Hak dingen tanggung jawab rasul
1Ma bebas kin aku? Ma rasul kin aku? Ma nggo kin pernah kuidah Jesus Tuhanta? Ma kin kam nge bekas dahinku i bas Tuhan?
2Amin la gia iakui kalak si deban aku rasul, kam tentu iakuindu nge! Kam me desken materai si mbuktiken maka aku sekalak rasul, erkiteken kam nggeluh i bas Tuhan.
3Adi iorati kalak kerna kinirasulenku, bagenda me ningku mbela diringku:
4Ma kin lit hakku ngaloken pangan ras inemen erkiteken dahinku?
5Ma kin lit hakku mbaba sekalak ndehara si nggo Kristen i bas perdalanenku bali ras si ibahan rasul-rasul si deban? Ma bage pe si ibahan Petrus ras senina-senina Tuhan?
6Ntah kin Barnabas ras aku saja ngenca arus ncariken keperlun kami jine?
7Lit kin perajurit si ikut erperang alu biayana jine? Lit kin perjuma si la man buah anggur si isuanna i bas kebun anggurna? Lit kin permakan si la kenan susu asuh-asuhenna?
8Tuhu maka kerina si kuturiken enda umpama-umpama i bas manusia; tapi ma kin bage ka nge si ikataken i bas Undang-undang Musa?
9I bas Undang-undang e lit tersurat, "Ula tutupi babah lembu si sangana ipake ngerik." Iakapndu lembu kin si iperdiateken Dibata?
10Ma kin enda si tuhuna kerna kita nge si ikatakenna e? Tentu si e isuratken guna kita. Kalak si nenggala bage pe kalak si ngerik arus ndahiken dahinna i bas pengarapen ndatken baginna i bas peranin e nari.
11Nggo isuanken kami benih pertendin i bas kegeluhenndu. Mbelinca kin e adi iperani kami barang doni i bas kam nari?
12Adi kalak si deban lit hakna ngarapken si enda i bas kam nari, ma kin beliden pe hak kami? Amin bage gia, hak kami e la ipake kami. Tapi ulin iakap kami nggengken latih erdahin asangken terhalang perdalanen Berita Si Mehuli kerna Kristus e.
13Tentu nggo ietehndu maka kalak si erdahin i bas Rumah Pertoton ngaloken pangan i bas Rumah Pertoton e nari, janah kalak si mpersembahken persembahen tutungen dat bagin i bas persembahen e nari.
14Bage me pe nggo itetapken Tuhan maka kalak si meritaken Berita Si Mehuli ngaloken keperlun geluhna i bas dahinna e nari.
15Tapi sada pe labo kupake hakku enda, janah i bas aku erbahan surat enda pe labo ateku nuntut hakku e. Sabap ulin aku mate asangken bene kai si kumegahken e.
16Si tuhuna labo lit hakku ermegah i bas meritaken Berita Si Mehuli e, sabap terpaksa kap aku. Janah cilaka kal aku adi la kin kuberitaken Berita Si Mehuli e.
17Adi aku jine min ndai milih dahin e, banci nge aku ngarapken upah. Tapi adi dahin meritaken Berita Si Mehuli e sada kearusen man bangku, janah e sada tanggung jawab si iendesken Dibata.
18Kai dage upahku? Upahku me kap: meritaken Berita Si Mehuli alu la ngarapken upah. La kutuntut hakku i bas dahinku meritaken Berita Si Mehuli e.
19Aku bebas nge; aku labo budak ise pe. Tapi kujadiken diringku jadi budak nandangi kerina jelma gelah banci nterem kalak dat aku guna Kristus.
20Nandangi kalak Jahudi bagi kalak Jahudi aku guna ndatken kalak Jahudi. Bagi ia patuh man Undang-undang Musa, aku pe patuh man Undang-undang e, gelah banci ia dat aku, aminna pe aku labo i teruh Undang-undang e.
21Bage me pe nandangi kalak si la lit i bas ia Undang-undang Musa, bagi ia e ka aku, gelah banci ia dat aku. Si enda labo nuduhken maka la aku i teruh Undang-undang Dibata, sabap si tuhuna aku i teruh Undang-undang Kristus.
22Nandangi kalak si merampek kinitekenna, bagi ia e ka aku, gelah kudat ia. Aku nggo jadi bali ras kerina kalak rikutken paksana gelah banci deba-deba ia kuselamatken alu kerina dalan si payo.
23Si enda kerina kubahan guna Berita Si Mehuli, gelah aku pe dat bagin subuk i bas dahin bage pe i bas pasu-pasu Berita Si Mehuli e.
24Tentu ietehndu maka kalak si erlumba kiam i bas sada perlumban, kerina ia kiam, tapi sekalak ngenca si dat hadiah. Emaka empetlah kiam gelah kam menang.
25Kerina kalak si ikut i bas perlumban e arus ia lebe ngikuti latihen si mberat. Si enda idalankenna guna ndatken rudang-rudang tanda kemenangen si ermasap-masap; tapi kita sidalanken e guna ndatken rudang-rudang si tahan seh rasa lalap.
26Eme sabapna maka pinter aku kiam ku garis batas. Janah bali ras sekalak si jago ertinju, la aku nggit ninju angin.
27Kupekpeki badanku seh batu-batun, seh maka kukuasai tuhu-tuhu, gelah ula pagi aku itulak kenca kudilo kalak si deban ku perlumban e.
<< 1 Korintus 9 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel