fa be slabe ta somebody, fa do all wa dat poson tell ya fa do, dat mean fa say ya dat poson slabe fa true, ainty? Same way so, ef ya gii yasef fa be slabe ta sin, fa do wa e say, dat sin gwine mek ya dead. Bot ef ya gii yasef fa be slabe ta God, fa do wa e say, God gwine mek all ting right tween esef an oona.
17Bot we tell God tankya, cause eben dough oona nyuse fa be slabe ta sin, now oona set ya haat fa do all dem true ting wa dey beena laan oona bout God.
18God done set oona free fom de powa ob sin, an now ya done come fa be slabe fa God, an lib fa um.
19A da taak dis way ta oona bout slabe an massa dem, cause dat mo easy fa people fa ondastan. Oona nyuse fa gii all paat ob oona life fa be slabe fa do mo an mo ob all kind ob wickity an dorty ting wa been dey een ya haat. Same way so, now ya mus pit ebry paat ob ya life straight wid God, fa lib like e people fa true.
20Wen oona been slabe ta sin, ya ain been boun fa do wa God been wahn ya fa do.
21Wa payback ya been git wen ya beena do dem ting dat ya shame ob now? Fa true, det de payback dat dem ting bring!
22Bot now God done set ya free so dat sin ain rule oba ya no mo. Oona God slabe now. Oona done gii God all oona life fa lib fa um fa true. An dat life gwine las faeba an eba. Dat de payback ya git!
23Cause det de payback ob sin, bot life dat las faeba an eba God gii we fa free. We git dat life wen we come fa be one wid Christ Jedus we Lawd.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel