Alkitab Mobile SABDA
[VER] : [KAILI_DAA]     [PL]  [PB] 
 <<  Matius 26 >> 

1Sangga naopupa Yesus nompatuduki etu pura-pura nangulimo I'a ka anaguru-anaguruna,

2"Ninjani komimo damo nepua Eo Bete Paska. Pade Aku, Ana nu Manusia kana rawai ka baliku ala rapaku ri kayu parika."

3Tempo etu nasiromumo balengga-balengga topanggeni agama bo totu'a-totu'a nto Yahudi ri sapo nu Balengga Topanggeni Agama to nosanga ka i Kayafas.

4Ira nasintuwu manjoko Yesus nggalino pade mompatesi I'a.

5Tapi nanguli ira samba'a ka roana, "Ne'e kita mowia etu tempo Eo Bete ala ne'e majadi kakanano ri tatongo ntau dea."

6Tempo Yesus ante anaguru-anaguruna naria ri ngata Betania ira nesai ri sapo ntau nosanga ka i Simon to naju'a bete bopia.

7Tempo ira ri setu naratamo samba'a besi nanggeni saongu botolo nipowia nggari watu to niisi minya wongi to nasuli mpu'u olina. Tempo Yesus nekatoko nanggoni naratamo besi etu nombatoli minya wongi etu ri balengga Yesus ewa tandai pebilana ka I'a.

8Tapi sangga nanggita powia besi etu naraumo rara anaguru-anaguru Yesus. Ira nanguli, "Nokuya minya wongi etu aga nipakarugi sinja'i?

9Kakonona minya wongi etu mamala rapobalu ante olina to nadea pade doi olina rawai ka tau-tau nakasiasi!"

10Yesus nangginjani pompekiri ira, jadi niulina ka ira, "Nokuya komi nompakasusa besi e'i? Nuapa to nipowiana ka Aku nabelo.

11Tau-tau nakasiasi bate-batena maria ri tatongo komi, tapi Aku da'a batena mosanggani ante komi.

12Ante nombatoli minya e'i ri ja'iku i'a nompakasadia koroku ratana banepia.

13Aku mpu'u-mpu'u notesa ka komi, ri umba-umba ri dunia Kareba Belo rapatolele, powia nu besi e'i kana ratesa wo'u ala mombatora i'a."

14Naopu etu samba'a nggari sampulu romba'a anaguru Yesus to nosanga ka Yudas Iskariot nalau mpaka ri ja'i balengga-balengga topanggeni agama

15pade niulina, "Ane aku mombawai Yesus riara mpale komi, nuapa rawai komi ka aku?" Nangepe etu ira nombawai ka i'a tolumpulu mpeka doi salaka.

16Pade nompamula nggari tempo etu Yudas nangelo loga to nabelona mombawai Yesus riara mpale balina.

17Ri eo pamulana Posusa Roti Da'a Nidika Ragi naratamo anaguru-anaguru Yesus nompekutana I'a, "Guru, ri umba peto'o mupokono rakalau kami ala mompakasadia panggoni Posusa Paska ka Komi?"

18Nesonomo I'a, "Kalaumo komi mpaka ri ngata Yerusalem ri ja'i yanu, pade ulimo ka i'a iwe'i: 'Guru nanguli, mana masaeka Aku ri se'i. Aku madota mantuki Eo Bete Paska ri sapomu mpasanggani-nggani ante anaguru-anaguruku.'"

19Pade nalaumo anaguru-anaguruna nompowia ewa to nipakau Yesus ka ira, pade nipakasadia iramo panggoni Posusa Paska.

20Tempo nawengimo nekatokomo Yesus nanggoni mpasanggani-nggani ante sampulu romba'a anaguruna.

21Tempo ira nanggoni nangulimo Yesus, "Aku mpu'u-mpu'u notesa ka komi, samba'a nggari tatongo komi kana mompobalu Aku ka baliku."

22Nangepe etu nasusa mpu'umo rara ira, pade nekutanamo ira samba'a bo samba'a ka I'a, "Pue, da'a aku e'i to nipatujumu?"

23Nesonomo Yesus, "Tau to mombatome roti riara tubu mpasanggani-nggani ante Aku, i'amo to mompobalu Aku.

24Aku, Ana nu Manusia kana mamate ewa to nitulisi riara Buku Nagasa. Tapi mandasa mpu'umo tau to mompobalu Aku etu! Nabelopa ane tau etu da'a niote ri dunia."

25Naopu etu nekutanamo Yudas to mompobalu Yesus ngina, "Guru, da'a aku e'i to nipatujumu?" Nesonomo Yesus, "Iwetu pangulimu."

26Tempo ira nanggoni Yesus nangala roti pade nanguli tarima kasi ka Alatala. Naopu etu nibingga-binggana roti etu pade niwaina ka anaguru-anaguruna ante nanguli, "Alamo roti e'i, pade konimo. E'imo koro bataku."

27Naopu etu nialana wo'u saongu sanggiri panginu, niulina tarima kasi ka Pue Alatala, pade niwaina ka ira ante nanguli, "Inu komi puramo panginu e'i,

28sabana e'imo leiku to rapatiti ka tau dea ngina ala mompakaasa Pojanji Alatala ante manusia. Leiku e'i rapatiti ka tau dea ala silaka-silaka ira mamala raampungi.

29Parasayamo tesaku e'i. Nompamula we'i-we'i Aku mana manginu anggur sampe marata tempona banepia Aku manginu anggur to nabouna mpasanggani-nggani ante komi riara Poparenta Umaku."

30Naopupa ira nodade nombatoiya Alatala nalaumo ira mpaka ri Bulu Zaitun.

31Pade nangulimo Yesus ka anaguru-anaguruna, "Wengi e'i komi pura-pura kana mokanggaura momparasaya tempo manggita nuapa to majadi ri ja'iku, sabana naria Tesa Alatala to nitulisi riara Buku Nagasa iwe'i: 'Aku kana mompatesi topoewu sampe bimba-bimbana mosimpotatare.'

32Tapi tempo Aku matuwu bali aku mokolu ka komi mpaka ri Bagia Galilea."

33Nangepe etu nangulimo i Petrus, "Naupa ira pura-pura mokanggaura momparasaya tempo manggita nuapa to majadi ri ja'imu, aku e'i da'a!"

34Tapi nangulimo Yesus ka i'a, "Aku mpu'u-mpu'u notesa ka iko, wengina e'i wo'u da'apa manu mora'o, tolungganimo iko mombasapu Aku."

35Nesonomo i Petrus, "Nau aku mamate mpasanggani ante Komi aku da'a ntoto mombasapu Komi!" Pade iwetu wo'u to niuli pura-pura anaguruna ntanina.

36Naopu etu naratamo Yesus ante anaguru-anaguruna ri saongu peto'o to nosanga ka Getsemani. Narata ri setu nangulimo I'a ka ira, Pekatokomo ri se'i. Aku malau ri sa'a mosambaya."

37Nikenina Petrus bo romba'a ana i Zebedeus mpasanggani-nggani. Pade nompamulamo I'a nasusa bo nandasa rarana.

38Niulina ka ira, "Nasusa mpu'umo raraku, ewa mamate nirasaiku! Popeamo ri se'i, pade komi kana mainga-inga mpasanggani-nggani ante Aku!"

39Naopu etu napolamo Yesus sakedi pade nekadede I'a sampe ri tana pade nosambaya. Niulina, "Uma, ane mamala kuperapi ala kasusa bo kapari e'i ne'e rapawela ka Aku e'i. Tapi ne'e dotaku majadi, aga dotamu mboto!"

40Naopu etu nanjilimo I'a ri ja'i anaguruna tolumba'a etu. Niratana ira pura-pura napisi. Pade niulina ka i Petrus, "Kitamo! Da'a nipakule komi mosanggani ka Aku nau aga sajaa?

41Komi kana mainga bo mosambaya ala ne'e komi mawela pesoba! Riara nta'imu naria dota mompowia to nabelona, tapi koromu da'a nompakule."

42Naopu etu nalau wo'umo Yesus njamba'ana karongganina nosambaya. Niulina, "Uma, ane kasusa bo kapari e'i kana rapawela ka Aku pade da'a namala rapakakawao nggari ja'iku, pakambamo dotamu majadi."

43Naopu etu narata wo'umo I'a ri ja'i anaguruna. Niratana ira aga napisi wo'umo sabana naluru mpu'u mata ira.

44Pade sangganipa wo'u I'a nompalasi ira pade nalau nosambaya katolungganina. Posambayana nasimbayu ante posambayana pane'a.

45Naopu nosambaya narata wo'umo I'a ri ja'i anaguruna pade niulina ka ira, "Iwenumo? Danapisi bo nangosaraka komi? Kitamo! Naratamo tempona Aku, Ana nu Manusia rawai riara mpale tau-tau nasilaka.

46Pembangumo! Kitamo! Naratamo tau to nompobalu Aku! Kamaimo kita mantomunaka i'a."

47Tempo Yesus danotesa naratamo Yudas, samba'a nggari sampulu romba'a anaguruna. Pade nosanggani ante i'a naria tau dea nanggeni guma bo pato to nipakau balengga-balengga topanggeni agama bo totu'a-totu'a nto Yahudi.

48Da'apa ira nomai Yudas nompakatantu ka ira tandaina ala ranjani ira ri umbana Yesus. Niulina, "Isema ngina kueki, etumo I'a. Soko komimo I'a!"

49Jadi sangga naratapa Yudas ri setu i'a kaliu-liu nompakamosu Yesus pade nanguli, "Tabe, Guru!" Pade niekina Yesus.

50Nangulimo Yesus ka i'a, "Umba wega, etumo patujumu nomai ri se'i?" Pade kaliu-liu tau dea etu nompakamosu Yesus pade nanjoko I'a.

51Nanggita etu samba'a nggari anaguru to nosanggani ante Yesus nangosu gumana nantimbe batua nu Balengga Topanggeni Agama sampe napudu talingana.

52Nangulimo Yesus ka anaguruna etu, "Boli mpanjilimo gumamu ri peto'ona! Sabana isema-sema mantimbe ante guma kana mamate ratimbe ante guma wo'u.

53Iwenumo? Da'a ninjanimu ane Aku merapi tulungi nggari ja'i Umaku I'a nasalisa mompakau njobu-njobu malaekana mantulungi Aku?

54Tapi ane etu majadi da'a madupa tesa to nitulisi riara Buku Nagasa nggaolu to nanguli e'i pura-pura kana majadi ri ja'iku."

55Pade ri tempo etu nangulimo Yesus ka tau dea ri setu, "Iwenumo? Niuli komi Aku e'i samba'a parampo sampe komi kana marata ante guma bo pato manjoko Aku? Eo-eo Aku nekatoko nopaguru ri Sapo Mpepue. Nokuya komi da'a nanjoko Aku tempo etu?

56Tapi pura-pura etu kana majadi ala madupa tesa to nitulisi nabi-nabi nggaolu ri Buku Nagasa." Naopu etu nalaimo pura-pura anaguruna nompalasi I'a.

57Pade ira to nanjoko Yesus nanggeni I'a mpaka ri sapo nu Balengga Topanggeni Agama to nosanga ka Kayafas. Tempo etu guru-guru agama bo totu'a-totu'a nto Yahudi nasiromu nolibu ri setu.

58Petrus nantuki ira nggawao sampe narata ri lalowo sapo Balengga Topanggeni Agama. Narata ri setu nesuamo i'a nekatoko mpasanggani-nggani ante topojaga-topojaga sabana i'a madota mangginjani nuapa majadi ante Yesus.

59Tempo etu balengga-balengga topanggeni agama bo pura-pura Topolibu Bete Agama nto Yahudi etu nompasimbuku mangelo tau modawa mompakanoto kasala Yesus ala I'a mamala rasuku mamate.

60Tapi naupa nadea tau narata nodawa ala mombanawusaka I'a da'a ria nirata ira kasalana. Kaopuna naria romba'a tau nantingayo Polibu Bete etu

61pade nanguli, "Naria sanggani tau e'i nanguli iwe'i: 'Aku nompakule mombagero Sapo Mpepue e'i pade mombabangu mpanjili sapo etu riara tolumbengi.'"

62Naopu etu nekanggoremo Balengga Topanggeni Agama nanguli ka Yesus, "Iwenumo? Naria pesonomu ewa tesa-tesa nu sabi e'i to nanguli Komi atau da'a?"

63Tapi naupa da'a ria salana Yesus aga nekalino. Pade sangganipa Balengga Topanggeni Agama nanguli ka I'a, "Ante sanga Alatala to Natuwuna, aku nompakau Iko ulimo ka kami ane Iko Magau to Mompakasalama, Ana nu Alatala!"

64Nesonomo Yesus, "Ewa niuli komi nakono. Pade kuuli ka komi, kana marata tempona banepia komi kana manggita Aku, Ana nu Manusia mekatoko ri sabingga nggana nu Alatala to Nakuasana. Pade komi kana manggita Aku mana'u nggari langi riara kulimu."

65Nangepe etu Balengga Topanggeni Agama nombaseri pakeana tandaina narau mpu'u rarana. Pade niulina ka Topolibu Bete, "I'a nompakakedi Alatala! Rapokuya kita mangelo sabi-sabi ntanina? Niepe komi mbotomo tesana nompakakedi Alatala!

66Iwenu pombarata komi?" Nesonomo ira Topolibu Bete, "I'a masipato rasuku mamate!"

67Naopu etu tau-tau ri setu nantailu lenje Yesus pade nombajaguru I'a. Naria sanupa to nanjapa I'a

68ante nanguli, "E, Magau to Mompakasalama, ulimo sema nombasapa Iko!"

69Tempo etu i Petrus nekatoko ri sawalikuna ri lalowo sapo etu. Tempo i'a ri setu samba'a batua besi nompakamosu i'a pade nanguli, "Iko wo'u samba'a tau nosanggani ante Yesus to Galilea etu!"

70Tapi Petrus nesapu ri ngayo ira pura-pura, "Da'a nakono! Da'a ninjaniku patuju tesamu!"

71Naopu etu Petrus nalau ri pewobo wala lalowo. Ri setu samba'a batua besi ntanina nanggita i'a pade nanguli ka tau-tau ri setu, "Tau e'i wo'u nosanggani-nggani ante Yesus to Nazaret etu."

72Tapi Petrus nesapu wo'umo ante metunda, "Da'a ninjaniku tau etu!"

73Da'a nasae kaolona tau-tau to nenggore ri setu nompakamosu Petrus pade nanguli ka i'a, "Natantumo iko samba'a roana, sabana nanoto nggari tesamu iko wo'u to Galilea!"

74Pade nompamulamo Petrus netunda bo nojanji. Niulina, "Da'a ntoto ninjaniku tau etu!" Pade iwetu Petrus notesa kaliu-liu nora'omo manu.

75Nangepe etu natetoramo rarana ewa tesa Yesus pane'a to nanguli, "Da'apa manu mora'o ngina, tolungganimo iko mombasapu Aku." Pade nesuwumo Petrus nggari setu nalau nageo nakanjodu-njodu ante nasusa mpu'u rarana.



 <<  Matius 26 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel