Alkitab Mobile SABDA
[VER] : [KARO]     [PL]  [PB] 
 <<  1 Tawarikh 28 >> 

Perentah Daud guna pembangunen Rumah Pertoton

1Iperentahken Daud pulung kerina pegawai Israel i Jerusalem. Bage pe pegawai tep-tep suku, pegawai si ngurus dahin kerajan, peminpin terpuk, pengawas erta-erta ras asuh-asuhen raja ras anak-anakna, kerina pegawai kerajan, puanglima meliter, dingen kalak si penting -- pulung kerina i Jerusalem.

2Tedis Daud i lebe-lebe bangsa e jenari ngerana man bangsa e nina, "Begikenlah aku o bangsangku. Ateku mbangun rumah tembok man ingan Peti Perpadanen, ingan ndeher man TUHAN Dibatanta. Nggo kubahan persikapen guna mbangun rumah pertoton mpermuliaken Ia,

3tapi IlarangNa aku mbangunsa, sabap aku sekalak tentera dingen melala ngamburken dareh.

4TUHAN Dibata nu Israel milih aku ras kesusurenku jadi raja Israel seh asa lalap. IpilihNa Juda ngelitken peminpin dingen i bas Juda nari ipilihna keluarga bapangku. I bas kerina keluarga e nggo meriah UkurNa milih aku jenari njadiken aku raja man kerina bangsa Israel.

5IberekenNa man bangku nterem anak dilaki dingen i bas anak-anakku si nterem e nari IpilihNa Salomo jadi raja man kerina bangsa Israel, kerajan Dibata e.

6Nina TUHAN man bangku, 'Anakndu si Salomo kap kalakna si mbangun Rumah PertotonKu. Nggo Kupilih ia jadi anakKu janah Aku jadi bapana.

7Kubahan tetap kerajanna adi iteruskenna ngikutken alu metenget kerina undang-undangKu, ras perentah-perentahKu bagi si genduari e.'

8Emaka genduari o rayatku, i adep-adepen Dibatanta dingen i lebe-lebe kerina bangsa Israel bangsa TUHAN enda, kukataken man bandu kerina: Tutuslah atendu ngikutken kerina si nggo iperentah TUHAN Dibatanta man bangsa, maka banci tetap kam empuna negeri si mejile enda janah banci itadingkenndu e man kesusurenndu rasa lalap."

9Jenari nina man anakna Salomo, "O anakku, kukataken man bandu, tandailah Dibata bapandu dingen erdahinlah guna Ia alu bulat ukurndu janah tutus atendu. Itandai Dibata kerina perukuren ras sura-suranta. Adi idahindu Ia, IjumpaiNa kam. Ia si mbebasken kam rasa lalap.

10Arus ingetndu maka TUHAN nggo milih kam guna mbangun Rumah Pertoton si badia e. Genduari bangun dage Rumah Pertoton e -- dingen bangunlah e tuhu-tuhu."

11Ibereken Daud man Salomo rencana guna kerina bangunen Rumah Pertoton e, guna mbangun gudang-gudang ras kerina ruangen-ruangen si debanna, bage pe guna mbangun Kamar si Badiana kal, eme ingan pengalemi dosa.

12Iberekenna ka pe rencana kerina si iukurkenna guna mbangun kesain Rumah Pertoton ras kamar-kamar i sekelewetna bage pe guna mbangun gudang-gudang ingan perkekas Rumah Pertoton ras persembahen-persembahen si iendesken man TUHAN.

13Ibereken Daud ka pe rencana organisasi imam ras kalak Lewi guna ndahiken tugas-tugasna, ndahiken dahin i bas Rumah Pertoton ras ngurus kerina perkekasna.

14Iberekenna pirak ras emas asa cukupna guna ipake erbahan perkekas-perkekas e,

15guna erbahan kerina lampu ras nahe lampu,

16guna meja pirak ras meja emas ingan ngamparken roti si man persembahenken man Dibata.

17Ibereken Daud ka pe pelajaren asa kai buena emas tulen ipake guna erbahan garpu-garpu, guna erbahan mangkuk-mangkuk ras guna erbahan guci-guci, asa kai buena pirak ras emas guna erbahan piring-piring,

18dingen asa kai buena emas tulen ipake erbahan batar-batar ingan nutung simerim-merim ras asa kai buena emas murni ipake guna erbahan gereta ingan mahluk si erkabeng ngkimbangken kabengna i babo Peti Perpadanen TUHAN.

19Nina Raja Daud, "Kerina enda tersurat i bas tulisen rikutken perentah-perentah si ibereken TUHAN jine man bangku gelah kubahan."

20Nina Raja Daud man anakna Salomo, "Tetapkenlah ukurndu tutuslah. Menakenlah erdahin janah ula bere kai pe ngambati kam. TUHAN Dibata si kusembah Ia lah ras kam. La kam ItadingkenNa, tapi tetap tading ras kam seh kam dung ndahiken Rumah PertotonNa.

21Imam-imam enda ras kalak Lewi enda nggo itetapken ndahiken tugas i bas Rumah Pertoton. Kalak si erdahin alu erbage-bage kebeluhen merincuh nampati kam, janah kerina rayat ras peminpin-peminpin lit i teruh perentahndu."



 <<  1 Tawarikh 28 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel