1Sabap ieteh kami maka adi kemah si jadi rumahta i doni enda kulanta enda itangtangi, lit kap rumahta i Surga, si tahan rasa lalap, la bekas tan manusia, tapi bekas Dibata erbahan.
2Kidekah kita ringan i bas kemah enda, kelsehen kita, sabap metedeh kal ateta make rumahta si asalna i Surga nari e i babo kemahta si genduari e.
3Alu make rumah e, la kap kita ketunduken manjang-anjang.
4Kidekah kita ringan i bas kemah si i doni enda, kelsehen kita erdandanken bage beratna babanta. Labo perban ateta nangtangi si male e, tapi sura-suranta eme makeken si mbaru i babona, gelah si ermasap-masap e itelen kegeluhen.
5Dibata nge si nikapken kita guna si e, janah selaku jaminenna, Dibata nggo mereken KesahNa man banta.
6Emaka tetap kami pang ngalaken kematen. Ieteh kami maka kidekah kami i bas rumah enda, eme kula enda, kami langa serumahen ras Tuhan. --
7Sabap kami nggeluh erpalasken kiniteken, labo erpalasken kai si teridah. --
8Sitik kal pe labo kami mbiar, janah pangen kal kami nadingken kula enda gelah banci kami serumahen ras Tuhan.
9Tapi lebih asa si e, perayaken kami eme kap ndarami uga maka ngena AteNa, subuk i bas rumah kami si i jenda tah pe i jah.
10Sabap kerina kita la banci lang ngadap ku lebe-lebe Kristus guna IadiliNa, gelah sekalak-sekalak ngaloken kai si patut ialokenna rikutken kai si nggo ibahanna arah kulana paksa ia nggeluh, subuk perbahanen si mehuli ntah si jahat.
Erdame ras Dibata arah Kristus
11Ieteh kami kai ertina erkemalangen man Tuhan, emaka iusahaken kami alu meseksek gelah kalak tek. Perukuren kami tangkas kap man Dibata, janah ngarap pe aku maka pusuh peratenndu nggo tangkas nandai perukurenku.
12Labo ate kami mujiken diri kami ka i lebe-lebendu. Saja ngenca isehken kami man bandu alasen si mehuli gelah megah iakapndu kerna kami, gelah lit i bas kam bekal guna ngelawan kalak si megah iakapna kerna kai si teridah saja, tapi la ia ngenehen ku bas pusuh.
13Adi tuhu kin kami adon, guna Dibata kap e. Janah adi jore ukur kami, man gunandu kap e.
14Erkiteken keleng ate Kristus ngkuasai kami nge maka nggo kami seh ku bas sada pengertin, eme: sekalak Manusia nggo mate guna kerina manusia. Enda ertina maka kerina manusia e nggo mate.
15Ia mate guna kerina manusia, gelah kalak si nggeluh lanai nggeluh erbana-bana, tapi guna Ia si nggo mate dingen si nggo ipekeke Dibata i bas si mate nari.
16Dage genduari pengerganta nandangi sekalak manusia lanai bo rikutken pertimbangen manusia. Aminna gia nai pengerganta nandangi Kristus e rikutken pertimbangen manusia, tapi genduari lanai bage sibahan.
17Adi kalak ersada ras Kristus, ia me tinepa si mbaru, si male nggo lepas janah nehenlah, si mbaru nggo reh.
18Kerina si enda Dibata erbahanca, maka arah Kristus, kita si gelgel nari ermusuhen ras Ia, nggo IbahanNa jadi TemanNa. Janah man kami IberekenNa dahin guna njadiken MusuhNa jadi TemanNa.
19Alu kata si deban: Dibata nggo nai reh i bas Kristus; nggo IjadikenNa manusia jadi teman Dibata. Dibata la mperkiraken kelepaken manusia. Janah man kami nggo IendeskenNa Berita perdamen e.
20Dage kami enda me utusen-utusen Kristus, bali ras Dibata jine si mindo man bandu arah kami. I bas gelar Kristus ipindo kami alu mesangat man bandu: bere min maka kam si gelgel nari ermusuhen ras Dibata banci ibahan Dibata jadi TemanNa!
21Aminna pe Kristus la erdosa, nggo ibahan Dibata maka Ia si mersan dosa-dosanta, gelah i bas persadan ras Kristus kita irembakken mulihken ras Dibata.
<< 2 Korintus 5 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel