Alkitab Mobile SABDA
[VER] : [GULLAH]     [PL]  [PB] 
 <<  Roma 7 >> 

We Ain Bine Op ta de Law No Mo

1Me Christian bredren, A know fa sho dat oona gwine ondastan wa A gwine taak bout, cause oona know de law. De law got powa oba a poson long as dat poson da lib.

2A gwine tell oona wa dat like. E like weh de law say a marry ooman mus lib wid e husban long as e da lib. Bot ef e husban done dead, den de ooman done free fom dat marry law.

3So den, ef de ooman go lib wid noda man wen e husban ain dead, people gwine say dat ooman dey da lib een sin cause e done broke de marry law. Bot ef e husban done dead, de ooman free fom dat law an e kin go marry noda man. An ef e do dat, e ain da lib een sin tall.

4Me Christian bredren, dat de same way fa oona, cause oona done dead ta de Law too. E ain got no powa oba oona, cause oona done dead ta de Law wen oona done dead wid Christ pon de cross. Now oona blongst ta Christ, wa God done mek git op fom mongst de dead people an lib gin. An cause ob dat, we kin do good wok wiles we da saab God.

5Wen we beena do jes waeba we haat tell we fa do, we beena folla wa we wahn een we sinful haat, wa de Law beena stir op, fa do plenty bad ting. An dem bad ting yah wa we beena do, dey beena kill we.

6Bot now we free fom de Law. Cause we done dead wid Christ an de Law wa nyuse fa keep we all tie op like prisona, dat Law ain got no mo powa oba we. We ain saab God een de ole way, wa dey been write down een de Law fa tell we wa fa do. Now we da saab God een de nyew way dat God Holy Sperit da hep we lib.

De Law Show We Sin

7Well den, wa we fa say? De Law sin? No, de Law ain sin tall! A ain been fa know wa sin da, ef de Law ain show me. A ain been fa know dat e ain right fa cobish ef de Law ain been say, “Ya mus dohn cobish nottin.”

8Wen de Law say A mus dohn cobish, sin been git e chance fa mek me wahn all kind ob ting dat ain blongst ta me. A cobish um. Ef dey ain no law, sin ain got no powa. E jes like e dead.

9A nyuse fa lib dout know wa de law say. Bot wen A come fa know de law, dat show me wa ting A haffa do an wa ting A mus dohn do, an dat mek me wahn fa sin bad.

10Cause ob dat, A been like somebody wa done dead een sin. So de law wa been fa mek me git life, e mek det come pon me.

11De law gii sin e chance an e ceebe me. An e been de law dat sin tek fa kill me.

12So den, de Law come fom God. E holy. An wa de Law tell we fa do, dat holy, an e right fa we fa do, an e good fa we.

13Dat mean fa say dat de Law, wa good, mek me dead? Fa sho, de Law ain neba do dat! Sin done um. Sin tek de Law, wa good, fa kill me, so dat people gwine know jes wa sin da. An cause de Law say we mus dohn sin, dat mek sin wossa.

De Fight Wa Dey Eenside We

14We know dat de Law come fom God, bot A a poson wa slabe ta sin.

15De ting dem wa A da do, A ain ondastan. A ain do wa A wahn fa do. Steada dat, A da do de ting dem wa A hate fa do.

16Wen A da do wa A ain wahn fa do, dat show dat A gree dat de Law right.

17So now, A by mesef ain do dem ting yah. Sin wa dey een me haat da mek me do um.

18Cause A know dey ain nottin good da lib een me--A mean fa say, een me haat wa wahn fa sin. Cause eben dough A kin wahn fa do good, A ain able fa do um.

19A ain do de good A wahn fa do. An de bad A ain wahn fa do, dat wa A da do.

20So ef A da do de ting dem wa A ain wahn fa do, dat mean fa say dat by mesef, A ain da do um, bot de sin wa da lib een me, e da mek me do um.

21So den, A find dat dis de ting een me life. Wen A wahn fa do right, ebil dey wid me.

22Een me haat, A heppy fa true wid de law wa come fom God.

23Bot A see dat de law wa me body da folla, e diffunt. E da fight ginst de law wa me mind tell me say, dat de right one. Dat mek me like a prisona ta de law wa me body da folla, wa da mek me sin.

24A saary fa true! Who dat gwine set me free fom wa dis body wahn me fa do, dis body wa da mek me dead?

25A tell God tankya! We Lawd Jedus Christ, e able fa set we free fom wa dis body wahn we fa do! So dat de way ting da gwine wid me. Een me mind A wahn fa do wa God Law say, bot een me body, A da folla de law ob sin.



 <<  Roma 7 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran