Alkitab Mobile SABDA
[VER] : [GULLAH]     [PL]  [PB] 
 <<  Yohanes 13 >> 

Jedus Wash E Ciple dem Foot

1De time ob de Passoba Feas come close, an Jedus been know de time come fa e fa leabe dis wol an gone back ta de Fada. Fom de fus, Jedus beena lob e own people een de wol, dem wa bleebe pon um. Now e da show um fa true hommuch e da lob um.

2Een de ebenin, Jedus an e ciple dem beena nyam. De Debil done pit eenta Judas haat dat e oughta ton Jedus een ta dem wa been ginst um. Dis Judas yah been Simon Iscariot chile.

3Jedus beena know dat de Fada done gim all powa fa win out oba ebryting. E beena know dat e come fom God an e da gwine back ta God.

4So Jedus git op fom de table weh dey been seddown da nyam. E pull off e robe wa e weah oba e oda cloes, an tie a towel roun e wais.

5Den e pit wata een a basin an staat fa wash e ciple dem foot, one by one. E dry um wid de towel wa beena tie roun e wais.

6Wen Jedus come ta Simon Peter, Peter aks Jedus say, “Lawd, ya da come fa wash me foot?”

7Jedus ansa um say, “Ya ain ondastan wa A da do now. Bot ya gwine ondastan um by an by.”

8Simon Peter tell Jedus say, “No, ya ain neba gwine wash me foot!” Jedus ansa say, “Ef A ain wash ya foot, ya ain got no place wid me.”

9So Simon Peter tell Jedus say, “Well den, Lawd, ef dat so e stan, mus dohn wash jes me foot. Mus wash me han an me head too!”

10Jedus ansa um say, “De one wa done wash e body ain need fa wash e body gin, cause e done clean all oba. E jes need fa wash e foot, wa done git dorty gin. Oona clean, bot all ob oona ain clean.”

11Jedus done beena know who dat gwine ton um een ta dem wa been ginst um. Dat mek um say, “Oona clean, bot all ob oona ain clean.”

12Wen Jedus done wash all de ciple dem foot, e pit on e robe gin oba e oda cloes. Den e gone an seddown gin ta de table weh e beena nyam. E aks e ciple dem say, “Oona ondastan wa A jes done ta oona?

13Oona da call me Teacha an Lawd, an oona right wen oona say dat, cause dat wa A da.

14Now den, A, oona Lawd an Teacha, done wash oona foot. Same fashion, oona oughta wash one noda foot.

15A done do dat fa show oona wa oona oughta do, so dat oona gwine do de same ting.

16A tell oona fa true, ain no saabant wa mo betta den e massa, an ain no messenja wa mo greata den de one wa sen um.

17Now dat oona know dat, oona gwine be heppy fa true ef oona do dat jes like A done tell oona fa do.

18“A ain da taak bout all ob oona. A know dem wa A done pick. Bot wa dey done write een God Book haffa happen. Dey write say, ‘De one wa done beena nyam me bread done ton ginst me.’

19A da tell oona now wa gwine happen, so dat wen e happen, oona gwine bleebe A da who A da.

20A tell oona fa true, whosoneba gii haaty welcome ta de one wa A sen, dat poson da gii haaty welcome ta me too. An whosoneba gii haaty welcome ta me, dat poson da gii haaty welcome ta de one wa sen me.”

Jedus Tell wa Gwine Happen

21Wen Jedus done say dat, e haat been hebby. An e taak plain say, “A tell oona fa true, one ob oona gwine ton me een ta dem wa ginst me.”

22De ciple dem been bumfumble. Dey keep on da look at one noda, cause dey ain know wish one ob dem Jedus da taak bout.

23One ob e ciple dem, wa Jedus lob a whole heap, e beena seddown close ta Jedus.

24Simon Peter mek sign ta dat ciple wa close ta Jedus an say, “Aks um wish one e da taak bout.”

25So dat ciple moob mo close ta Jedus, aks um say, “Lawd, who dat ya da taak bout?”

26Jedus ansa say, “A gwine dip dis piece ob bread eenta de sauce an gim ta um. Dat de man.” So Jedus dip de piece ob bread eenta de sauce an gim ta Judas, Simon Iscariot chile.

27Jes wen Judas done tek dat bread, Satan gone eenta e haat. Jedus tell Judas say, “Wa ya gwine do, go do um quick!”

28None ob de oda ciple dem wa beena seddown ta de table fa nyam wid Jedus ain ondastan hoccome Jedus tell Judas dat.

29Since Judas beena keep de money bag fa um, some tink Jedus done tell Judas fa go buy ting wa dey need fa de Passoba Feas, o dey tink Jedus done tell Judas fa go gii sompin ta de po people.

30Jes wen Judas done tek de bread, e lef an gone out quick. An e been already daak.

De Nyew Chaage wa Jedus Gii

31Atta Judas done gone, Jedus tell de oda ciple dem say, “Now God gwine show de people de glory ob de Man wa Come fom God. An God gwine nyuse de Man wa Come fom God fa show God glory.

32An ef de Man wa Come from God show de people God glory, den God gwine show de glory ob de Man wa Come fom God. An God gwine do dat now.

33Me chullun, A ain gwine stay yah wid oona much longa. Oona gwine look fa me, bot A da tell oona same wa A done tell dem Jew leada, ‘Oona cyahn go ta de place weh A da gwine.’

34An now A da gii oona a nyew chaage. Oona mus lob one noda. A beena lob oona same fashion oona mus lob one noda.

35Ef oona da lob one noda, ebrybody gwine know dat oona me ciple dem.”

Jedus Say Peter Gwine Say E Ain Know Um

36Simon Peter aks Jedus say, “Lawd, weh ya da gwine?” Jedus ansa say, “Oona cyahn folla me now an go weh A da gwine. Bot atta a wile, ya gwine folla me dey.”

37Peter aks Jedus say, “Lawd, hoccome A cyahn folla ya dey now? A ready fa gii me life fa ya!”

38Jedus ansa say, “Ya ready fa gii ya life fa me, fa true? A da tell ya, fo de roosta crow demarra maanin, shree time ya gwine say ya ain know me.”



 <<  Yohanes 13 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran