Alkitab Mobile SABDA
[VER] : [KARO]     [PL]  [PB] 
 <<  1 Raja-raja 15 >> 

Abia raja Juda (2Taw 13:1-14:1)

1Kenca Jerobeam nandangi genep sepulu waluh tahun jadi raja i Israel, Abia jadi raja i Juda,

2janah dekahna ia erkuasa lit telu tahun i Jerusalem. Nandena Maaka, anak Absalom.

3Dosa si ibahanna bali ras dosa si ibahan bapana, janah la bulat ukurna ngikutken TUHAN Dibatana bagi Daud, ninina.

4Tapi erkite-kiteken Daud, ibereken TUHAN Dibatana man Abia sekalak anak dilaki jadi raja i Jerusalem janah ibahanna Jerusalem tetap aman.

5Si enda ibahan TUHAN sabap nggo ibahan Daud kai si ngena AteNa janah la pernah isimbakna PedahNa, seakatan i bas soal Uria kalak Heti e.

6Abia ras Jerobeam tetap si perang-perangen kidekah pemerentahen Abia.

7Janah turi-turin si deban kerna kai si ibahan Abia isuratken i bas kitap Sejarah Raja-raja Juda.

8Jenari mate Abia janah ikuburken i bas Kota Daud; anakna Asa nggantiken ia jadi raja.

Asa raja Juda (2Taw 15:16-16:6)

9Kenca Jerobeam nandangi genep dua puluh tahun jadi raja i Israel, Asa jadi raja i Juda,

10janah dekahna ia erkuasa lit empat pulu sada tahun i Jerusalem. Nini-tudungna eme Maaka, anak Absalom.

11Asa ngelakoken kai si ngena ate TUHAN, bagi si ibahan ninina Daud.

12Ipelawesna i negeri e nari kerina dilaki ras diberu si pendahinna erlua-lua i bas ingan-ingan ersembah kalak perbegu, janah iaguina kerina gana-gana si nggo ibahan raja-raja si leben asa ia.

13Ipindahkenna nini-tudungna Maaka i bas jabaten kemberahen nari, sabap nggo ibahanna sada patung Dewi Asera si mereha man tatapen. Itabah Asa patung e jenari icilukna i berneh Kidron.

14Aminna gia ingan-ingan ersembah kalak perbegu e la kerina icedaken Asa, ia tetap patuh man TUHAN i bas gedang-gedang geluhna.

15Barang-barang si nggo ikhususken bapana man Dibata bage pe barang-barang emas ras pirak si ipersembahkenna kerina itamakenna i bas Rumah Pertoton.

16Raja Asa, raja Juda ras Raja Baasa, raja Israel tetap si perang-perangen kidekah ia erkuasa duana.

17Iserbu Baasa taneh Juda jenari ibenakenna erbahan benteng kota Rama gelah lanai banci kalak bengket ntah pe ndarat i Juda nari.

18Emaka ibuat Raja Asa kerina pirak ras emas si lit denga tading i bas Rumah Pertoton ras i bas istana, jenari itenahkenna arah piga-piga kalak pegawaina ku Damaskus, man Benhadat raja Siria, anak Tabrimon kempu Hesion, rikut ras berita enda:

19"Ertemanlah kita bagi bapa-bapanta nai. Pirak ras emas enda me hadiahku man bandu. Genduari putuskenlah hubungenndu ras Baasa raja Israel gelah terpaksa itarikna tenterana i bas daerahku nari."

20Mehuli iakap Raja Benhadat kerna pemindon Asa enda jenari isuruhna puanglima perangna ras tenterana merangi kota-kota Israel. Italukenna Ijon, Dan, Abel-Bet-Maaka, daerah i deher Dano Galilea, janah kerina daerah Naptali.

21Kenca ibegi Raja Baasa kai si nggo jadi, ingadikenna erbahan benteng Rama jenari lawes ia ku Tirsa.

22Kenca bage ikiremken Raja Asa perentah ku kerina taneh Juda gelah kerina rayat, sada pe la si tading-tading, ngangkati batu ras papan-papan i Rama nari si nggo ipake Baasa man benteng kota e. Alu si enda ibahan Asa benteng kota Mispa ras Geba, kota i daerah Benyamin.

23Turi-turin si deban kerna perbahanen Raja Asa, kerna kinirawanna ras kota-kota si ibahanna bentengna, kerina isuratken i bas kitap Sejarah Raja-raja Juda. Tapi kenca dagingna nggo metua ia lanai ngasup erdalan sabap lit penakit i bas nahena.

24Jenari mate Asa janah ikuburken i bas kuburen raja-raja i bas Kota Daud; anakna Josapat nggantiken ia jadi raja.

Nadap raja Israel

25Nadap anak Raja Jerobeam jadi raja Israel i bas tahun si peduaken pemerentahen Asa raja Juda. Lit dua tahun dekahna Nadap jadi raja.

26Ia pe bali ras bapana, erdosa man TUHAN janah kalak Israel pe ibabaina erdosa.

27Baasa anak Ahia i bas suku Isakar nari erpekat ngelawan Nadap. Ibunuh Baasa ia asum Nadap ras tenterana ngkeleweti kota Gibeton e taneh Pilisti.

28Enda jadi i bas tahun si peteluken pemerentahen Asa raja Juda. Emaka igantiken Baasa si Nadap jadi raja Israel.

29Minter ibunuhina kerina anggota keluarga Jerobeam. Sue ras kai si nggo ikataken TUHAN arah suruh-SuruhenNa Nabi Ahia i Silo nari, maka kerina keluarga Jerobeam ibunuh la lit sada pe pulah.

30Enda jadi erkiteken alu dosa si ibahan Jerobeam keke rawa TUHAN, Dibata bangsa Israel. Bage pe ia me si erbahanca maka Israel erdosa.

31Kerina si debanna si ilakoken Nadap isuratken i bas Sejarah Raja-raja Israel.

32Kidekah Asa, raja Juda ras Baasa, raja Israel erkuasa, lalap ia si perang-perangen.

Baasa raja Israel

33Baasa, anak Ahia, jadi raja Israel i bas tahun si peteluken pemerentahen Asa, raja Juda. Lit dua pulu empat tahun dekahna Baasa ngerajai Israel i Tirsa.

34Ia pe bali ras Raja Jerobeam, erdosa ia man TUHAN janah kalak Israel pe ibabaina erdosa.



 <<  1 Raja-raja 15 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran