Hallelujah!
1Wen dat angel wa got heapa powa been done, A yeh sompin like loud shoutin ob a heapa dem wa een heaben say, “Hallelujah! Leh we praise God! We God de one wa done sabe we. E got glory an e got powa mo den all!
2E da taak true all de time, an e da jedge scraight! E done condemn dat free ooman wa all people know bout, dat wid e free life e done been mek de people ob de wol sin real bad an God done punish um, cause e done been kill dem do e wok.”
3Den A yeh dem een heaben shout gin say, “Hallelujah! Leh we praise God! De smoke wa da come outta de fire wa da bun Babylon gwine go op faeba an eba.”
4Den de twenty-fo elda an dem fo ting wa got life, dey git down fo God, wa seddown pon de trone. An dey woshup um say, “Amen, Hallelujah!”
De Marry Feas ob de Lamb
5Den A yeh a boice come fom de trone say, “Oona all wa da wok fa God an oona all wa gim hona, oona wa de mos small ta oona way big mo den all, leh we all praise we God!”
6Den A yeh sompin like loud shoutin ob a big crowd, like wen heapa big wata da ron fast an like wen tunda da crack loud. Dem boice yah beena say, “Hallelujah! De Lawd we God wa got powa mo den all, e da rule!
7Leh we rejaice an be glad. Leh we praise um an gim glory! Cause de time fa de Lamb weddin done come, an e bride done git ready fa um.
8Dey gii e bride fine linen an bright shinin cloes fa weah.” (De fine linen da show dat God people da waak scraight.)
9Den de angel tell me say, “Write dis ting yah! Dey bless fa true, dem wa been call fa go nyam ta de marry suppa ob de Lamb.” Den de angel tell me say, “Dem wod yah dey de true wod wa God tell.”
10Den A git down een front ob dat angel foot fa woshup um. Bot e tell me say, “Mus dohn do dat! A God saabant jes like ya an ya broda dem, all dem wa bleebe de true wod wa Jedus tell we! Ya mus woshup God!”
John See Poson wa da Ride a White Hoss
11A see a door een heaben wa been open op, an a white hoss da stanop dey. De poson wa da ride um been name “De One wa we Kin Trus an De One wa da Taak True.” E da jedge scraight.
12E eye been red like a blazin fire, an heapa crown been dey pon e head. One name been write pon um, bot ain nobody cep um know wa dat name da.
13Dey done beena pit de cloes wa e weah eenta blood. E name “De wod ob God.”
14Heaben aamy dem beena folla um. Dey beena ride white hoss an dey beena weah clean shinin linen too.
15E beena hole one swod een e mout, wa e gwine tek fa fight dem nation wid, an e gwine win out oba um. E gwine tek a iron staff fa rule dem wid. An e gwine squeeze out de wine een de winepress, wa gwine show dat God, wa got powa mo de all, bex fa true.
16One name been write pon e cloes an pon e leg, dat say, King wa da rule oba all dem king, an Lawd oba all dem lord.”
17Den A see one angel stanop weh de sun dey, da holla loud ta all dem bod wa da fly op high, an e tell um say, “Oona come geda togeda fa nyam de big suppa wa God done mek!
18Oona come so dat oona kin nyam dem king, dem captain, an dem big man, dem body. oona come nyam dem hoss dem body, an dem wa da ride dem too. Come nyam all people dem body. Nyam dem slabe an dem freeman, all dem wa de mos small ta dem wa big mo den all, dem body.”
19Den A see de beast an dem king ob de wol wid dem aamy. Dey beena geda togeda fa mek waa ginst de one wa beena ride de hoss an ginst e aamy.
20Bot dey ketch de beast an dat wa say e God prophet, bot e ain. E de one wa done beena do dem miracle een front ob de beast. Wid dem miracle dat man beena ceebe dem people wa been git de maak ob de beast an wa beena woshup e statue. De beast an dat man wa say e a prophet, bot e ain, bof ob dem been troway wiles dey still da lib. Dey been troway eenta de lake wa full op wid fire bunin wid sulfa.
21Den de odares ob de aamy been kill by de swod wa de poson wa beena ride de hoss been hole een e mount. All de bod come nyam dey body. Dey name um op til dey been full op fa true.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel