Raja Salomo ersikap majekken Rumah Pertoton (2Taw 2:1-18)
1Raja Hiram i Tirus nari gelgel nari erteman ras Daud, janah kenca ibegina maka Salomo nggo nggantiken bapana Daud jadi raja, isuruhna piga-piga kalak utusenna ndahisa.
2Ipeseh Salomo mulihken berita man Hiram nina,
3"Ietehndu maka erkite-kiteken bapangku Daud la erngadi-ngadi erperang ngelawan negeri-negeri musuh i sekelewetna, la ia ngasup majekken rumah pertoton man ingan ersembah man TUHAN Dibatana. Kedungenna nggo ibereken TUHAN kemenangen man bana naluken kerina musuh-musuhna e.
4Genduari nggo ibereken TUHAN Dibatangku man bangku keamanen i bas kerina baleng kerajanku. Lanai lit musuhku, janah la lit bahaya.
5TUHAN nggo erjanji ras bapangku Daud: 'Anakndu, si Kuangkat jadi raja kenca kam, ia pagi si majekken Rumah Pertoton man bangKu.' Janah genduari nggo kutetapken majekken Rumah Pertoton e man ingan ersembah man TUHAN Dibatangku.
6Emaka suruhlah kalak ku Deleng Libanon nabah kayu pinus si merim man bangku. Suruh-suruhenku ras suruh-suruhenndu ras erdahin, jenari kugalari man suruh-suruhenndu e kai si ipindondu. Sabap itehndu jine, maka i bas kami la lit sada pe si beluh nabah kayu bagi kalak Sidon."
7Lanai kal langlang riahna ukur Hiram kenca ialokenna tenah Salomo janah nina, "Pujilah sendah TUHAN sabap IberekenNa man Daud sekalak anak si pentar nggantiken ia jadi raja i bas negeri si mbelin e!"
8Kenca bage ipeseh Hiram man Salomo berita si arah teruh enda, "Nggo kualoken berita i bas kam nari janah nggo sikap aku genduari erbahan kai si ipindondu. Banci kusediaken kayu pinus si merim ras kayu pinus si biasa.
9Suruh-suruhenku banci maba balok e ngincuah i Libanon nari ku lawit, kenca bage irakutina jadi rakit gelah iombakken ngikuti tepi lawit ku bas ingan si itentukenndu. Kenca seh i je iosari suruh-suruhenku ka mulihken, jenari suruh-suruhenndu si ngurussa. Mindo aku gelah isediakenndu nakan man suruh-suruhenku."
10Bage me ibereken Hiram man Salomo kerina balok-balok kayu pinus si merim ras kayu pinus biasa si iperlukenna.
11Janah ibereken Salomo man Hiram dua ribu ton gandum ras empat ratus ribu liter minak saitun murni tiap tahun man keperlun suruh-suruhenna.
12TUHAN nepati PadanNa, iberekenna man Salomo kepentaren. I bas Hiram ras Salomo lit perdamen, janah ibahanna perpadanen sapih-sapih ia duana.
13Itugasken Raja Salomo 30.000 kalak kerja paksa i bas kerina taneh Israel nari,
14janah itamakenna Adoniram ngaturkenca. Kalak si erdahin e ibagina jadi telu terpuk, 10.000 kalak tiap terpuk, janah tiap terpuk erdahin sada bulan i Libanon janah dua bulan mulih ku rumahna.
15Lit ka pe i bas Salomo 80.000 kalak si erdahin muat batu i deleng, ras 70.000 kalak si naruhisa,
16janah itugaskenna 3.300 kalak mandur ngawasisa guna ngaturken pendahinna.
17Sue ras perentah Raja Salomo ibuatna batu galang si mejile man palas Rumah Pertoton.
18Tukang-tukang Salomo ras tukang-tukang Hiram bage pe kalak i bas kota Biblos nari nikapken batu ras papan guna majekken Rumah Pertoton e.
<< 1 Raja-raja 5 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel