Alkitab Mobile SABDA
[VER] : [KARO]     [PL]  [PB] 
 <<  1 Raja-raja 16 >> 

1Emaka ngerana TUHAN man Nabi Jehu, anak Hanani; ItenahkenNa berita enda man Baasa arah ia nina,

2"Mbarenda labo lit kai pe ergandu, tapi nggo Kuangkat kam jadi peminpin bangsangKu Israel. Genduari kam nggo erdosa bali ras Jerobeam, janah nggo ibabaindu bangsangKu erdosa. Dosana erbahan keke rawangKu,

3emaka Kulesapken me kam ras keluargandu, bali ras si nggo Kubahan man Jerobeam.

4Kerina keluargandu si mate i bas kota, ipan biang janah si mate i mbalmbal ipan kuliki."

5Kerina si debanna si ilakoken Baasa ras kerina perbahanenna si nuduhken kinimbisanna isuratken i bas Sejarah Raja-raja Israel.

6Mate Baasa, janah ikuburken i Tirsa; emaka Ela, anakna jadi raja nggantiken ia.

7Berita pernembeh ate TUHAN man Baasa ras keluargana e ipeseh Nabi Jehu, sabap melala ibahan Baasa dosana man TUHAN. Ipekekena rawa TUHAN, labo saja erkiteken kejahaten si ibahanna, si bali ras kejahaten Raja Jerobeam, tapi pe erkiteken ibunuhna keluarga Jerobeam.

Ela raja Israel

8Ela anak Baasa jadi raja Israel i bas tahun si pedua pulu enemken pemerentahen Asa raja Juda. Lit dua tahun dekahna Ela ngerajai Israel i Tirsa nari.

9Simri pegawai Ela jadi puanglima setengah gereta perang raja, erpekat ngelawan ia. I bas sada wari i Tirsa, Ela mabuk i rumah Arsa; ia me si ertugas ngurus istana raja.

10Ibengketi Simri rumah e ibunuhna Ela, jenari igantikenna ia jadi raja. Si enda jadi i bas tahun si pedua pulu pituken pemerentahen Asa raja Juda.

11Kenca Simri jadi raja, minter ibunuhina kerina keluarga Baasa. Kerina kade-kade ras teman-temanna si dilaki pe ibunuh.

12Dage sue ras si nggo ikataken TUHAN arah Nabi Jehu kerna Baasa, ibunuh Simri kerina keluarga Baasa.

13Erkiteken isembahna berhala ibabaina Israel erdosa, Baasa ras Ela pekeke rawa TUHAN, Dibata bangsa Israel.

14Kerina si debanna si ilakoken Ela isuratken i bas Sejarah Raja-raja Israel.

Simri raja Israel

15Simri jadi raja Israel i Tirsa pitu wari dekahna i bas tahun si pedua pulu pituken pemerentahen Asa raja Juda. Tentera kalak Israel sangana ngkepung kota Gibeton i taneh Pilisti.

16Kenca ibegi tentera Israel maka Simri nggo erpekat ngelawan raja janah nggo ibunuhna pe raja e, minter imomoken tentera e pengangkaten puanglimana Omri, jadi raja Israel.

17Lawes Omri ras tenterana i Gibeton nari, jenari ikepungna kota Tirsa.

18Kenca idah Simri kota e nggo irebut musuh, lawes ia ku bas benteng si arah basna kal i bas istana, icilukna istana e, janah ia jine mate ipan api e.

19Si enda jadi erkiteken dosa-dosana man TUHAN. Bali ras Jerobeam si jadi raja ope denga ia, Simri pe nembeh ate TUHAN erkiteken dosa-dosana ibabaina Israel erdosa.

20Kerina si debanna si ilakoken Simri bage pe turi-turin kerna penghianatenna, isuratken i bas Sejarah Raja-raja Israel.

Omri raja Israel

21Kenca bage bangsa Israel erbelah-belah. Deba atena ngangkat Tipni anak Ginat jadi raja, deba nari Omri atena jadi raja.

22Dungna menang kalak si erpihak man Omri, mate Tipni, emaka Omri jadi raja.

23Dage kenca telu pulu sada tahun Asa jadi raja Juda, Omri jadi raja i Israel. Dekahna ia jadi raja lit sepulu dua tahun; i bas si e enem tahun ia merentah i Tirsa nari.

24Kenca bage itukurna uruk Samaria i bas Semer nari enem ribu duit pirak. Ipajekken Omri benteng uruk e, jenari ipantekina sada kuta i je, janah ibahanna gelar kota e Samaria, rikutken gelar empu uruk e ndube, eme Semer.

25Omri erdosa man TUHAN lebih asangken kerina si nggo leben jadi raja asa ia.

26Bali ras Jerobeam ipekekena rawa TUHAN, Dibata Israel, alu dosa-dosana dingen mabai bangsa e erdosa ras ersembah man berhala-berhala.

27Kerina si debanna si ibahan Omri ras kerina kinimbisanna isuratken i bas kitap Sejarah Raja-raja Israel.

28Mate Omri, jenari ikuburken i Samaria, janah anakna Ahap nggantiken ia jadi raja.

Ahap raja Israel

29Kenca Raja Asa menam genep telu pulu waluh tahun jadi raja Juda, Ahap anak Omri jadi raja Israel. Ia jadi raja Israel i Samaria dua pulu dua tahun dekahna.

30Erdosa ia man TUHAN lebih asa kerina raja-raja si leben asa ia.

31La iakapna cukup dosana bagi dosa Raja Jerobeam saja, emaka iempoina Isebel, anak Raja Etbaal i Sidon nari, jenari isembahna Baal.

32Ipajekkenna rumah sembah-sembahen man Baal i Samaria, ibahanna batar-batar, jenari itamakenna ku bas rumah sembah-sembahen e.

33Ibahanna pe patung Dewi Asera. Tuhu buen perbahanenna si erbahanca nembeh ate TUHAN, Dibata Israel asangken kerina raja-raja Israel si leben asa ia.

34I bas masa pemerentahenna, Hiel anak kota Betel majekken Jeriho ka mulihken. Sue ras si nggo leben ikataken TUHAN arah Josua anak Nun, Hiel kebenen kesah anakna sintua Abiram asum ipajekkenna palas kota Jeriho, janah kebenen kesah anakna singuda Segup asum ipajekkenna pintu gerbang kota e.



 <<  1 Raja-raja 16 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran