Alkitab Mobile SABDA
[VER] : [KARO]     [PL]  [PB] 
 <<  1 Raja-raja 18 >> 

Nabi Elia njumpai Raja Ahap

1Kenca piga-piga paksa, kelegon e menam telu tahun dekahna nina TUHAN man Elia, "To cidahken bandu man Raja Ahap, maka Kupesusur udan."

2Emaka berkat Elia. Paksa si e kelihen i Samaria nggo seh kal sangatna,

3emaka idilo Ahap si Obaja. (Obaja kalak si ertugas ngurus istana. Ia kalak tutus nembah man TUHAN.

4Asum Isebel munuhi nabi-nabi TUHAN, idilo Obaja seratus kalak, jenari ibunikenna i bas gua-gua, lima puluh kalak sada inganen. Ia si nikapken pangan ras inemen man kalak e.)

5Nina Ahap man Obaja, "Ota, sinehen kerina sumbul ras baluren i bas negeri e ntah banci dat kita gagaten si cukup guna kerina kuda ras kaldenta. Adi cukuplah gagatenna tentu la perlu si bunuh deba asuh-asuhennta."

6Ibagina perdalanna, ku daerah si man siarenna jenari berkat sekalak-sekalak kempak baginna.

7Sangana Obaja niari baginna, rempet ia jumpa ras Elia. Itandaina Elia, emaka mungkuk ia i lebe-lebena janahna nungkun, "Ma kam nge e bapa?" nina.

8"Payo aku ngenda. To kataken man tuanndu raja, maka aku sangana i jenda," nina Elia.

9Ngaloi Obaja, "Kai kin salahku maka itamakenndu aku ku bas tan raja? Ugapa pe ibunuh Raja Ahap aku.

10Ersumpah aku i bas gelar TUHAN, Dibatandu, maka tuhu nggo idarami raja kam i bas kerina negeri i doni enda. Adi lit sekalak raja ngatakenca maka kam la i negeri e, emaka isuruhna ia ersumpah tandana tuhu-tuhu kam la i je.

11Genduari lawes atendu aku ngata man raja maka kam sangana i jenda?

12Uga kari jadina adi aku lawes minter kam ibabaken Kesah TUHAN ku ingan si la kueteh? Janah kenca kukataken man Ahap maka kam i jenda, tapi la kam idapetina i jenda, ugapa pe ibunuhna aku. Ingetlah maka kitik-kitikku nari aku kalak tutus nembah man TUHAN.

13Ma nggo kin ibegindu maka tupung Isebel munuhi nabi-nabi TUHAN, kubuniken seratus kalak i bas dua gua, lima puluh kalak sada inganen, janah aku mereken pangan ras inemen man kalak e?

14Dage kuga maka isuruhndu aku ngata man raja maka kam sangana i jenda? Ibunuhna aku kari!"

15Nina Elia erjabap, "I bas gelar TUHAN si Mada Kuasa si kusembah, erpadan aku maka kujumpai sendah raja."

16Emaka lawes Obaja ngadap Raja Ahap, iturikenna man bana, emaka berkat minter Ahap njumpai Elia.

17Kenca idah Ahap si Elia nina man bana, "Kam nge, o si ngguluti Israel?"

18"Labo aku si ngguluti e," nina Elia ngaloi. "Tapi kam nge, kam ras bapandu. Sabap ilanggarndu perentah TUHAN janah isembahndu dibata-dibata Baal.

19Genduari perentahkenlah man kerina bangsa Israel njumpai aku i Deleng Karmel. Baba pe nabi-nabi Baal si empat ratus lima puluh e ras nabi-nabi Dewi Asera si empat ratus kalak e, si ibere-bere man Isebel."

Elia ngelawan nabi-nabi Baal i Deleng Karmel

20Emaka iperentahken Raja Ahap maka pulung kerina kalak Israel ras nabi-nabi Baal i Deleng Karmel.

21Tedis Elia i lebe-lebe kalak ndai nina, "Asa kai nari dekahna maka banci ipetetapndu ukurndu? Adi TUHAN kin Dibata, sembahlah Ia; tapi adi Baal kin Dibata, sembahlah ia!" Tapi sengkebabah pe la lit kalak ndai ngaloi.

22Kenca bage nina Elia, "Aku nari ngenca sisada nabi TUHAN si tading, tapi nabi Baal lit 450 kalak.

23Genduari buatlah dua jenggi lembu, bereken ipilih nabi-nabi Baal sada, maka igelehna janah ilapahina, jenari itamakenna i babo ranting, tapi ula pegara apina. Aku pe bage ka kubahan nandangi jenggi lembu si sada nari.

24Kenca bage bere maka nabi-nabi Baal e ertoto man dibatana, janah aku ertoto man TUHAN. Apai kari si ngaloi pertoton e alu pesusur api, Ia kap Dibata." "Cocok!" nina kalak ndai kerina ngaloi.

25Jenari nina Elia man nabi-nabi Baal. "Erkiteken nterem kal kam, emaka kam lebe muat jenggi lembu ras nikapkenca. Ertotolah kam man dibatandu, tapi ula pegara api i bas ranting e."

26Ibuat kalak ndai jenggi lembu si iendesken man bana, emaka isikapkenna, jenari ertoto ia man Baal, mulai erpagi-pagi nari seh ciger. Erlebuh kalak ndai! "Aloi kami, o Baal!" nina. Landek-landek ia ngkeleweti batar-batar si nibahanna, tapi sora kai pe la lit terbegi.

27Kenca wari nggo pantek ciger mulai me iuru-uru Elia kalak e nina, "Tergangen ban sorandu! Ma dibata kin ia? Banci jadi sangana ia lolah, ntah sangana kuduru, ntah sangana ia i bas perdalanen si ndauh! Banci ka pe sangana tunduh, emaka terpaksa ingetindu ia!"

28Reh gangna ibahan kalak ndai sorana, janah igarisina dagingna alu rawit bagi acara agamana, seh maleren darehna.

29Kalak ndai terus-terusen erlebuh-lebuh dingen serko-serko seh kira-kira pukul telu karaben. Tapi la lit si ngaloi, la lit sora kai pe terbegi.

30Kenca bage nina Elia man jelma si nterem, "Mari terdeheren ku jenda." Emaka pulung kalak ndai ngkeleweti Elia. Ipesikapna batar-batar TUHAN si nggo iruntuhken mbarenda.

31Ibuatna sepulu dua batu, sada guna tiap suku si sepulu dua, si igelari rikutken gelar anak-anak Jakup, si kedungenna isambari TUHAN gelarna jadi Israel.

32Alu batu e Elia majekken batar-batar e mulihken, man ingan persembahen man TUHAN. Ikalina parik sekelewet batar-batar e; parik e banci i isi lau kira-kira sepulu empat liter.

33Kenca bage iamparkenna ranting i babo batar-batar e, ilapahina jenggi lembu ndai, jenari icibalkenna i babo ranting. Nina Elia, "Demi empat guci lau, jenari curcuri persembahen ras ranting alu lau e." Ilakoken kalak ndai bage,

34jenari nina, "Bahan sekali nari bage." Ilakoken kalak ndai bage, emaka nina ka, "Bahan sekali nari kal bage." Ilakoken kalak ndai bage petelu kaliken.

35Maler lau ndai ku sekelewet batar-batar e, piah dem ibahanna parik ndai.

36Kenca seh paksana erbahan persembahen si karaben, ideheri Nabi Elia batar-batar e, jenari ertoto ia, "O TUHAN, Dibata Abraham, Isak, ras Jakup; cidahkenlah genduari maka Kam kap Dibata Israel, janah aku kap suruh-SuruhenNdu. Pebetehkenlah maka kerina kubahan e arah PerentahNdu.

37Aloi aku, TUHAN, aloilah, gelah ieteh bangsa enda maka Kam TUHAN Dibata kap, maka Kam nge si mabai bangsa enda mulihken man BaNdu."

38Emaka ipesusur TUHAN api; meseng ibahanna persembahen, ras ranting ndai, bage pe kerina batu ras taneh, janah lau si lit i bas parik ndai pe kerah.

39Asum idah kalak ndai kejadin e, langkem ia minter kerina i babo taneh, janah nina, "TUHAN kap Dibata; TUHAN ngenca Dibata si man sembahen!"

40Iperentahken Elia man kalak ndai nina, "Tangkap kerina nabi-nabi Baal, sekalak pe ula pulah!" Kenca itangkap kerina nabi-nabi e ibaba Elia ku Lau Kison, i je ibunuhna.

Ngadi musim perlego

41Kenca bage nina Elia man Raja Ahap, "To manlah kam genduari. Sabap kubegi sora udan reh erdeso."

42Sanga Ahap lawes man, Elia nangkih ku das Deleng Karmel. I je mungkuk Elia ku taneh, takalna seh ku kelang-kelang tiwenna.

43Nina Elia man suruh-suruhenna, "To ku das kam tatap kempak lawit." Mulihken suruh-suruhen ndai nina, "Kai pe la lit kuidah." Pitu kali ia isuruh Elia ku das janah natap kempak lawit.

44Asum ia reh pepitu kaliken nina, "Kuidah embun si kitik asa tapak-tapak tan e belinna nangkih i lawit nari." Emaka iperentahken Elia man suruh-suruhenna, "To dahi Raja Ahap, suruh inangkihina geretana gelah mulih ku rumah maka ula tertahan ia iban udan e."

45La ndekahsa nari, langit nggo gelap ibahan embun mbiring, janah angin mulai rembus. Emaka nusur udan meder. Inangkihi Ahap geretana, mulih ia ku Jisreel.

46Gegeh TUHAN reh mengketi Elia, ipekeskesina gendit jubahna, emaka kiam ia arah lebe Ahap terus ku Jisreel.



 <<  1 Raja-raja 18 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran